ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܟܰܕ ܩܰܒܠܰܬ ܗ̱ܘܳܬ ܗܺܝ ܣܳܒܬܳܐ܆ ܒܰܛܢܳܐ ܪܓܺܝܓܳܐ ܕܝܽܘܚܰܢܳܢ. ܐܶܬܳܬ ܕܶܝܢ ܗܺܝ ܩܰܕܺܝܫܬܳܐ܆ ܕܬܶܣܥܪܺܝܗ̇ ܘܬܶܚܕܶܐ ܥܰܡܳܗ̇. ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐܶܬܡܰܠܝܰܬ ܗ̱ܘܳܬ ܪܽܘܚ ܩܽܘܕܫܳܐ. ܥܩܰܪܬܳܐ ܒܰܪ̱ܬ ܐܰܗܪܽܘܢ ܟܳܗܢܳܐ. ܘܫܰܪܝܰܬ ܕܬܶܙܡܰܪ ܠܰܒܬܽܘܠܬܳܐ܆ ܕܰܡܒܰܪܰܟܬܳܐ ܐܰܢ̱ܬܝ ܒ̈ܢܶܫܶܐ. ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܡܰܢ ܢܶܬܶܠ ܠܺܝ ܕܡܳܪܝ ܘܶܐܡܶܗ܆ ܢܺܐܬܽܘܢ ܘܢܶܚܙܽܘܢ ܡܶܣܟܺܢܽܘܬܝ. ܘܒܰܪ ܥܰܬܺܝܪܳܐ ܢܶܬܢܰܚܰܬ܆ ܕܰܠܒܰܪ ܡܶܣ̈ܟܺܢܶܐ ܢܶܣܥܽܘܪ. ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܆ ܕܰܐܪܟܶܢ ܪܰܘܡܳܐ ܕܪܰܒܽܘܬܶܗ. ܘܰܫܪܳܐ ܒܡܰܪܝܰܡ ܒܰܪ̱ܬ ܕܰܘܺܝܕ܆ ܘܰܨܒܳܐ ܕܢܶܣܥܽܘܪ ܟܳܪܽܘܙܶܗ. ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐ̱ܚܪܺܢܳܐ

ܙܳܚܰܬ ܣܶܠܩܰܬ ܒܰܪ̱ܬ ܕܰܘܺܝܕ܆ ܠܰܫܠܳܡܳܗ̇ ܕܗܳܝ ܒܰܪ̱ܬ ܐܰܗܪܽܘܢ܆ ܘܰܛܥܺܝܢܳܐ ܒܥܽܘܒܳܗ̇ ܕܰܟܝܳܐ܆ ܠܗܰܘ ܕܰܛܥܺܝܢ ܠܶܗ ܠܰܪܩܺܝܥܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܶܐܠܰܬ ܡܰܪܝܰܡ ܒܰܫܠܳܡܳܗ̇܆ ܕܶܐܠܺܝܫܒܰܥ ܐܰܢ̱ܬܰܬ ܙܟܰܪܝܳܐ܆ ܕܳܨ ܝܽܘܚܰܢܳܢ ܒܓܰܘ ܟܰܪܣܳܐ܆ ܘܰܚܕܺܝ ܗ̱ܘܳܐ ܠܽܘܩܒܰܠ ܡܳܪܶܗ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܡܒܰܪܰܟܬܳܐ ܐܺܝܬܰܝܟܝ ܒܢܶܫ̈ܶܐ܆ ܒܚܰܕܽܘܬܳܐ ܩܥܳܬ ܐܶܠܺܝܫܒܰܥ܆ ܕܗܰܘ ܕܰܫܡܰܝܳܐ ܡܠܶܝܢ ܡܶܢܶܗ܆ ܗܳܐ ܫܪܳܐ ܒܥܽܘܒܶܟܝ ܒܰܫܪܳܪܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܟܽܠ ܥܰܡ̱̈ܡܺܝܢ ܣܳܓܕܺܝܢ ܠܰܒܪܶܟܝ܆ ܘܟܽܠ ܠܶܫܳܢܺܝ̈ܢ ܠܶܗ ܢܰܘܕܽܘܢ܆ ܕܡܰܠܟܽܘܬܶܗ ܠܳܐ ܡܶܫܬܰܪܝܳܐ܆ ܘܺܐܝܬܰܘܗ̱ܝ ܡܳܪܝܳܐ ܐܰܠܳܗܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ
ܐܰܠܶܦܰܝܢܝ ܡܳܪܝܳܐ. ܐܽܪܘܚܳܐ ܕܟܽܠܗܽܘܢ

ܝܰܘܡܳܢ ܐܶܙܰܠ̱ܬ ܗ̱ܘܳܬ܆ ܒܬܽܘܠܬܳܐ ܡܰܪܝܰܡ ܒܰܪ̱ܬ ܕܰܘܺܝܕ܆ ܠܘܳܬ ܐܶܠܺܝܫܒܰܥ ܕܬܶܫܰܐܠ ܒܰܫܠܳܡܳܗ̇܆ ܘܕܳܨ ܗ̱ܘܳܐ ܒܚܰܕܽܘܬܳܐ܆ ܥܽܘܠܳܐ ܦܰܐܝܳܐ ܕܥܰܩܪܽܘܬܳܐ܆ ܕܰܚܙܳܐ ܠܡܳܪܶܗ ܕܰܫܪܶܐ ܒܰܛܠܺܝܬܳܐ܀

ܫܽܘܒܚܳܐ

ܫܽܘܒܚܳܐ ܠܗܰܘ ܚܰܝܠܳܐ܆ ܕܰܐܪܟܶܢ ܪܰܘܡܳܐ ܕܪܰܒܽܘܬܶܗ܆ ܘܰܫܪܳܐ ܒܡܰܪܝܰܡ ܡܶܛܽܠ ܦܽܘܪܩܳܢܰܢ܆ ܘܰܣܥܰܪ ܟܳܪܽܘܙܶܗ܆ ܘܩܰܒܶܠ ܣܶܓܕܬܳܐ ܒܓܰܘ ܟܰܪܣܳܐ܆ ܗܰܘ ܕܰܟܪ̈ܽܘܒܶܐ ܣܳܓܕܺܝܢ ܠܺܐܝܩܳܪܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܡܰܠܟܽܘܬ ܪܰܘܡܳܐ
ܡܰܠܟܳܐ ܡܫܺܝܚܳܐ: ܒܬܰܪܥܶܗ ܕܰܚܢܳܢܳܟ

ܠܛܽܘܪܳܐ ܕܺܝܗܽܘܕ: ܕܶܙܰܠ̱ܬ ܗ̱ܘܳܬ ܡܰܪܝܰܡ: ܕܬܶܫܰܐܠ ܒܰܫܠܳܡܳܗ̇ ܕܣܳܒܬܳܐ ܥܩܰܪܬܳܐ ܒܰܪ̱ܬ ܐܰܗܪܽܘܢ: ܘܰܛܥܺܝܢܳܐ ܠܗܰܘ ܕܰܛܥܺܝܢ ܟܽܠ: ܘܟܰܕ ܫܶܡܥܰܬ ܗ̱ܘܳܬ ܐܶܠܺܝܫܒܰܥ: ܫܠܳܡܳܐ ܫܰܦܝܳܐ ܕܰܒܬܽܘܠܬܳܐ: ܒܚܰܕܽܘܬܳܐ ܕܳܨ ܥܽܘܠܳܐ ܒܟܰܪܣܳܗ̇܀

ܫܽܘܒܚܳܐ

ܫܽܘܒܚܳܐ ܠܗܰܘ ܚܰܝܠܳܐ: ܕܰܛܥܺܝܢ ܒܰܚܢܳܢܶܗ ܠܰܫܡܰܝܳܐ ܘܠܰܐܪܥܳܐ: ܘܟܰܪܣܳܐ ܕܒܶܣܪܳܐ ܣܶܦܩܰܬ ܠܶܗ: ܟܰܕ ܟܝܳܢܶܗ ܠܳܐ ܡܶܣܬܰܝܰܟ: ܘܰܒܚܽܘܒܶܗ ܕܠܳܐ ܡܶܬܡܰܠܰܠ: ܐܶܬܳܐ ܕܢܶܣܥܽܘܪ ܟܳܪܽܘܙܶܗ: ܒܪܺܝܟ ܡܶܢ ܟܽܠ: ܝܰܠܕܶܗ ܕܥܶܠܳܝܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܒܪܺܝܟ ܕܶܐܬܡܰܟܰܟ ܡܶܛܽܠ ܦܽܘܪܩܳܢܰܢ܆ ܘܦܰܪܩܰܢ ܒܰܚܢܳܢܶܗ ܡܶܢ ܛܽܘܥܝܰܝ.

ܐܶܙܰܠ̱ܬ ܡܰܪܝܰܡ ܕܬܶܫܰܐܠ܆ ܫܠܳܡܳܗ̇ ܕܣܳܒܬܳܐ ܒܰܪ̱ܬ ܠܶܘܳܝ̈ܶܐ܆ ܘܰܛܥܺܝܢܳܐ ܠܶܗ ܒܥܽܘܒܳܗ̇܆ ܠܡܳܪܳܐ ܕܟܽܠܳܐ ܘܣܶܠܩܰܬ ܠܛܽܘܪܳܐ܆ ܘܰܫܡܰܥ ܡܶܚܕܳܐ܆ ܦܺܐܪܳܐ ܕܥܰܩܪ̈ܶܐ܆ ܫܠܳܡܳܐ ܕܡܳܪܶܗ܆ ܕܶܐܬܳܐ ܨܶܐܕܰܘܗ̱ܝ܆ ܫܰܪܺܝ ܕܳܐܶܨ ܗ̱ܘܳܐ܆ ܘܙܳܡܰܪ ܬܶܫܒܽܘܚܬܳܐ܆ ܥܽܘܠܳܐ ܒܓܰܘ ܟܰܪܣܳܐ ܕܝܳܠܶܕܬܶܗ܀

ܗܳܐ ܡܶܢ ܕܫܶܡܥܶܬ ܫܠܳܡܶܟܝ܆ ܐܳܘ ܒܰܪ̱ܬ ܕܰܘܺܝܕ ܕܳܨ ܥܽܘܠܳܐ ܒܟܰܪܣܝ܆ ܘܫܰܪܺܝ ܗ̱ܘܳܐ ܬܽܘܒ ܕܳܐܶܨ܆ ܠܽܘܩܒܰܠ ܡܳܪܶܗ ܕܶܐܬܳܐ ܘܣܰܥܪܶܗ܆ ܐܳܘ ܠܬܶܕܡܽܘܪܬܳܐ܆ ܕܡܳܪܳܐ ܠܥܰܒܕܶܗ܆ ܐܶܬܳܐ ܕܢܶܣܥܽܘܪ܆ ܒܰܒܛܺܝܠܽܘܬܳܐ܆ ܗܰܘ ܕܰܡܠܶܝܢ ܡܶܢܶܗ܆ ܫܡܰܝ̈ܳܐ ܐܳܦ ܐܰܪܥܳܐ܆ ܬܰܚܬܺܝ ܪܰܒܽܘܬܶܗ ܠܦܽܘܪܩܳܢܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܩܛܺܝܠ ܗ̱ܽܘ

ܥܽܘܢܺܝܬܳܐ: ܒܪܺܝܟ ܕܰܓܒܳܐ ܠܥܰܒܕܶܗ ܟܳܪܽܘܙ ܩܽܘܫܬܳܐ܆ ܘܫܰܕܪܶܗ ܐܺܝܙܓܰܕܳܐ ܕܢܰܟܪܶܙ ܩܽܘܕܡܰܘܗ̱ܝ.

ܛܽܘܒܰܝܟ ܝܽܘܚܰܢܳܢ. ܦܺܐܪܳܐ ܪܓܺܝܓܳܐ܆ ܕܰܒܥܽܘܒܳܐ ܕܣܰܬܳܐ. ܥܩܰܪܬܳܐ ܗܰܒܶܒܬ܆ ܒܟܰܪܣܳܐ ܡܕܰܝܶܨ ܗ̱ܘܰܝܬ. ܩܕܳܡ ܒܰܪ ܡܰܠܟܳܐ܆ ܟܰܕ ܐܶܬܳܐ ܕܢܶܕܢܰܚ܆ ܡܶܢ ܒܰܪ̱ܬ ܕܰܘܺܝܕ܀

ܗܳܐ ܡܶܢ ܕܰܢܦܰܠ ܗ̱ܘܳܐ. ܩܳܠܶܟܝ ܒܶܐܕܢܰܝ̈܆ ܒܚܰܕܽܘܬܳܐ ܪܰܒܬܳܐ. ܕܳܨ ܥܽܘܠܳܐ ܒܟܰܪܣܝ܆ ܛܽܘܒ ܠܰܐܝܕܳܐ ܕܗܰܝܡܢܰܬ. ܘܰܐܫܪܰܬ ܕܗܳܘܶܐ܆ ܘܡܶܫܬܰܡܠܶܐ ܡܶܕܶܡ܆ ܕܶܐܡܰܪ ܡܳܪܝܳܐ܀

ܠܳܐ ܬܶܬܪܰܗܒܺܝܢ ܠܶܟܝ. ܣܳܒܬܳܐ ܥܩܰܪܬܳܐ܆ ܕܶܐܡܰܪ ܡܰܠܰܐܟܳܐ. ܬܩܰܒܠܺܝܢ ܒܰܛܢܳܐ܆ ܘܶܐܢܳܐ ܛܥܺܝܢܳܐ ܐ̱ܢܳܐ. ܠܡܳܪܳܐ ܕܥܳܠ̈ܡܶܐ܆ ܘܓܰܒܪܳܐ ܠܳܐ ܚܟܺܝܡ ܠܺܝ܆ ܘܠܳܐ ܝܳܕܥܳܐ ܐ̱ܢܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܘܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܶܐܬܳܐ ܕܢܶܦܪܩܰܢ܆ ܒܪܺܝܟܽ ܗ̱ܘ ܕܰܣܥܰܪ ܥܰܒܕܶܗ܆ ܟܰܕ ܗܽܘ ܒܟܰܪܣܳܐ ܕܝܳܠܶܕܬܶܗ.

ܟܰܕ ܕܶܝܢ ܩܰܒܠܰܬ ܣܒܰܪܬܳܐ܆ ܗܕܺܝܪܬܳܐ ܕܢܶܫ̈ܶܐ ܡܰܪܝܰܡ܆ ܫܪܳܐ ܒܳܗ̇ ܪܽܘܚܳܐ ܕܩܽܘܕܫܳܐ܆ ܘܒܰܛܢܳܐ ܬܗܺܝܪܳܐ ܩܰܒܠܰܬ܆ ܐܶܙܰܠ̱ܬ ܕܬܶܚܙܶܐ ܒܪܶܚܡܬܳܐ܆ ܠܶܐܠܺܝܫܒܰܥ ܗܳܝ ܕܶܐܬܟܰܢܝܰܬ܆ ܡܶܢ ܡܰܠܰܐܟܳܐ ܐ̱ܚܝܳܢܬܳܗ̇܀

ܐܶܢ ܥܰܠ ܒܽܘܪ̈ܟܰܝܟܝ ܛܥܶܢܬܶܗ܆ ܘܠܳܐ ܩܰܪܶܒܬܝ ܠܶܗ ܕܪܳܫܳܐ܆ ܗܳܫܳܐ ܕܰܪܟܺܝܒ ܟܪ̈ܽܘܒܶܐ܆ ܘܙܳܝܥܺܝܢ ܡܶܢܶܗ ܣܪ̈ܳܦܶܐ܆ ܐܰܝܢܳܐ ܕܡܰܡܪܰܚ ܕܢܶܒܨܶܝܘܗ̱ܝ܆ ܟܡܳܐ ܟܰܝ ܢܶܒܠܰܥ ܡܚܺܝܠܳܐ܆ ܕܒܳܨܶܐ ܠܰܒܪܳܐ ܕܰܐܠܳܗܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܦܰܪܕܰܝܣܳܐ
ܝܶܫܽܘܥ ܒܪܶܗ ܕܰܐܒܳܐ ܗܘܺܝ ܠܰܢ

ܥܽܘܢܺܝܬܳܐ: ܫܽܘܒܚܳܐ ܠܕܰܫܦܰܪ ܠܶܗ ܘܰܫܪܳܐ ܒܓܰܘ ܟܰܪܣܳܐ: ܕܰܒܬܽܘܠܬܳܐ ܡܰܪܝܰܡ ܡܶܛܽܠ ܕܢܶܦܪܽܘܩ ܠܰܢ.

ܒܓܰܘ ܟܰܪܣܳܐ ܕܒܶܣܪܳܐ ܢܚܶܬ ܘܰܫܪܳܐ ܡܰܠܟܳܐ܆ ܕܰܥܬܺܝܕ ܗ̱ܘܳܐ ܕܢܶܬܓܠܶܐ ܠܦܽܘܪܩܳܢ ܒܢܰܝ̈ܢܳܫܳܐ܆ ܘܰܥܠܰܝܡܬܳܐ ܒܬܽܘܠܬܳܐ ܛܶܥܢܰܬ ܙܰܝܰܚܬܶܗ܆ ܘܰܠܘܳܬ ܐܶܠܺܝܫܒܰܥ ܐܰܫ݉ܩܠܰܬ܆ ܘܪܶܗܛܰܬ ܥܰܩܪܽܘܬܳܐ ܠܽܘܩܒܰܠ ܒܬܽܘܠܽܘܬܳܐ܆ ܘܕܳܨ ܥܽܘܠܳܐ ܒܟܰܪܣܳܐ ܠܽܘܩܒܰܠ ܒܳܪܽܘܝܶܗ܀

ܡܰܢܽܘ ܕܠܳܐ ܢܶܬܗܰܪ ܟܡܳܐ ܐܰܘܪܒܳܟ ܡܳܪܳܟ܆ ܟܰܕ ܐܰܢ̱ܬ ܒܓܰܘ ܟܰܪܣܳܐ ܗܽܘ ܒܡܰܪܒܥܳܐ ܒܬܽܘܠܳܐ܆ ܠܶܐܡܶܗ ܕܒܰܪ ܘܶܐܬܳܐ ܠܘܳܬܳܟ ܕܠܳܟ ܢܰܘܪܶܒ܆ ܘܟܰܕ ܬܽܘܒ ܡܛܳܐ ܙܰܒܢܳܐ ܕܢܶܬܥ݉ܡܶܕ ܪܺܝܫܶܗ ܣܳܡ ܩܽܘܕܡܰܝܟ ܒܝܽܘܪܕܢܳܢ ܕܰܐܢ̱ܬ ܬܰܥܡܕܺܝܘܗ̱ܝ܆ ܕܒܳܟ ܢܺܐܠܦܽܘܢ ܟܳܗ̈ܢܶܐ ܕܰܪ̈ܓܶܐ ܕܥܺܕ̈ܳܬܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܢܦܰܩܘ ܡܶܢ ܝܺܗܽܘܕ ܒܢܰܝ̈ ܝܺܣܪܳܐܶܝܠ

ܨܠܽܘܬܟܶܝܢ ܥܰܡܰܢ ܐܳܘ ܡܒܰܪ̈ܟܳܬܳܐ ܨܠܽܘܬܟܶܝܢ ܥܰܡܰܢ܆

ܠܰܨ̈ܠܰܘܳܬܟܶܝܢ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܐܶܙܰܠ̱ܬ ܡܰܪܝܰܡ ܨܶܝܕ ܐܶܠܺܝܫܒܰܥ ܘܰܛܥܺܝܢܳܐ ܠܶܗ܆ ܠܗܰܘ ܕܰܟܪ̈ܽܘܒܶܐ ܒܕܶܚܠܳܐ ܛܥܺܝܢܺܝܢ ܠܰܐܠܳܗܽܘܬܶܗ܆ ܫܶܡܥܰܬ ܣܳܒܬܳܐ ܫܠܳܡܳܐ ܫܰܦܝܳܐ ܕܛܽܘܒܳܢܺܝܬܳܐ܆ ܘܰܒܚܰܕܽܘܬܳܐ ܕܳܨ ܗ̱ܘܳܐ ܥܽܘܠܳܐ ܠܽܘܩܒܰܠ ܡܳܪܶܗ܀

ܐܶܬܳܬ ܐܰܝܠܬܳܐ ܘܰܛܥܺܝܢܳܐ ܠܶܗ ܠܰܐܝܠܳܐ ܥܠܰܝܡܳܐ܆ ܕܥܰܡ ܗܰܘ ܥܶܓܠܳܐ ܒܰܪ ܣܰܝܒܽܘܬܳܐ ܢܕܰܝܶܨ ܒܺܝܗܽܘܕ܆ ܓܳܚܰܬ ܣܶܠܩܰܬ ܥܢܳܢܳܐ ܡܰܪܝܰܡ ܡܰܠܝܰܬ ܪ̈ܰܚܡܶܐ܆ ܕܬܺܐܙܰܠ ܬܰܫܩܶܐ ܠܰܐܪܥܳܐ ܨܗܺܝܬܳܐ ܕܦܺܐܪܳܐ ܗܘܳܐ ܒܳܗ̇܀

ܒܰܨ̈ܠܰܘܳܬܟܶܝܢ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܟܶܝܢ ܒܗܰܝܡܳܢܽܘܬܳܐ܀