ܩܝܢܬܐ ܒ

ܦܬܓܡܐ:

ܒܢܳܐ ܥܰܠ ܪܰܘܡܳܐ ܡܰܩܕܫܶܗ: ܘܰܐܬܩܢܶܗ ܒܰܐܪܥܳܐ ܥܕܰܡܳܐ ܠܥܳܠܰܡ ܗ̄܀

ܬܒܪܬ‌ܐ:

ܐܰܘܕܳܝ ܥܺܕܬܳܐ ܒܰܙܡܺܝܪ̈ܳܬܶܟܝ̱ ܫܰܦܺܝܪ̈ܳܬܳܐ: ܘܩܰܪܶܒ ܠܰܒܪܳܐ ܕܳܫܢ̈ܶܐ ܕܫܽܘܒܚܳܐ ܒܝܽܘܡ ܚܽܘܕܳܬܶܟܝ̱܀

ܐܰܝܢܳܐ ܕܡܰܩܪܶܒ ܥܰܡܶܟܝ̱ ܥܺܕܬܳܐ ܣܽܘܣܝܶܗ ܢܶܦܶܠ: ܘܰܒܗܰܘ ܓܶܐܪܳܐ ܕܡܳܬܚܳܐ ܩܶܫܬܶܗ ܒܣܶܛܪܶܗ ܢܶܒܠܰܥ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ - H

ܡܳܐ ܫܰܦܺܝ̣ܪܰܬܝ̱ ܒܰܪܬ ܥܰܡ̱̈ܡܶܐ ܡܳܐ ܫܰܦܺܝܪܰܬܝ̱. ܫܠܶܝܡܽܘܢ ܡܰܠܟܳܐ ܡܢܰܨܰܪ ܠܶܟܝ̱ ܥܺܕܬܳܐ ܩܰܕܺܝܫܬܳܐ. ܟܰܟܳܪܺܝܬܳܐ ܡܰܛܦ̈ܳܢ ܣܶܦܘ̈ܳܬܶܟܝ̱. ܘܪܺܝܚܳܐ ܕܡܳܐܢܰܝ̈ܟܝ̱ ܐܰܝܟ ܘܰܪܕܳܐ ܒܢܺܝܣܳܢ. ܟܽܠܶܟܝ̱ ܥܺܕܬܳܐ ܫܰܦܺܝܪܰܬܝ̱ ܘܡܽܘܡܳܐ ܠܳܐ ܐܺܝܬ ܒܶܟܝ̱. ܘܡܰܠܟܳܐ ܡܫܺܝܚܳܐ ܡܢܰܛܰܪ ܠܶܟܝ̱ ܕܠܰܨܠܺܝ̣ܒܶܗ ܣܳܓܕܰܬܝ̱ ܗ̄ܘܗ̄܀

ܠܘܛܢܝܐ ܒܩ̄: ܕܰܚܛܳܐ ܠܳܐ ܢܶܚܛܶܐ - H

ܡܳܐ ܫܒܺܝ̣ܚܰܬܝ̱ ܥܺܕܬܳܐ: ܬܪܺܝܨܰܬ ܬܰܘܕܺܝܬܳܐ. ܕܰܐܒܳܐ ܒܺܐܝ̣ܕܶܗ ܢܨܰܒ: ܒܶܢܝܳܢܳܐ ܕܺܝܠܶܟܝ̱. ܣܳܡܘ ܢܒܺܝ̈ܶܐ ܐܶܣܰܝ̈ܟܝ̱: ܘܰܫܠܺܝ̈ܚܶܐ ܕܽܘܡܣܰܝ̈ܟܝ̱. ܘܰܨܠܺܝܒܳܐ ܕܰܒܪܳܐ: ܣܳܡܟܳܐ ܕܰܬܛܠܝܺܠܶܟܝ̱܀

ܒܶܢܝܳܢܶܟܝ̱ ܓܰܐܝܳܐ: ܘܗܶܕܪܶܟܝ̱ ܛܳܒ ܦܰܐܝܳܐ. ܕܕܶܡ ܣܳܗ̈ܕܰܝ ܩܽܘܫܬܳܐ: ܗܳܐ ܡܨܰܒܶܬ ܬܰܪ̈ܥܰܝܟܝ̱. ܟܰܕ ܫܪܳܪܳܐ ܓܰܠܝܳܐ: ܢܺܝܫܶܟܝ̱ ܗ̱ܘ ܡܥܰܠܝܳܐ. ܗܽܘ ܒܚܰܝܠܶܗ ܣܳܚܶܦ: ܠܣܳܩܽܘܪ̈ܶܐ ܐܳܪ̈ܥܰܝܟܝ̱܀

ܣܕܰܪ ܠܶܟܝ̱ ܦܳܬܽܘܪܳܐ: ܕܪܽܘܚܳܐ ܘܰܕܢܽܘܪܳܐ. ܩܢܽܘܡ ܦܰܓܪܶܗ ܘܰܕܡܶܗ: ܕܝܶܫܽܘܥ ܠܚܽܘܪܳܪܶܟܝ. ܘܩܰܕܫܶܟܝ̱ ܒܬܰܘܕܺܝܬܳܐ: ܘܐ̱ܪܳܙ ܡܰܥܡܽܘܕܺܝܬܳܐ. ܢܺܝܫ ܣܺܝܡܰܬ ܒܢܰܝ̈ܳܐ: ܕܛܰܝܒܽܘ ܠܫܽܘܪܳܪܶܟܝ̱܀

ܚܕܳܝ ܬܪܺܝܨܰܬ ܫܽܘܒܚܳܐ: ܘܰܐܣܶܩܝ̱ ܩܳܠ ܫܽܘܒܚܳܐ. ܠܰܡܫܺܝܚܳܐ ܡܟܺܝܪܶܟܝ̱: ܘܰܡܥܰܫܢܳܢ ܪܺܝܫܶܟܝ̱. ܕܗܽܘ ܡܩܰܕܶܫ ܠܐܪ̈ܳܙܰܝܟܝ̱: ܘܰܡܢܰܛܰܪ ܠܝܰܠܕܰܝ̈ܟܝ̱. ܘܥܰܠ ܟܽܠܗܽܘܢ ܣܰܘܦܰܝ̈: ܬܺܒܶܝܠ ܡܪܺܝܡ ܢܺܝܫܶܟܝ̱܀

ܚܘܬܡܐ ܒܩ̄: ܡܫܺܝܚܳܐ ܐܶܬܝܠܶܕ - H

ܛܽܘܒܰܝܟܝ̱ ܒܰܪܬ ܥܰܡ̱̈ܡܶܐ: ܕܥܰܠ ܫܽܘܥܳܐ ܣܺܝܡܰܬܝ̱ ܕܰܒܪܳܐ ܡܫܺܝܚܳܐ: ܕܙܰܒܢܶܟܝ̱ ܒܰܕܡܶܗ ܝܰܩܺܝܪܳܐ: ܗܳܐ ܕܳܝܨܺܝܢ ܝܰܠ̈ܕܰܝܟܝ̱: ܒܝܰܘܡܳܐ ܕܚܽܘܕܳܬܶܟܝ̱ ܒܪܽܘܚܩܽܘܕܫܳܐ ܕܢܳܚܶܬ: ܡܩܰܕܶܫ ܐܰܬܪܳܐ ܕܰܫܟܺܝܢܬܶܗ܀