ܩܝܢܬܐ ܙ

ܦܬܓܡܐ:

ܛܠܳܝ̈ܶܐ ܫܰܒܚܽܘܗܝ ܒܽܐܘܫܰܥ̈ܢܶܐ. ܘܝܰܠܽܘ̈ܕܶܐ ܒܣܰܘ̈ܟܰܝ ܙܰܝܬܳܐ ܗ̄܀

ܬܒܪܬ‌ܐ:

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܩܥܰܘ ܝܰܠܽܘ̈ܕܶܐ: ܩܰܕܺܝܫ ܡܳܪܝܳܐ ܕܰܪܟܺܝܒ ܥܺܝܠܳܐ ܘܥ̣ܰܠ ܠܽܐܘܪܺܫܠܶܡ܀

ܙܡܰܪܘ ܠܶܗ ܙܡܰܪܘ ܠܶܗ ܙܡܰܪܘ ܠܶܗ ܫܽܘܒܚܳܐ ܠܒܰܪ ܐܰܠܳܗܳܐ: ܠܫܽܘܒܚܶܗ ܣܳܡܳܟ ܠܡܽܘܢ ܒܰܛܺܝܠ ܐܰܢܬ ܡܶܢ ܬܶܫܒܽܘܚܬܶܗ܀

ܚܘܬܡܐ: ܢܒܺܝ̈ܶܐ ܡܶܢ ܩܽܘܕܡܰܘܗܝ ܫܠܺܝ̈ܚܶܐ ܡܶܢ ܒܳܬܪܶܗ: ܝܰܠܽܘܕ̈ܶܐ ܘܫܰܒܪ̈ܶܐ: ܒܽܐܘܫܰܥ̈ܢܶܐ ܩܰܠܣܽܘܗܝ܀

ܩܕܡ ܐܘܢܓܠܝܘܢ ܒܩ̄: ܕܰܚܛܳܐ ܠܳܐ ܢܶܚܛܶܐ

ܕܰܘܺܝܕ ܐܶܬܢܰܒܺܝ: ܘܗܳܟܰܢܳܐ ܐܶܡܰܪ. ܕܡܶܢ ܦܽܘܡܳܐ ܕܫܰܒܪ̈ܶܐ. ܬܶܩܢܰܬ ܬܶܫܒܽܘܚܬܳܐ. ܫܰܘܺܝܘ ܡܳܐܢܰܝ̈ܗܽܘܢ ܥܰܡ ܡܰܪ̈ܛܽܘܛܰܝܗܽܘܢ ܘܰܛܠܳܝ̈ܶܐ ܘܫܰܒܪ̈ܶܐ: ܒܽܐܘܫܰܥ̈ܢܶܐ ܫܰܒܚܽܘܗܝ܀

ܙܟܰܪܝܳܐ ܐܶܬܢܰܒܺܝ. ܘܗܳܟܰܢܳܐ ܐܶܡܰܪ: ܕܽܘܨܝ̱ ܛܳܒ ܒܰܪܬ ܨܶܗܝܽܘܢ ܕܗܳܐ ܡܰܠܟܶܟܝ̱ ܐܳܬܶܐ. ܝܰܬܺܝܒ ܥܰܠ ܥܺܝܠܳܐ ܘܰܒܙܰܘܚܳܐ ܥܳܐܶܠ. ܘܰܛܠܳܝ̈ܶܐ ܘܫܰܒܪ̈ܶܐ ܒܽܐܘܫܰܥ̈ܢܶܐ ܩܰܠܣܽܘܗܝ܀

ܩܕܡ ܐܘܢܓܠܝܘܢ

ܬܶܫܒܽܘܚܬܳܐ ܘܗܶܕܪܳܐ ܘܪܽܘܡܪܳܡܳܐ ܡܕܰܫܢܺܝܢܰܢ ܠܓܰܐܝܳܐ ܘܓܰܢ̱ܒܳܪܳܐ ܘܬܰܩܺܝܦ ܥܽܘܫܢܳܐ. ܥܰܠ ܦܽܘܪܩܳܢܳܐ ܘܙܳܟ̣ܽܘܬ̣ܳܐ ܕܥܰܡܳܟ ܝܺܣܪܳܐܝܠ܀

ܟܰܕ ܡܥܰܢܝܳܐ ܡܰܪܝܰܡ. ܒܰܦܠܰܓ̈ܶܐ. ܘܒܰܪ̈ܒܺܝܥܶܐ. ܠܝܰܗ ܡܳܪܝܳܐ܀

ܗܰܠܶܠܘ̱ ܗܰܠܶܠܘ̱ ܗܰܠܶܠܘ̣ܢܳܝܗ̱ܝ. ܠܺܐܝܠ ܬܰܩܺܝܦܳܐ. ܕܰܪܟ݂ܺܝܒ ܥܺܝ݂ܠܳܐ ܘܥܰܠ ܠܽܐܘܪܺܫܠܶܡ܀

ܫܰܒܰܚܘ̱ ܫܰܒܰܚܘ̱ ܫܰܒܰܚܘ̣ܢܳܝܗ̱ܝ. ܠܺܐܝܠ ܥܰܫܺܝܢܳܐ. ܕܰܪܟ݂ܺܝܒ ܥܺܝ݂ܠܳܐ ܘܥܰܠ ܠܽܐܘܪܺܫܠܶܡ܀

ܙܰܡܰܪܘ̱ ܙܰܡܰܪܘ̱ ܙܰܡܰܪܘܢܳܝܗ̱ܝ. ܠܺܐܝܠ ܥܰܙܺܝܙܳܐ ܕܰܪܟ݂ܺܝܒ. ܥܺܝ݂ܠܳܐ ܘܥܰܠ ܠܽܐܘܪܺܫܠܶܡ܀

ܡܶܛܽܠ ܕܰܡܫܰܒܚܳܐ ܐܺܝܬ̣ܰܘܗ̱ܝ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܫܶܐܠ ܝܰܘܡܳܢܳܐ ܒܰܪ ܡܰܠܟܳܐ: ܥܺܝܠܳܐ ܠܡܶܪܟܰܒ ܥܠܰܘܗܝ: ܘܰܒܙܰܘܚܳܐ ܕܡܰܠܟ̈ܶܐ ܥ̣ܰܠ ܗܘܳܐ ܒܬܰܪܥܳܐ ܕܽܐܘܪܺܫܠܶܡ. ܟܶܢ̈ܫܶܐ ܫܰܘܺܝܘ: ܢܰܚ̈ܬܶܐ ܩܕܳܡ ܥܺܝܠܶܗ: ܘܫܰܒܪ̈ܶܐ ܩܥܰܘ ܠܶܗ: ܐܽܘܫܰܥܢܳܐ ܒܪܰܘܡܳܐ. ܫܶܠܡܰܬ ܡܶܠܬܶܗ ܕܒܰܪ ܐܺܝܫܰܝ: ܕܰܒܪܽܘܚܩܽܘܕܫܳܐ ܩܥܳܐ. ܕܡܶܢ ܦܽܘܡ ܝܰܠܽܘ̈ܕܶܐ ܬܶܩܢܰܬ ܬܶܫܒܽܘܚܬܳܐ ܠܡܳܪܝܳܐ ܗ̄ܘܗ̄܀

ܠܘܛܢܝܐ:

ܢܦܰܩܘ ܟܶܢ̈ܫܶܐ ܕܝܰܠܽܘܕ̈ܶܐ: ܘܫܰܒܪ̈ܶܐ ܫܦܰܝ̈ܳܐ. ܘܰܛܥܺܝܢܺܝܢ ܡܶܢ ܕܶܩ̈ܠܶܐ: ܣܰܘ̈ܟܶܐ ܪ̈ܓܰܝܳܐ. ܘܰܡܢܰܨܪܺܝܢ ܐܽܘܫܰܥܢܳܐ: ܒܪ̈ܶܟܢܶܐ ܚܠܰܝ̈ܳܐ. ܠܽܐܘܪܥܳܐ ܕܰܒܪܶܗ ܕܕܰܘܺܝܕ: ܡܠܶܟ ܝܺܣܪܳܐܝܠ܀

ܗܦܟܬܐ: ܐܽܘܫܰܥܢܳܐ ܐܽܘܫܰܥܢܳܐ: ܝܰܒܶܒܘ ܗܰܠܶܠܽܘܝܰܗ: ܠܰܒܪܶܗ ܕܕܰܘܺܝܕ. ܐܽܘܫܰܥܢܳܐ ܠܡܰܠܟܳܐ ܕܰܥܬܺܝܕ: ܠܳܟ ܬܶܫܒܽܘܚܬܳܐ ܐܳܘ ܒܰܪ ܚܰܝܳܐ. ܠܳܟ ܬܰܘܕܺܝܬܳܐ ܐܺܝܬܝܳܐ ܓܰܐܝܳܐ: ܐܽܘܫܰܥܢܳܐ ܠܡܰܠܟܶܗ ܕܝܺܣܪܳܐܝܠ܀

ܬܰܠܡܺܝ̈ܕܶܐ ܗܶܕܝܽܘ̈ܛܶܐ: ܕܠܶܗ ܗܘ ܡܠܰܘܶܝܢ. ܚܳܕܝܳܐܺܝܬ ܩܕܳܡ ܥܺܝܠܶܗ: ܢܰܚ̈ܬܶܐ ܡܫܰܘܶܝܢ. ܘܥܰܡ ܫܰܒܪ̈ܶܐ ܐܽܘܫܰܥܢܳܐ: ܒܪܰܘܡܳܐ ܡܚܰܘܶܝܢ. ܠܗܰܘ ܡܳܪܳܐ ܡܙܺܝܥ ܬܶܓ̈ܡܶܐ: ܕܒܶܝܬ ܓܰܒܪܺܐܶܝܠ܀

ܒܰܪܬ ܨܶܗܝܽܘܢ ܢܒܺܝܽܘܬܳܐ: ܫܡܰܥܝ̱ ܕܰܙܟܰܪܝܳܐ. ܕܰܒܓܶܠܝܳܢ ܪܽܘܚܩܽܘܕܫܳܐ ܠܘܳܬܶܟܝ̱ ܩܳܪܝܳܐ. ܗܳܐ ܡܰܠܟܶܟܝ ܐܳܬܶܐ ܕܽܘܨܝ̱. ܐܳܡܰܪ ܡܳܪܝܳܐ: ܟܰܕ ܝܰܬܺܝ̣ܒ ܥܰܠ ܥܺܝܠܳܐ: ܕܡܶܢ ܐ̱ܢܳܫܳܐ ܫܐܺܝܠ܀

ܠܙܘܝܚܐ: ܕܽܘܪܬܳܐ ܩܰܕܡܳܝܬܳܐ

ܡܰܢ ܕܶܝܢ ܐܰܣܩܰܢܝ̱ ܥܰܠ ܛܽܘܪ̈ܶܐ ܪ̈ܳܡܶܐ ܕܽܐܘܪܺܫܠܶܡ: ܘܰܚܙܺܝܬܶܗ ܠܒܰܪ ܐܰܠܳܗܳܐ ܡܶܠܬܳܐ ܕܶܐܬܓܰܫܰܡ: ܕܰܪܟܺܝܒ ܥܰܠ ܥܺܝܠܳܐ ܫܺܝܛܳܐ ܘܥܳܐܶܠ ܠܽܐܘܪܺܫܠܶܡ. ܐܳܙܠܳܐ ܩܽܘܕܡܰܘܗܝ: ܓܽܘܕܳܐ ܕܰܢܒܺܝ̈ܶܐ: ܘܳܐܬܝܳܐ ܒܳܬܪܶܗ ܓܽܘܕܳܐ ܕܰܫܠܺܝ̈ܚܶܐ. ܘܰܛܠܳܝ̈ܶܐ ܒܣܰܘ̈ܟܰܝ ܙܰܝܬܳܐ ܡܫܰܒܚܺܝܢ ܩܽܘܕܡܰܘܗܝ ܟܰܕ ܐܳܡܪܺܝܢ. ܐܽܘܫܰܥܢܳܐ ܒܪܰܘܡܳܐ ܘܥܽܘܡܩܳܐ. ܐܽܘܫܰܥܢܳܐ ܠܰܒܪܶܗ ܕܕܰܘܝܺܕ. ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ: ܒܰܫܡܳܐ ܡܫܰܒܚܳܐ ܕܝܳܠܽܘܕܶܗ. ܡܳܪܶܐ ܟܽܠ ܫܽܘܒܚܳܐ ܠܳܟ܀

ܠܙܘܝܚܐ: ܕܘܪܬܳܐ ܕܬܪܬܝܢ

ܥܺܐܕܳܐ ܪܰܒܳܐ ܗܘܳܐ ܒܽܐܘܪܺܫܠܶܡ: ܕܡܶܬܟܰܢܶܐ ܗܘܳܐ ܥܺܐܕܳܐ ܕܕܶܩ̈ܠܶܐ. ܘܰܐܝܟ ܥܝܳܕܳܐ ܕܺܐܝܬ ܗܘܳܐ ܠܝܰܠܽܘ̈ܕܶܐ: ܒܶܗ ܥܰܠ ܡܳܪܰܢ ܥܰܡ ܬܰܠܡܺܝ̈ܕܰܘܗܝ܀

ܛܠܳܝ̈ܶܐ ܛܥܺܝܢܺܝܢ ܣܰܘ̈ܟܶܐ ܘܩܳܥܶܝܢ: ܘܨܶܗܝܽܘܢ ܓܳܙܡܳܐ ܥܰܠ ܐܰܒܕܳܢܶܗ. ܟܳܗ̈ܢܶܐ ܠܺܝ̣̈ܛܶܐ ܒܠܰܥܘ ܒܰܚܣܳܡܳܐ: ܢܥܺܝܪܽܘܢ ܗܶܪܬܳܐ ܥܰܠ ܙܰܕܺܝܩܳܐ܀

ܪܟܺܝܒ ܥܰܠ ܥܺܝܪ̈ܶܐ ܘܡܶܢܶܗ ܙܳܝܥܺܝܢ: ܘܒܰܪ ܐܰܬܳܢܳܐ ܐܰܝܟܰܢ ܛܰܥܢܶܗ. ܨܶܗܝܽܘܢ ܟܶܦܪܰܬ ܘܥܺܕܬܳܐ ܡܰܘܕܝܳܐ: ܒܩܶܛܠܶܗ ܚܰܝܳܐ ܕܒܶܗ ܐܶܬܦܰܪܩܰܬ܀

ܒܪܺܝܟ ܗ̱ܘ ܡܫܺܝܚܳܐ ܕܥܰܩܪܳܗ̇ ܠܨܶܗܝܽܘܢ: ܪܶܚܡܰܬ ܥܶܓܠܳܐ ܘܨܰܗܝܰܬ ܠܰܕܡܳܐ. ܘܰܓܒܳܐ ܠܥܺܕܬܳܐ ܒܰܪܬ ܐܰܪ̈ܡܳܝܶܐ: ܒܩܶܛܠܶܗ ܚܰܝܳܐ ܕܒܶܗ ܐܶܬܦܰܪܩܰܬ܀

ܠܙܘܝܚܐ: ܕܘܪܬܳܐ ܕܬܠܬ: ܛܘܒܐ ܠܝܠܘ̈ܕܐ

ܛܽܘܒܳܐ ܠܝܰܠܽܘ̈ܕܶܐ: ܕܰܫܘܰܘ ܕܢܶܚܙܽܘܢ ܠܰܡܫܺܝܚܳܐ: ܟܰܕ ܥܳܐܶܠ ܗܘܳܐ ܠܽܐܘܪܺܫܠܶܡ. ܘܰܪܟܺܝܒ ܥܰܠ ܥܺܝܠܳܐ: ܫܺܐܝܠܳܐ ܡܫܰܠܚܳܐ ܕܰܐܬܳܢܳܐ. ܘܩܳܥܶܝܢ ܝܰܠܽܘܕ̈ܶܐ ܩܽܘܕܡܰܘܗܝ. ܐܽܘܫܰܥܢܳܐ ܒܪܰܘܡܳܐ: ܐܽܘܫܰܥܢܳܐ ܠܰܒܪܶܗ ܕܕܰܘܝܺܕ. ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܢܦܰܩܶܝ̈ܢ ܥܠܰܝ̈ܡܳܬܳܐ: ܘܰܦܠܰܓܰܝ̈ܗܶܝܢ ܒܺܐܝܕܰܝ̈ܗܶܝܢ. ܘܰܩܕܳܡ ܕܰܘܺܝܕ ܢܳܩ̈ܫܳܢ ܗܘܰܝ̈. ܘܰܩܕܳܡ ܒܰܪ ܕܰܘܺܝܕ: ܗܳܐ ܥܺܕܬܳܐ ܛܥܺܝܢܳܐ ܨܠܺܝܒܳܐ. ܘܫܽܘܒܚܳܐ ܒܽܐܘܫܰܥ̈ܢܶܐ ܙܳܡܪܳܐ. ܐܽܘܫܰܥܢܳܐ ܒܪܰܘܡܳܐ: ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ: ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܢܰܘܕܶܐ ܘܢܶܣܓܽܘܕ ܠܶܗ: ܠܥܰܡܰܢܽܘܐܶܝܠ ܕܶܐܬܬܰܚܬܺܝ: ܘܰܒܡܽܘܟܳܟܶܗ ܥܺܝܠܳܐ ܪܟܶܒ: ܟܶܢ̈ܫܶܐ ܢܦܰܩܘ̱ ܠܽܐܘܪܥܶܗ: ܘܰܒܣܰܘ̈ܟܰܝ ܙܰܝܬܳܐ ܫܰܒܚܽܘܗܝ. ܘܝܰܒܶܒܘ̱ ܩܽܘܕܡܰܘܗܝ ܟܰܕ ܐܳܡܪܺܝܢ: ܐܽܘܫܰܥܢܳܐ ܒܪܰܘܡܳܐ: ܐܽܘܫܰܥܢܳܐ ܠܰܒܪܶܗ ܕܕܰܘܺܝܕ: ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀

ܠܙܘܝܚܐ: ܕܩܘܪܒܐ

ܡܳܪܰܢ ܐܶܬܪܰܚܡܥܠܰܝܢ: ܡܳܪܰܢ ܚܽܘܣ ܘܪܰܚܶܡܥܠܰܝܢ: ܡܳܪܰܢ ܥܢܺܝܢ ܘܪܰܚܶܡܥܠܰܝܢ܀

ܝܰܘܡܳܢ ܢܗܰܪܘ ܫܽܘ̈ܩܶܐ ܕܨܶܗܝܽܘܢ: ܒܝܰܠܽܘ̈ܕܶܐ ܛܥܺܝ̣̈ܢܰܝ ܣܰܘ̈ܟܶܐ. ܘܩܳܥܶܝܢ ܩܽܘܕܡܰܬ ܒܰܪ ܕܰܘܺܝܕ: ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ. ܘܗܳܐ ܥܺܕܬܳܐ ܦܨܺܝܚܳܐ ܝܰܘܡܳܢ: ܕܶܐܬܡܰܠܝܰܬ ܗܳܝ ܕܒܰܪ ܐܺܝܫܰܝ. ܕܡܶܢ ܦܽܘܡ ܝܰܠܽܘ̈ܕܶܐ ܘܫܰܒܪ̈ܶܐ: ܬܶܩܢܰܬ ܬܶܫܒܽܘܚܬܳܐ ܠܡܳܪܝܳܐ܀

ܠܰܐܠܳܗܳܐ ܫܽܘܒܚܳܐ ܒܪܰܘܡܳܐ. ܘܰܠܝܳܠܶܕܬܶܗ ܪܽܘܡܪܳܡܳܐ. ܘܰܠܣܳܗ̈ܕܶܐ ܟܠܺܝܠ ܩܽܘ̈ܠܳܣܶܐ. ܠܥܰܢܺܝ̈ܕܶܐ ܚܢܳܢܳܐ ܘܪ̈ܰܚܡܶܐ ܗ̄܀

ܗܫܐ ܚܙܝ ܛܟܣܐ ܕܥܐܕܐ ܩܕܝܫܐ ܕܐܘܫܥܢ̈ܐ

ܚܘܬܡܐ ܐܚܪܢܐ ܒܩ̄: ܛܽܘܒܳܐ ܠܝܰܠܽܘ̈ܕܶܐ

ܥܺܕܬܳܐ ܐܰܘܕܳܝ ܠܶܗ: ܠܒܰܪ ܐܰܠܳܗܳܐ ܕܶܐܬܬܰܚܬܺܝ. ܘܰܦܪܰܩ ܝܰܠܕܰܝ̈ܟܝ̱ ܡܶܢ ܛܽܘܥܝܰܝ. ܘܰܛܥܰܢܝ̱ ܠܰܨܠܺܝܒܶܗ. ܘܦܽܘܩܝ̱ ܠܽܐܘܪܥܶܗ ܒܩܳܠܰܝ̈ ܫܽܘܒܚܳܐ: ܘܰܩܥܳܝ ܩܽܘܕܡܰܘܗܝ ܟܰܕ ܙܳܡܪܰܬܝ. ܐܽܘܫܰܥܢܳܐ ܒܪܰܘܡܳܐ: ܐܽܘܫܰܥܢܳܐ ܠܰܒܪܶܗ ܕܕܰܘܝܺܕ. ܒܪܺܝܟ ܕܶܐܬܳܐ ܒܰܫܡܶܗ ܕܡܳܪܝܳܐ܀