ܒܝܽܘܡ 15 ܐܝܳܪ

ܩܝܢܬܐ ܐ

ܦܬܓܡܐ:

ܟܽܠܳܗ̇ ܫܽܘܒܚܳܐ ܕܒܰܪܬ ܡܰܠܟܳܐ ܡܶܢ ܠܓܰܘ. ܘܰܡܨܰܒܰܬ ܠܒܽܘܫܳܗ̇ ܒܕܰܗܒܳܐ ܛܳܒܳܐ ܗ̄܀

ܬܒܪܬ‌ܐ:

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ: ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܰܨ̈ܠܰܘܳܬܶܟܝ ܡܳܪܝܳܐ ܢܒܰܛܶܠ ܫܰܒܛܳܐ ܕܪܽܘܓܙܳܐ: ܡܶܢ ܟܽܠ ܐܰܝܢܳܐ ܕܩܰܠܶܣ ܥܺܐܕܶܟܝ ܒܗܰܝܡܳܢܽܘܬܳܐ܀

ܩܕܡ ܐܘܢܓܠܝܘܢ - H

ܐܶܬܢܶܐ ܫܽܘܦܪ̈ܰܝܟܝ ܬܳܗܰܪ ܐ̱ܢܳܐ: ܡܰܪܝܰܡ ܒܰܪ̱ܬ ܕܰܘܺܝܕ: ܘܕܺܐܡܰܪ ܫܰܪܒܶܟܝ ܠܳܐ ܡܨܶܐ ܐ̱ܢܳܐ: ܒܬܽܘܠܬܳܐ ܩܰܕܺܝܫܬܳܐ܀

ܒܪܺܝܟܬܳܐ ܒܢܶܫ̈ܶܐ ܐܰܢ̱ܬܝ ܐܺܝܬܰܝܟܝ: ܡܰܪܝܰܡ ܒܰܪ̱ܬ ܕܰܘܺܝܕ: ܘܰܒܪܺܝܟ ܦܺܐܪܳܐ ܕܰܒܟܰܪܣܶܟܝ: ܐܶܡܪܰܬ ܐܶܠܺܝܫܒܰܥ܀

ܛܽܘܒܰܝܟܝ ܐܳܦ ܠܶܟܝ ܘܠܰܐܒܳܗܰܝ̈ܟܝ: ܡܰܪܝܰܡ ܒܰܪ̱ܬ ܕܰܘܺܝܕ: ܘܛܽܘܒܰܘܗ̱ܝ ܠܰܐܝܢܳܐ ܕܰܒܟܽܠ ܫܳܥ: ܛܽܘܒܳܐ ܝܳܗܶܒ ܠܶܟܝ܀

ܫܡܰܝ̈ܳܢܶܐ ܥܰܡ ܐܰܪ̈ܥܳܢܶܐ: ܡܰܪܝܰܡ ܒܰܪ̱ܬ ܕܰܘܺܝܕ: ܚܳܕܶܝܢ ܒܝܰܘܡܳܐ ܕܕܽܘܟܪܳܢܶܟܝ: ܨܠܽܘܬܶܟܝ ܬܥܰܕܰܪ ܠܰܢ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ - H

ܗܳܐ ܫܶܒܰܠ ܚܰܝ̈ܶܐ ܫܶܘܚܰܬ: ܡܶܢ ܚܰܩܠܳܐ ܒܪܺܝܟܬܳܐ. ܩܽܘܡܘ ܟܰܦ̈ܢܶܐ ܩܛܽܘܦܽܘܢ ܡܶܢܳܗ̇: ܬܽܘܪܣܳܝ ܢܰܦ̈ܫܳܬܟܽܘܢ. ܕܟܰܦܢܺܝܢ ܐܢ̱ܬܽܘܢ. ܘܗܳܫܳܐ ܣܳܒܥܺܝܢ ܐܢ̱ܬܽܘܢ. ܘܕܰܨܗܶܝܢ ܗܘܰܝܬܽܘܢ. ܘܗܳܫܳܐ ܪܳܘܶܝܬܽܘܢ. ܐܽܘܟܠܳܗ̇ ܣܰܒܥܰܐ ܗܘ ܕܰܠܥܳܠܰܡ: ܘܚܰܝ̈ܶܐ ܕܠܳܐ ܡܰܘܦܶܝܢ. ܚܨܽܘܕܘ ܡܶܢܳܗ̇ ܟܰܦܳܐ ܘܰܩܢܰܘ: ܛܽܘ̈ܒܶܐ ܕܠܳܐ ܦܳܛܪܺܝܢ ܗ̄ܘܗ̄܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܩܽܘܩܳܝܳܐ - H

ܟܽܠܳܗ̇ ܐܰܪܥܳܐ ܕܶܐܦܶܣܳܘܣ܆ ܛܰܠܳܐ ܪܶܣܡܰܬ. ܟܰܕ ܐܰܝܬܺܝ ܡܳܪܝ ܝܽܘܚܰܢܳܢ܆ ܟܬܳܒ̈ܶܐ ܕܰܒܬܽܘܠܬܳܐ: ܕܰܪܫܺܝܡ ܗ̱ܘܳܐ ܒܗܽܘܢ. ܕܢܶܗܘܶܐ ܕܽܘܟܪܳܢܳܐ. ܕܰܡܒܰܪܰܟܬܳܐ. ܬܠܳܬ ܙܰܒܢܺܝ̈ܢ ܒܫܰܢ̱ܬܳܐ. ܒܟܳܢܽܘܢ ܢܶܗܘܶܐ ܥܰܠ ܙܰܪ̈ܥܶܐ. ܘܒܺܐܝܳܪ ܥܰܠ ܫܶܒ̈ܠܶܐ. ܘܒܳܐܒ ܝܰܪܚܳܐ ܡܶܛܽܠ ܓܽܘ̈ܦܢܶܐ. ܕܐ̱ܪܳܙ ܚܰܝ̈ܶܐ ܨܺܝܪ ܒܗܶܝܢ ܗ̄ ܨܠܽܘܬܳܗ̇ ܬܥܰܕܰܪ ܠܰܢ܀

ܠܘܛܢܝܐ ܒܩ̄: ܢܫܰܒܰܚ ܘܢܰܘܕܶܐ - H

ܫܶܒܰܠ ܚܰܝ̈ܶܐ ܕܢܰܚ ܡܶܢ ܡܰܪܝܰܡ ܘܰܐܚܺܝ ܠܥܳܠܡܳܐ: ܘܬܰܪܣܺܝ ܘܣܰܒܰܥ ܡܶܢ ܟܰܦܢܽܘܬܳܐ ܠܟܽܠܗܽܘܢ ܥܰܡ̱̈ܡܶܐ܀

ܫܶܒܰܠ ܚܰܝ̈ܶܐ ܣܠܶܩ ܡܶܢ ܡܰܪܝܰܡ ܒܪܺܝܟܰܬ ܒܢܶܫ̈ܶܐ: ܘܚܰܪܰܪ ܠܰܐܪܥܳܐ ܡܶܢ ܫܽܘܥܒܳܕܳܐ ܕܫܺܐܕ̈ܶܐ ܒܺܝ̣̈ܫܶܐ܀

ܛܽܘܒܰܝܟܝ ܡܰܪܝܰܡ ܕܟܰܦܳܐ ܕܫܽܘܒܚܳܐ ܫܘܰܚ ܡܶܢ ܚܰܩܠܶܟܝ: ܘܰܗܘܳܐ ܠܰܚܡܳܐ ܠܟܰܦ̈ܢܶܐ ܕܰܐܪܥܳܐ ܘܣܰܒܰܥ ܐܶܢܽܘܢ܀

ܛܽܘܒܰܝܟܝ ܡܰܪܝܰܡ ܡܶܢ ܟܽܠ ܦܽܘܡܺܝ̈ܢ ܐܳܦ ܠܶܫܳܢܺܝ̈ܢ: ܕܒܰܒܪܶܟܝ ܩܢܰܝܢܰܢ: ܫܶܒܰܠ ܚܰܝ̈ܶܐ ܘܥܽܘܬܪܳܐ ܪܰܒܳܐ܀

ܠܘܛܢܝܐ ܒܩ̄: ܚ : ܙ ܠܬܶܫܒܽܘܚܬܶܗ ܕܡܳܪܝܳܐ - H

ܫܶܒܠܳܐ ܒܪܺܝܟܬܳܐ ܕܛܰܠܳܐ ܩܰܒܠܰܬ: ܡܶܢ ܥܢܳܢܳܐ ܕܰܐܠܳܗܽܘܬܳܐ. ܘܡܶܢ ܪܽܘܚܩܽܘܕܫܳܐ ܒܶܛܢܰܬ ܘܝܰܒܠܰܬ: ܫܶܒܰܠ ܚܰܝ̈ܶܐ ܠܐܢܳܫܽܘܬܳܐ܀

ܒܗܳܕ ܫܶܒܠܳܐ ܟܳܣܳܐ ܚܡܺܝܪ ܚܰܝ̈ܶܐ: ܕܒܶܗ ܡܽܘܠܳܝ ܟܽܠ ܣܽܘܢܩܳܢܳܐ. ܐܽܘܟܠܶܗ ܦܳܪܶܩ ܡܶܢ ܙܢܰܝ̈ ܘܳܝ̈ܶܐ: ܘܡܰܩܢܶܐ ܚܰܝ̈ܶܐ ܘܦܽܘܪܩܳܢܳܐ܀

ܓܰܙܳܐ ܕܪ̈ܰܚܡܶܐ ܘܝܰܡܺܝܢ ܥܶܕܪܳܐ: ܘܢܶܒܥܳܐ ܕܚܰܝ̈ܶܐ ܘܛܳܒ̈ܳܬܳܐ. ܠܶܟܝܽ ܗ̱ܘ ܝܳܐܝܳܐ ܪܰܒܽܘܬ ܗܶܕܪܳܐ: ܘܛܽܘܒܳܐ ܡܶܢ ܟܽܠ ܫܰܪ̈ܒܳܬܳܐ܀

ܒܶܟܝ ܡܶܬܓܰܘܣܳܐ ܥܺܕܬܳܐ ܘܝܰܠ̈ܕܶܝܗ̇: ܐܶܡܳܐ ܡܰܠܝܰܬ ܛܰܝܒܽܘܬܳܐ. ܒܥܳܝ ܡܶܢ ܒܶܪܝ ܕܰܒܚܽܘܒܶܗ ܢܗܰܕܶܝܗ̇: ܠܽܐܘܪܚܳܐ ܕܫܰܝܢܳܐ ܘܰܐܘܝܽܘܬܳܐ܀

ܗܫܐ ܚܙܝ ܛܟܣܐ ܕܙܘܝܚܐ ܕܨܠܝܒܐ ܒܝܘܡ ܥܐܕܝ̈ܗ̇ ܕܒܬܘܠܬܐ ܩܕܝܫܬܐ ܡܪܝܡ

ܚܘܬܡܐ ܒܩ̄: ܗܰܒܠܰܢ ܡܳܪܰܢ - H

ܐܰܢ̱ܬܝ ܗܺܝ ܡܰܪܝܰܡ ܫܶܒܰܠ ܚܰܝ̈ܶܐ: ܕܡܶܢ ܥܽܘܒܶܟܝ ܫܘܰܚ ܠܰܢ ܐܽܘܟܠܳܐ ܕܚܰܝ̈ܶܐ. ܐܰܢ̱ܬܝ ܗܺܝ ܐܶܡܳܐ ܩܽܘܒܬܳܐ ܚܕܰܬܳܐ: ܕܡܰܝ̈ܳܐ ܡܰܚ̈ܝܳܢܶܐ ܠܥܳܠܡܳܐ ܝܶܗܒܰܬ܀

ܚܘܬܡܐ ܐܚܪܢܐ ܒܩ̄: ܗܳܐ ܩܛܺܝܠܽ ܗܘ - H

ܛܽܘܒܰܝܟܝ ܒܰܪܬ ܕܰܘܺܝܕ: ܚܰܩܠܳܐ ܒܪܺܝܟܬܳܐ. ܕܡܶܢܶܟܝ ܕܢܰܚ ܫܶܒܰܠ ܚܰܝ̈ܶܐ ܠܥܳܠܡܳܐ. ܕܒܶܗܽ ܗ̱ܘ ܣܒܰܥܘ ܟܰܦ̈ܢܶܐ ܘܰܪܘܺܝܘ ܨܗܰܝ̈ܳܐ. ܘܶܐܬܚܰܪܰܪܘ ܥܰܡ̱̈ܡܶܐ ܡܶܢ ܫܽܘܥܒܳܕܳܐ܀