ܒܝܘܡ 15 ܐܒ

ܩܝܢܬܐ ܙ

ܦܬܓܡܐ:

ܒܩܽܘܪ̈ܒܳܢܶܐ ܬܺܐܙܰܠ ܠܡܰܠܟܳܐ: ܘܢܰܘܒܠܽܘܢ ܒܬܽܘ̈ܠܳܬܳܐ ܚܰܒܪ̈ܳܬܳܗ̇ ܒܳܬܪܳܗ̇ ܗ̄܀

ܬܒܪܬ‌ܐ:

ܨܠܽܘܬܶܟܝ̱ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ̱ ܥܰܡܰܢ: ܠܰܨܠܰܘ̈ܳܬܶܟܝ̱ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܰܨܠܰܘ̈ܳܬܶܟܝ̱ ܡܳܪܝܳܐ ܢܒܰܛܶܠ ܫܰܒܛܳܐ ܕܪܽܘܓܙܳܐ: ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܶܟܝ ܒܗܰܝܡܳܢܽܘܬܳܐ܀

ܩܕܡ ܐܘܢܓܠܝܘܢ

ܐܶܬܢܶܐ ܫܽܘܦܪ̈ܰܝܟܝ̱ ܬܳܗܰܪ ܐ̱ܢܳܐ܇ ܡܰܪܝܰܡ ܒܰܪܬ̣ ܕܰܘܝܕ܇ ܘܕܶܐܡܰܪ ܫܰܪܒܶܟ̣ܝ̱ ܠܐ ܡܨܶܐ ܐ̱ܢܳܐ܇ ܒܬ̣ܽܘܠܬܳܐ ܩܰܕܺܝܫܬܳܐ܀

ܒܪܺܝܟ̣ܬܳܐ ܒܢܶܫ̈ܶܐ ܐܰܢ̱ܬܝ̱ ܐܺܝܬ̣ܰܝܟܝ̱܇ ܡܰܪܝܰܡ ܒܰܪܬ̣ ܕܰܘܝܕ܇ ܘܰܒܪܺܝܟ ܦܺܐܪܳܐ ܕܰܒܟܰܪܣܶܟ̣ܝ̱܇ ܐܶܡܪܰܬ̣ ܐܶܠܺܝܫܒܰܥ܀

ܛܽܘܒܰܝܟܝ̱ ܐܳܦ ܠܶܟ̣ܝ̱ ܘܠܰܐܒܳܗܰܝ̈ܟܝ̱܇ ܡܰܪܝܰܡ ܒܰܪܬ̣ ܕܰܘܝܕ܇ ܘܛܽܘܒܰܘܗ̱ܝ̱ ܠܰܐܝܢܳܐ ܕܰܒܟܽܠܫܳܥ܇ ܛܽܘܒܳܐ ܝܳܗܶܒ ܠܶܟ̣ܝ̱܀

ܫܡܰܝ̈ܳܢܶܐ ܥܰܡ ܐܰܪ̈ܥܳܢܶܐ܇ ܡܰܪܝܰܡ ܒܰܪܬ̣ ܕܰܘܝܕ܇ ܚܳܕܶܝܢ ܒܝܰܘܡܳܐ ܕܕܽܘܟ̣ܪܳܢܶܟ̣ܝ̱܇ ܨܠܽܘܬ̣ܶܟ̣ܝ̱ ܬܥܰܕܰܪ ܠܰܢ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܝܳܠܕܰܬ ܐܰܠܳܗܳܐ ܒܬܽܘܠܬܳܐ: ܕܽܘܟܪܳܢܶܟܝ̱ ܠܒܽܘܪܟܬܳܐ. ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ: ܦܰܢܳܝ ܫܐܶܠܳـ̈ܬܗܽܘܢ. ܠܰܐܝܢܳܐ ܕܰܟܪܺܝܗ. ܗܰܒܝ ܠܶܗ ܚܽܘܠܡܳܢܳܐ. ܘܰܐܝܢܳܐ ܕܰܡܥܳܩ ܒܥܳܝ ܠܶܗ ܠܽܘܒܳܒܳܐ. ܘܰܐܝܢܳܐ ܕܒܺܝܫܳܐ ܫܳܚܶܩ ܠܶܗ ܛܪܽܘܕܺܝܘܗܝ ܡܶܢܶܗ. ܒܰܨܠܽܘܬܶܟܝ̱ ܘܰܒܒܳܥܽܘܬܶܟܝ̱ ܪ̈ܰܚܡܶܐ ܢܶܗܘܽܘܢ ܥܠܰܝܢ ܗ̄ ܨܠܽܘܬܶܟܝ̱ ܬܥܰܕܰܪ ܠܰܢ܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܩܽܘܩܳܝܳܐ

ܟܽܠܳܗ̇ ܐܰܪܥܳܐ ܕܶܐܦܶܣܳܘܣ܆ ܛܰܠܳܐ ܪܶܣܡܰܬ. ܟܰܕ ܐܰܝܬܺܝ ܡܳܪܝ ܝܽܘܚܰܢܳܢ܆ ܟܬܳܒ̈ܶܐ ܕܰܒܬܽܘܠܬܳܐ: ܕܰܪܫܺܝܡ ܗ̱ܘܳܐ ܒܗܽܘܢ. ܕܢܶܗܘܶܐ ܕܽܘܟܪܳܢܳܐ. ܕܰܡܒܰܪܰܟܬܳܐ. ܬܠܳܬ ܙܰܒܢܺܝ̈ܢ ܒܫܰܢ̱ܬܳܐ. ܒܟܳܢܽܘܢ ܢܶܗܘܶܐ ܥܰܠ ܙܰܪ̈ܥܶܐ. ܘܒܺܐܝܳܪ ܥܰܠ ܫܶܒ̈ܠܶܐ. ܘܒܳܐܒ ܝܰܪܚܳܐ ܡܶܛܽܠ ܓܽܘܦܢ̈ܶܐ. ܕܐ̱ܪܳܙ ܚܰܝ̈ܶܐ ܨܺܝܪ ܒܗܶܝܢ ܗ̄ ܨܠܽܘܬܳܗ̇ ܬܥܰܕܰܪ ܠܰܢ܀

ܠܘܛܢܝܐ ܒܩ̄: ܠܡܕܝܚ ܐܠܪܒ

ܪܳܡܰܬܝ ܡܰܪܝܰܡ ܡܰܠܝܰܬ ܛܽܘ̈ܒܶܐ: ܡܶܢ ܪܰܘܡܳܐ ܕܫܶܡܫܳܐ ܘܣܰܗܪܳܐ. ܪܰܒ ܐܺܝ̣ܩܳܪܶܟܝ̱ ܡܶܢ ܕܰܟܪ̈ܽܘܒܶܐ: ܐܳܘ ܐܶܡܳܐ ܝܳܠܕܰܬ ܢܽܘܗܪܳܐ܀

ܒܰܐܪܥܳܐ ܫܠܺܝ̣̈ܚܶܐ ܒܪܽܘܚܳܐ ܨܳܝܒܺܝܢ: ܕܰܠܦܰܓܪܶܟܝ̱ ܕܰܟܝܳܐ ܢܠܰܘܽܘܢ. ܒܪܰܘܡܳܐ ܥܺܝܪ̈ܶܐ ܒܙܰܘܚܳܐ ܡܛܰܝܒܺܝܢ: ܕܠܶܟܝ̱ ܟܽܠ ܐܺܝ̣ܩܳܪܳܐ ܢܚܰܘܽܘܢ܀

ܪܽܘܚܩܽܘܕܫܳܐ ܬܪܰܥ ܪܰܘܡܳܐ ܦܳܬܰܚ: ܕܰܠܢܰܦܫܶܟܝ̱ ܠܘܰܥܕܶܗ ܢܝܰܒܶܠ. ܘܰܒܪܶܟܝ̱ ܒܚܽܘܒܳܐ ܕܪ̈ܳܥܰܘܗܝ ܡܳܬܰܚ: ܕܰܠܦܰܓܪܶܟܝ̱ ܙܰܗܝܳܐ ܢܩܰܒܶܠ܀

ܒܬܽܘܠܬܳܐ ܕܰܫܘܳܬ ܕܬܶܗܘܶܐ ܢܰܘܣܳܐ: ܠܒܳܪܽܘܝܳܐ ܕܟܽܠܗܽܘܢ ܗܘ̈ܰܝܳܐ. ܟܶܢܦܶܟܝ̱ ܪܰܘܡܳܐ ܢܗܶܐ ܒܶܝܬ ܓܰܘܣܳܐ: ܠܟܽܠܗܽܘܢ ܡܚܺܝ̈ܠܶܐ ܘܕܳܘ̈ܰܝܳܐ܀

ܗܫܐ ܚܙܝ ܛܟܣܐ ܕܙܘܝܚܐ ܕܨܠܝܒܐ ܒܝܘܡ ܥܐܕܝ̈ܗ̇ ܕܒܬܘܠܬܐ ܩܕܝܫܬܐ ܡܪܝܡ

ܚܘܬܡܐ ܒܩ̄: ܗܳܢܰܘ ܝܰܪܚܳܐ

ܪ̈ܰܘܡܶܐ ܘܥܽܘܡ̈ܩܶܐ ܚܕܺܝܘ ܠܫܽܘܢܳܝܶܟܝ̱ ܐܶܡܶܗ ܕܢܽܘܗܪܳܐ. ܥܺܝܪ̈ܶܐ ܒܪܰܘܡܳܐ ܡܩܰܒܠܺܝܢ ܢܰܦܫܶܟܝ̱. ܘܐܢܳܫ̈ܳܐ ܒܬܶܗܪܳܐ ܡܠܰܘܶܝܢ ܦܰܓܪܶܟܝ̱. ܐܰܦܺܝܣܝ̱ ܠܝܰܠܕܶܟܝ̱ ܕܰܠܘܰܥܕܶܗ ܩܪܳܟܝ̱. ܢܚܽܘܣ ܥܰܠ ܟܶܢܫܰܢ܀

ܚܘܬܡܐ ܐܚܪܢܐ ܒܩ̄: ܠܡܰܪܝܰܡ ܝܳܠܕܰܬ ܐܠܳܗܳܐ

ܐܶܢ ܦܰܓܪܶܟܝ̱ ܪܰܚܺܝܩ ܡܶܢܰܢ ܩܰܕܺܝܫܬܳܐ: ܨܠܰܘ̈ܳܬܶܟܝ̱ ܥܰܡܰܢ ܐܶܢܶܝܢ ܒܟܽܠ ܥܶܕ̈ܳܢܺܝܢ. ܠܗܰܘ ܚܰܝܠܳܐ ܟܰܣܝܳܐ ܕܰܢܚܶܬ ܘܰܫܪܳܐ ܒܶܟܝ̱. ܐܶܬܟܰܫܰܦܝ̱ ܠܶܗ ܩܰܕܺܝܫܬܳܐ ܕܰܢܚܰܣܶܐ ܠܰܢ܀