ܩܝܢܬܐ ܙ

ܦܬܓܡܐ:

ܢܩܽܘܡ ܐܰܠܳܗܳܐ ܢܶܬܒܕܪܽܘܢ ܟܽܠܗܽܘܢ ܒܥܶܠܕܒܳܒܰܘ̈ܗܝ: ܘܢܶܥܪܩܽܘܢ ܣܳܢܰܐܘ̈ܗܝ ܡܶܢ ܩܕܳܡܰܘܗܝ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫܡܰܝܴ̈ܢܶܐ ܘܠܐܰܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܩܽܘܡܝ̱ ܐܰܢܗܰܪܝ̱ ܕܰܡܛܳܐ ܢܽܘܗܪܶܟ̣ܝ̱: ܥܺܕܬܳܐ ܩܰܕܺܝܫܬܳܐ: ܕܰܒܚܶܫܽܘܟ̣ܳܐ ܝܳܬ̣ܒܳܐ ܗܘܰܝܬܝ̱: ܡܶܢ ܢܽܘܓ̣ܪܳܐ ܪܰܒܳܐ: ܩܽܘܡܝ̱ ܦܬܰܚܝ̱ ܬܰܪ̈ܥܰܝܟܝ̱: ܪ̈ܳܡܶܐ ܒܬܶܫܒܽܘܚܬܳܐ: ܕܢܶܥܽܘܠ ܡܰܠܟܳܐ: ܡܳܪܝܳܐ ܓܰܢ̱ܒܳܪܳܐ: ܕܗܳܐ ܩܳܡ ܠܶܗ ܡܶܢ ܒܶܝܬ ܡܺܝ̈ܬ̣ܶܐ܆ ܒܫܽܘܒܚܳܐ ܪܰܒܳܐ: ܘܟܽܠܗܽܘܢ ܥܰܡ̈ܡܶܐ ܘܶܐܡܘ̈ܳܬ̣ܳܐ: ܫܽܘܒܚܳܐ ܠܶܗ ܙܳܡܪܺܝܢ ܗ̄ ܒܝܰܘܡܳܐ ܕܰܩܝܳܡܬܶܗ܀

ܒܬܪ ܐܘܢܓܠܝܘܢ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ

ܟܰܕ ܡܰܟ̣ܪܳܗ̇ ܚܰܬܢܳܐ ܫܡܰܝܳܢܳܐ: ܠܥܺܕܰܬ ܩܽܘܕܫܳܐ ܡܗܰܝܡܰܢܬܳܐ. ܩܪܳܐ ܠܫܶܡܥܽܘܢ ܘܰܩܪܳܐ ܠܝܽܘܚܰܢܳܢ: ܘܰܐܓܥܶܠ ܝܰܗܒܳܗ̇ ܠܰܬܪ̈ܰܝܗܽܘܢ. ܠܫܶܡܥܽܘܢ ܥܰܒܕܶܗ ܪܰܒ ܒܰܝܬܳܐ: ܘܰܠܝܽܘܚܰܢܳܢ ܟܳܪܽܘܙܳܐ: ܩܪܳܐ ܐܶܢܽܘܢ ܘܦܰܩܶܕ ܐܶܢܽܘܢ. ܕܰܙܗܺܝܪܳܐܺܝܬ ܢܶܛܪܽܘܢܳܗ̇: ܕܒܰܕܡܶܗ ܝܰܩܺܝܪܳܐ ܙܒܺܝܢܳܐ܀

ܠܘܛܢܝܐ ܒܩ̄: ܚ : ܚ ܠܟܽܘܢ ܛܽܘܒܰܝܟܽܘܢ

ܗܳܐ ܐ̱ܪܳܙܳܐ ܡܚܰܣܶܐ ܠܚܰܝܳܒ̈ܶܐ: ܘܩܽܘܪܒܳܢܳܐ ܡܙܰܗܶܐ ܠܬܰܝܳܒ̈ܶܐ: ܗܳܐ ܦܰܓ̣ܪܳܐ ܡܕܰܟܶܐ ܠܚܽܘ̈ܫܳܒܶܐ: ܘܰܕܡܳܐ ܝܳܗܶܒ ܚܰܝ̈ܶܐ ܦܰܐܝ̈ܳܐ܀

ܐ̱ܪܳܙܳܐ ܕܡܰܦܢܶܐ ܟܽܠ ܐܰܒܺܝ̈ܕܶܐ: ܘܣܰܒܪܳܐ ܕܚܰܝ̈ܶܐ ܘܰܕܥܰܢܺܝ̈ܕܶܐ: ܐܽܘܟ̣ܠܶܗ ܡܒܰܛܶܠ ܨܶܢܥ̈ܳܬ̣ ܫܺܐܕ̈ܶܐ: ܐܳܦ ܘܡܰܫܘܶܐ ܠܛܽܘ̈ܒܶܐ ܕܰܓ̣ܒܰܝ̈ܳܐ܀

ܬܰܘ ܡܗܰܝ̈ܡܢܶܐ ܘܰܩܢܰܘ ܒܶܗ ܚܰܝ̈ܶܐ: ܕܗܽܘܝܽܘ ܣܰܒܪܳܐ ܕܟܽܠ ܚܰܛܳܝ̈ܶܐ: ܕܗܽܘ ܝܳܗܶܒ ܚܰܝ̈ܶܐ ܡܬ̣ܽܘܡ̈ܳܝܶܐ: ܒܰܐܘ̈ܳܢܶܐ ܫܒܺܝ̈ܚܶܐ ܕܰܫܡܰܝ̈ܳܐ܀

ܟܡܳܐ ܚܬ̣ܺܝܪܳܐ ܡܳܪܝ ܒܚܽܘܒܳܟ̣ ܥܺܕܬܳܐ: ܕܦܰܓ̣ܪܳܟ ܩܰܪܶܒܬ ܠܳܗ̇ ܬܰܪܣܺܝܬ̣ܳܐ: ܗܳܐ ܡܰܣܩܳܐ ܫܽܘܒܚܳܐ ܘܬܰܘܕܺܝܬ̣ܳܐ: ܠܳܟ ܘܠܰܐܒܽܘܟ ܘܰܠܪܽܘܚܳܟ ܚܰܝܳܐ܀

ܚܘܬܡܐ ܒܩ̄: ܗܳܐ ܩܛܺܝܠ ܗ̱ܘ ܒܡܶܨܪܶܝܢ

ܚܕܺܝܘ ܥܺܝܖ̈ܶܐ ܕܰܠܥܶܠ: ܘܝܰܒܶܒܘ̱ ܫܽܘܒܚܳܐ: ܘܟܶܢ̈ܫܶܐ ܕܰܐܖ̈ܥܳܢܶܐ: ܝܰܗܒܘ̱ ܬܶܫܒܽܘܚܬܳܐ: ܠܗܰܘ ܕܶܐܬ̣ܳܐ ܒܪ̈ܰܚܡܰܘܗ̱ܝ: ܘܰܛܥܶܡ ܡܰܘܬܳܐ: ܘܚܰܕܺܝ ܒܢܽܘܚܳܡܶܗ: ܫܡܰܝܳܐ ܘܰܐܪܥܳܐ܀