ܩܛܠܐ ܕܝܠܘܕ̈ܐ
ܩܝܢܬܐ ܚ
ܦܬܓܡܐ:
ܡܶܛܠܳܬܳܟ ܐܶܬܩܰܛܠܰܢ ܒܟܽܠܝܽܘܡ: ܘܶܐܬܚܫܶܒܢ ܐܰܝܟ ܐܶܡܪ̈ܶܐ ܠܢܶܟܣܬܳܐ ܗ̄܀
ܨܠܽܘܬܟܽܘܢ ܥܰܡܰܢ ܫܰܒܪ̈ܶܐ ܒܪܺܝܪ̈ܶܐ ܨܠܽܘܬܟܽܘܢ ܥܰܡܰܢ: ܠܰܨ̈ܠܰܘܳܬܟܽܘܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀
ܒܰܨ̈ܠܰܘܳܬܟܽܘܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ: ܡܶܢܟܽܠ ܐܰܝܢܳܐ ܕܡܶܬܓܰܘܰܣ ܒܟܽܘܢ ܒܗܰܝܡܳܢܘܬܳܐ܀
ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ - H
ܐܰܪܒܥܺܝܢ ܓܰܒܪ̈ܶܐ ܓܰܢ̱ܒܳܪ̈ܶܐ ܢܰܚܫܺܝܪ̈ܬܳܢܶܐ. ܫܰܕܰܪ ܗܺܝܪܳܘܕܶܣ ܡܰܠܟܳܐ ܠܰܬܚܽܘܡܳܐ ܕܒܶܝܬ ܠܚܶܡ. ܘܰܕܒܰܪܘ ܥܰܡܗܽܘܢ ܟܽܠ ܚܰܕ ܐܰܪܒܥܺܝܢ ܓܰܒܪ̈ܶܐ. ܘܟܽܠ ܚܰܕ ܡܶܢܗܽܘܢ ܩܛܰܠ ܐܰܪܒܥܺܝܢ ܫܰܒܪ̈ܶܐ. ܘܰܗܘܰܘ ܟܽܠܗܽܘܢ ܒܡܶܢܝܳܢܳܐ ܫܬܺܝܢ ܘܰܐܪܒܥܳܐ ܐܰܠ̈ܦܰܝܳܐ. ܒܰܨܠܘܽܬܗܽܘܢ ܘܰܒܒܳܥܽܘܬܗܽܘܢ ܪ̈ܰܚܡܶܐ ܢܶܗܘܽܘܢ ܥܠܰܝܢ ܗ̄ ܨܠܽܘܬܗܽܘܢ ܬܥܰܕܰܪ ܠܰܢ܀
ܒܬܪ ܐܘܢܓܠܝܘܢ ܐܚܪܢܐ ܒܩ̄: ܛܽܘܒܰܝܟܝ ܥܺܕܬܳܐ - H
ܛܽܘܒܳܐ ܠܫܰܒܪ̈ܶܐ ܒܪܺܝܪ̈ܶܐ ܒܢܰܝ̈ܳܐ ܕܒܶܝܬ ܠܚܶܡ: ܕܰܚܠܳܦ ܛܰܠܝܳܐ ܐܶܬܩܰܛܰܠܘ: ܘܰܣܠܶܩ ܪܽܘܡܝܳܢܳܐ ܡܪܰܥܝܳܐ: ܚܙܰܘ ܠܰܡܓܽܘ̈ܫܶܐ ܡܩܰܪܒܺܝܢ ܠܶܗ: ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ: ܚܣܰܡܘ ܒܗܽܘܢ ܫܰܒܪ̈ܶܐ ܘܩܰܪܶܒܘ ܠܶܗ: ܕܡܳܐ ܕܰܟܝܳܐ ܕܰܩܢܽܘ̈ܡܰܝܗܽܘܢ: ܘܰܗܘܰܘ ܚܕܽܘ̈ܓܶܐ ܫܰܪ̈ܘܳܝܶܐ: ܒܡܶܫܬܽܘܬܶܗ ܕܚܰܬܢܳܐ ܕܪܰܘܡܳܐ܀
ܠܘܛܢܝܐ ܒܩ̄: ܠܢܣܒܚ ܘܢܡܓܕ - H
ܒܪܳܡܰܬ ܕܰܘ̈ܩܶܐ ܒܚܶܢܓܳܐ ܢܳܗܶܡ: ܩ̈ܳܠܶܐ ܪ̈ܰܥܽܘܡܶܐ. ܥܰܠ ܩܶܛܠܳܐ ܕܫܰܒܪ̈ܶܐ ܕܒܶܝܬ ܠܚܶܡ: ܒܣܰܝ̈ܦܶܐ ܕܛܳܠܽܘ̈ܡܶܐ܀
ܪܳܚܶܝܠ ܒܳܟܝܳܐ ܥܰܠ ܒܢܶܝ̈ܗ̇ ܒܪܺܝܪ̈ܶܐ: ܘܳܐܠܝܳܐ ܠܡܰܘܬܰܝ̈ܗܽܘܢ. ܘܠܳܐ ܡܶܬܒܰܝܳܐܐ ܠܓܽܘܢ̈ܚܶܝܗ̇ ܟܡܺܝܪ̈ܶܐ: ܡܶܛܽܠ ܕܠܰܝܬܰܝܗܽܘܢ܀
ܡܙܰܓ ܣܰܝܦܳܐ ܠܕܶܡܗܽܘܢ ܥܰܡ ܚܰܠܒܳܐ: ܒܟܶܢ̈ܦܶܐ ܕܶܐܡ̈ܗܳܬܳܐ. ܘܶܐܬܩܰܪܰܒܘ ܐܰܝܟ ܥܶܛܪܳܐ ܛܳܒܳܐ: ܠܡܳܪܳܐ ܕܒܶܪ̈ܝܳܬܳܐ܀
ܚܽܘܪ ܒܰܕܡܳܐ ܕܰܠܘܳܬܳܟ ܓܳܥܶܐ: ܐܳܘ ܡܳܪܳܐ ܟܺܐܢܳܐ. ܕܰܐܢܬ ܗ̱ܘ ܕܬܳܒܰܥ ܘܠܳܐ ܣܳܟ ܛܳܥܶܐ. ܓܥܳܬܶܗ ܕܡܶܣܟܺܢܳܐ܀
ܠܘܛܢܝܐ ܐܚܪܢܐ ܒܩ̄: ܢܶܩܝܳܐ ܗܘܺܝܬ - H
ܝܰܘܡܳܢ ܐܳܦܰܪܬܳܐ ܘܠܰܩܚܶܝ̈ܗ̇: ܒܬܶܢܚ̈ܳܬܳܐ ܕܚܰܫ̈ܶܐ ܕܠܺܝ̣ܚܺܝܢ. ܕܒܰܕܡܳܐ ܙܰܟܳܝܳܐ ܕܦܰܩܚܶܝ̈ܗ̇: ܫܽܘܩܶܝ̈ܗ̇ ܘܒܶܪ̈ܝܳܬܳܗ̇ ܙܠܺܝ̣ܚܺܝܢ܀
ܐܺܝܬ ܝܰܠܽܘܕܳܐ ܕܰܬܕܳܐ ܠܒܺܝܟ: ܘܨܳܕܶܗ ܣܰܝܦܳܐ ܕܰܛܪܽܘܢܳܐ. ܘܺܐܝܬ ܗ̱ܘ ܕܥܰܠ ܕܪ̈ܳܥܶܐ ܕܰܡܺܝܟ: ܢܦܰܩ ܡܶܢ ܫܶܢܬܳܐ ܠܰܓܢܽܘܢܳܐ܀
ܚܠܳܦܰܝܟ ܡܳܪܝ ܝܰܗܒܘ̱ ܨܰܘܪ̈ܰܝܗܽܘܢ: ܠܦܽܘܡ ܣܰܦܣܺܝܪ̈ܶܐ ܕܛܳܠܽܘ̈ܡܶܐ. ܠܪܰܘܡܳܟ ܐܰܩܶܬܘ̱ ܚܰܘܪ̈ܰܝܗܽܘܢ: ܕܠܳܟ ܐܶܬܩܰܪܰܒܘ̱ ܗܶܪ̈ܽܘܡܶܐ܀
ܩܰܒܶܠ ܡܳܪܝ ܦܝܳܣܳܐ ܕܥܰܒܕܰܝ̈ܟ: ܐܰܝܟ ܕܶܡ ܨܰܘܪܳܐ ܕܝܰܠܽܘ̈ܕܶܐ. ܘܰܐܩܺܝܡ ܣܰܟܪܳܐ ܠܣܳܓܽܘܕܰܝ̈ܟ: ܠܽܘܩܒܰܠ ܛܪ̈ܽܘܢܶܐ ܘܡܳܪ̈ܽܘܕܶܐ܀
ܚܘܬܡܐ ܒܩ̄: ܐܳܘ ܥܽܘܡܪܳܐ ܕܙܰܒܢܳܐ - H
ܠܒܶܙܚܳܐ ܕܰܡܓܽܘ̈ܫܶܐ ܠܶܒܫܰܬ ܚܶܡܬܳܐ ܠܗܶܪܳܘܕܶܣ. ܫܠܰܚ ܩܰܛܶܠ ܠܫܰܒܪ̈ܶܐ: ܕܡܶܢ ܒܰܪ ܬܰܪܬܶܝܢ ܫܢܺܝ̈ܢ ܘܰܠܬܰܚܬ. ܐܳܘ ܠܦܰܩ̈ܚܶܐ ܪ̈ܓܰܝܳܐ. ܝܰܠܽܘ̈ܕܶܐ ܒܢܰܝ̈ ܐܳܦܰܪܬܳܐ. ܕܚܰܝܰܝ̈ܗܽܘܢ ܩܰܪܶܒܘ̱. ܚܠܳܦ ܚܰܝ̈ܶܐ ܕܝܰܠܕܶܗ ܕܰܐܒܳܐ܀