ܩܝܢܬܐ ܕ

ܦܬܓܡܐ:

ܡܳܪܝܳܐ ܐܰܡܠܶܟ ܘܓܰܐܝܽܘܬܳܐ ܠܒܶܫ: ܠܒܶܫ ܡܳܪܝܳܐ ܥܽܘܫܢܳܐ ܘܶܐܬܥܰܫܰܢ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗܿ ܠܥܺܕ݈ܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗܿ ܫܰܝܢܳܐ ܘܢܰܛܰܪ ܝܰܠ̈ܕܝܶܗܿ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝ̈ܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܐܶܡܪܳܐ ܕܰܢܚܶܬ̣ ܡܶܢ ܪܰܘܡܳܐ: ܥܰܠ ܩܰܝܣܳܐ ܐܶܬܬܠܺܝ: ܬܰܘܪܳܐ ܕܰܢܟ̣ܰܣܘ̱ ܝܽܘܕܳܝ̈ܶܐ: ܗܳܐ ܣܺܝܡ ܥܰܠ ܡܰܕܒܚܳܐ: ܬܰܘ ܥܽܘܠܘ̱ ܥܰܡ̈ܡܶܐ: ܕܰܢܦܰܩ ܠܶܗ ܥܰܡܳܐ: ܩܽܘܡܝ̱ ܠܶܟ̣ܝ̱ ܥܺܕ̱ܬܳܐ: ܕܢܶܦܠܰܬ݀ ܠܳܗ̇ ܨܶܗܝܽܘܢ: ܗܳܐ ܡܰܬ̣ܩܰܢ ܒܶܟ̣ܝ̱ ܦܳܬ̣ܽܘܪܳܐ: ܘܠܰܚܡܳܐ ܕܚܰܝ̈ܶܐ ܥܠܰܘܗܝ: ܘܰܡܙܺܝܓ̣ܳܐ ܒܶܟ̣ܝ̱ ܐܰܓܳܢܳܐ: ܡܶܢ ܕܰܦܢܶܗ ܕܡܳܪܝܳܐ ܗ̄ܘܗ̄܀

ܐ̱ܚܪܢܐ ܒܬܪ ܐܘܢܓܠܝܘܢ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ

ܒܰܩܝܳܡܬܶܗ ܕܒܰܪ ܐܰܠܳܗܳܐ: ܐܶܬܚܰܕ̈ܰܬܝ ܟܽܠ ܒܶܪ̈ܝܳܬܳܐ: ܕܰܩܛܰܠ ܠܡܰܘܬܳܐ ܘܣܳܛܳܢܳܐ: ܘܶܐܬܥܰܠܺܝ ܠܝܰܡܺܝܢ ܐܰܒܽܘܗܝ: ܘܶܐܬ̣ܬܪܺܝܡ ܪܺܝܫܳܐ ܕܬܰܠ̈ܡܺܝܕܶܐ: ܕܡܶܢ ܕܶܚܠܰܬܗܽܘܢ ܥܪܰܩܘ ܡܶܢ ܨܳܠܽܘ̈ܒܶܐ: ܘܢܶܫ̈ܶܐ ܣܰܒܰܪ̈ܝ ܢܽܘܚܳܡܶܗ: ܡܰܠܰܐܟ̈ܶܐ ܝܰܩܰܪܘ ܩܰܒܪܶܗ: ܒܰܐܪ݉ܒܰܥ ܦܶܢ̈ܝܳܬܳܐ: ܣܒܰܪܬܶܗ ܒܟܽܠ ܕܽܘܟ ܐܶܬܟܰܪܙܰܬ: ܕܗܰܘ ܕܙܰܩܦܶܗ ܥܰܡܳܐ ܠܺܝܛܳܐ: ܩܳܡ ܠܶܗ ܒܫܽܘܒܚܳܐ: ܘܚܰܕܺܝ ܠܰܐܪܥܳܐ ܘܠܰܫܡܰܝܳܐ܀

ܠܘܛܢܝܐ ܒܩ̄: ܝܒ:ܝܒ ܐܳܘ ܚܰܟܺܝܡܳܐ

ܥܰܠ ܒܰܪ ܚܺܐܪ̈ܶܐ ܫܪܳܐ ܒܶܝܬ ܡܺܝ̈ܬܶܐ ܘܫܰܓ̣ܫܳܗ̇ ܠܰܫܝܽܘܠ: ܘܰܐܝܠܶܠ ܡܰܘܬܳܐ ܘܙܳܥ ܐܰܒܕܳܢܳܐ ܘܰܪܥܶܠܘ̱ ܩܰܒܪ̈ܶܐ܀

ܢܗܰܪ ܐܰܘܳܢܳܐ ܗܰܘ ܕܰܫܟܺܝ̈ܒܶܐ ܕܢܽܘܗܪܳܐ ܥܰܠ ܠܶܗ: ܘܶܐܬܦܰܨܚܰܬ݀ ܗܘܳܬ݀ ܡܰܫܪܺܝܬ̣ ܕܰܡ̈ܟܶܐ ܕܥܺܝܪܳܐ ܢܚܶܬ ܠܳܗ̇܀

ܪܗܶܛ ܚܰܢܳܢܳܐ ܘܕܰܩܪܶܗ ܠܳܐܕܳܡ ܐܰܝܟ ܕܰܢܥܺܝܪܺܝܘܗܝ: ܘܝܰܗܒ ܠܶܗ ܣܰܒܪܳܐ ܕܰܥܒܰܪ ܐܶܒܠܶܗ ܕܰܒܦܰܪܕܰܝܣܳܐ܀

ܩܽܘܡ ܠܳܟ ܕܰܡܟܳܐ ܕܡܺܝܬ ܒܰܚܛܳܗܰܘ̈ܗܝ ܕܪ̈ܰܚܡܶܐ ܣܰܥܪܽܘܟ: ܗܳܐ ܢܽܘܚܳܡܳܐ ܡܳܪܳܟ ܘܰܒܪܳܟ ܐܳܦ ܐܰܠܳܗܳܟ܀

ܚܘܬܡܐ ܒܩ̄: ܗܳܐ ܩܛܺܝܠ ܗ̱ܘ ܒܡܶܨܪܶܝܢ

ܐܳܘ ܕܰܗܘܳܐ ܒܩܰܒܪܳܐ ܝܰܘ̈ܡܶܐ ܬܠܳܬ̣ܳܐ: ܘܰܐܩܺܝܡ ܠܰܩܒܺܝܪ̈ܶܐ ܒܫܽܘܒܚܳܐ ܪܰܒܳܐ: ܐܰܫܘܳܢ ܠܰܓ̣ܢܽܘܢܳܟ ܡܳܐ ܕܳܐܬ̣ܶܐ ܐܰܢ̱ܬ: ܘܢܶܙܡܰܪ ܠܳܟ ܫܽܘܒܚܳܐ ܥܰܡ ܩܰܕܺܝ̈ܫܰܝܟ܀

ܐ̱ܚܪܢܐ ܚܘܬܡܐ ܒܩ̄: ܛܽܘܒܰܝܟܝ ܐܳܦܪܰܬ

ܒܗܳܢܳܐ ܝܰܘܡܳܐ ܒܓܰܢܬܶܗ ܕܝܰܘܣܶܦ: ܚܙܳܬܶܗ ܡܰܪܝܰܡ ܠܺܝܚܺܝܕܳܝܳܗ̇: ܘܩܶܪܒܰܬ ܨܶܐܕܰܘܗ̱ܝ ܘܰܡܫܰܐܠܳܐ ܠܶܗ: ܒܚܰܫܳܐ ܪܰܒܳܐ ܪܰܥܽܘܡܳܐܺܝܬ: ܕܳܐܘ ܓܰܢܳܢܳܐ ܗܰܒܠܺܝ ܠܰܪܚܽܘܡܝ: ܗܰܘ ܦܺܐܪܳܐ ܕܰܒܓܰܢܬܳܟ ܣܺܝܡ ܗܘܳܐ: ܙܶܠܝ ܠܶܟܝ ܡܰܪܝܰܡ: ܣܰܒܰܪܝ ܠܰܫܠܺܝ̈ܚܶܐ: ܕܩܳܡܶܬ ܡܶܢ ܩܰܒܪܳܐ܀