ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܶܐܬܺܝܠܶܕ ܡܶܢ ܐܰܒܳܐ ܓܢܺܝܙܳܐ܆ ܒܥܽܘܒܳܗ̇ ܕܡܰܪܝܰܡ ܗܳܝ ܒܰܪ̱ܬ ܕܰܘܺܝܕ ܫܪܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܡܶܬܩܰܕܰܫ ܡܶܢ ܣܪ̈ܳܦܶܐ ܕܢܽܘܪܳܐ܆ ܥܺܝܪܳܐ ܫܰܪܰܪ ܠܝܰܘܣܶܦ ܥܰܠ ܒܰܛܢܶܗ܆ ܪܰܚܶܡ ܥܠܰܝܢ ܐܰܠܳܗܳܐ܀

ܝܺܚܺܝܕܳܝܰܐ ܗ̱ܘ ܘܡܶܠܬܳܐ ܡܬܽܘܡܳܝܳܐ܆ ܗܰܘ ܕܰܫܪܳܐ ܒܳܗ̇܆ ܗܽܘ ܦܳܪܶܩ ܥܳܠ̈ܡܶܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܫܽܘܒܚܳܐ ܠܰܒܪܳܐ ܕܶܐܬܳܐ ܠܦܽܘܪܩܳܢܰܢ܆ ܘܫܰܕܰܪ ܣܰܒܰܪ ܠܝܰܘܣܶܦ ܥܰܠ ܒܰܛܢܶܗ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܕܠܳܐ ܢܺܐܙܽܠ̱ܘܢ ܚܰܘ̈ܒܰܝ

ܐܶܬܬܥܺܝܪ ܝܰܘܣܶܦ ܟܰܕ ܡܶܬܒܰܠܗܶܐ: ܕܰܚܺܝܠ ܪܳܐܶܬ: ܬܰܡܺܝܗ ܘܟܳܘܶܙ: ܪܗܺܝܒ ܘܡܶܣܬܰܬܰܪ: ܐܶܬܪܰܚܰܡܥܠܰܝܢ ܐܰܠܳܗܳܐ܀

ܛܳܣ ܪܽܘܚܳܢܳܐ ܘܰܡܛܳܐ ܠܘܳܬܶܗ ܩܰܠܺܝܠܳܐܺܝܬ: ܕܰܠܚܽܘ̈ܫܳܒܶܐ ܕܰܦܠܺܝܓܽܘܬܳܐ ܢܶܛܪܽܘܕ ܡܶܢܶܗ: ܐܶܬܪܰܚܰܡܥܠܰܝܢ ܐܰܠܳܗܳܐ܀

ܟܰܕ ܥܰܠ ܫܶܢܬܶܗ ܕܠܺܠܝܳܐ ܫܰܠܝܳܐ ܢܳܚ ܗ̱ܘܳܐ ܟܺܐܢܳܐ: ܒܪܳܗ̇ ܕܰܒܬܽܘܠܬܳܐ ܪܡܰܙ ܗ̱ܘܳܐ ܠܥܺܝܪܳܐ ܘܰܡܛܳܐ ܨܶܝܕܰܘܗ̱ܝ: ܐܶܬܪܰܚܰܡܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܨܠܺܝ ܡܳܪܝܳܐ ܒܪ̈ܰܚܡܶܐ

ܒܪܺܝܟ ܕܶܐܬܬܰܚܬܺܝ ܒܛܰܝܒܽܘܬܶܗ: ܕܢܶܦܪܽܘܩ ܠܓܶܢܣܳܐ ܕܥܰܦܪ̈ܳܢܶܐ: ܘܶܐܬܳܐ ܠܒܰܛܢܳܐ ܘܡܰܘܠܳܕܳܐ: ܘܫܰܪܪܶܗ ܠܝܰܘܣܶܦ ܕܶܐܬܦܰܠܰܓ܀

ܒܝܰܕ ܓܰܒܪܺܐܶܝܠ ܡܰܠܰܐܟܳܐ: ܐܶܫܬܰܪܰܪ ܝܰܘܣܶܦ ܟܺܐܢܳܐ: ܕܠܳܐ ܬܶܬܦܰܠܰܓ ܐܳܘ ܝܰܘܣܶܦ: ܥܰܠ ܒܰܛܢܳܐ ܕܡܰܠܝܰܬ ܫܽܘܦܪ̈ܶܐ܀

ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ: ܢܚܶܬ ܨܶܝܕ ܝܰܘܣܶܦ ܒܰܪ ܕܰܘܺܝܕ: ܘܶܐܡܰܪ ܠܶܗ ܕܠܳܐ ܬܶܬܦܰܠܰܓ: ܥܰܠ ܒܰܛܢܳܗ̇ ܕܛܽܘܒܳܢܺܝܬܳܐ܀

ܫܽܘܒܚܳܐ ܠܰܐܒܳܐ ܩܰܕܺܝܫܳܐ: ܕܫܰܕܰܪ ܠܰܒܪܶܗ ܩܰܕܺܝܫܳܐ. ܘܶܐܬܺܝܠܶܕ ܡܶܢ ܒܰܪ̱ܬ ܕܰܘܺܝܕ: ܘܚܰܕܺܝ ܠܝܰܘܣܶܦ ܒܡܰܘܠܳܕܶܗ܀

ܫܽܘܒܚܳܐ

ܡܶܢ ܫܶܠܝܳܐ ܡܛܳܐ ܐܺܝܙܓܰܕܳܐ: ܘܥܰܡ ܟܺܐܢܳܐ ܝܰܘܣܶܦ ܡܰܠܶܠ: ܕܳܐܘ ܒܰܪ ܕܰܘܺܝܕ ܠܳܐ ܬܶܗܘܶܐ: ܛܳܠܽܘܡܳܐ ܠܰܡܒܰܪܰܟܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܬܶܫܡܶܫܬܳܐ ܪܰܡܫܳܝܬܳܐ

ܐܳܡܰܪ ܝܰܘܣܶܦ ܠܰܒܬܽܘܠܬܳܐ܆ ܐܳܘ ܛܠܺܝܬܳܐ ܡܰܢ ܐܰܗܶܠ ܒܶܟܝ܆ ܘܡܰܢ ܚܰܠܶܨ ܡܰܪܓܳܢܺܝܬܶܟܝ. ܘܰܫܩܰܠ ܫܪܳܪܳܐ ܕܢܰܟܦܽܘܬܶܟܝ܆ ܘܡܰܢ ܩܰܨܶܨ ܓܶܦܰܝ̈ ܫܽܘܦܪܶܟܝ܆ ܘܥܰܒܕܶܟܝ ܚܶܣܕܳܐ ܠܝܳܕܽܘܥܰܝ̈ܟܝ܀

ܒܰܥܪܽܘܒܬܳܐ ܒܰܬܫܰܥܫܳܥܺܝ̈ܢ܆ ܚܳܪܶܬ ܘܰܚܙܺܝܬ ܢܽܘܪܳܢܳܐ܆ ܡܶܢ ܪܽܘܚܩܳܐ ܫܠܳܡܳܐ ܝܰܗ̱ܒ ܠܺܝ܆ ܘܡܶܢ ܩܽܘܪܒܳܐ ܒܪܶܟ ܘܰܣܓܶܕ ܠܺܝ܆ ܘܶܐܡܰܪ ܠܺܝ ܫܠܳܡܳܐ ܥܰܡܶܟܝ܆ ܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ܀

ܒܦܶܠܓܶܗ ܕܠܺܠܝܳܐ ܫܰܕܰܪ ܗ̱ܘܳܐ܆ ܡܳܪܳܐ ܕܥܺܝܪ̈ܶܐ ܠܓܰܒܪܺܐܶܝܠ܆ ܘܰܢܚܶܬ ܩܳܡ ܥܰܠ ܬܰܫܘܺܝܬܶܗ܆ ܕܝܰܘܣܶܦ ܟܺܐܢܳܐ ܟܰܕ ܕܰܡܺܝܟ܆ ܘܚܰܘܺܝ ܠܶܗ ܕܡܶܢ ܪܽܘܚ ܩܽܘܕܫܳܐ܆ ܐܺܝܬܰܘܗ̱ܝ ܒܰܛܢܳܐ ܕܰܕܟܺܝܬܳܐ܀

ܫܽܘܒܚܳܐ

ܫܽܘܒܚܳܐ ܠܪܳܡܳܐ ܕܶܐܬܡܰܟܰܟ܆ ܘܰܗܘܳܐ ܥܽܘܠܳܐ ܡܶܢ ܡܰܪܝܰܡ܆ ܓܠܳܐ ܐ̱ܪܳܙܳܐ ܠܝܰܘܣܶܦ ܟܺܐܢܳܐ܆ ܘܶܐܡܰܪ ܠܶܗ ܕܠܳܐ ܬܶܬܦܰܠܰܓ܆ ܥܰܠ ܒܰܛܢܳܗ̇ ܕܛܽܘܒܳܢܺܝܬܳܐ܆ ܕܡܶܢ ܪܽܘܚܳܐ ܕܩܽܘܕܫܳܐ ܐܺܝܬܰܘܗ̱ܝ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܪܳܥܶܡ ܩܳܠܶܗ ܕܫܺܝܦܽܘܪܳܐ

ܚܰܕܽܘܬܳܐ ܘܰܦܨܺܝܚܽܘܬܳܐ܆ ܐܶܬܥܰܛܰܦ ܝܰܘܣܶܦ ܟܺܐܢܳܐ܆ ܟܰܕ ܩܰܒܶܠ ܗ̱ܘܳܐ ܓܶܠܝܳܢܳܐ܆ ܡܶܢ ܚܰܝܠܳܐ ܐܰܠܳܗܳܝܳܐ܆ ܥܰܠ ܒܰܛܢܳܐ ܕܰܡܒܰܪܰܟܬܳܐ܆ ܒܬܽܘܠܬܳܐ ܡܰܪܝܰܡ ܘܰܐܘܕܺܝ ܟܰܕ ܐܳܡܰܪ܆ ܡܰܘܕܶܐ ܐ̱ܢܳܐ ܒܳܟ ܡܳܪܝ ܘܰܐܠܳܗܝ܆ ܕܶܐܬܒܰܣܰܪܬ ܕܠܳܐ ܫܽܘܓܢܳܝܳܐ܆ ܡܶܛܽـ݉ܠ ܦܽܘܪܩܳܢܳܐ܆ ܕܓܶܢܣܳܐ ܡܚܺܝܠܳܐ ܕܒܶܝܬ ܐܳܕܳܡ܆ ܫܽܘܒܚܳܐ ܠܚܰܝܠܳܐ ܬܠܺܝܬܳܝܳܐ܆ ܕܰܐܠܳܗܽܘܬܳܐ ܕܠܳܐ ܡܶܣܬܰܝܰܟ ܓܶܠܝܳܢܳܗ̇܀

ܫܽܘܒܚܳܐ

ܠܳܟ ܬܶܫܒܽܘܚܬܳܐ ܐܰܠܳܗܳܐ܆ ܕܠܳܐ ܡܶܣܬܰܝܟܳܐ ܪܰܒܽܘܬܳܟ܆ ܘܰܫܪܰܝܬ ܒܥܽܘܒܳܗ̇ ܕܒܰܪ̱ܬ ܐ̱ܢܳܫ̈ܳܐ܆ ܘܰܐܝܟ ܥܽܘܠܳܐ ܚܰܘܺܝܬ ܢܰܦܫܳܟ܆ ܘܰܒܝܰܕ ܥܺܝܪܳܐ ܓܠܰܝܬ ܠܟܺܐܢܳܐ܆ ܐ̱ܪܳܙܳܐ ܕܒܰܛܢܳܗ̇ ܕܰܒܬܽܘܠܬܳܐ ܡܰܪܝܰܡ܆ ܕܗܽܘ ܫܳܪܶܐ ܫܽܘܠܛܳܢܰܝ̈ܗܽܘܢ܆ ܕܡܰܘܬܳܐ ܝܰܥܢܳܐ ܘܣܳܛܳܢܳܐ܆ ܫܽܘ݉ܒܚܳܐ ܠܗܰܘ ܨܶܡܚܳܐ܆ ܕܡܶܢ ܥܽܘܒܳܐ ܕܰܐܒܳܐ ܕܢܰܚ ܠܰܢ܆ ܘܰܚܙܳܝܗ̱ܝ ܚܶܫܽܘܟܳܐ ܘܰܥܪܰܩ܆ ܘܰܐܙܠܶܓ ܢܽܘܗܪܶܗ ܒܥܺܕܬܳܐ ܦܪܺܝܩܰܬ ܒܰܨܠܺܝܒܶܗ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܩܳܝܳܐ
ܡܶܢ ܪܽܘܡܺܝ ܡܕܺܝܢܰܬ ܡܰܠ̈ܟܶܐ

ܟܰܕ ܐܶܣܬܰܒܰܪ ܗ̱ܘܳܐ ܝܰܘܣܶܦ ܡܶܢ ܡܰܠܰܐܟܳܐ܆ ܡܶܛܽܠ ܒܰܛܢܳܗ̇ ܕܰܒܬܽܘܠܬܳܐ ܕܡܶܢ ܪܽܘܚܰܐ ܗ̱ܘ ܕܩܽܘܕܫܳܐ܆ ܐܶܬܬܥܺܝܪ ܟܺܐܢܳܐ܆ ܘܩܳܡ ܗ̱ܘܳܐ ܟܰܕ ܚܳܕܶܐ܆ ܘܣܳܓܶܕ ܠܡܰܪܝܰܡ܆ ܘܗܳܟܰܢ ܐܳܡܰܪ ܗ̱ܘܳܐ܆ ܣܳܓܶܕ ܐ̱ܢܳܐ ܠܶܟܝ ܐܳܘ ܡܰܪܝܰܡ ܒܺܝܪܬܳܐ ܚܬܺܝܡܬܳܐ܆ ܕܰܫܪܳܐ ܒܶܟܝ ܒܰܪ ܐܰܠܳܗܳܐ ܘܚܰܝܠܳܐ ܕܪܽܘܚ ܩܽܘܕܫܳܐ܆ ܗ̄ܘܗ̄܀

ܫܽܘܒܚܳܐ

ܝܽܘ̈ܕܳܝܶܐ ܐܶܟܰܠܘ ܩܰܪ̈ܨܶܝܗ̇ ܕܛܽܘܒܳܢܺܝܬܳܐ܆ ܘܶܐܡܰܪܘ ܠܶܗ ܠܝܰܘܣܶܦ ܕܰܫܪܺܝܗ̇ ܕܡܶܢ ܓܰܘܪܳܐ ܒܰܛܢܳܐ܆ ܘܶܐܡܰܪ ܠܗܽܘܢ܆ ܕܰܕܟܺܝܬܳܐ ܐܺܝܬܶܝܗ̇܆ ܘܰܒܒܶܝܬ ܩܽܘܕܫܳܐ܆ ܠܘܳܬܰܢ ܐܶܬܪܰܒܝܰܬ܆ ܘܡܶܢ ܛܰܠܝܽܘܬܳܗ̇ ܟܢܺܝܟܳܐ ܗ̱ܘܳܬ ܘܩܰܕܺܝܫܳܐ ܗ̱ܘܳܬ܆ ܘܡܶܢ ܪܽܘܚܩܽܘܕܫܳܐ ܗܘܳܐ ܒܰܛܢܳܗ̇ ܕܡܶܢ ܥܺܝܪܳܐ ܝܶܠܦܶܬ܆ ܗ̄ܘܗ̄܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܦܶܬܓܳܡܳܐ: ܗܳܝܕܶܝܢ ܡܡܰܠܶܠ ܒܚܶܙܘܳܢ̈ܶܐ ܥܰܡ ܙܰܕܺܝܩܰܘ̈ܗ̱ܝ܆ ܘܶܐܡܰܪ ܕܣܳܡܶܬ ܥܽܘܗܕܳܢܳܐ ܠܓܰܒܪܳܐ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܒܪܳܐ ܕܒܰܨܠܺܝܒܶܗ ܦܰܪܩܳܗ̇ ܠܥܺܕܬܶܗ

ܨܠܽܘܬܳܟ ܥܰܡܰܢ ܝܰܘܣܶܦ ܟܺܐܢܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܢܚܶܬ ܐܺܝܙܓܰܕܳܐ ܘܰܐܝܬܺܝ ܣܒܰܪܬܳܐ ܠܛܽܘܒܳܢܺܝܬܳܐ܆ ܘܰܓܠܳܐ ܐ̱ܪܳܙܳܐ ܠܝܰܘܣܶܦ ܓܰܒܪܳܗ̇ ܕܰܡܗܰܝܡܰܢܬܳܐ܆ ܩܪܳܐ ܘܶܐܡܰܪ ܠܶܗ ܐܳܘ ܒܰܪ ܕܰܘܺܝܕ ܠܳܐ ܬܶܬܦܰܠܰܓ܆ ܕܗܰܘ ܕܰܫܪܶܐ ܒܳܗ̇ ܒܰܪ ܥܶܠܳܝܰܐ ܗ̱ܘ ܫܰܪܺܝܪܳܐܺܝܬ܀

ܫܽܘܒܚܳܐ ܠܰܐܒܳܐ ܕܫܰܕܰܪ ܠܰܒܪܶܗ ܨܶܝܕ ܒܰܪ̱ܬ ܕܰܘܺܝܕ܆ ܘܣܶܓܕܬܳܐ ܠܰܒܪܳܐ ܕܰܒܝܰܕ ܥܺܝܪܳܐ ܫܰܪܪܶܗ ܠܝܰܘܣܶܦ܆ ܬܰܘܕܺܝ ܠܪܽܘܚܳܐ ܣܳܦܪܳܐ ܕܡܰܠܶܦ ܫܰܪܺܝܪ̈ܳܬܳܐ܆ ܬܠܺܝܬܳܝܽܘܬܳܐ ܚܰܕ ܐܰܠܳܗܳܐ ܠܶܗ ܬܶܫܒܽܘܚܬܳܐ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀