ܩܝܢܬܐ ܗ

ܦܬܓܡܐ:

ܚܰܘܺܝ ܡܳܪܝܳܐ ܦܽܘܪܩܳܢܶܗ:ܘܰܠܥܺܝܢ ܥܰܡ̱̈ܡܶܐ ܓܠܳܐ ܙܰܕܺܝܩܽܘܬܶܗ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗܿ ܠܥܺܕ݈ܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗܿ ܫܰܝܢܳܐ ܘܢܰܛܰܪ ܝܰܠ̈ܕܝܶܗܿ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝ̈ܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ

ܒܝܽܘܡ ܚܰܕ ܒܫܰܒܳܐ: ܕܢܰܚ ܢܽܘܗܪܳܐ ܥܰܠ ܒܶܪ̈ܝܳܬ̣ܳܐ: ܘܰܡܫܺܝܚܳܐ ܒܶܗ ܐܶܬ̣ܢܰܚܰܡ: ܘܰܫܪܳܐ ܫܽܘܠܛܳܢ ܚܶܫܽܘܟ̣ܳܐ: ܘܰܐܢܗܰܪ ܠܰܐܪܒܰܥ ܦܶܢ̈ܝܳܬ̣ܳܐ: ܒܰܣܒܰܪܬ̣ܳܐ ܕܟܳܪܽܘܙܽܘܬ̣ܶܗ: ܫܽܘܒܚܳܐ ܠܶܗ ܟܡܳܐ ܐܶܬܬܰܚܬܺܝ: ܘܣܰܝܒܰܪ ܚܰܫܰܘ̈ܗ̱ܝ ܕܰܨܠܺܝܒܳܐ: ܘܩܳܡ ܡܶܢ ܩܰܒܪܳܐ ܒܬܶܫܒܽܘܚܬܳܐ: ܘܶܐܬ̣ܥܰܠܺܝ ܠܘܳܬ̣ ܫܳܠܽܘܚܶܗ܀

ܐ̱ܚܪܢܐ ܒܬܪ ܐܘܢܓܠܝܘܢ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ

ܩܳܡ ܐܰܠܳܗܳܐ ܡܶܢ ܩܰܒܪܳܐ: ܘܰܐܢܗܰܪ ܠܟܽܠܗܶܝܢ ܒܶܪ̈ܝܳܬܳܐ: ܘܝܰܒܶܒܘ ܟܶܢ̈ܫܶܐ ܕܡܰܠܰܐܟ̈ܶܐ: ܘܰܢܩܰܫ ܓܶܦܳܐ ܕܰܣܪ̈ܳܦܶܐ: ܘܰܟܪ̈ܽܘܒܶܐ ܒܩ̈ܳܠܶܐ ܕܚܺܝ̈ܠܶܐ: ܩܰܕܺܝܫ ܩܰܕܺܝܫ ܡܳܪܝܳܐ ܩܳܥܶܝܢ ܗ̱ܘܰܘ: ܠܰܐܒܳܐ ܕܫܰܕܰܪ ܠܺܝܚܺܝܕܶܗ: ܕܰܢܚܰܕܶܬ ܨܰܠܡܶܗ ܕܳܐܕܳܡ: ܡ݉ܕܰܒܰܪ ܠܟܽܠ ܒܶܪ̈ܝܳܢ ܩܰܒܪܳܐ ܐܰܚܕܶܗ ܒܨܶܒܝܳܢܶܗ: ܘܩܳܡ ܦܰܟܪܶܗ ܠܡܰܘܬܳܐ ܘܰܢܦܰܠ: ܘܣܰܚܦܳܗ̇ ܠܰܫܝܽܘܠ: ܘܰܐܡܠܶܟ ܒܰܫܡܰܝܳܐ ܘܒܰܐܪܥܳܐ܀

ܠܘܛܢܝܐ ܒܩ̄: ܙ:ܙ ܢܶܩܝܳܐ ܗܘܺܝܬ

ܒܚܰܕ ܒܫܰܒܳܐ ܐܶܬܬܥܺܝܪ ܡܳܪܝܳܐ: ܐܰܝܟ ܕܰܡܟܳܐ ܡܶܢ ܓ̣ܰܘ ܩܰܒܪܳܐ: ܘܚܰܕܺܝ ܠܰܐܪܥܳܐ ܘܠܰܫܡܰܝܳܐ: ܒܝܰܘܡܳܐ ܪܰܒܳܐ ܕܢܽܘܚܳܡܶܗ܀

ܕܽܘܨܝ ܘܰܚܕܳܝ ܥܺܕܰܬ̣ ܩܽܘܕܫܳܐ: ܒܰܩܝܳܡܬܶܗ ܕܺܝܚܺܝܕܳܝܳܐ: ܕܰܢܚܶܬ ܘܰܦܪܰܩ ܒܶܪ̈ܝܳܬ̣ܳܐ: ܘܶܐܬ̣ܥܰܠܺܝ ܠܘܳܬ̣ ܫܳܠܽܘܚܶܗ܀

ܝܰܘܡܳܢ ܚܳܕ̈ܝܳܢ ܒܶܪ̈ܝܳܬ̣ܳܐ: ܘܪ̈ܳܘܙܳܢ ܘܕܳܝ̈ܨܳܢ ܘܰܦܨܺܝ̈ܚܳܢ: ܕܶܐܬ̣ܢܰܚܰܡ ܘܩܳܡ ܡܶܢ ܩܰܒܪܳܐ: ܒܰܪ ܐܰܠܳܗܳܐ ܒܬܶܫܒܽܘܚܬܳܐ܀

ܫܽܘܒܚܳܐ ܠܰܐܒܳܐ ܩܰܕܺܝܫܳܐ: ܕܫܰܕܰܪ ܠܰܒܪܶܗ ܩܰܕܺܝܫܳܐ: ܘܰܛܥܶܡ ܡܰܘܬܳܐ ܒܨܶܒܝܳܢܶܗ: ܘܰܐܩܺܝܡ ܠܰܢ ܡܶܢ ܡܰܦܽܘܠܬܰܢ܀

ܐ̱ܚܪܢܐ ܠܘܛܢܝܐ ܒܩ̄: ܗ:ܗ

ܐܶܡܪܳܐ ܫܡܰܝܳܢܳܐ܇ ܕܶܒܚܳܐ ܡܚܰܣܝܳܢܳܐ. ܥܢܺܝ ܠܰܡܚܺܝܠܽܘܬ̣ܰܢ܇ ܘܰܐܫܘܳܢ ܠܫܽܘܒܩܳܢܳܐ܀

ܬܳܐ ܡܳܪܝ̱ ܠܺܐܝܳܠܰܢ܇ ܡܰܠܟܰܢ ܡܪܰܚܡܳܢܳܐ܇ ܘܰܐܪܘܰܚ ܥܳܩܳــ̈ܬ̣ܰܢ܇ ܒܙܰܒ̈ܢܶܐ ܕܽܐܘܠܨܳܢܳܐ܀

ܒܳܟ ܗ̱ܽܘ ܡܣܰܒܪܺܝܢܰܢ܇ ܝܶܫܽܘܥ ܚܰܢܳܢܳܐ܇ ܠܳܐ ܬܰܗܡܶܐ ܡܶܢܰܢ܇ ܘܢܶܫܪܰܟ ܠܰܐܒܕܳܢܳܐ܀

ܐܳܘ ܝܰܡܳܐ ܕܪ̈ܰܚܡܶܐ܇ ܘܓܰܙܳܐ ܕܬܽܘܟ̣ܠܳܢܳܐ܇ ܐܰܫܦܰܥ ܥܠܰܝܢ ܪ̈ܰܚܡܶܐ܇ ܘܣܽܘܓ̣ܳܐܐ ܕܥܽܘܕܪܳܢܳܐ܀

ܫܡܰܥ ܡܳܪܝ ܒܳܥܽܘܬ̣ܰܢ܇ ܘܩܰܒܶܠ ܬܝܳܒܽܘܬ̣ܰܢ܇ ܘܰܡܪܽܘܩ ܟܽܘ̈ܬܡܳܬ̣ܰܢ܇ ܒܙܽܘܦܳܟ ܡܕܰܟܝܳܢܳܐ܀

ܚܘܬܡܐ ܒܩ̄: ܝܰܘܢܳܐ ܛܠܺܝܬܳܐ

ܒܗܳܢ ܝܰܘܡܳܐ ܩܳܡ ܓܰܢ̱ܒܳܪܳܐ: ܘܠܳܐ ܚܙܳܐ ܚܒܳܠܳܐ ܒܶܝܬ̣ ܡܺܝ̈ܬ̣ܶܐ: ܥܰܒ̈ܕܰܘܗ̱ܝ ܕܰܐܒܽܘܗ̱ܝ ܕܶܐܫܬܰܕܰܪܘ̱: ܒܰܬܪܰܥ ܩܰܒܪܳܐ ܣܓ̣ܶܕܘ ܗܘܰܘ ܠܶܗ: ܨܶܗܝܽܘܢ ܕܰܨܠܰܒܬ̣ܶܗ: ܥܰܩܪܳܗ̇ ܒܢܽܘܚܳܡܶܗ: ܘܛܰܪܕܳܗ̇ ܡܶܢ ܒܰܝܬܶܗ: ܘܰܡܟ̣ܰܪ ܠܶܗ ܥܺܕ̱ܬܳܐ: ܘܡܺܝܬ̣ ܗܽܘ ܥܰܠ ܐܰܦܶܝ̈ܗ̇: ܘܰܒܩܶܛܠܶܗ ܚܰܪܪܳܗ̇: ܘܰܒܡܰܘܬܶܗ ܦܰܪܩܳܗ̇: ܘܰܒܝܽܘܡ ܢܽܘܚܳܡܶܗ: ܝܰܗ̱ܒ ܠܳܗ̇ ܬܽܘܒ ܚܰܝ̈ܶܐ܀