ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܥܰܡ ܗܳܢܽܘܢ ܕܰܠܥܶܠ

ܒܝܰܘܡܳܐ ܕܕܽܘܟܪܳܢܶܗ܆ ܕܩܰܕܺܝܫܳܐ ܡܳܪܝ ܒܰܪܨܰܘܡܳܐ ܚܳܕܝܳܐ ܥܺܕܬܳܐ܆ ܘܙܳܡܪܳܐ ܫܽܘܒܚܳܐ ܗܺܝ ܘܝܰܠ̈ܕܶܝܗ̇ ܒܓܰܘܳܗ̇܆ ܠܗܰܘ ܕܰܒܚܽܘܒܶܗ ܐܶܬܢܰܨܰܚ. ܨܠܽܘܬܶܗ ܥܰܡܰܢ܀

ܟܽܠ ܝܳܬܒܰܝ̈ ܐܰܪܥܳܐ܆ ܚܳܕܶܝܢ ܒܝܰܘܡܳܐ ܕܕܽܘܟܪܳܢܶܗ ܕܡܳܪܝ ܒܰܪܨܰܘܡܳܐ܆ ܘܰܒܚܰܕܽܘܬܳܐ ܠܕܰܝܪܶܗ ܗܳܐ ܪܳܗܛܺܝܢ܆ ܘܠܳܐ ܡܶܬܦܰܠܓܺܝܢ ܕܢܶܣܒܽܘܢ ܡܶܢܶܗ ܫܶܐܠܳــ̈ܬܗܽܘܢ܀

ܚܳܕ̈ܝܳܢ ܪ̈ܽܘܚܳܬܳܐ܆ ܕܰܐܒܳܗ̈ܳܬܳܐ ܩܰܕܺܝ̈ܫܶܐ ܘܙܳܡܪ̈ܳܢ ܫܽܘܒܚܳܐ. ܒܗܳܢܳܐ ܝܰܘܡܳܐ ܕܥܽܘܗܕܳܢܶܗ ܚܰܣܝܳܐ܆ ܕܡܳܪܝ ܒܰܪܨܰܘܡܳܐ ܩܰܕܺܝܫܳܐ܆ ܨܠܽܘܬܶܗ ܫܽܘܪܳܐ ܬܶܗܘܶܐ ܠܰܢ܀

ܐܶܬܟܰܫܰܦ ܐܳܘ ܐܰܒܽܘܢ܆ ܘܰܒܥܺܝ ܪ̈ܰܚܡܶܐ ܡܶܢ ܐܰܠܳܗܳܐ ܒܝܽܘܡ ܕܽܘܟܪܳܢܳܟ܆ ܠܥܳܢ̈ܳܐ ܕܨܳܒܰܬ ܘܶܐܬܳܬ ܠܺܐܝܩܳܪܳܟ܆ ܕܢܶܫܠܽܘܢ ܡܶܢܳܗ̇ ܣܶܕ̈ܩܶܐ ܘܚܶܪ̈ܝܳܢܶܐ ܒܰܨ̈ܠܰܘܳܬܳܟ܀

ܫܽܘܒܚܳܐ

ܫܽܘܒܚܳܐ ܠܗܰܘ ܕܰܓܒܳܟ܆ ܘܪܰܡܪܶܡ ܝܰܘܡܳܐ ܕܕܽܘܟܪܳܢܳܟ ܒܰܐܪܒܰܥ ܦܶܢ̈ܝܳܢ܆ ܡܳܪܝ ܒܰܪܨܰܘܡܳܐ ܥܰܡܽܘܕܳܐ ܕܥܺܕܬܳܐ܆ ܘܚܽܘܬܪܳܐ ܘܨܶܒܬܳܐ ܕܰܓܒܳܐ ܕܰܬܪ̈ܺܝܨܰܝ ܫܽܘܒܚܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܥܒܶܕ ܠܗܽܘܢ ܢܝܳܚܳܐ ܕܽܘܟܪܳܢܳܐ

ܐܰܝܟ ܡܽܘܫܶܐ ܡܰܝ̈ܳܐ ܚܰܠܺܝܬ ܗ̱ܘܰܝܬ܆ ܩܰܕܺܝܫܳܐ ܡܳܪܝ ܒܰܪܨܰܘܡܳܐ܆ ܘܰܐܝܟ ܐܶܠܺܝܫܳܥ ܛܽܘܒܳܢܳܐ܆ ܡܰܝ̈ܳܐ ܝܰܗ̱ܒܬ ܘܰܐܚܺܝܬ ܡܺܝ̈ܬܶܐ܆ ܘܰܐܝܟ ܫܶܡܥܽܘܢ ܪܺܝܫ ܬܰܠܡܺܝ̈ܕܶܐ܆ ܒܕܽܘܒܳܪ̈ܶܐ ܕܟܰܝ̈ܳܐ ܐܶܬܓܡܰܪܬ܆ ܗܳܐ ܡܶܬܢܰܨܰܚ ܕܽܘܟܪܳܢܳܟ܆ ܡܶܢ ܣܰܘ̈ܦܶܐ ܠܣܰܘ̈ܦܶܝܗ̇ ܕܰܐܪܥܳܐ܆ ܨܠܽܘܬܳܟ ܫܽܘܪܳܐ ܬܶܗܘܶܐ ܠܰܢ܀

ܫܽܘܒܚܳܐ

ܡܰܢܽܘ ܡܰܘܦܶܐ ܕܰܢܡܰܠܶܠ܆ ܢܶܨܚܳܢܰܘ̈ܗ̱ܝ ܕܡܳܪܝ ܒܰܪܨܰܘܡܳܐ܆ ܕܰܚܙܳܐ ܗ̱ܘܳܐ ܠܐ̱ܢܳܫ̈ܳܐ ܩܰܕܺܝ̈ܫܶܐ܆ ܘܶܐܬܪܰܓܪܰܓ ܠܰܡܛܰܠܰܝ̈ܗܽܘܢ܆ ܫܶܡܥܽܘܢ ܟܺܐܢܳܐ ܘܙܰܕܺܝܩܳܐ܆ ܘܰܐܒܪܳܗܳܡ ܩܺܝܕܽܘܢܳܝܳܐ܆ ܘܣܳܒܳܐ ܙܰܗܝܳܐ ܝܽܘܠܝܰܢܶܐ܆ ܒܚܰܝܰܝ̈ܗܽܘܢ ܘܰܒܡܰܘ̈ܬܰܝܗܽܘܢ܆ ܨܠܽܘܬܗܽܘܢ ܫܽܘܪܳܐ ܬܶܗܘܶܐ ܠܰܢ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܨܠܺܝܒܳܐ ܥܒܺܝܕ ܠܶܗ܆ ܠܥܳܠܡܳܐ ܟܽܠܶܗ ܐܰܝܟ ܥܰܡܽܘܕܳܐ

ܥܽܘܢܺܝܬܳܐ: ܨܠܽܘܬܳܟ ܐܰܒܽܘܢ܆ ܬܢܰܛܰܪ ܠܟܶܢܫܳܐ ܪܚܺܝܡܳܐ ܕܰܒ̈ܢܰܝܟ.

ܐܰܝܟܰܢ ܐܶܣܦܰܩ. ܠܰܡܡܰܠܳܠܽܘ ܥܰܠ ܩܽܘ̈ܠܳܣܰܝܟ܆ ܡܳܪܝ ܒܰܪܨܰܘܡܳܐ ܢܰܨܺܝܚ ܫܽܘܦܪ̈ܶܐ܆ ܢܰܘܣܳܐ ܕܰܟܝܳܐ ܕܪܽܘܚܳܐ ܕܩܽܘܕܫܳܐ܆ ܒܳܟ ܐܶܬܚܰܝܰܠ܆ ܘܺܐܡܰܪ ܫܽܘܦܪ̈ܰܝܟ ܐܰܠܳܗܳܝ̈ܶܐ܀

ܛܥܺܝܢ ܗ̱ܘܳܐ ܦܰܓܪܳܟ܆ ܝܽܘܩܪܳܐ ܕܥܰܡ̈ܠܰܝܟ ܠܰܝܠܰܝ̈ ܐܺܝܡܳܡ܆ ܒܨܰܘܡܳܟ ܕܰܟܝܳܐ ܬܗܰܪܘ ܥܶܠܳܝ̈ܶܐ܆ ܐܳܦ ܐܶܬܪܰܓܪܰܓܘ ܕܬܶܗܘܶܐ ܥܰܡܗܽܘܢ܆ ܘܰܒܕܰܟܝܽܘܬܳܟ܆ ܠܗܽܘܢ ܕܳܡܶܐ ܐܰܢ̱ܬ ܐܳܘ ܩܰܕܺܝܫܳܐ܀

ܟܡܳܐ ܐܽܘܠ̈ܨܳܢܶܐ܆ ܣܰܝܒܰܪ ܦܰܓܪܳܟ ܡܳܪܝ ܒܰܪܨܰܘܡܳܐ܆ ܚܽܘܡܳܐ ܕܩܰܝܛܳܐ ܘܩܽܘܪܳܐ ܕܣܰܬܘܳܐ܆ ܠܒܽܘܫܳܐ ܕܦܰܪܙܠܳܐ ܘܥܰܡ̈ܠܶܐ ܩܫܰܝ̈ܳܐ܆ ܚܰܡܫܺܝܢ ܘܰܐܪܒܰܥ܆ ܫܢܰܝ̈ܳܐ ܣܰܝܒܰܪܬ ܨܠܽܘܬܳܟ ܥܰܡܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܰܢܽܘ ܟܰܝ ܕܟܰܕ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܢܰܨܚܶܗ ܠܰܐܬܠܺܝܛܶܗ܆ ܩܰܕܺܝܫܳܐ ܡܳܪܝ ܒܰܪܨܰܘܡܳܐ.

ܗܳܢܳܐ ܕܰܗܘܳܐ ܗܶܓܝܳܢܶܗ܆ ܒܢܳܡܽܘ̈ܣܰܝܟ ܠܰܝ̈ܠܰܝ ܐܺܝܡܳܡ܆ ܘܰܠܦܽܘ̈ܩܕܳܢܰܝܟ ܫܰܡܠܺܝ ܗ̱ܘܳܐ܆ ܙܰܒܢܳܐ ܕܰܫܢܰܝ̈ ܝܰܘ̈ܡܳܬܶܗ܆ ܒܰܪܨܰܘܡܳܐ ܕܕܰܝܶܒ ܒܶܣܪܶܗ܆ ܒܕܽܘܒܳܪ̈ܶܐ ܐܰܠܳܗܳܝ̈ܶܐ܆ ܘܟܰܕ ܡܶܬܚܳܐ ܕܨܰܘܡܳܐ ܥܒܰܕ ܠܶܗ܆ ܫܳܒܽܘ̈ܥܶܐ ܬܪܶܝܢ ܘܰܬܠܳܬܳܐ܆ ܘܰܠܚܰܪܬܳܐ ܡܶܢ ܝܽܘܪܳܩܳܐ܆ ܕܰܒܕܰܒܪܳܐ ܡܶܬܬܰܪܣܶܐ ܗ̱ܘܳܐ܀

ܙܳܐܰܥ ܠܶܫܳܢܝ ܐܳܘ ܓܰܒܝܳܐ܆ ܕܰܢܡܰܠܶܠ ܥܰܠ ܩܽܘ̈ܠܳܣܰܝܟ܆ ܕܪܳܡܽ ܗ̱ܘ ܫܰܪܒܳܐ ܕܢܶܨܚܳܢܰܝ̈ܟ܆ ܡܶܢ ܦܽܘܡܳܐ ܘܡܶܢ ܡܰܫܡܰܥܬܳܐ܆ ܡܳܪܳܟ ܒܰܠܚܽܘܕ ܣܳܦܶܩܽ ܗ̱ܘ܆ ܕܗܽܘ ܝܰܩܰܪ ܝܽܘܡ ܥܰܕܥܺܐܕܳܟ܆ ܕܰܪܚܶܡܬܳܝܗ̱ܝ ܡܶܢ ܛܰܠܝܽܘܬܳܟ. ܢܰܨܰܚ ܘܰܐܘܪܶܒ ܕܽܘܟܪܳܢܳܟ܆ ܘܗܳܐ ܥܺܝܪ̈ܶܐ ܘܐ̱ܢܳܫ̈ܳܐ ܙܳܡܪܺܝܢ܆ ܬܶܫܒܽܘܚܬܳܐ ܒܝܽܘܡ ܕܽܘܟܪܳܢܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܕܽܘܟܪܳܢ ܓܰܒܝܳܐ ܠܒܽܘܪ̈ܟܳܬܰܢ܆ ܘܰܨܠܽܘܬܶܗ ܫܽܘܪܳܐ ܠܢܰܦ̈ܫܳܬܰܢ.

ܐܳܘ ܠܰܢܙܺܝܪܳܐ ܕܟܰܕ ܟܦܶܢ܆ ܐܶܟܰܠ ܨܰܘܡܳܐ ܘܒܶܗ ܐܶܬܒܰܣܰܡ܆ ܐܳܘ ܠܢܰܨܺܝܚܳܐ ܕܟܰܕ ܨܗܺܝ܆ ܐܶܫܬܺܝ ܨܠܽܘܬܳܐ ܘܒܳܗ̇ ܐܶܬܦܰܪܦܰܥ܆ ܗܳܢܰܘ ܕܰܠܐܺܝ܆ ܘܰܐܘܣܶܦ ܥܰܡܠܳܐ܆ ܘܰܙܩܺܝܦܽܘܬܳܐ܆ ܘܢܳܚ ܒܽܐܘܠܨܳܢܳܐ܆ ܠܒܰܪܨܰܘܡܳܐ ܛܽܘܒܰܘܗ̱ܝ܆ ܕܡܳܐ ܕܰܟܦܶܢ ܘܰܨܗܺܝ܆ ܒܨܰܘܡܳܐ ܘܨܠܽܘܬܳܐ ܒܳܣܶܡ ܗ̱ܘܳܐ܀

ܩܕܳܡ ܪܶܥܝܳܢܶܗ ܨܺܝܪ ܗ̱ܘܳܐ܆ ܡܰܠܟܳܐ ܡܫܺܝܚܳܐ ܘܡܶܬܒܰܩܶܐ ܒܶܗ܆ ܘܰܚܙܳܝܗ̱ܝ ܒܨܰܥܪܳܐ ܕܒܶܗܬܬܳܐ܆ ܥܰܠ ܗܰܘ ܩܰܝܣܳܐ ܕܰܙܩܺܝܦܽܘܬܳܐ܆ ܡܶܛܽܠ ܗܳܕܶܐ܆ ܫܩܰܠ ܕܢܶܬܕܰܡܶܐ܆ ܥܰܒܕܳܐ ܛܳܒܳܐ܆ ܒܡܳܪܳܐ ܟܺܐܢܳܐ܆ ܠܒܰܪܨܰܘܡܳܐ ܛܽܘܒܰܘܗ̱ܝ܆ ܕܶܐܨܛܰܚܺܝ ܚܠܳܦܰܘܗ̱ܝ܆ ܕܢܺܝܫܶܗ ܛܥܺܝܢ ܗ̱ܘܳܐ ܥܠܰܘܗ̱ܝ ܫܽܘܒܚܳܐ ܠܶܗ܀

ܢܦܰܩ ܐܶܠܺܝܳܐ ܡܣܰܪܩܳܐ܆ ܡܶܢ ܒܶܝܬ ܐ̱ܢܳܫܰܘ̈ܗ̱ܝ ܠܰܐܬܪܳܐ ܚܽܘܪܒܳܐ܆ ܘܰܩܢܳܐ ܓܰܙܳܐ ܡܝܰܩܪܳܐ܆ ܕܰܐܥܬܰܪ ܡܰܠ̈ܟܶܐ ܘܦܰܪܢܶܣ ܟܰܪ̈ܟܶܐ܆ ܪܗܶܛܘ ܘܰܒܥܰܐܽܘܗ̱ܝ܆ ܒܰܐܬܪ̈ܰܘܳܬܳܐ܆ ܕܢܶܬܶܠ ܙܶܕܩܳܐ܆ ܠܥܰܡܳܐ ܨܪܺܝܟܳܐ܆ ܠܒܰܪܨܰܘܡܳܐ ܛܽܘܒܰܘܗ̱ܝ܆ ܕܡܰܠ̈ܟܶܐ ܒܥܰܘ ܡܶܢܶܗ܆ ܕܢܰܪܡܶܐ ܒܓܰܙܰܝ̈ܗܽܘܢ ܡܶܢ ܥܽܘܬܪܶܗ܀

ܐܰܝܟ ܐܰܒܪܳܗܳܡ ܐܰܚܒܳܗ̇܆ ܠܥܶܕܝܳܝܽܘܬܳܐ ܡܶܢ ܛܰܠܝܽܘܬܶܗ܆ ܘܰܐܝܟ ܐܶܠܺܝܳܐ ܛܰܢ ܠܒܶܫ܆ ܗܰܝܡܳܢܽܘܬܳܐ ܒܕܳܪ̈ܶܐ ܥܰܣ̈ܩܶܐ܆ ܐܰܟܶܣ ܡܰܠ̈ܟܶܐ܆ ܐܰܝܟ ܐܶܪܰܡܝܳܐ܆ ܘܕܳܢ ܕܰܝܳܢ̈ܶܐ܆ ܐܰܝܟ ܕܳܢܺܝܐܶܝܠ܆ ܕܳܡܶܐ ܠܝܽܘܚܰܢܳܢ܆ ܕܰܐܟܣܳܗ̇ ܠܙܳܢܺܝܬܳܐ܆ ܘܰܠܡܰܠܟܳܐ ܕܰܐܪܡܝܶܗ ܒܶܝܬ ܢܛܽܘܪܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܡܶܢ ܥܳܠܡܳܐ ܡܶܕܶܡ ܠܳܐ ܟܰܢܫܶܬ

ܥܽܘܢܺܝܬܳܐ: ܬܶܫܒܽܘܚܬܳܐ ܠܡܳܪܳܟ ܒܕܽܘܟܪܳܢܳܟ܆ ܩܰܕܺܝܫܳܐ ܘܓܰܒܝܳܐ ܒܰܪܨܰܘܡܳܐ.

ܡܳܐ ܫܰܦܺܝܪ ܣܡܳܟܳܐ ܕܰܓܢܶܐ ܒܶܗ܆ ܒܰܪܨܰܘܡܳܐ ܘܟܺܐܢ̈ܶܐ ܒܢܰܝ̈ ܛܶܟܣܶܗ܆ ܕܒܰܪ ܡܰܠܟܳܐ ܥܒܺܝܕ ܗ̱ܘܳܐ ܫܰܡܳܫܳܐ܆ ܕܰܢܒܰܣܶܡ ܠܰܐܝܠܶܝܢ ܕܙܰܡܶܢ ܗ̱ܘܳܐ܆ ܒܡܶܫܬܽܘܬܳܐ ܪܰܒܬܳܐ܆ ܕܡܰܠܝܳܐ ܚܰܕܽܘܬܳܐ܆ ܠܰܐܝܠܶܝܢ ܕܫܳܘܶܝܢ ܠܳܗ̇܆ ܘܟܽܠܗܶܝܢ ܛܳܒ̈ܳܬܳܐ܆ ܛܽܘܒܰܝܗܽܘܢ ܠܟܺܐܢ̈ܶܐ ܘܙܰܕܺܝ̈ܩܶܐ܆ ܡܳܐ ܕܳܐܬܶܐ ܡܳܪܗܽܘܢ ܒܬܶܫܒܽܘܚܬܳܐ܀

ܡܰܢ ܣܳܦܶܩ ܕܢܺܐܡܰܪ ܩܽܘ̈ܠܳܣܰܘܗ̱ܝ܆ ܕܢܰܨܺܝܚܳܐ ܘܪܰܒܳܐ ܒܰܪܨܰܘܡܳܐ܆ ܐܰܝܟ ܘܰܪܕܳܐ ܪܓܺܝܓܳܐ ܘܫܽܘܫܰܢܬܳܐ܆ ܗܳܐ ܦܳܐܰܚ ܪܺܝܚܶܗ ܒܰܒܪܺܝܬܳܐ܆ ܛܽܘܒܰܘܗ̱ܝ ܓܶܝܪ ܕܰܫܘܳܐ܆ ܓܰܒܝܳܐ ܘܢܰܨܺܝܚܳܐ܆ ܠܗܰܘ ܐܰܬܪܳܐ ܕܥܺܝܪ̈ܶܐ܆ ܡܕܰܝܪܺܝܢ ܘܪܳܕܶܝܢ ܒܶܗ܆ ܕܽܘܒܳܪ̈ܰܘܗ̱ܝ ܒܰܕܡܽܘܬ ܢܰܗܺܝܪ̈ܶܐ܆ ܗܳܐ ܥܳܐܠܺܝܢ ܩܕܳܡܰܘܗ̱ܝ ܠܰܓܢܽܘܢܳܐ܀

ܒܰܪܨܰܘܡܳܐ ܕܣܰܝܒܪܶܗ ܠܢܶܣܝܽܘܢܳܐ܆ ܫܢܺܝ̈ܢ ܚܰܡܫܺܝܢ ܟܰܕ ܨܠܺܝܒ ܩܕܳܡ ܡܳܪܶܗ܆ ܠܥܰܡܽܘܕܳܐ ܕܦܰܪܙܠܳܐ ܡܕܰܡܰܝ ܗ̱ܘܳܐ܆ ܕܠܳܐ ܢܳܐܶܡ ܒܠܺܠܝܳܐ ܘܒܺܐܝܡܳܡܳܐ܆ ܡܶܢ ܨܰܦܪܳܐ ܠܪܰܡܫܳܐ܆ ܩܰܘܡܬܶܗ ܟܦܺܝܦܳܐ ܗ̱ܘܳܬ܆ ܫܠܶܡܘ ܝܰܘ̈ܡܰܝ ܚܰܝܰܘ̈ܗܝ܆ ܘܚܰܬܡܳܗ̇ ܠܒܳܥܽܘܬܶܗ܆ ܟܰܕ ܫܰܠܶܡ ܨܠܽܘܬܶܗ ܛܽܘܒܳܢܳܐ܆ ܘܟܶܢ ܦܰܫܛܳܗ̇ ܠܢܰܦܫܶܗ ܡܠܶܐ ܫܳܥܳܐ܀

ܒܰܪܨܰܘܡܳܐ ܣܺܝܡܬܳܐ ܗ̱ܝ ܡܝܰܬܰܪܬܳܐ܆ ܛܽܘܒ ܠܰܐܝܢܳܐ ܕܶܐܫܬܘܺܝ ܠܥܶܩ̈ܒܳܬܶܗ܆ ܡܰܪܕܺܝܬܶܗ ܣܺܝܡܬܳܐ ܗ̱ܝ ܡܥܰܠܰܝܬܳܐ܆ ܛܽܘܒ ܠܰܐܝܢܳܐ ܕܶܐܫܬܡܰܥ ܠܝܽܘܠܦܳܢܶܗ܆ ܬܶܫܡܶܫܬܶܗ ܙܗܺܝܬܳܐ܆ ܘܰܨܠܽܘܬܶܗ ܕܟܺܝܬܳܐ܆ ܡܥܺܝܢܳܐ ܗ̱ܝ ܕܥܽܘܕܪ̈ܳܢܶܐ܆ ܘܢܶܒܥܳܐ ܗ̱ܝ ܕܚܽܘܠ̈ܡܳܢܶܐ܆ ܛܽܘܒ ܠܰܐܝܢܳܐ ܕܶܐܫܬܘܺܝ ܠܗܽܘ̈ܠܳܠܰܘܗ̱ܝ܆ ܘܰܒܥܺܕܬܳܐ ܙܳܡܰܪ ܕܠܳܐ ܫܶܠܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܝܰܘܡܳܟ ܠܳܟ ܕܳܡܶܐ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܰܐܘܪܶܒ ܝܽܘܡ ܕܽܘܟܪܳܢܳܟ܆ ܙܰܗܝܳܐ ܘܢܰܨܺܝܚܳܐ ܡܳܪܝ ܒܰܪܨܰܘܡܳܐ.

ܚܰܡܫܺܝܢ ܓܶܝܪ ܘܰܐܪܒܰܥ ܫܢܰܝ̈ܳܐ ܚܰܡܣܶܢ܆ ܒܟܰܦܢܳܐ ܘܰܒܨܰܗܝܳܐ ܗܽܘ ܩܰܕܺܝܫܳܐ܆ ܘܠܳܐ ܣܳܟ ܪܰܛܶܢ ܗ̱ܘܳܐ܆ ܐܰܘ ܡܶܐܢܰܬ ܠܶܗ܆ ܕܰܒܪܽܘܚܳܐ ܕܩܽܘܕܫܳܐ ܡܶܬܬܰܪܣܶܐ ܗ̱ܘܳܐ܀

ܥܒܰܕ ܥܽܘܡܪܶܗ ܫܩܺܝܦܳܐ ܗܰܘ ܙܰܕܺܝܩܳܐ܆ ܡܥܰܪܬܳܐ ܬܰܛܠܺܝܠܶܗ ܒܡܶܨܥܰܬ ܫܽܘܥܳܐ܆ ܥܡܰܪ ܗ̱ܘܳܐ ܥܰܡ ܕܶܒܳܐ ܘܥܰܡ ܚܶܘܝܳܐ ܬܽܘܒ܆ ܕܰܙܟܳܐ ܗ̱ܘܳܐ ܠܒܺܝܫܳܐ ܘܓܳܪܣܳܐ ܠܺܝܛܳܐ܀

ܩܽܘܡ ܐܰܒܽܘܢ ܚܰܣܝܳܐ ܘܒܰܪܶܟ ܟܶܢܫܳܐ܆ ܕܨܳܒ ܘܶܐܬܳܐ ܢܝܰܩܰܪ ܝܽܘܡ ܕܽܘܟܪܳܢܳܟ܆ ܒܰܨܠܽܘܬܳܟ ܐܰܒܽܘܢ ܘܣܳܗ̈ܕܶܐ ܕܥܰܡܳܟ܆ ܢܶܬܒܰܛܠܽܘܢ ܡܶܢܰܢ ܫܰܒ̈ܛܶܐ ܕܪܽܘܓܙܳܐ܀

ܒܰܨܠܽܘܬܶܗ ܕܓܰܒܝܳܐ ܡܳܪܝ ܒܰܪܨܰܘܡܳܐ܆ ܗܰܒܠܰܢ ܦܳܪܽܘܩܰܢ ܪ̈ܰܚܡܶܐ ܒܕܺܝܢܳܐ܆ ܘܢܶܫܡܰܥ ܠܒܰܪ̱ܬ ܩܳܠܳܟ ܟܰܕ ܐܳܡܪܳܐ ܠܰܢ܆ ܫܒܺܝܩܺܝܢ ܚܰܘ̈ܒܰܝܟܽܘܢ ܠܳܐ ܬܶܟܪܶܐ ܠܟܽܘܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܳܟ ܥܰܡܰܢ ܡܳܪܝ ܒܰܪܨܰܘܡܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܬܰܘ ܦܳܪ̈ܽܘܫܶܐ ܢܶܒܣܰܡ ܝܰܘܡܳܢ ܡܶܢ ܝܽܘܠܦܳܢܳܐ܆ ܕܛܰܥܡܶܗ ܚܠܶܐ ܗ̱ܘ ܛܳܒ ܡܶܢ ܕܶܒܫܳܐ ܕܟܰܟܳܪܺܝܬܳܐ܆ ܚܰܕ ܒܰܪܢܳܫܳܐ ܪܽܘܚܳܢܳܝܳܐ ܩܪܳܐ ܠܰܢ ܝܰܘܡܳܢ܆ ܡܰܢܽܘ ܗܳܢܳܐ ܐܶܠܳܐ ܓܰܒܝܳܐ ܡܳܪܝ ܒܰܪܨܰܘܡܳܐ܀

ܗܳܢܳܐ ܕܰܗܘܳܐ ܐܰܝܟ ܠܰܡܦܺܝܕܳܐ ܢܰܨܺܝܚ ܕܰܠܩܳܐ܆ ܘܒܶܗ ܐܶܬܢܰܗܰܪܘ ܟܽܠ ܚܶܫܽܘ̈ܟܶܐ ܕܰܚܙܰܘ ܢܽܘܗܪܶܗ܆ ܗܳܢܳܐ ܕܰܓܒܳܝܗ̱ܝ ܡܳܪܝܳܐ ܨܒܰܐܽܘܬ ܐܰܝܟ ܐܶܪܰܡܝܳܐ܆ ܘܰܐܝܟ ܐܶܠܺܝܫܳܥ ܘܰܐܝܟ ܡܰܠܟܺܝܙܕܶܩ ܕܰܫ̈ܡܳܗܳܬܳܐ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀