ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܒܪܺܝܟ ܕܒܰܢ̈ܒܺܝܶܐ ܒܢܳܗ̇ ܠܥܺܕܬܶܗ܆ ܘܒܰܫܠܺܝ̈ܚܶܐ ܫܰܟܠܶܠ ܣܳܡܳܗ̇܆ ܘܙܰܡܶܢ ܗ̱ܘܳܐ ܠܳܗ̇ ܐܶܡ̈ܘܳܬܳܐ܆ ܘܟܽܠ ܥܰܡ̱̈ܡܺܝܢ ܗܳܐ ܡܫܰܒܚܺܝܢ ܠܶܗ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܒܪܺܝܟ ܕܰܒܢܳܗ̇ ܠܥܺܕܰܬ ܩܽܘܕܫܳܐ܆ ܘܨܰܒܬܳܗ̇ ܒܥܽܘܬܪ̈ܶܐ ܫܡܰܝ̈ܳܢܶܐ܆ ܘܚܰܕܺܝ ܒܝܰܘܡܳܐ ܕܩܽܘܕܳܫܳܗ̇܆ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܬܶܚܕܶܐ ܥܺܕܬܳܐ ܥܰܡ ܝܰܠ̈ܕܶܝܗ̇܆ ܘܰܬܝܰܒܶܒ ܘܬܶܙܡܰܪ ܫܽܘܒܚܳܐ܆ ܒܗܳܢܳܐ ܝܰܘܡܳܐ ܕܩܽܘܕܳܫܳܗ̇܆ ܕܰܐܦܨܰܚ ܠܟܽܠܗܶܝܢ ܒܶܪ̈ܝܳܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܒܪܺܝܟܽ ܗ̱ܘ ܕܰܫܪܳܐ ܘܰܐܓܶܢ ܒܳܗ̇܆ ܒܥܺܕܬܳܐ ܕܰܓܒܳܐ ܠܺܐܝܩܳܪܶܗ܆ ܘܰܐܬܩܶܢ ܒܳܗ̇ ܡܰܕܒܰܚ ܩܽܘܕܫܳܐ܆ ܕܰܥܠܰܘܗ̱ܝ ܫܰܪܝܳܐ ܪܰܒܽܘܬܶܗ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܛܽܘܒܰܝܟܝ ܥܺܕܬܳܐ ܡܗܰܝܡܰܢܬܳܐ܆ ܕܡܳܪܝܳܐ ܫܰܡܠܺܝ ܩܽܘܕܳܫܶܟܝ܆ ܨܰܒܶܬܝ ܝܰܠ̈ܕܰܝܟܝ ܕܰܟܝܳܐܺܝܬ܆ ܕܢܰܣܩܽܘܢ ܫܽܘܒܚܳܐ ܠܪܰܒܽܘܬܶܗ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ
ܣܳܠܶܩ: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܕܰܘܺܝܕ ܡܰܠܟܳܐ ܐܶܬܚܰܫܰܒ܆ ܕܢܶܒܢܶܐ ܒܰܝܬܳܐ ܠܺܐܝܩܳܪܳܟ ܡܳܪܝܳܐ܆ ܘܥܰܠ ܗܳܕܶܐ ܟܽܠ ܒܽܘܪ̈ܟܳܬܳܐ܆ ܢܣܰܒ ܨܶܒܝܳܢܶܗ ܫܰܦܺܝܪܳܐ܆ ܘܶܐܬܒܰܝܰܐ ܡܶܢ ܛܰܝܒܽܘܬܳܟ܆ ܢܰܛܰܪ ܐܳܦ ܠܰܢ ܒܰܨܠܺܝܒܳܟ܆ ܘܰܠܪ̈ܳܥܰܘܳܬܰܢ܆ ܕܒܳܢܶܝܢ ܒܰܝܬܳܐ ܠܺܐܝܩܳܪܳܟ܀

ܫܽܘܒܚܳܐ

ܥܰܠ ܛܽܘܪ̈ܶܐ ܘܥܰܠ ܪ̈ܳܡܳܬܳܐ܆ ܥܺܕܰܬ ܥܰܡ̱̈ܡܶܐ ܣܺܝܡܳܐ ܘܒܰܢܝܳܐ܆ ܣܠܶܩ ܘܶܐܬܥܰܠܺܝ ܒܶܢܝܳܢܳܗ̇܆ ܘܰܡܛܳܐ ܪܺܝܫܶܗ ܠܰܫܡܰܝܳܐ܆ ܥܰܠ ܫܽܘܥܳܐ ܕܗܰܝܡܳܢܽܘܬܳܐ܆ ܕܦܶܛܪܽܘܣ ܪܺܝܫܳܐ ܕܰܫܠܺܝܚ̈ܶܐ܆ ܣܺܝܡܺܝܢ ܫܶܬܶܐܣܶܝ̈ܗ̇܆ ܘܰܠܥܳܠܰܡ ܠܳܐ ܡܶܙܕܰܥܙܥܺܝܢ܀

ܡܰܕܪܳܫܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܬܰܘ ܢܺܐܡܰܪ ܛܽܘܒܶܝܗ̇ ܠܗܳܝ ܡܰܪܝܰܡ

ܥܽܘܢܺܝܬܳܐ: ܐܰܫܪܳܐ ܡܳܪܝ ܫܰܝܢܳܟ ܒܓܰܘ ܥܺܕܬܳܟ܆ ܘܰܫܠܳܡܳܟ ܢܕܰܝܰܪ ܒܣܳܚܪ̈ܳܬܳܗ̇.

ܒܕܶܐܬܪܰܓܪܰܓ ܡܽܘܫܶܐ ܠܥܶܢܝܳܢܳܟ܆ ܣܳܘܚܳܐ ܐ̱ܢܳܐ ܠܝܰܘܡܳܟ ܐܰܝܟ ܐܰܒܪܳܡ܆ ܦܬܺܝܚܺܝܢ ܠܺܝ ܟܰܘܰܝ̈ ܠܽܐܘܪܫܠܶܡ܆ ܕܩܰܕܺܝܫܳܐ ܡܶܢ ܬܰܝܡܢܳܐ ܐܳܬܶܐ܆ ܘܰܠܚܰܩܠܳܐ ܢܶܦܽܘܩ܆ ܘܰܒܟܰܪܡܳܐ ܢܶܚܕܶܐ܆ ܘܰܬܕܰܝ̈ ܐܶܬܶܠ ܠܳܟ܆ ܘܶܐܣܒܰܥ ܒܪܶܚܡܬܳܟ܆ ܘܶܐܢܳܐ ܘܰܐܢ̱ܬ ܢܶܪܥܶܐ ܒܫܽܘ̈ܫܰܢܶܐ܆ ܕܢܶܬܕܰܡܶܐ ܕܳܕܝ ܠܺܝ ܘܶܐܢܳܐ ܠܶܗ܀

ܕܳܕܳܐ ܐܰܢ̱ܬ ܕܰܟܣܶܐ ܡܶܢ ܕܳܪ̈ܶܐ܆ ܥܰܠܗܳܕܶܐ ܪ̈ܰܚܡܳܟܝ ܥܠܰܝ̈ܡܳܬܳܐ܆ ܡܽܘܪܽܘܢ ܫܡܳܟ ܘܰܠܪܺܝܚ ܒܶܣ̈ܡܳܢܰܝܟ܆ ܢܰܦ̈ܫܳܬܳܐ ܕܙܰܕܺܝ̈ܩܶܐ ܪ̈ܳܗܛܳܢ܆ ܨܗܶܐ ܠܗܽܘܢ ܒܰܪ ܐܺܝܫܰܝ܆ ܠܡܰܝ̈ܳܐ ܕܒܶܝܬ ܠܚܶܡ܆ ܘܰܐܝܟ ܪܰܦܩܳܐ ܠܺܐܝܣܚܳܩ܆ ܐܳܬܽܘܪ ܡܟܰܣܶܐ ܠܳܟ܆ ܚܠܳܦ ܒܽܘܨܳܐ ܚܰܒܩܽܘܩ ܢܰܝܬܶܐ ܠܳܟ܆ ܠܕܳܢܺܝܐܶܝܠ ܕܢܶܒܣܰܡ ܒܫܳܪܽܘܬܳܐ܀

ܘܒܳܟ ܚܰܬܢܳܐ ܐܶܢܗܰܪ ܘܶܐܬܚܰܘܰܪ܆ ܡܶܢ ܨܳܐܬܳܐ ܘܚܶܫܟܳܐ ܕܛܳܥܝܽܘܬܳܐ܆ ܩܦܽܘܠ ܣܰܢܝܽܘܬܝ ܕܡܶܢ ܫܶܡܫܳܐ ܚܳܡܶܬ܆ ܘܒܰܦܬܰܟܪ̈ܶܐ ܙܰܢܺܝܬ ܕܟܽܠ ܥܰܡ̱̈ܡܺܝܢ܆ ܗܳܐ ܠܳܟ ܚܳܝܪܳܐ ܐ̱ܢܳܐ܆ ܐܶܬܟܰܢܰܫ ܒܰܠܡܺܝܢܳܟ܆ ܘܶܐܥܽܘܠ ܠܩܰܝܛܽܘܢܳܟ܆ ܘܶܐܚܕܶܐ ܒܳܟ ܚܰܬܢܳܐ܆ ܘܢܶܬܒܰܣܰܡ ܐܰܢ̱ܬ ܒܺܝ ܘܶܐܢܳܐ ܒܳܟ܆ ܘܶܐܗܘܶܐ ܠܳܟ ܟܰܠܬܳܐ ܡܫܰܒܰܚܬܳܐ܀

ܚܽܘܒܳܗ̇ ܕܝܰܘܢܝ ܛܳܒ ܡܶܢ ܢܶܩ̈ܒܳܬܳܐ܆ ܘܰܕܡܽܘܬܳܐ ܕܨܽܘܪܬܳܗ̇ ܚܰܒܺܝܒܳܐ܆ ܩܰܪܺܝܒܬܝ ܗܳܝ ܕܪܶܚܡܶܬ ܡܶܢ ܢܶܫ̈ܶܐ܆ ܘܰܒܪܶܚܡܬܳܗ̇ ܢܰܦܫܝ ܐܶܬܝܰܐܝܒܰܬ ܠܳܗ̇. ܕܶܡܟܶܬ ܘܩܰܪܺܝܒܳܐ ܗ̱ܝ܆ ܘܳܐܦ ܗܺܝ ܥܺܝܪܳܐ ܗ̱ܝ ܥܰܡܝ܆ ܘܫܶܒܩܰܬ ܠܒܶܝܬ ܐܰܒܽܘܗ̇܆ ܘܪܶܗܛܰܬ ܐ̱ܬܳܬ ܒܳܬܰܪܝ܆ ܠܳܐ ܬܶܕܚܠܺܝܢ ܝܰܘܢܳܐ ܬܰܡܺܝܡܬܳܐ܆ ܕܰܒܩܰܝܛܽܘܢܝ ܚܳܕܝܰܬܝ ܒܟܽܠ ܥܶܕܳܢ܀

ܝܰܘܢܳܐ ܐܰܢ̱ܬܝ ܕܦܳܪܚܳܐ ܒܺܐܝܡܳܡܳܐ܆ ܘܡܳܐ ܕܦܳܪܚܰܬܝ ܫܳܟܢܰܬܝ ܒܛܶܠܳܠܳܐ܆ ܫܰܦܺܝܪܰܬܝ ܩܰܪܺܝܒܬܝ ܘܒܰܣܺܝܡܰܬܝ܆ ܘܟܽܠ ܚܰܠܒܳܐ ܘܕܶܒܫܳܐ ܒܣܶܦ̈ܘܳܬܶܟܝ܆ ܚܰܡܪܳܐ ܡܠܶܐ ܦܽܘܡܶܟܝ܆ ܘܡܶܫܚܳܐ ܒܣܶܦ̈ܘܳܬܶܟܝ܆ ܘܢܰܗܺܝܪ ܫܦܶܐ ܓܰܘܢܶܟܝ܆ ܘܗܳܐ ܕܳܠܶܩ ܨܶܡܚܶܟܝ܆ ܗܕܺܝܪ ܨܰܘܪܶܟܝ ܒܥܶܩ̈ܶܐ ܘܒܰܙܠܺܝܚ̈ܶܐ܆ ܘܰܩܕܳܠܶܟܝ ܘܦܰܟܰܝ̈ܟܝ ܒܰܓ̈ܕܽܘܠܶܐ܀

ܠܪ̈ܳܡܳܬܳܐ ܕܰܠܒܽܘܢܬܳܐ ܣܶܠܩܶܬ܆ ܕܶܐܬܒܰܩܶܐ ܒܡܽܘܪܽܘܢ ܘܰܒܥܰܠܘܰܝ܆ ܚܙܺܝܬܶܗ ܠܕܳܕܝ ܕܩܳܐܶܡ ܒܪܺܝܫ ܛܽܘܪܳܐ܆ ܘܰܡܩܰܝܶܙ ܒܛܽܘܪ̈ܰܝ ܒܶܣ̈ܡܳܢܶܐ܆ ܐܰܝܟ ܡܰܫܟ̈ܢܰܝ ܩܰܕܳܪ܆ ܐܰܘܟܡܰܢܝ ܒܢܰܝ̈ ܝܳܠܶܕܬܝ܆ ܘܒܶܗ ܗܽܘ ܐܶܬܚܰܘܪܶܬ܆ ܘܪܶܚܡܬܶܗ ܐܰܢܗܰܪܬܰܢܝ܆ ܫܽܘܩܰܝܢܝ ܕܳܕܝ ܒܢܽܘܫ̈ܩܳܬܶܗ ܕܦܽܘܡܳܟ܆ ܕܛܳܒܺܝܢ ܠܺܝ ܪ̈ܰܚܡܰܝܟ ܡܶܢ ܚܰܝ̈ܶܐ܀

ܢܳܡܶܬ ܠܺܝ ܟܰܕ ܒܳܥܝܳܐ ܐ̱ܢܳܐ ܠܶܗ܆ ܘܡܶܬܟܰܪܟܳܢ ܒܫܽܘ̈ܩܶܐ ܕܰܡܕܺܝܢ̱ܬܳܐ܆ ܢܳܛܽܘܪ̈ܶܐ ܐܶܫܟܚܽܘܢܝ ܘܰܡܚܰܐܽܘܢܝ܆ ܘܰܐܣܓܺܝܘ ܥܠܰܝ ܨܽܘ̈ܠܦܳܬܝ ܐܳܦ ܨܽܘܚ̈ܝܳܬܝ܆ ܗܳܐ ܒܓܰܢܬܳܐ ܕܳܕܶܟܝ܆ ܠܬܰܡܳܢ ܙܶܠܝ ܨܶܐܕܰܘܗ̱ܝ܆ ܘܰܚܕܰܘ ܒܰܚ̈ܕܳܕܶܐ܆ ܕܗܳܟܰܢ ܚܬܺܝܪܰܬܝ ܒܶܗ܆ ܒܒܶܝܬ ܫܽܘ̈ܩܶܐ ܥܰܠ ܡܽܘܢ ܦܳܗܝܳܐ ܐܰܢ̱ܬܝ܆ ܗܳܐ ܕܳܕܳܟܝ ܥܰܝ̈ܢܰܘܗ̱ܝ ܚܳܝܪ̈ܳܢ ܠܶܟܝ܀

ܥܪܳܡܬܳܐ ܐܰܢ̱ܬܝ ܕܚ̈ܶܛܶܐ ܛܳܒܴ̈ܬܳܐ܆ ܕܒܶܐܫܟܳܪܶܗ ܕܕܳܕܶܟܝ ܐܶܬܪܰܒܺܝܬܝ܆ ܗܳܐ ܓܰܘܢܶܟܝ ܨ̈ܠܳܦܶܐ ܕܪ̈ܽܘܡܳܢܶܐ܆ ܕܚܳܫܰܚ ܠܶܗ ܒܝܰܘܡܳܐ ܕܡܶܫܬܽܘܬܶܟܝ܆ ܚܰܕܝܶܟܝ ܘܰܕܪ̈ܳܥܰܝܟܝ܆ ܫܺܝܫܳܐ ܫܒܺܝܚ ܓܰܘܢܳܐ܆ ܘܟܰܪܣܶܟܝ ܘܥܰܛ̈ܡܳܬܶܟܝ܆ ܥܰܪ̈ܩܶܐ ܕܽܐܘܡܳܢܶܐ܆ ܠܶܟܝ ܛܽܘܒܰܝܟܝ ܟܡܳܐ ܪܰܚܡܶܟܝ ܕܳܕܳܟܝ܆ ܒܪܺܝܟ ܚܽܘܒܶܗ ܕܫܰܩܠܶܟܝ ܘܠܳܐ ܫܰܒܩܶܟܝ܀

ܨܳܝܬܳܐ ܐ̱ܢܳܐ ܠܩܳܠܶܗ ܕܕܳܕܝ ܕܢܺܐܬܶܐ܆ ܘܩܳܪܶܐ ܠܺܝ ܦܬܰܚܝ ܝܰܘܢܝ ܬܰܡܺܝܡܬܳܐ܆ ܩܳܡ ܒܬܰܪܥܳܐ ܘܰܢܩܰܫ ܒܰܨܝܳܪܬܳܐ܆ ܘܶܐܬܬܥܺܝܪܶܬ ܘܩܳܡܶܬ ܕܶܐܦܬܰܚ ܠܶܗ܆ ܩܪܺܝܬܶܗ ܕܢܶܥܽܘܠ ܠܘܳܬܝ܆ ܘܰܐܘܫܶܛ ܠܺܝ ܐܺܝܕܶܗ܆ ܘܠܰܒܟܰܢܝ ܘܡܳܫ ܠܰܬܕܰܝ̈܆ ܩܽܘܡܝ ܠܶܟܝ ܚܳܬܝ ܘܩܰܪܺܝܒܬܝ܆ ܗܳܐ ܒܢܰܝ̈ ܒܰܝܬܝ ܚܳܝܪܺܝܢ ܡܣܰܟܶܝܢ ܠܶܟܝ܆ ܕܶܐܢܳܐ ܘܰܐܢ̱ܬܝ ܘܗܶܢܽܘܢ ܒܺܝ ܢܶܚܕܽܘܢ܀

ܪܚܺܝܡܳܐ ܐ̱ܢܳܐ ܐܳܘ ܒܢ̈ܳܬ ܐܽܘܪܫܠܶܡ܆ ܪܚܺܝܡܳܐ ܐ̱ܢܳܐ ܘܚܰܙܽܘܪ̈ܶܐ ܦܐܶܝܢ ܠܺܝ܆ ܐܶܢ ܐܰܘܟܡܰܢܝ ܚܽܘܡܳܐ ܕܰܐܒܳܗܰܝ̈܆ ܚܰܘܪܰܢܝ ܬܽܘܒ ܓܰܘܢܶܗ ܕܕܳܕܝ ܩܰܪܺܝܒܝ܆ ܐܶܢ ܐܰܘܟܡܳܢܝ ܫܶܡܫܳܐ܆ ܘܰܒ̈ܢܰܝ ܐܶܡܝ ܟܰܬܡܽܘܢܝ܆ ܣܳܡܽܘܢܝ ܢܳܛܽܘܪܳܐ ܆ ܕܟܰܪܡܳܐ ܘܠܳܐ ܢܛܰܪܬܶܗ܆ ܐܰܥܠܰܢܝ ܕܳܕܝ ܒܣܶܛܪܶܗ ܕܰܣܝܳܓܶܗ܆ ܒܚܽܘܠܳܠܳܐ ܕܫܶܡܫܳܐ ܡܪܰܩ ܟܽܘ̈ܬܡܳܬܝ܀

ܬܰܩ̈ܢܳܬܶܗ ܕܕܳܕܝ ܒܩܰܝܛܽܘܢܝ ܐܶܢܶܝܢ܆ ܘܡܶܢ ܐܰܬܪܳܐ ܠܰܐܬܪܳܐ ܥܒܰܪ ܨܶܐܕܰܝ܆ ܡܳܫܰܚ ܗ̱ܘܳܐ ܠܰܐܪܥܳܐ ܘܠܰܫܡܰܝܳܐ܆ ܘܥܰܠ ܘܰܫܪܳܐ ܒܒܰܝܬܳܐ ܕܰܒܢܺܝܬ ܠܶܗ܆ ܠܥܰܪܣܳܐ ܕܕܳܕܝ ܟܰܪܟܽܘܗ̇܆ ܐܶܫܬܺܝܢ ܓܰܢ̱ܒܳܪ̈ܶܐ܆ ܓܒܰܪ ܚܳܪ ܒܳܗ̇ ܘܢܰܛܪܽܘܗ̇܆ ܥܒܰܕ ܠܺܝ ܕܳܕܝ ܒܰܝܬܳܐ܆ ܕܳܡܶܐ ܕܳܕܝ ܠܛܰܒܝܳܐ ܘܥܽܘܙܰܝܠܳܐ܆ ܐܳܦ ܠܰܐܝܠܳܐ ܒܛܽܘܪ̈ܰܝ ܒܶܣ̈ܡܳܢܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܗܳܢܰܘ ܝܰܪܚܳܐ ܕܰܛܥܺܝܢ ܟܽܠܶܗ ܟܽܠ ܚܰܕܘ̈ܳܬܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ܆ ܕܪܰܡܪܶܡ ܥܺܕܬܶܗ ܒܰܐܪܒܰܥ ܦܶܢ̈ܝܳܢ.

ܒܪܺܝܟ ܕܒܰܢ̈ܒܺܝܶܐ܆ ܫܰܬܶܐܣ ܣܳܡܳܗ̇ ܘܰܐܬܩܶܢ ܢܰܘܣܳܗ̇܆ ܘܙܰܡܶܢ ܥܰܡ̱̈ܡܶܐ ܠܝܽܘܡ ܡܶܫܬܽܘܬܳܗ̇܆ ܘܒܰܨܠܺܝܒ ܢܽܘܗܪܳܐ ܚܬܰܡ ܦܶܪܢܺܝܬܳܗ̇܆ ܘܣܳܡ ܒܳܗ̇ ܦܰܓܪܶܗ܆ ܘܰܕܡܶܗ ܚܰܝܳܐ ܠܚܽܘܣܳܝ ܚܰܘ̈ܒܶܐ܀

ܫܰܝܢܳܟ ܢܩܽܘܡ܆ ܥܰܠ ܙܳܘ̈ܝܳܬܳܗ̇ ܟܰܗܺܝ̈ܢܳܬܳܐ܆ ܚܽܘܒܳܟ ܢܶܡܙܽܘܓ ܫܠܳܡܳܐ ܒܓܰܘܳܗ̇܆ ܘܢܶܛܪܽܘܕ ܡܶܢܳܗ̇ ܩܪ̈ܳܒܶܐ ܘܩܺܐܪ̈ܣܶܐ܆ ܘܟܽܠ ܡܰܨܘ̈ܳܬܳܐ܆ ܐܳܦ ܚܶܪ̈ܝܳܢܶܐ ܕܟܽܠ ܒܳܨܽܘܝ̈ܶܐ܀

ܫܰܝܶܢ ܡܳܪܰܢ܆ ܘܰܠܥܰܠܠܳܢ̈ܶܐ ܘܪ̈ܳܥܰܘܳܬܳܐ܆ ܕܢܶܪܥܽܘܢ ܥܳܢ̈ܳܐ ܗܳܝ ܕܰܐܢ̱ܬ ܦܪܰܩܬܳܗ̇܆ ܒܰܕܡܳܐ ܚܰܣܝܳܐ ܕܰܙܩܺܝܦܽܘܬܳܟ܆ ܫܰܝܢܰܢ ܐܰܢ̱ܬܽ ܗ̱ܘ܆ ܙܳܪܰܥ ܫܰܝܢܳܐ ܘܡܰܣܓܶܐ ܫܠܳܡܳܐ܀

ܒ̈ܳܬܶܐ ܕܡܰܠ̈ܟܶܐ܆ ܠܳܐ ܦܳܚܡܺܝܢ ܒܶܟܝ ܥܺܕܰܬ ܩܽܘܕܫܳܐ܆ ܕܰܒܗܽܘܢܽ ܗ̱ܘ ܫܟܺܝܚ ܥܽܘܬܪܳܐ ܕܥܳܒܰܪ܆ ܘܒܶܟܝ ܗܳܐ ܫܟܺܝܚܽ ܗ̱ܘ ܗܰܘ ܕܠܳܐ ܥܳܒܰܪ܆ ܕܺܐܝܬܰܘܗ̱ܝ ܦܰܓܪܳܐ܆ ܕܡܳܐ ܡܚܰܣܝܳܢܳܐ ܘܫܳܒܶܩ ܚܰܘ̈ܒܶܐ܀

ܣܽܘܓܺܝܬܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ܆ ܕܶܐܬܬܰܚܬܺܝ܆ ܘܒܰܨܠܺܝܒܶܗ ܦܰܪܩܳܗ̇ ܠܥܺܕܬܶܗ.

ܟܢܽܘܫܬܳܐ ܣܢܳܬܶܗ ܠܰܡܫܺܝܚܳܐ܆ ܘܰܪܕܰܦܬܶܗ ܡܶܢ ܒܰܝܬܳܗ̇ ܠܡܰܕܒܪܳܐ܆ ܘܰܢܚܶܬ ܡܶܢ ܛܰܠܳܐ܆ ܕܠܺܠܝܳܐ ܥܰܠ ܪܺܝܫܶܗ܆ ܘܶܐܬܳܐ ܩܪܳܐ ܠܳܗ̇ ܠܒܰܪ̱ܬ ܥܰܡ̱̈ܡܶܐ܆ ܦܬܰܚܝ ܠܺܝ ܚܳܬܝ ܕܶܐܥܽܘܠ ܠܒܰܝܬܟܽܘܢ܀

ܐܺܝܕܳܗ̇ ܦܶܫܛܰܬ ܕܬܶܦܬܰܚ ܠܶܗ܆ ܕܰܠܘܳܬܳܗ̇ ܢܶܥܽܘܠ ܒܪܶܚܡܬܳܐ܆ ܘܰܢ̈ܛܰܦܝ ܨܶܒ̈ܥܳܬܶܗ܆ ܡܽܘܪܳܐ ܥܰܠ ܬܰܪܥܳܐ܆ ܘܰܡܚܳܐ ܪܺܝܚܳܐ ܒܓܰܘ ܒܰܝܬܳܐ܆ ܘܶܐܬܒܰܣܰܡ ܚܰܬܢܳܐ ܡܫܰܒܚܳܐ܀

ܬܳܐ ܠܳܟ ܨܶܐܕܰܝ ܐܳܡܪܳܐ ܠܶܗ܆ ܒܰܪ̱ܬ ܥܰܡ̱̈ܡܶܐ ܘܰܒܒܰܝܬܰܢ ܐܶܬܬܢܺܝܚ܆ ܕܰܣܢܳܬܳܟ ܟܢܽܘܫܬܳܐ܆ ܐܶܢܳܐ ܐܰܚܶܒܬܳܟ܆ ܝܳܕܥܳܐ ܐ̱ܢܳܐ ܓܶܝܪ ܕܡܶܛܽܠܳܬܝ܆ ܙܳܢܺܝܬܳܐ ܛܪܰܕܬܳܟ ܠܡܰܕܒܪܳܐ܀

ܬܳܐ ܐܶܢܰܫܶܩ ܫܽܘ̈ܡܳܬܳܟ܆ ܕܰܒ̈ܨܶܨܶܐ ܒܰܙܰܥܬܳܟ ܟܢܽܘܫܬܳܐ܆ ܐܳܡܪܳܐ ܠܶܗ ܥܺܕܬܳܐ܆ ܒܚܽܘܒܳܐ ܠܰܡܫܺܝܚܳܐ܆ ܐܶܫܬܶܐ ܘܶܐܪܘܶܐ ܡܶܢ ܕܰܦܢܳܟ܆ ܕܡܶܢܳܗ̇ ܪܕܰܘ ܚܰܝ̈ܶܐ ܠܥܳܠܡܳܐ܀

ܡܶܢ ܫܽܘ̈ܡܳܬܳܐ ܕܥܰܠ ܦܰܓܪܳܟ܆ ܥܽܘܕܪ̈ܳܢܶܐ ܢܳܒܥܺܝܢ ܠܥܳܠܡܳܐ܆ ܒܶܝܬ ܪ̈ܳܚܡܶܐ ܡܚܰܐܽܘܟ܆ ܕܚܽܘܒܗܽܘܢ ܕܰܓܳܠܰܐ ܗ̱ܘ܆ ܗܶܢܽܘܢ ܪܰܕܦܽܘܟ ܬܳܐ ܠܒܰܝܬܰܢ܆ ܕܩܰܪ̈ܢܳܬܶܗ ܪ̈ܨܺܝܦܳܢ ܒܪܶܚܡܬܳܟ܀

ܕܺܝܠܳܟ ܐܶܢܳܐ ܡܶܢ ܝܰܘܡܳܐ܆ ܕܰܣܢܰܐܽܘܟ ܘܫܰܟܪܽܘܟ ܪ̈ܳܚܡܰܝܟ܆ ܠܳܟ ܡܰܟܪܰܢܝ ܕܰܘܺܝܕ܆ ܐܳܡܪܳܐ ܠܶܗ ܥܺܕܬܳܐ܆ ܣܢܺܝ ܠܰܟܢܽܘܫܬܳܐ ܕܰܣܢܳܬܳܟ܆ ܘܶܐܬܕܰܟܪܰܝܢܝ ܕܰܩܢܰܝܬܳܢܝ ܡܶܢ ܩܕܺܝܡ܀

ܗܳܝ ܙܳܢܺܝܬܳܐ ܕܣܶܒܟܰܬ ܒܳܟ܆ ܘܳܐܦ ܠܒܽܘ̈ܫܰܝܟ ܫܶܩܠܰܬ ܘܦܶܠܓܰܬ܆ ܦܠܺܝ̈ܓܶܐ ܒܝܰܕ ܢܰܚ̈ܬܰܝܟ܆ ܣܶܢܶܐܬܗܽܘܢ ܚܰܘܺܝܘ܆ ܒܶܝܬ ܐܰܒ̈ܳܗܰܝ ܬܳܐ ܫܪܺܝ ܡܳܪܝ܆ ܕܰܦܨܺܝܚܺܝܢ ܟܽܠܗܽܘܢ ܒܡܶܐܬܝܳܟ܀

ܝܰܗ̱ܒ ܠܳܗ̇ ܡܳܪܰܢ ܕܽܘܠܳܠܳܐ܆ ܠܰܟܢܽܘܫܬܳܐ ܙܳܢܺܝܬܳܐ ܘܰܫܪܳܗ̇܆ ܒܩܰܢܝܳܐ ܕܩܰܦܰܚܬܶܗ܆ܫܪܳܗ̇ ܘܰܫܕܳܗ̇ ܡܶܢܶܗ܆ ܘܒܰܕܡܶܗ ܟܬܰܒ ܠܳܗ̇ ܦܶܪܢܺܝܬܳܐ܆ ܠܒܰܪ̱ܬ ܥܰܡ̱̈ܡܶܐ ܘܒܰܨܠܺܝܒܶܗ ܚܰܪܪܳܗ̇܀

ܒܗܳܢܳܐ ܥܺܐܕܳܐ ܬܶܙܡܰܪ ܠܶܗ܆ ܒܰܪ̱ܬ ܥܰܡ̱̈ܡܶܐ ܫܽܘܒܚܳܐ ܠܒܽܘܟܪܳܐ܆ ܕܛܰܪܕܳܗ̇ ܠܙܳܢܺܝܬܳܐ܆ ܘܰܐܦܩܳܗ̇ ܡܶܢ ܒܰܝܬܶܗ܆ ܘܶܐܬܳܐ ܘܰܦܬܰܚ ܠܳܗ̇ ܬܰܪܥܶܗ܆ ܠܰܡܟܺܝܪܬܶܗ ܒܥܺܐܕܳܐ ܕܩܽܘܕܳܫܳܗ̇܀

ܗܳܢܳܐ ܥܽܘܬܪܳܐ ܝܰܗ̱ܒ ܗ̱ܘܳܐ ܠܳܗ̇܆ ܠܒܰܪ̱ܬ ܥܰܡ̱̈ܡܶܐ ܕܰܐܚܒܰܬ ܠܦܳܪܽܘܩܳܗ̇܆ ܬܰܪܫܺܝܫ ܘܓܳܙܪ̈ܳܬܳܐ܆ ܐܶܬܰܝ̈ ܘܰܣ̈ܓܶܕܝ ܠܳܗ̇܆ ܡܰܠ̈ܟܶܐ ܕܫܰܒܰܐ ܘܰܕܣܰܒܰܐ܆ ܩܽܘܪ̈ܒܳܢܶܐ ܡܩܰܪܒܺܝܢ ܩܕܳܡܶܝܗ̇܀

ܚܙܳܬܶܗ ܪܚܺܝܡܬܳܐ ܘܫܶܦܪܰܬ ܠܶܗ܆ ܡܶܢ ܟܽܠܗܶܝܢ ܟܢܽܘ̈ܫܳܬܳܐ ܕܰܓܒܳܐ܆ ܕܢܶܗܘܶܐ ܣܺܝܡ ܫܽܘܦܪܳܗ̇܆ ܩܕܳܡ ܥܰܝ̈ܢܰܘܗ̱ܝ ܟܽܠܝܽܘܡ܆ ܘܥܰܠ ܦܰܣܬܳܐ ܕܶܝܢ ܕܝܰܡܺܝܢܶܗ܆ ܡܬܰܚ ܕܽܘܡ̈ܣܶܝܗ̇ ܡܫܰܩ̈ܠܶܐ ܘܪ̈ܳܡܶܐ܀

ܒܝܰܘܢܳܐ ܓܠܺܝܙܰܬ ܡܶܢ ܪܽܘܓܙܳܐ܆ ܕܰܠܟܽܠܳܗ̇ ܚܶܡܬܳܐ ܡܢܰܟܪܝܳܐ܆ ܬܰܡܺܝܡܳܐ ܘܫܰܦܝܳܐ܆ ܦܫܺܝܛܳܐ ܘܫܰܦܺܝܪܳܐ܆ ܒܗܳܢܳܐ ܓܽܘܫܡܳܐ ܫܰܦܺܝܪܳܐ܆ ܗܘܳܐ ܨܰܠܡܳܗ̇ ܕܥܺܕܬܳܐ ܪܚܺܝܡܬܳܐ܀

ܥܺܕܬܳܐ ܙܡܰܪܝ ܠܶܗ ܬܶܫܒܽܘܚܬܳܐ܆ ܠܰܡܫܺܝܚܳܐ ܕܦܰܪܩܶܟܝ ܒܡܶܐܬܝܶܗ܆ ܘܰܒܦܰܟܳܐ ܕܰܒܠܰܥ܆ ܝܰܗ̱ܒ ܠܶܟܝ ܫܽܘܒܩܳܢܳܐ܆ ܘܡܶܢ ܡܰܒܽܘܥܳܐ ܕܡܶܢ ܕܰܦܢܶܗ܆ ܪܕܰܘ ܚܰܝ̈ܶܐ ܚܰܕ̱̈ܬܶܐ ܠܥܳܠܡܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܐܰܘܕܳܝ ܥܺܕܬܳܐ ܒܰܙܡܺܝܪ̈ܳܬܶܟܝ ܫܰܦܺܝܪ̈ܳܬܳܐ܆

ܘܩܰܪܶܒܝ ܠܰܒܪܳܐ ܕܳܫ̈ܢܶܐ ܕܫܽܘܒܚܳܐ ܒܝܽܘܡ ܩܽܘܕܳܫܶܟܝ܀

ܒܝܰܘܡܳܟ ܪܰܒܳܐ ܚܰܕܳܐ ܠܥܺܕܬܳܟ ܒܰܪ ܐܰܠܳܗܳܐ܆ ܘܰܚܬܽܘܡ ܝܰܠ̈ܕܶܝܗ̇ ܒܰܨܠܺܝܒ ܢܽܘܗܪܳܐ ܕܰܐܚܺܝܕܺܝܢ ܒܶܗ܆ ܫܰܝܢܳܟ ܢܰܡܠܶܟ ܒܰܝܢܳܬ ܓܽܘܕܶܝ̈ܗ̇ ܟܰܗܺܝ̈ܢܳܬܳܐ܆ ܘܢܶܣܓܽܘܢ ܥܺܐܕܶܝ̈ܗ̇ ܒܩܶܛܠܳܟ ܪܰܒܳܐ ܕܰܡܢܰܛܰܪ ܠܳܗ̇܀

ܢܶܣܬܰܕܪ̈ܳܢ ܒܳܗ̇ ܓܽܘ̈ܕܶܐ ܕܫܽܘܒܚܳܐ ܘܠܳܐ ܕܚܶܪܝܳܢܳܐ܆ ܘܢܶܣܰܩ ܡܶܢܳܗ̇ ܩܳܠ ܗܽܘ̈ܠܳܠܶܐ ܘܠܳܐ ܕܰܒܨܳܬܳܐ܆ ܢܶܬܚܰܢܩܽܘܢ ܒܳܗ̇ ܕܺܐܒ̈ܶܐ ܕܣܳܥܶܝܢ ܥܰܠ ܚܽܘܒܳܠܳܗ̇܆ ܘܰܙܩܺܝܦܽܘܬܳܟ ܬܶܛܪܽܘܕ ܐܶܢܽܘܢ ܡܶܢ ܐܽܘܚܕܳܢܳܗ̇܀

ܐܰܝܢܳܐ ܕܡܰܩܪܶܒ ܥܰܡܶܟܝ ܥܺܕܬܳܐ ܣܽܘܣܝܶܗ ܢܶܦܶܠ܆

ܘܰܒܗܰܘ ܓܶܐܪܳܐ ܕܡܳܬܚܳܐ ܩܶܫܬܶܗ ܒܣܶܛܪܶܗ ܢܶܒܠܰܥ܀