ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܒܓܰܘ ܟܰܪܣܳܗ̇ ܢܽܘܪܳܐ ܫܰܪܝܳܐ܆ ܘܥܰܠ ܚܰܕܝܳܗ̇ ܬܶܗܪܳܐ ܪܰܒܳܐ܆ ܒܨܶܒ̈ܥܳܬܳܗ̇ ܢܽܘܪܳܐ ܠܶܒܟܰܬ܆ ܘܰܒܟܶܢ̈ܦܶܝܗ̇ ܫܶܡܫܳܐ ܛܶܥܢܰܬ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐܰܝܟ ܠܶܓ̈ܝܽܘܢܶܐ ܕܢܽܘܪ̈ܳܢܶܐ܆ ܙܗܶܝܢ ܗ̱ܘܰܘ ܘܰܕܟܶܝܢ ܚܽܘ̈ܫܳܒܶܝܗ̇܆ ܕܬܶܓܠܶܐ ܐ̱ܪܳܙܳܐ ܕܳܚܠܳܐ ܗ̱ܘܳܬ܆ ܘܰܕܬܶܫܠܶܐ ܠܳܐ ܡܰܨܝܳܐ ܗ̱ܘܳܬ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܡܰܪܟܰܒܬܳܐ ܗܳܝ ܕܰܟܪ̈ܽܘܒܶܐ. ܠܳܐ ܦܳܚܡܳܐ ܒܶܟܝ ܐܳܘ ܒܬܽܘܠܬܳܐ܆ ܕܡܶܢ ܥܽܘܒܶܟܝ ܕܰܟܝܳܐ ܕܢܰܚ ܠܰܢ܆ ܐܰܠܳܗܳܐ ܕܰܠܒܶܫ ܦܰܓܪܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܆ ܕܡܶܢ ܥܽܘܒܳܐ ܕܰܒܬܽܘܠܽܘܬܳܐ܆ ܢܣܰܒ ܠܶܗ ܦܰܓܪܳܐ ܐܰܝܟ ܕܰܨܒܳܐ܆ ܘܝܺܠܶܕܬܶܗ ܘܢܰܛܪܳܗ̇ ܒܬܽܘܠܬܳܐ܆ ܘܰܐܘܪܶܒ ܝܰܘܡܳܐ ܕܕܽܘܟܪܳܢܳܗ̇܆ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܩܽܘܩܳܝܳܐ
ܚܕܳܐ ܛܠܺܝܬܳܐ ܡܶܢ ܒܶܝܬ ܕܰܘܺܝܕ

ܡܶܢ ܗܳܝ ܓܽܘܕܳܐ ܕܪ̈ܽܘܚܳܢܶܐ. ܕܙܳܡܪܳܐ ܘܠܳܐ ܫܳܠܝܳܐ܆ ܪܡܰܙ ܠܶܗ ܡܳܪܝܳܐ ܠܓܰܒܪܺܐܶܝܠ܆ ܘܗܳܟܰܢ ܐܶܡܰܪ ܠܶܗ܆ ܙܶܠ ܚܽܘܬ ܠܢܳܨܪܰܬ܆ ܡܕܺܝܢ̱ܬܳܐ ܕܰܓܠܺܝܠܳܐ܆ ܘܰܚܙܺܝ ܛܠܺܝܬܳܐ. ܕܩܳܝܡܳܐ ܒܰܨܠܽܘܬܳܐ܆ ܐܰܪܟܶܢ ܪܺܝܫܳܟ ܘܰܣܓܽܘܕ ܠܳܗ̇ ܘܗܳܟܰܢ ܐ̱ܡܰܪ ܠܳܗ̇܆ ܕܡܶܢܶܟܝ ܕܳܢܰܚ ܐܰܠܳܗܳܐ ܦܳܪܽܘܩܳܐ ܕܥܳܠܡܳܐ܆ ܗ̄ ܨܠܽܘܬܶܟܝ ܬܥܰܕܰܪ ܠܰܢ܀

ܫܽܘܒܚܳܐ

ܬܰܪܥܳܐ ܕܰܚܙܳܐ ܚܰܙܩܺܝܐܶܝܠ. ܒܰܢܒܺܝܽܘܬܶܗ܆ ܕܰܐܚܺܝܕ ܘܰܚܬܺܝܡ ܗ̱ܘܳܐ ܡܰܪܝܰܡ܆ ܒܬܽܘܠܬܳܐ ܩܰܕܺܝܫܬܳܐ ܗ̱ܝ܆ ܕܰܕܢܰܚ ܡܶܢܳܗ̇܆ ܡܳܪܰܢ ܘܰܚܬܺܝܡܳܐ܆ ܘܠܳܐ ܫܪܳܐ ܛܰܒ̈ܥܶܐ܆ ܢܛܺܝܪ̈ܶܐ ܕܰܒܬܽܘ̈ܠܶܝܗ̇. ܒܪܺܝܟܽ ܗ̱ܘ ܝܰܠܕܳܐ ܕܕܽܘܡܳܪܳܐ ܕܰܣܥܰܪ ܥܰܡܶܗ܆ ܘܝܳܠܶܕܬܶܗ ܪܰܡܪܶܡ ܘܰܐܘܪܶܒ ܒܰܐܪܒܰܥ ܦܶܢ̈ܝܳܬܳܐ܆ ܗ̄ܘܗ̄܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܗܳܢܰܘ ܝܰܪܚܳܐ܆ ܕܰܛܥܺܝܢ ܟܽܠܶܗ ܟܽܠ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ܆ ܕܝܰܩܰܪ ܘܰܐܘܪܶܒ ܝܽܘܡ ܕܽܘܟܪܳܢܶܟܝ.

ܡܰܪܝܰܡ ܝܶܗܒܰܬ. ܦܺܐܪܳܐ ܚܰܠܝܳܐ ܠܰܒܢܰܝ̈ܢܳܫܳܐ܆ ܘܰܚܠܳܦ ܦܺܐܪܳܐ ܗܰܘ ܡܰܪܺܝܪܳܐ܆ ܕܩܶܛܦܰܬ ܚܰܘܳܐ ܒܶܝܬ ܐܺܝ̈ܠܳܢܶܐ܆ ܒܦܺܐܪܳܗ̇ ܕܡܰܪܝܰܡ. ܗܳܐ ܡܶܬܒܰܣܡܳܐ ܒܪܺܝܬܳܐ ܟܽܠܳܗ̇܀

ܐܺܝܠܳܢ ܚܰܝ̈ܶܐ. ܗܰܘ ܕܰܢܨܺܝܒ ܗ̱ܘܳܐ ܒܓܰܘ ܦܰܪܕܰܝܣܳܐ܆ ܒܡܰܪܝܰܡ ܝܺܥܳܐ ܘܰܫܘܰܚ ܡܶܢܳܗ̇܆ ܘܗܳܐ ܒܛܶܠܳܠܶܗ ܒܪܺܝܬܳܐ ܝܳܬܒܳܐ܆ ܘܫܳܕܶܐ ܦܺܐܪ̈ܰܘܗ̱ܝ. ܥܰܠ ܪ̈ܰܚܺܝܩܶܐ ܘܥܰܠ ܩܰܪ̈ܺܝܒܶܐ܀

ܢܶܚܕܶܐ ܒܡܰܪܝܰܡ. ܐܳܕܳܡ ܪܰܒܳܐ ܕܢܰܟܬܶܗ ܚܶܘܝܳܐ܆ ܕܗܺܝ ܝܶܗܒܰܬ ܠܶܗ ܚܰܕ ܥܶܩܳܪܳܐ܆ ܘܰܐܟܠܶܗ ܘܰܐܩܠܺܝ ܥܰܠ ܚܰܪܡܳܢܳܐ܆ ܘܒܶܗ ܐܶܬܚܰܠܡܰܬ܆ ܢܽܘܟܬܰܬ ܚܶܘܝܳܐ ܕܰܩܛܰܠܬܶܗ ܗ̱ܘܳܬ܀

ܢܶܚܕܽܘܢ ܟܽܘܡܪ̈ܶܐ. ܒܰܡܒܰܪܰܟܬܳܐ ܕܒܶܪܟܰܬ ܘܝܶܠܕܰܬ܆ ܟܽܘܡܪܳܐ ܪܰܒܳܐ ܕܰܗܘܳܐ ܕܶܒܚܳܐ܆ ܘܰܚܣܰܟ ܐܶܢܽܘܢ ܡܶܢ ܕܶܒ̈ܚܳܬܳܐ܆ ܘܪܰܥܺܝ ܠܰܐܒܽܘܗ̱ܝ܆ ܥܰܡ ܒܶܪ̈ܝܳܬܶܗ ܫܽܘܒܚܳܐ ܠܰܫܡܶܗ܀

ܗܳܐ ܒܒܶܝܬ ܠܚܶܡ܆ ܕܰܘܺܝܕ ܡܰܠܟܳܐ ܒܽܘܨܳܐ ܠܒܺܝܫ ܗ̱ܘܳܐ܆ ܡܳܪܶܗ ܕܕܰܘܺܝܕ ܘܰܒܪܶܗ ܕܕܰܘܺܝܕ܆ ܒܓܰܘ ܥܰܙܪܽܘܪ̈ܶܐ ܛܡܰܪ ܬܶܫܒܽܘܚܬܶܗ܆ ܘܝܰܗ̱ܒ ܥܰܙܪܽܘܪ̈ܰܘܗ̱ܝ܆ ܐܶܣܛܰܠ ܫܽܘܒܚܳܐ ܠܰܕܒܶܝܬ ܐܳܕܳܡ܀

ܐܶܡܳܟ ܗ̱ܺܝ ܓܶܝܪ. ܗܺܝ ܒܰܠܚܽܘܕܶܝܗ̇ ܘܚܳܬܳܟ ܥܰܡ ܟܽܠ܆ ܗܘܳܬ ܠܳܟ ܐܶܡܳܐ ܗܘܳܬ ܠܳܟ ܚܳܬܳܐ܆ ܘܰܡܟܺܝܪܬܳܟ ܗ̱ܺܝ ܥܰܡ ܢܰܟ̈ܦܳܬܳܐ܆ ܒܟܽܠܡܶܕܶܡ ܓܶܝܪ ܐܰܢ̱ܬ ܨܰܒܶܬܬܳܗ̇ ܫܽܘܦܪܳܐ ܕܶܐܡܶܗ܀

ܚܳܬܳܟ ܐ̱ܢܳܐ ܓܶܝܪ. ܡܶܢ ܒܶܝܬ ܕܰܘܺܝܕ ܕܰܐܒܰܐ ܗ̱ܘ ܕܰܬܪܶܝܢ܆ ܐܶܡܳܟ ܐ̱ܢܳܐ ܓܶܝܪ ܡܶܛܽܠ ܒܰܛܢܳܟ܆ ܘܰܡܟܺܝܪܬܳܟ ܬܽܘܒ ܡܶܛܽܠ ܣܰܒܪܳܟ܆ ܐܶܡܳܟ ܐ̱ܢܳܐ ܬܽܘܒ܆ ܘܰܗܘܺܝܬ ܚܳܬܳܟ ܡܶܢ ܓܰܘ ܡܰܝ̈ܳܐ܀

ܫܡܰܝܳܐ ܕܬܰܪܬܶܝܢ. ܢܶܩܪܶܝܢܝ ܟܽܠܢܳܫ ܕܰܠܡܰܢ ܝܶܠܕܶܬ܆ ܠܒܰܪ ܡܳܪܶܐ ܟܽܠ ܠܒܰܪ ܙܳܐܶܢ ܟܽܠ܆ ܠܒܰܪ ܕܳܐܶܢ ܟܽܠ ܠܒܰܪ ܚܳܐܶܢ ܟܽܠ܆ ܠܒܰܪ ܥܶܠܳܝܳܐ܆ ܠܒܰܪ ܟܰܣܝܽܘܬܳܐ ܠܒܰܪ ܓܰܠܝܽܘܬܳܐ܀

ܡܰܪܝܰܡ ܙܶܩܪܰܬ. ܐܶܣܛܰܠ ܫܽܘܒܚܳܐ ܘܝܶܗܒܰܬ ܠܰܐܒܽܘܗ̇܆ ܕܰܡܦܰܪܣܰܝ ܗ̱ܘܳܐ ܒܶܝܬ ܐܺܝ̈ܠܳܢܶܐ܆ ܠܒܶܫ ܘܶܐܬܢܰܟܰܦ ܡܶܢ ܨܶܝܕ ܡܰܪܝܰܡ܆ ܐܰܢ̱ܬܬܳܐ ܣܚܰܦܬܶܗ܆ ܘܒܰܪܬܳܐ ܣܡܰܟܬܶܗ ܘܩܳܡ ܓܰܢ̱ܒܳܪܳܐ܀

ܢܚܶܬ ܡܶܢ ܪܰܘܡܳܐ܆ ܡܶܠܬܶܗ ܕܰܐܒܳܐ ܨܶܝܕ ܒܰܪ̱ܬ ܕܰܘܺܝܕ܆ ܫܪܳܐ ܒܳܗ̇ ܘܒܶܛܢܰܬ ܘܠܳܐ ܪܶܓܫܰܬ ܒܶܗ܆ ܢܦܰܩ ܗ̱ܘܳܐ ܒܝܰܠܕܶܗ ܡܶܢ ܓܰܘ ܥܽܘܒܳܗ̇܆ ܘܰܚܬܺܝܡ ܛܰܒܥܳܐ܆ ܕܰܒܬܽܘܠܽܘܬܳܗ̇ ܘܠܳܐ ܐܶܬܚܰܒܰܠ܀

ܐ̱ܚܪܺܢܳܐ

ܩܳܠܳܐ ܒܩ̄: ܕܡܰܘ̈ܕܝܳܢܶܐ
ܣܳܠܶܩ: ܕܽܘܨ ܟܶܢܫܳܐ ܕܰܥܠܰܝܡܳܬܳܐ

ܥܽܘܢܺܝܬܳܐ: ܠܳܟ ܫܽܘܒܚܳܐ ܒܪܳܐ ܕܰܐܠܳܗܳܐ܆ ܒܕܽܘܟܪܳܢܳܗ̇ ܕܗܳܝ ܕܺܝܠܶܕܬܳܟ.

ܛܥܺܝܢܳܐ ܒܺܐܝ̈ܕܶܝܗ̇ ܝܰܠܽܘܕܳܐ܆ ܘܚܳܙܝܳܐ ܒܬܽܳܘ̈ܠܶܐ ܥܰܠ ܓܽܘܫܡܳܗ̇܆ ܚܰܠܒܳܐ ܒܰܬܕܶܝ̈ܗ̇ ܪܳܬܰܚ ܗ̱ܘܳܐ. ܘܒܰܒܬܽܘܠܽܘܬܳܗ̇ ܠܳܐ ܙܳܥܰܬ܆ ܘܟܽܠܳܗ̇ ܬܶܗܪܳܐ ܡܰܠܝܳܐ ܗ̱ܘܳܬ܀

ܚܙܳܬ ܕܰܛܥܺܝܢܳܐ ܝܰܠܽܘܕܳܐ܆ ܘܰܒܬܽܘܠܽܘܬܳܗ̇ ܩܰܝܳܡܳܐ܆ ܥܒܳܕܳܐ ܚܰܕ̱ܬܳܐ ܕܰܗܘܳܐ ܒܳܗ̇܆ ܝܰܗ̱ܒ ܠܳܗ̇ ܬܶܗܪܳܐ ܕܬܶܣܬܰܟܰܠ܆ ܕܗܰܘ ܕܰܛܥܺܝܢܳܐ ܐܰܠܳܗܰܐ ܗ̱ܘ܀

ܚܰܙܩܺܝܐܶܝܠ ܒܰܪ ܓܳܠܽܘܬܳܐ܆ ܒܗܰܘ ܬܰܪܥܳܐ ܕܰܐܚܺܝܕ ܫܰܡܗܶܟܝ܆ ܕܰܐܚܺܝܕ ܘܰܚܬܺܝܡ ܘܠܳܐ ܐܶܬܦܬܰܚ܆ ܐܺܝܬܰܘܗ̱ܝ ܗ̱ܘܳܐ ܒܬܽܘܠܬܳܐ ܡܰܪܝܰܡ܆ ܕܰܚܬܺܝܡܳܐ ܗ̱ܝ ܒܰܒܬܽܘܠܽܘܬܳܗ̇܀

ܡܰܢ ܠܳܐ ܢܶܬܶܠ ܠܶܟܝ ܛܽܘܒܳܐ܆ ܘܡܰܢ ܠܳܐ ܢܰܘܪܶܒ ܕܽܘܟܪܳܢܶܟܝ܆ ܡܰܢ ܠܳܐ ܢܶܐܚܽܘܕ ܒܶܟܝ ܓܰܘܣܳܐ܆ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ܆ ܨܠܽܘܬܶܟܝ ܫܽܘܪܳܐ ܬܶܗܘܶܐ ܠܰܢ܀

ܒܢܽܘܪܳܐ ܨܳܪ ܡܽܘܫܶܐ ܫܽܘܦܪܶܟܝ܆ ܕܰܫܪܳܬ ܓܰܘܙܰܠܬܳܐ ܒܥܽܘܒܶܟܝ܆ ܘܠܳܐ ܝܺܩܶܕܬܝ ܡܶܢ ܢܰܒܪܰܫܬܳܐ܆ ܘܢܽܘܪܳܐ ܗܳܝ ܕܰܐܠܳܗܽܘܬܳܐ܆ ܕܢܰܚ ܡܶܢܶܟܝ ܘܰܦܪܰܩ ܥܳܠ̈ܡܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܫܺܝܚܳܐ ܘܡܶܫܚܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܕܢܰܚ ܡܶܢ ܥܽܘܒܳܗ̇܆ ܕܰܒܬܽܘܠܬܳܐ ܕܟܺܝܬܳܐ ܡܰܪܝܰܡ.

ܛܽܘܒܰܝܟܝ ܡܰܪܝܰܡ ܒܰܪ̱ܬ ܕܰܘܺܝܕ܆ ܒܰܪ̱ܬ ܐ̱ܢܳܫ̈ܳܐ ܡܝܰܩܪ̈ܶܐ ܘܟܺܐܢ̈ܶܐ܆ ܕܰܒܢܶܕܪ̈ܶܐ ܘܰܒܩܽܘܪ̈ܒܳܢܶܐ܆ ܡܶܢ ܐܰܠܳܗܳܐ ܐܶܬܺܝܗܶܒܬܝ܆ ܘܶܐܬܪܰܒܺܝܬܝ ܒܗܰܝܟܰܠ ܩܽܘܕܫܳܐ܆ ܘܡܶܢ ܡܰܠܰܐܟ̈ܶܐ ܐܶܫܬܰܡܰܫܬܝ܆ ܫܪܳܐ ܒܶܟܝ ܚܰܝܠܶܗ ܕܥܶܠܳܝܳܐ܆ ܡܶܠܬܶܗ ܕܰܐܒܳܐ ܫܡܰܝܳܢܳܐ܆ ܘܰܢܦܰܩ ܠܥܳܠܡܳܐ ܐܰܝܟ ܐ̱ܢܳܫܳܐ܆ ܟܰܕ ܐܰܠܳܗܰܐ ܗ̱ܘ ܒܰܟܝܳܢܶܗ܀

ܛܽܘܒܰܝܟܝ ܡܰܪܝܰܡ ܩܰܕܺܝܫܬܳܐ܆ ܕܰܫܡܰܝܳܐ ܘܰܐܪܥܳܐ ܝܰܩܪܽܘܟܝ܆ ܘܰܐܠܳܗܳܐ ܡܶܠܬܳܐ ܝܺܚܺܝܕܳܐ܆ ܫܪܳܐ ܒܥܽܘܒܶܟܝ ܘܰܠܒܶܫ ܦܰܓܪܳܐ܆ ܘܰܕܢܰܚ ܘܰܢܦܰܩ ܠܰܒܪܺܝܬܳܐ܆ ܐܰܝܟ ܫܰܪܟܳܐ ܕܟܽܠ ܝܺܠܺܝ̈ܕܶܐ܆ ܛܽܘܒܳܐ ܪܰܒܳܐ ܬܶܬܶܠ ܠܺܝ܆ ܫܡܰܝܳܐ ܕܰܫܪܳܐ ܒܳܗ̇ ܟܽܘܪܣܝܶܗ܆ ܘܰܐܪܥܳܐ ܕܰܥܒܰܕ ܠܶܗ ܡܰܫܪܝܳܐ܆ ܘܽܐܘܪܝܳܐ ܕܒܶܗ ܗܽܘ ܐܶܬܺܝܠܶܕ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܝܢܰܘ ܕܢܰܓܺܝܪܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܡܶܢ ܡܰܪܝܰܡ: ܕܢܰܚ ܗ̱ܘܳܐ ܘܰܦܪܰܩ ܠܰܢ.

ܐܶܩܪܶܝܗ̇ ܡܙܰܘܰܓܬܳܐ: ܒܬܽܘ̈ܠܶܝܗ̇ ܡܙܺܝܥܺܝܢ ܠܺܝ: ܘܰܒܬܽܘܠܬܳܐ ܐܶܩܪܶܝܗ̇: ܝܰܠܕܳܗ̇ ܡܰܬܗܰܪ ܠܺܝ: ܝܰܠܕܳܗ̇ ܕܕܽܘܡܳܪܰܐ ܗ̱ܘ: ܘܫܰܪܒܰܐ ܗ̱ܘ ܕܠܳܐ ܣܳܟܳܐ܀

ܒܝܰܕ ܩܽܘܩܬܳܐ ܚܕܰܬܳܐ: ܐܶܬܡܰܬܠܰܬ ܡܰܪܝܰܡ: ܕܰܒܪܳܗ̇ ܗܘܳܐ ܡܶܠܚܳܐ: ܘܚܰܠܺܝ ܠܗܳܝ ܡܶܪܬܳܐ: ܕܚܶܘܝܳܐ ܓܣܳܐ ܒܰܥܕܶܝܢ: ܘܚܰܒܶܠ ܫܰܦܺܝܪ̈ܶܐ܀

ܒܡܰܪܝܰܡ ܕܢܰܚ ܢܽܘܗܪܳܐ: ܘܰܪܕܦܶܗ ܠܚܶܫܽܘܟܳܐ: ܕܥܰܠ ܗ̱ܘܳܐ ܒܝܰܕ ܚܰܘܳܐ: ܘܕܰܠܚܳܗ̇ ܠܐ̱ܢܳܫܽܘܬܳܐ: ܘܢܶܗܪܰܬ ܒܝܰܕ ܡܰܪܝܰܡ: ܒܪܺܝܬܳܐ ܕܚܶܫܟܰܬ ܗ̱ܘܳܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܫܩܳܢܝ ܡܳܪܝ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܰܐܪܟܶܢ ܢܰܦܫܶܗ܆ ܘܰܗܘܳܐ ܥܽܘܠܳܐ ܒܛܽܘܒܳܢܺܝܬܳܐ.

ܐܰܠܳܗܳܐ ܕܥܶܠܳܝ ܡܶܢ ܟܽܠ܆ ܬܰܚܬܺܝ ܝܳܬܶܗ ܨܶܝܕ ܥܰܦܪ̈ܳܢܶܐ. ܒܪܳܐ ܓܢܺܝܙܳܐ ܕܕܳܡܶܐ ܠܰܐܒܽܘܗ̱ܝ܆ ܐܶܬܕܰܡܺܝ ܠܰܢ ܘܰܗܘܳܐ ܡܶܢܰܢ܆ ܐܶܬܺܝܠܶܕ ܡܶܢ ܐܰܒܳܐ ܠܗܰܠ ܡܶܢ ܙܰܒ̈ܢܶܐ܆ ܘܶܐܬܺܝܠܶܕ ܡܶܢ ܡܰܪܝܰܡ ܠܥܶܠ ܡܶܢ ܡܶܠܬܳܐ܆ ܝܰܠܕܶܗ ܐܰܒܳܐ ܕܠܳܐ ܦܰܓܪܳܐ܆ ܐܳܦ ܐ̱ܢܳܫܽܘܬܳܐ ܦܰܓܪܳܢܳܐܺܝܬ܀

ܝܰܠܕܶܗ ܕܰܐܒܳܐ ܗܘܳܐ ܥܽܘܠܳܐ܆ ܠܛܽܘܒܳܢܺܝܬܳܐ ܕܠܳܐ ܙܽܘܘܳܓܳܐ܆ ܒܰܪ ܐܺܝܬܽܘܬܳܐ ܗܘܳܐ ܝܰܠܕܳܐ܆ ܠܒܰܪ̱ܬ ܡܶܣ̈ܟܺܢܶܐ ܦܰܓܪܳܢܳܐܺܝܬ܆ ܩܕܳܡ ܙܰܒ̈ܢܶܐ ܝܰܠܕܶܗ ܐܰܒܳܐ ܕܠܳܐ ܫܽܘܪܳܝܳܐ܆ ܘܰܒܚܰܪܬܳܐ ܗܘܳܐ ܒܶܣܪܳܐ ܡܶܛܽܠܳܬܰܢ܆ ܫܘܶܐ ܠܰܐܒܽܘܗ̱ܝ ܒܰܐܠܳܗܽܘܬܶܗ܆ ܘܰܫܘܶܐ ܠܐܢܳܫܽܘܬܰܢ ܒܦܰܓܪܳܐ ܕܰܠܒܶܫ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܰܕܢܰܚ ܡܶܢܶܟܝ. ܡܰܠܝܰܬ ܫܽܘܦܪ̈ܶܐ ܒܚܰܪܰܬ ܙܰܒ̈ܢܶܐ.

ܛܽܘܒܰܝܟܝ ܐܶܡܳܐ. ܡܰܠܝܰܬ ܛܽܘ̈ܒܶܐ܆ ܕܗܳܐ ܝܳܗ̈ܒܳܢ ܠܶܟܝ ܟܽܠ ܫܰܪ̈ܒܳܬܳܐ܆ ܛܽܘܒܳܐ ܪܰܒܳܐ. ܒܩܳܠܳܐ ܪܳܡܳܐ܆ ܡܶܛܽܠ ܝܰܠܕܳܐ ܕܰܕܢܰܚ ܡܶܢܶܟܝ܆ ܐܶܡ̈ܗܳܬܳܐ ܡܓܰܙ̈ܝܳܬܳܐ ܟܽܠܗܶܝܢ܆ ܛܽܘܒܳܐ ܝܳܗ̈ܒܳܢ ܠܶܟܝ ܡܶܢ ܦܽܘ̈ܡܰܝܗܶܝܢ܆ ܛܽܘܒܰܝܟܝ ܢܰܟܦܬܳܐ܆ ܕܒܶܟܝ ܘܥܰܡܶܟܝ ܐܶܬܚܙܺܝ܆ ܛܽܘܒܳܐ ܕܠܳܐ ܡܰܘܦܶܐ܀

ܛܽܘܒܰܝܟܝ ܡܰܪܝܰܡ. ܕܰܗܘܳܐ ܥܽܘܒܶܟܝ܆ ܒܺܐܪܰܬ ܡܰܠܟܳܐ ܘܥܰܠ ܘܰܫܪܳܐ ܒܶܟܝ܆ ܩܳܛܰܪ ܬܳܓ̈ܶܐ. ܠܟܽܠܗܽܘܢ ܡܰܠ̈ܟܶܐ܆ ܘܝܳܗܶܒ ܕܰܪ̈ܓܶܐ ܠܡܳܪ̈ܰܘܳܬܳܐ܆ ܡܶܢ ܕܺܝܗܽܘܕܳܐ ܡܰܫܩܠܶܟܝ܆ ܘܡܶܢ ܐܰܪܥܳܐ ܕܒܶܝܬ ܕܰܘܺܝܕ ܫܰܪܒܬܶܟܝ܆ ܓܶܢܣܶܟܝ ܓܶܝܪ ܡܫܰܒܚܳܐ܆ ܘܰܗܘܰܝܬܝ ܠܶܗ ܐܶܡܳܐ܆ ܠܰܒܪܳܐ ܒܬܶܕܡܽܘܪܬܳܐ܀

ܛܽܘܒܰܝܟܝ ܐܳܦܪܰܬ. ܐܶܡܳܐ ܕܡܰܠ̈ܟܶܐ܆ ܕܰܕܢܰܚ ܡܶܢܶܟܝ ܡܳܪܶܐ ܡܰܠ̈ܟܶܐ܆ ܡܺܝܟܰܐ ܗ̱ܘ ܣܰܒܪܶܟܝ܆ ܕܡܶܢ ܥܳܠܰܡ ܗ̱ܽܘ܆ ܘܡܶܬܚܳܐ ܕܚܰܝܰܘ̈ܗ̱ܝ ܠܳܐ ܡܶܬܕܰܪܟܺܝܢ܆ ܛܽܘܒ ܠܥܰܝܢܰܝ̈ܟܝ ܕܰܩܕܳܡ ܟܽܠ ܐܰܩܒܠܳܝ̈ܗ̱ܝ܆ ܘܠܶܟܝ ܐܰܫܘܺܝ ܕܬܶܚܙܶܝܢܳܝܗ̱ܝ ܟܰܕ ܕܢܰܚ܆ ܠܪܺܝܫܳܐ ܕܒܽܘܪ̈ܟܳܬܳܐ܆ ܘܫܽܘܪܳܝ ܚܰܕ̈ܘܳܬܳܐ܆ ܫܩܰܠܬܺܝܘܗ̱ܝ ܩܕܳܡ ܟܽܠܳܐ܀

ܛܽܘܒܰܝܟܝ ܡܰܪܝܰܡ. ܒܰܪ̱ܬ ܡܶܣ̈ܟܺܢܶܐ܆ ܕܰܗܘܰܝܬܝ ܐܶܡܳܐ ܠܡܳܪܶܐ ܡܰܠ̈ܟܶܐ܆ ܘܰܫܪܳܐ ܒܥܽܘܒܶܟܝ. ܩܰܕܺܝܫܳܐܺܝܬ܆ ܗܰܘ ܕܰܫܡܰܝ̈ܳܐ ܡܠܶܝܢ ܬܶܫܒܽܘܚܬܶܗ܆ ܛܽܘܒ ܠܚܰܕܝܶܟܝ ܕܰܪܬܰܚ ܠܶܗ ܘܰܐܝܢܩܶܗ܆ ܘܰܠܦܽܘܡܶܟܝ ܕܰܣܘܰܚ ܠܶܗ ܘܢܰܫܩܶܗ܆ ܕܪ̈ܳܥܰܝܟܝ ܛܰܥܢܽܘܗ̱ܝ܆ ܗܘܰܝܬܝ ܐܰܝܟ ܡܰܪܟܰܒܬܳܐ܆ ܘܙܰܝܰܚܬܝ ܠܢܽܘܪܳܢܳܐ܀

ܐܰܝܢܰܘ ܛܰܠܝܳܐ. ܕܪܰܒܺܝ ܠܰܐܒܽܘܗ̱ܝ܆ ܘܰܗܘܳܐ ܐܰܒܳܐ ܠܶܐܡܳܐ ܕܶܐܡܶܗ܆ ܘܟܰܕ ܐܶܡ̈ܗܳܬܳܐ܆ ܬܰܪܬܶܝܢ ܗܘܰܝ̈ ܠܶܗ܆ ܘܗܽܘܝܽܘ ܩܰܫܺܝܫ ܡܶܢ ܬܰܪ̈ܬܰܝܗܶܝܢ܆ ܕܠܳܐ ܙܽܘܘܳܓܳܐ ܘܡܶܢ ܙܽܘܘܳܓܳܐ܆ ܐܰܒܽܘܗ̱ܝ ܛܰܠܝܳܐ ܘܶܐܡܶܗ ܣܳܒܬܳܐ܆ ܘܶܐܢܗܽܘ ܕܬܺܐܠܰܦ܆ ܠܰܫܡܶܗ ܒܳܥܶܐ ܐܰܢ̱ܬ܆ ܗܳܐ ܟܬܺܝܒ ܒܽܐܘܪܳܝܬܳܐ܀

ܛܽܘܒܰܝܟܝ ܡܰܪܝܰܡ. ܕܠܶܟܝ ܨܳܐܰܪ ܗ̱ܘܳܐ܆ ܗܰܘ ܐܺܝܠܳܢܳܐ ܒܛܽܘܪܶܗ ܕܺܐܝܣܚܳܩ܆ ܕܝܰܗ̱ܒ ܗ̱ܘܳܐ ܐܶܡܪܳܐ܆ ܕܢܶܗܘܶܐ ܕܶܒܚܳܐ܆ ܟܰܕ ܠܳܐ ܝܺܠܺܝܕ ܡܶܢ ܙܽܘܘܳܓܳܐ܆ ܒܬܽܘܠܳܐܺܝܬ ܝܺܠܶܕܬܶܗ ܣܰܘܟܬܳܐ܆ ܨܳܪ ܛܽܘܦܣܳܐ ܠܶܟܝ ܐܶܡܳܐ ܒܬܽܘܠܬܳܐ܆ ܕܺܝܠܶܕܬܝ ܕܠܳܐ ܢܶܩܦܳܐ܆ ܩܽܘܪܒܳܢܳܐ ܘܶܐܣܬܰܕܰܪ܆ ܥܠܳܬܳܐ ܒܓܳܓܽܘܠܬܳܐ܀

ܛܽܘܒܰܝܟܝ ܨܶܦܪܳܐ. ܫܡܰܝܳܢܺܝܬܳܐ܆ ܕܰܓܕܰܠܬܝ ܩܶܢܶܟܝ ܒܰܨܠܺܝܒ ܢܽܘܗܪܳܐ܆ ܘܠܳܐ ܨܒܰܝܬܝ ܕܬܶܒܢܶܝܘܗ̱ܝ. ܠܩܶܢܶܟܝ ܒܰܐܪܥܳܐ܆ ܕܢܶܥܽܘܠ ܚܶܘܝܳܐ ܢܚܰܒܶܠ ܝܰܠ̈ܕܰܝܟܝ܆ ܛܽܘܒ ܠܓܶܦܰܝ̈ܟܝ ܕܰܫܘܰܘ ܕܢܶܦܪܚܽܘܢ܆ ܘܥܰܡ ܢܶܫܪܳܐ ܫܡܰܝܳܢܳܐ ܢܕܰܝܪܽܘܢ܆ ܛܽܘܒܰܝܟܝ ܥܠܰܝܡܬܳܐ܆ ܕܰܣܠܶܩܬܝ ܡܶܢ ܐܰܬܪܰܢ܆ ܠܰܐܬܪܳܐ ܫܡܰܝܳܢܳܐ܀

ܐܶܩܪܶܝܟܝ ܒܬܽܘܠܬܳܐ. ܝܰܠܕܶܟܝ ܡܰܟܶܣ܆ ܘܰܐܢ̱ܬܰܬ ܓܰܒܪܳܐ ܒܬܽܘ̈ܠܰܝܟܝ ܩܳܥܶܝܢ܆ ܐܶܩܪܶܝܟܝ ܒܬܽܘܠܬܳܐ. ܘܰܐܢ̱ܬܰܬ ܓܰܒܪܳܐ܆ ܓܽܘܫܡܳܐ ܚܰܕ ܗ̱ܽܘ ܘܠܳܐ ܫܳܒܶܩ ܠܺܝ܆ ܬܶܗܪܳܐ ܘܕܽܘܡܳܪܳܐ ܠܰܡܗܰܝ̈ܡܢܶܐ܆ ܫܚܳܩܳܐ ܘܛܽܘܪܳܦܳܐ ܠܣܳܦܪ̈ܶܐ܆ ܒܬܽܘ̈ܠܶܐ ܢܛܺܝܪܺܝܢ܆ ܘܰܬܕܰܝ̈ܳܐ ܗܳܐ ܡܠܶܝܢ܆ ܚܰܠܒܳܐ ܒܬܶܕܡܽܘܪܬܳܐ܀

ܛܽܘܒܰܝܟܝ ܥܠܰܝܡܬܳܐ. ܕܰܛܥܺܝܢܳܐ ܐܰܢ̱ܬܝ܆ ܠܓܽܘܪܝܳܐ ܕܰܐܪܝܳܐ ܕܰܐܟܬܶܒ ܝܰܥܩܽܘܒ܆ ܡܰܟܶܟ ܢܰܦܫܶܗ܆ ܘܺܝܢܶܩ ܡܶܢܶܟܝ܆ ܚܰܠܒܳܐ ܕܰܟܝܳܐ ܘܶܐܬܪܰܒܺܝ ܒܶܗ܆ ܐܶܡܪܳܐ ܕܡܶܢ ܢܶܩܝܳܐ ܒܬܽܘܠܬܳܐ܆ ܕܠܰܥܠܳܬܳܐ ܢܶܣܰܩ ܗ̱ܘܳܐ ܕܢܶܦܪܩܰܢ܆ ܠܶܟܝ ܨܳܐܰܪ ܗ̱ܘܳܐ܆ ܐܺܝܠܳܢܳܐ ܕܝܰܗ̱ܒ ܕܶܟܪܳܐ܆ ܘܒܶܗ ܐܶܬܦܪܶܩ ܐܺܝܣܚܳܩ܀

ܛܽܘܒܰܝܟܝ ܚܣܺܝܡܬܳܐ܆ ܕܳܐܦ ܐܶܫܰܥܝܳܐ܆ ܙܡܰܪ ܗ̱ܘܳܐ ܫܰܪܒܶܟܝ܆ ܒܶܝܬ ܓܶܠܝܳܢܰܘ̈ܗ̱ܝ܆ ܕܗܳܐ ܠܰܡ ܒܬܽܘܠܬܳܐ ܒܳܛܢܳܐ ܘܝܳܠܕܳܐ܆ ܝܰܠܕܳܐ ܕܰܫܡܶܗ ܥܰܡܰܢܽܘܐܶܝܠ. ܫܠܶܡܘ ܐ̱ܪ̈ܳܙܶܐ ܒܡܰܘܠܳܕܶܟܝ ܒܬܽܘܠܬܳܐ܆ ܘܚܰܕܘ̈ܳܬܳܐ ܣܓܺܝ̈ ܡܶܢܶܟܝ ܠܥܳܠܡܳܐ. ܢܒܺܝ̈ܶܐ ܕܳܝܨܺܝܢ. ܕܒܶܟܝ ܐܶܬܓܠܺܝ ܘܰܕܢܰܚ܆ ܫܽܘܦܪܳܐ ܕܡܶܠܰܝ̈ܗܽܘܢ܀

ܬܳܐ ܐܶܫܰܥܝܳܐ. ܚܙܺܝ ܠܰܒܬܽܘܠܬܳܐ܆ ܕܰܪܫܺܝܡܺܝܢ ܒܳܗ̇ ܐ̱ܪ̈ܳܙܰܘܗ̱ܝ ܕܰܒܪܳܐ܆ ܕܗܳܐ ܫܪܶܐ ܒܥܽܘܒܳܗ̇. ܥܰܡܰܢܽܘܐܶܝܠ܆ ܘܝܳܢܶܩ ܚܰܠܒܳܐ ܒܰܕܡܽܘܬ ܫܰܒܪܳܐ܆ ܬܳܐ ܚܽܘܪ ܒܶܗ ܘܰܚܕܺܝ ܘܫܰܒܰܚ܆ ܘܰܩܪܺܝ ܠܰܢ̈ܒܺܝܶܐ ܕܢܶܚܕܽܘܢ ܥܰܡܳܟ܆ ܕܗܳܐ ܐܶܬܳܐ ܠܶܗ܆ ܘܰܓܡܰܪ ܦ̈ܶܠܳܐܬܳܐ܆ ܕܠܶܗ ܗ̱ܽܘ ܨܳܝܪ̈ܳܢ ܗ̱ܘܰܝ̈܀

ܐ̱ܚܪܺܢܳܐ

ܩܳܠܳܐ ܒܩ̄: ܝܰܘܢܳܐ ܛܠܺܝܬܳܐ

ܥܽܘܢܺܝܬܳܐ: ܫܽܘܒܚܳܐ ܠܳܟ ܒܽܘܟܪܳܐ ܕܰܐܒܳܐ܆ ܕܰܗܘܰܝܬ ܒܽܘܟܪܳܐ ܠܰܒܬܽܘܠܬܳܐ.

ܝܰܘܢܳܐ ܛܠܺܝܬܳܐ ܛܥܺܝܢܳܐ ܠܶܗ܆ ܠܢܶܫܪܳܐ ܥܰܬܺܝܩ ܝܰܘ̈ܡܳܬܳܐ܆ ܛܥܺܝܢܳܐ ܠܶܗ ܘܙܳܡܪܳܐ ܫܽܘܒܚܳܐ܆ ܒܢܽܘܨܪ̈ܳܬܳܐ ܚܰܒܺܝ̈ܒܳܬܳܐ܆ ܐܳܘ ܒܰܪ ܥܰܬܺܝܪܳܐ܆ ܕܰܒܩܶܢܳܐ ܙܥܽܘܪܳܐ. ܫܦܰܪ ܠܳܟ ܕܬܶܬܪܰܒܶܐ܆ ܐܳܘ ܩܺܝܬܳܪ ܩ̈ܳܠܶܐ. ܕܫܰܬܺܝܩ ܐܰܝܟ ܫܰܒܪܳܐ܆ ܦܩܽܘܕ ܠܺܝ ܕܶܐܙܡܰܪ ܠܳܟ܆ ܒܟܶܢܳܪܳܐ ܕܰܡܙܺܝܥ. ܪܶܬܡܶܗ ܠܰܟܪ̈ܽܘܒܶܐ܆ ܨܒܺܝ ܘܶܐܡܰܠܶܠ ܠܳܟ܀

ܐܰܬܪܳܟ ܒܶܪܝ ܪܳܡ ܗ̱ܽܘ ܡܶܢ ܟܽܠ܆ ܘܕܰܨܒܰܝܬ ܐܰܬܪܳܐ ܥܒܰܕܬܳܢܝ ܠܳܟ܆ ܫܡܰܝܳܐ ܙܥܽܘܪܝܳܐ ܠܺܐܝܩܳܪܳܟ܆ ܘܰܡܓܰܙܰܝܬܳܐ ܛܥܺܝܢܳܐ ܠܳܟ܆ ܢܺܐܬܶܐ ܚܰܙܩܺܝܐܶܝܠ܆ ܘܢܶܚܙܶܝܟ ܥܰܠ ܒܽܘܪ̈ܟܰܝ܆ ܢܶܒܪܽܘܟ ܘܢܶܣܓܽܘܕ ܠܳܟ܆ ܘܢܶܒܣܰܡ ܒܰܚܙܳܬܳܟ܆ ܘܢܶܫܬܰܘܕܰܥ ܕܰܐܢ̱ܬ ܗ̱ܽܘ܆ ܗܰܘ ܕܰܚܙܳܟ ܬܰܡܳܢ܆ ܠܥܶܠ ܥܰܠ ܡܰܪܟܰܒܬܳܐ܆ ܘܠܺܝ ܢܶܬܶܠ ܛܽܘܒܳܐ܆ ܠܡܰܢܽܘ ܛܥܺܝܢܳܐ ܐ̱ܢܳܐ܀

ܬܳܐ ܒܰܪ ܒܽܘܙܺܝ ܥܶܒܪܳܝܳܐ܆ ܫܚܺܝܩܳܐ ܕܰܡܠܶܐ ܓܶܠ̈ܝܳܢܶܐ܆ ܚܶܙܘ̈ܶܐ ܕܡܰܪܟܰܒܬܳܐ ܫܰܚܩܽܘܟ܆ ܘܫܽܘ̈ܚܠܳܦܶܝܗ̇ ܒܰܐܪܥܳܐ ܣܰܚܦܽܘܟ܆ ܬܳܐ ܩܪܽܘܒ ܠܳܟ ܨܶܐܕܰܝ܆ ܘܰܒܣܰܡ ܒܰܚܙܳܬܶܗ܆ ܕܗܰܘ ܕܰܟܣܶܐ ܡܶܢܳܟ܆ ܒܓ̈ܶܦܶܐ ܕܰܟܪ̈ܽܘܒܶܐ܆ ܗܳܪܟܳܐ ܦܫܺܝܩ ܗ̱ܽܘ ܠܳܟ܆ ܚܽܘܪ ܒܶܗ ܥܰܠ ܒܽܘܪ̈ܟܰܝ܆ ܘܰܐܪܡܳܐ ܠܶܗ ܩ̈ܳܠܶܐ܆ ܘܶܐܢܳܐ ܘܰܐܢ̱ܬ ܢܶܩܥܶܐ܆ ܒܪܺܝܟ ܐܰܢ̱ܬ ܡܶܢ ܐܰܬܪܳܟ܀

ܕܶܐܩܪܽܘܒ ܒܶܪܝ ܕܰܚܺܝܠܳܐ ܐ̱ܢܳܐ܆ ܘܕܶܐܡܰܠܶܠ ܩܰܢܺܝܛܳܐ ܐ̱ܢܳܐ܆ ܕܶܐܩܪܽܘܒ ܠܳܟ ܗܳܐ ܙܳܝܥܳܐ ܐ̱ܢܳܐ܆ ܘܕܶܐܫܬܽܘܩ ܬܽܘܒ ܠܳܐ ܡܰܨܝܳܐ ܐ̱ܢܳܐ܆ ܒܪܶܡܙܳܟ ܐܰܦܶܣ ܠܺܝ܆ ܐܰܝܟܰܢ ܐܶܩܪܽܘܒ ܠܳܟ܆ ܐܰܢ̱ܬ ܡܳܪܝ ܐܰܠܶܦܰܝܢܝ܆ ܡܽܘܢ ܐܶܡܰܠܶܠ ܠܳܟ. ܡܰܠܦܳܢܳܗ̇ ܕܶܐܡܶܗ܆ ܛܰܟܶܣ ܝܳܠܶܕܬܳܟ܆ ܣܳܦܪܳܐ ܗܘܺܝ ܠܺܝ ܒܶܪܝ܆ ܘܰܒܓܰܘ ܚܽܘ̈ܫܳܒܰܝ܆ ܟܬܽܘܒ ܠܺܝ ܨܶܒܝܳܢܳܟ܀

ܕܶܐܩܪܽܘܒ ܒܶܪܝ ܕܰܚܺܝܠܳܐ ܐ̱ܢܳܐ܆ ܘܕܶܐܡܰܠܶܠ ܩܰܢܺܝܛܳܐ ܐ̱ܢܳܐ܆ ܕܶܐܩܪܽܘܒ ܠܳܟ ܗܳܐ ܙܳܝܥܳܐ ܐ̱ܢܳܐ܆ ܘܕܶܐܫܬܽܘܩ ܬܽܘܒ ܠܳܐ ܡܰܨܝܳܐ ܐ̱ܢܳܐ܆ ܒܪܶܡܙܳܟ ܐܰܦܶܣ ܠܺܝ܆ ܐܰܝܟܰܢ ܐܶܩܪܽܘܒ ܠܳܟ܆ ܐܰܢ̱ܬ ܡܳܪܝ ܐܰܠܶܦܰܝܢܝ܆ ܡܽܘܢ ܐܶܡܰܠܶܠ ܠܳܟ. ܡܰܠܦܳܢܳܗ̇ ܕܶܐܡܶܗ܆ ܛܰܟܶܣ ܝܳܠܶܕܬܳܟ܆ ܣܳܦܪܳܐ ܗܘܺܝ ܠܺܝ ܒܶܪܝ܆ ܘܰܒܓܰܘ ܚܽܘ̈ܫܳܒܰܝ܆ ܟܬܽܘܒ ܠܺܝ ܨܶܒܝܳܢܳܟ܀

ܬܰܘ ܢܶܬܗܰܪ ܐܳܘ ܦܳܪ̈ܽܘܫܶܐ܆ ܒܶܐܡܳܐ ܒܬܽܘܠܬܳܐ ܒܰܪ̱ܬ ܕܰܘܺܝܕ܆ ܦܺܐܝܬܳܐ ܕܝܶܠܕܰܬ ܕܽܘܡܳܪܳܐ܆ ܡܥܺܝܢܳܐ ܕܝܶܗܒܰܬ ܡܰܒܽܘܥܳܐ܆ ܐܶܠܦܳܐ ܕܚܰܕܘ̈ܳܬܳܐ܆ ܕܛܶܥܢܰܬ ܡܶܢ ܐܰܒܳܐ܆ ܡܰܘܒܰܠ ܣܰܒܪ̈ܳܬܳܐ܆ ܘܰܒܥܽܘܒܳܗ̇ ܕܰܟܝܳܐ܆ ܛܶܥܢܰܬ ܙܰܝܰܚܬܶܗ܆ ܠܗܰܘ ܩܽܘܒܰܪܢܺܝܛܺܝ܆ ܪܰܒܳܐ ܕܒܶܪ̈ܝܳܬܳܐ܆ ܕܒܶܗ ܐܰܡܠܶܟ ܫܰܝܢܳܐ܆ ܒܰܐܪܥܳܐ ܘܒܰܫܡܰܝܳܐ܀

ܐܶܫܰܥܝܳܐ ܢܒܺܝܳܐ ܐܰܟܪܶܙ܆ ܕܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ܆ ܬܳܐ ܚܽܘܪ ܒܺܝ ܘܰܚܙܺܝ ܝܰܘܡܳܢ܆ ܕܗܳܐ ܝܶܠܕܶܬ ܘܰܚܬܺܝܡܳܐ ܐ̱ܢܳܐ܆ ܬܳܐ ܢܒܺܝܳܐ ܕܪܽܘܚܳܐ܆ ܥܰܬܺܝܪ ܒܓܶܠ̈ܝܳܢܶܐ܆ ܚܙܺܝ ܠܥܰܡܰܢܽܘܐܶܝܠ܆ ܘܰܒܩܳܠܳܐ ܪܳܡܳܐ܆ ܒܣܽܘܪܺܝܗ̇ ܠܙܳܢܺܝܬܳܐ܆ ܨܶܗܝܽܘܢ ܕܰܛܠܰܡܬܰܢܝ܆ ܘܠܳܐ ܨܳܒܝܳܐ ܕܬܰܐܫܰܪ܆ ܕܒܰܒܬܽܘܠܽܘܬܝ ܝܶܠܕܶܬ܆ ܐܰܝܟ ܕܰܐܢ̱ܬ ܣܳܗܶܕ ܐܰܢ̱ܬ܀

ܬܰܘ ܨܶܐܕܰܝ ܐܳܘ ܟܳܪ̈ܽܘܙܶܐ܆ ܣܢܺܐܓܪ̈ܶܐ ܕܪܽܘܚܳܐ ܡܰܠܳــ̈ـܠܶܐ܆ ܢܒܺܝ̈ܶܐ ܕܰܚܙܰܘ ܟܰܣ̈ܝܳܬܳܐ܆ ܒܓܶܠ̈ܝܳܢܰܝܗܽܘܢ ܫܰܪܺܝܪ̈ܶܐ܆ ܐܰܟܳܪ̈ܶܐ ܕܰܙܪܰܥܘ܆ ܘܰܕܡܶܟܘ ܥܰܠ ܣܰܒܪܳܐ܆ ܩܽܘܡܘ ܕܽܘܨܘ ܒܰܥܠܰܠܬܳܐ܆ ܕܗܳܐ ܫܶܒܰܠ ܚܰܝ̈ܶܐ܆ ܥܦܺܝܦܳܐ ܒܰܕܪ̈ܳܥܰܝ܆ ܕܒܳܗ̇ ܠܰܚܡܳܐ ܠܟܰܦ̈ܢܶܐ܆ ܘܫܶܩܝܳܐ ܠܰܨܗܰܝ̈ܳܐ܆ ܚܕܰܘ ܥܰܡܝ ܕܶܐܫܟܰܚܬܶܗ܆ ܠܟܰܦܳܐ ܕܚܰܕܘ̈ܳܬܳܐ܀

ܢܶܚܕܽܘܢ ܥܰܡܝ ܐܳܦ ܡܰܠܰܐܟ̈ܶܐ܆ ܟܰܕ ܬܳܗܪܺܝܢ ܒܺܝ ܟܶܢܫܰܝ̈ܗܽܘܢ܆ ܕܗܰܘ ܕܰܟܣܶܐ ܡܶܢ ܓܽܘ̈ܕܰܝܗܽܘܢ܆ ܗܳܐ ܓܢܶܐ ܨܶܐܕܰܝ ܕܰܫܦܰܪ ܠܶܗ܆ ܢܶܚܕܶܐ ܓܰܒܪܺܐܶܝܠ܆ ܟܰܕ ܚܳܙܶܐ ܠܡܳܪܶܗ܆ ܕܰܫܪܶܐ ܥܰܠ ܒܽܘܪ̈ܟܰܝ܆ ܘܰܚܠܳܦ ܓܰܘܙܰܠܬܳܐ܆ ܡܥܰܛܰܦ ܥܰܙܪܽܘܪ̈ܶܐ܆ ܘܰܦܫܺܝܩ ܠܰܚܙܳܬܶܗ܆ ܕܢܶܣܰܒ ܕܶܡ̈ܘܳܬܶܗ܆ ܐܳܘ ܕܕܳܡܶܐ ܠܰܐܒܽܘܗ̱ܝ܆ ܛܰܟܶܣ ܝܳܠܶܕܬܳܟ܀

ܬܰܘ ܢܶܬܗܰܪ ܒܳܗ̇ ܒܰܕܟܺܝܬܳܐ܆ ܕܬܰܗܺܝܪܳܐ ܗܺܝ ܒܰܩܢܽܘܡܶܗ܆ ܕܗܺܝ ܒܰܠܚܽܘܕܶܝܗ̇ ܒܰܒܪܺܝܬܳܐ܆ ܝܶܠܕܰܬ ܟܰܕ ܠܳܐ ܐܶܬܚܰܟܡܰܬ܆ ܬܶܗܪܳܐ ܡܰܠܝܳܐ ܗ̱ܘܳܬ܆ ܢܰܦܫܳܗ̇ ܕܰܕܟܺܝܬܳܐ܆ ܘܟܽܠ ܝܽܘܡ ܒܽܘܝܳܢܳܗ̇܆ ܫܽܘܒܚܳܐ ܪܳܣܶܡ ܗ̱ܘܳܐ܆ ܟܰܕ ܚܳܙܝܳܐ ܗܺܝ ܒܳܗ̇܆ ܬܰܪܬܶܝܢ ܕܥܰܣ̈ܩܳܢ ܗ̱ܘܰܝ̈܆ ܒܬܽܘ̈ܠܶܐ ܫܰܪܺܝܪ̈ܶܐ܆ ܘܝܰܠܕܳܐ ܚܰܒܺܝܒܳܐ܆ ܒܪܺܝܟ ܕܰܕܢܰܚ ܡܶܢܳܗ̇܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܩܛܺܝܠ ܗ̱ܽܘ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܫܪܳܐ ܒܳܗ̇. ܒܡܰܠܝܰܬ ܬܶܗܪܳܐ܆ ܕܢܰܚ ܘܰܢܦܰܩ ܡܶܢܳܗ̇ ܘܢܶܗܪܰܬ ܬܺܒܶܝܠ.

ܫܶܐܠ ܕܰܘܺܝܕ ܡܰܠܟܳܐ ܡܰܝ̈ܳܐ ܕܢܶܫܬܶܐ܆ ܡܶܢ ܓܽܘܒܳܐ ܪܰܒܳܐ ܕܰܒܒܶܝܬ ܠܚܶܡ܆ ܗܳܐ ܡܰܪܝܰܡ ܝܶܗܒܰܬ ܡܰܝ̈ܳܐ ܚܰܝ̈ܶܐ܆ ܘܝܶܠܕܰܬ ܠܰܢ ܒܒܶܝܬ ܠܚܶܡ ܢܶܒܥܳܐ ܪܰܒܳܐ܀

ܝܶܠܕܰܬ ܠܳܗ̇ ܡܰܪܝܰܡ ܒܰܒܬܽܘܠܽܘܬܳܗ̇܆ ܘܰܢܗܰܪܘ ܓܶܠ̈ܝܳܢܶܐ ܕܰܢܒܺܝܽܘܬܳܐ܆ ܘܫܰܪܒܳܗ̇ ܕܶܐܬܡܰܠܰܠ ܐ̱ܪܳܙܳܢܳܐܺܝܬ܆ ܗܳܐ ܡܰܠܝܳܐ ܡܶܢܶܗ ܒܪܺܝܬܳܐ ܟܽܠܳܗ̇܀

ܐܶܬܛܰܝܰܒ ܟܶܢܫܳܐ ܕܰܥܠܰܝ̈ܡܳܬܳܐ܆ ܩܽܘ̈ܫܝ ܟܰܦܳܐ ܘܰܙܡܰܪ̈ܝ ܩܳܠܰܝ̈ ܫܽܘܒܚܳܐ܆ ܕܗܳܐ ܒܳܛܢܳܐ ܒܬܽܘܠܬܳܐ ܕܠܳܐ ܙܽܘܘܳܓܳܐ܆ ܘܝܳܠܕܳܐ ܕܽܘܡܳܪܳܐ ܒܬܶܗܪܳܐ ܪܰܒܳܐ܀

ܐܶܫܰܥܝܳܐ ܙܰܡܶܢ ܠܰܥܠܰܝ̈ܡܳܬܳܐ܆ ܘܰܓܠܳܐ ܗ̱ܘܳܐ ܐ̱ܪܳܙܳܐ ܠܰܒܬܽܘ̈ܠܳܬܳܐ܆ ܕܗܳܐ ܒܬܽܘܠܬܳܐ ܒܳܛܢܳܐ ܕܠܳܐ ܙܽܘܘܳܓܳܐ܆ ܘܝܳܠܕܳܐ ܕܽܘܡܳܪܳܐ ܩܰܕܺܝܫܳܐܺܝܬ܀

ܗܳܐ ܒܬܽܘܠܬܳܐ ܒܳܛܢܳܐ ܕܠܳܐ ܙܽܘܘܳܓܳܐ܆ ܠܳܐ ܕܶܝܢ ܦܰܫܶܩ ܗ̱ܘܳܐ ܕܡܰܢ ܗ̱ܺܝ ܘܰܐܝܕܳܐ ܗ̱ܝ܆ ܒܡܰܪܝܰܡ ܪܳܡ ܩܳܠܳܗ̇ ܕܰܢܒܺܝܽܘܬܳܐ܆ ܕܶܐܬܝܰܕܥܰܬ ܡܰܢ ܗ̱ܺܝ ܡܰܠܝܰܬ ܬܶܗܪܳܐ܀

ܗܳܐ ܨܪܺܝܪܺܝܢ ܡܰܝ̈ܳܐ ܒܓܰܘ ܫܽܘܫܶܦܳܐ܆ ܕܰܒܬܽܘܠܬܳܐ ܒܶܛܢܰܬ ܕܠܳܐ ܙܽܘܘܳܓܳܐ܆ ܒܡܰܪܝܰܡ ܐܶܬܦܰܫܰܩ̈ܝ ܟܽܠ ܦ̈ܶܠܳܐܬܳܐ܆ ܘܐ̱ܪ̈ܳܙܶܐ ܘܓܶܠ̈ܝܳܢܶܐ ܒܳܗ̇ ܐܶܣܬܰܝܰܟܘ܀

ܐܶܫܰܥܝܳܐ ܡܰܠܶܠ ܓܶܠܝܳܢܳܐܺܝܬ܆ ܘܰܪܗܳܒܬܳܐ ܢܶܦܠܰܬ ܒܰܥܠܰܝ̈ܡܳܬܳܐ܆ ܕܡܰܢ ܗ̱ܺܝ ܟܰܝ ܡܰܢ ܗ̱ܺܝ ܘܶܐܡܰܬܝ ܘܰܐܝܟܳܐ܆ ܗܳܘܶܐ ܣܽܘܥܪܳܢܳܐ ܕܰܡܠܶܐ ܬܶܗܪܳܐ܀

ܝܶܠܕܰܬ ܠܰܢ ܡܰܪܝܰܡ ܝܰܠܕܳܐ ܦܰܐܝܳܐ܆ ܕܗܽܘ ܐܰܘܠܶܕ ܠܟܽܠܗܽܘܢ ܓܶܢ̈ܣܶܐ ܘܛܽܘ̈ܗܡܶܐ܆ ܠܚܶܡ ܚܰܝ̈ܶܐ ܕܢܰܚ ܠܰܢ ܡܶܢ ܓܰܘ ܥܽܘܒܳܗ̇܆ ܘܒܶܗ ܗ̱ܽܘ ܩܢܰܝ̈ ܚܰܝ̈ܶܐ ܟܽܠ ܒܶܪ̈ܝܳܬܳܐ܀

ܡܶܢ ܫܰܒܛܳܐ ܕܡܰܠ̈ܟܶܐ ܛܠܺܝܬܳܐ ܢܶܦܩܰܬ܆ ܘܝܶܠܕܰܬ ܗ̱ܘܳܬ ܡܰܠܟܳܐ ܘܩܳܛܰܪ ܬܳܓ̈ܶܐ܆ ܕܢܰܚ ܠܰܢ ܒܰܪ ܕܰܘܺܝܕ ܡܶܢ ܒܰܪ̱ܬ ܕܰܘܺܝܕ܆ ܘܰܐܥܕܺܝ ܠܓܳܠܽܘܬܳܐ ܡܶܢ ܫܰܒܳܝܳܐ܀

ܩܳܠܶܗ ܕܰܢܒܺܝܳܐ ܐܰܪܗܶܒ ܐܶܢܶܝܢ܆ ܘܰܙܡܰܪ̈ܝ ܚܰܕ̱̈ܬܳܬܳܐ ܥܶܒܪ̈ܳܝܳܬܳܐ܆ ܕܰܒܬܽܘܠܬܳܐ ܒܳܛܢܳܐ ܙܳܥܝ̈ ܢܰܟ̈ܦܳܬܳܐ܆ ܒܬܶܗܪܳܐ ܕܶܐܬܡܰܠܰܠ ܒܰܢܒܺܝܽܘܬܳܐ܀

ܗܘܳܬ ܡܰܪܝܰܡ ܣܰܬܳܐ ܘܰܦܪܰܥ ܡܶܢܳܗ̇܆ ܢܽܘܪܒܳܐ ܢܳܨܪܳܝܳܐ ܐܰܝܟܰܢ ܕܰܟܬܺܝܒ܆ ܕܢܶܓܡܽܘܪ ܗ̱ܘܳܐ ܐ̱ܪ̈ܳܙܶܐ ܕܰܢܒܺܝܽܘܬܳܐ܆ ܒܢܳܨܪܰܬ ܐܶܬܪܰܒܺܝ ܕܰܢܫܰܡܠܶܐ ܟܽܠ܀

ܒܪܺܝܟܽ ܗ̱ܘ ܕܝܰܗܒܳܟ ܠܰܢ ܟܰܕ ܠܳܐ ܫܶܐܠܢܳܟ܆ ܒܳܟ ܢܰܘܕܶܐ ܠܰܐܒܽܘܟ ܥܰܠ ܡܰܘܗܰܒܬܳܟ܆ ܒܪܺܝܟܽ ܗ̱ܘ ܡܳܪܝ ܝܰܘܡܳܟ ܗܰܘ ܩܰܕܺܝܫܳܐ܆ ܕܠܶܗ ܕܳܡܶܐ ܗܳܢܳܐ ܝܽܘܡ ܥܰܕܥܺܐܕܳܟ܀

ܝܰܘܡܳܟ ܠܳܟ ܕܳܡܶܐ ܪܳܚܶܡ ܐ̱ܢܳܫ̈ܳܐ܆ ܕܡܶܬܝܰܒܰܠ ܘܳܐܬܶܐ ܥܰܠ ܟܽܠ ܕܳܪ̈ܺܝܢ܆ ܝܰܘܡܰܐ ܗ̱ܘ ܕܰܡܫܰܠܶܡ ܥܰܡ ܩܰܫܺܝ̈ܫܶܐ܆ ܘܗܳܦܶܟ ܕܰܢܫܰܪܶܐ ܥܰܡ ܝܰܠܽܘ̈ܕܶܐ܀

ܒܰܨܠܽܘܬ ܝܳܠܶܕܬܳܟ ܗܰܒ ܠܰܒܨܺܝܪܽܘܬܝ܆ ܪ̈ܰܚܡܶܐ ܒܗܰܘ ܝܰܘܡܳܐ ܕܗܳܘܶܐ ܕܺܝܢܳܐ܆ ܘܰܨܠܺܝܒܳܟ ܕܺܐܝܬܰܘܗ̱ܝ ܫܽܘܪܳܐ ܪܳܡܳܐ܆ ܢܢܰܛܪܺܝܘܗ̱ܝ ܠܗܳܢ ܥܽܘܡܪܳܐ ܘܰܠܥܳܡܽܘܪ̈ܰܘܗ̱ܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܡܰܠܟܽܘܬܳܐ

ܥܽܘܢܺܝܬܳܐ: ܫܰܘܬܶܦܳܝܗ̱ܝ ܡܳܪܝ ܒܛܽܘ̈ܒܶܐ ܕܡܰܠܟܽܘܬܳܟ: ܠܟܶܢܫܳܐ ܕܙܰܝܰܚ ܕܽܘܟܪܳܢ ܝܳܠܶܕܬܳܟ.

ܛܽܘܒܳܐ ܪܰܒܳܐ ܢܶܬܠܽܘܢ ܟܽܠ ܥܰܡ̱̈ܡܺܝܢ: ܠܰܡܒܰܪܰܟܬܳܐ ܘܡܰܠܝܰܬ ܛܰܝܒܽܘܬܳܐ: ܕܗܺܝ ܒܰܠܚܽܘܕܶܝܗ̇ ܫܶܦܪܰܬ ܠܰܐܠܳܗܳܐ: ܘܰܢܚܶܬ ܘܰܫܪܳܐ ܒܓܰܘ ܥܽܘܒܳܗ̃ ܕܰܟܝܳܐ܀

ܗܰܘ ܚܰܙܳܝܳܐ ܕܟܽܠܗܶܝܢ ܣܬܺܝܪ̈ܳܬܳܐ: ܚܙܳܗ̇ ܠܰܒܬܽܘܠܬܳܐ ܕܕܰܟܝܳܐ ܘܩܰܕܺܝܫܳܐ: ܫܰܕܰܪ ܚܰܝܠܶܗ ܘܰܢܚܶܬ ܫܪܳܐ ܒܥܽܘܒܳܗ̇: ܘܰܠܒܶܫ ܦܰܓܪܳܐ ܘܒܶܗ ܦܪܰܩ ܒܶܪ̈ܝܳܬܳܐ܀

ܒܶܟܝ ܐܶܣܬܰܝܰܟܝ ܐ̱ܪ̈ܳܙܶܐ ܕܰܢܒܺܝ̈ܶܐ: ܐܳ ܒܰܪ̱ܬ ܕܰܘܺܝܕ ܡܰܠܝܰܬ ܛܰܝܒܽܘܬܳܐ: ܘܒܶܟܝ ܐܶܬܦܰܫܰܩܘ ܦܽܘ̈ܫܳܩܶܐ ܕܐ̱ܪ̈ܳܙܶܐ: ܕܡܰܠܶܠܘ ܟܽܠܗܽܘܢ ܢܒܺܝ̈ܶܐ ܘܚܰܙܳܝ̈ܶܐ܀

ܪܫܺܝܡܺܝܢ ܐ̱ܪ̈ܳܙܰܝܟܝ ܒܣܶܦܪ̈ܶܐ ܕܰܢܒܺܝ̈ܶܐ: ܡܕܺܝܩܺܝܢ ܣܶܦܪ̈ܰܝܟܝ ܒܚܰܘ̈ܩܶܐ ܕܰܟܬܳܒ̈ܶܐ: ܗܳܐ ܒܶܐܫܰܥܝܳܐ ܢܳܨ̈ܚܳܢ ܦܶܠܳܐܬܟ̈ܝ: ܘܒܶܝܬ ܟܰܠ̈ܕܳܝܶܐ ܙܡܰܪܬܶܟܝ ܢܒܺܝܽܘܬܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ܆

ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܬܳܝ ܒܰܫܠܳܡܳܐ ܐܶܠܦܳܐ ܛܥܺܝܢܰܬ ܚܰܝ̈ܶܐ ܚܰܕ̱̈ܬܶܐ܆ ܫܠܳܡܳܐ ܥܰܡܶܟܝ ܒܺܐܪܬܳܐ ܕܡܰܠܟܳܐ ܢܚܶܬ ܘܰܫܪܳܐ ܒܳ̇ܗ̇܆ ܬܳܝ ܒܫܠܳܡܳܐ ܓܰܢܬܳܐ ܕܺܐܝܬ ܒܳܗ̇ ܫܰܒܛܳܐ ܦܫܺܝܛܳܐ܆ ܫܠܳܡܳܐ ܥܰܡܶܟܝ ܕܰܝܪܳܐ ܕܐ̱ܪ̈ܳܙܶܐ ܢܛܺܝܪܺܝܢ ܨܶܐܕܶܝܗ̇܀

ܬܳܝ ܒܰܫܠܳܡܳܐ ܛܠܺܝܬܳܐ ܦܺܐܝܬܳܐ ܘܡܰܠܝܰܬ ܫܽܘܦܪ̈ܶܐ܆ ܫܠܳܡܳܐ ܥܰܡܶܟܝ ܝܰܘܢܳܐ ܕܪܰܒܝܰܬ ܠܢܶܫܪܳܐ ܡܰܠܟܳܐ܆ ܬܳܝ ܒܰܫܠܳܡܳܐ ܟܰܠܬܳܐ ܒܬܽܘܠܬܳܐ ܘܠܳܐ ܡܙܰܘܰܓܬܳܐ܆ ܫܠܳܡܳܐ ܥܰܡܶܟܝ ܠܡܺܐܢܳܐ ܕܢܰܘܚܳܐ ܕܟܽܠܶܗ ܥܳܠܡܳܐ܀

ܒܰܨ̈ܠܰܘܳܬܶܟܝ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܶܟܝ ܒܗܰܝܡܳܢܽܘܬܳܐ܀