ܕܰܬܪܶܝܢ ܒܫܰܒܳܐ

ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܚܰܘ̈ܒܰܝ ܘܰܚ̈ܛܳܗܰܝ

ܣܳܒ̈ܶܐ ܟܒܶܢܘ ܣܰܩ̈ܶܐ܆ ܘܺܝܬܶܒܘ ܥܰܠ ܐܰܪܥܳܐ܆ ܘܰܥܠܰܝ̈ܡܶܐ ܒܩܶܛܡܳܐ܆ ܘܒܶܟܝܳܐ ܐܶܬܦܰܠܦܰܠܘ܀

ܫܶܡܥܰܬ ܗ̱ܘܳܬ ܢܺܝܢܘܶܐ܆ ܩܳܠܶܗ ܕܰܢܒܺܝܳܐ܆ ܕܠܰܐܪܒܥܺܝܢ ܝܰܘ̈ܡܳܬܳܐ܆ ܢܺܝܢܘܶܐ ܡܶܬܗܰܦܟܳܐ܀

ܥܶܒܕܰܬ ܒܳܥܽܘܬܳܐ܆ ܘܓܶܙܪܰܬ ܬܝܳܒܽܘܬܳܐ܆ ܘܶܐܬܳܐ ܠܳܗ̇ ܚܢܳܢܳܐ܆ ܘܙܶܡܪܰܬ ܗ̱ܘܳܬ ܫܽܘܒܚܳܐ܀

ܫܰܒܪ̈ܶܐ ܘܝܰܠܽܘ̈ܕܶܐ܆ ܚܶܣܟܰܬ ܡܶܢ ܚܰܠܒܳܐ܆ ܘܚ̈ܰܬܢܶܐ ܘܟܰܠ̱̈ܠܳܬܳܐ܆ ܐܰܪܡܺܝܘ ܨܶܒ̈ܬܰܝܗܽܘܢ܀

ܩܶܛܡܳܐ ܚܠܳܦ ܒܶܣ̈ܡܶܐ܆ ܘܣܰܩ̈ܶܐ ܚܠܳܦ ܢܰܚ̈ܬܶܳܐ܆ ܐܶܬܥܰܛܰܦ ܡܰܠܟܳܐ܆ ܘܚܺܐܪ̈ܶܐ ܘܪ̈ܺܝܫܳܢܶܐ܀

ܫܽܘܒܚܳܐ ܠܚܰܢܳܢܳܐ܆ ܐܰܒܳܐ ܡܪܰܚܡܳܢܳܐ܆ ܘܰܒܪܳܐ ܡܪܰܚܦܳܢܳܐ܆ ܘܪܽܘܚܳܐ ܡܚܰܣܝܳܢܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܐܰܢ̱ܬ ܕܰܒܪܺܝܫܺܝܬ

ܡܳܪܝܳܐ ܕܫܰܘܙܶܒ܆ ܠܢܺܝܢܘܶܐ ܡܶܢ ܚܶܡܬܳܐ ܕܪܽܘܓܙܳܐ܆ ܫܰܘܙܶܒ ܠܰܢ ܡܶܢ܆ ܒܶܗܬܰܬ ܐܰܦ̈ܶܐ ܕܰܩܕܳܡܰܝܟ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܚܽܘܣ ܒܰܪ ܛܳܒܳܐ܆ ܥܰܠ ܡܰܪܥܺܝܬܳܟ ܕܰܙܒܰܢܬܳܗ̇܆ ܒܰܕܡܳܟ ܚܰܝܳܐ܆ ܘܒܰܛܶܠ ܡܶܢܳܗ̇ ܢܶܟ̈ܝܳܢܶܐ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܬܰܘ ܢܶܬܟܰܫܰܦ܆ ܘܢܶܒܥܶܐ ܪ̈ܰܚܡܶܐ ܘܰܚܢܳܢܳܐ܆ ܡܶܢ ܗܰܘ ܡܳܪܳܐ. ܕܰܡܠܶܐ ܓܰܙܶܗ ܥܽܘܕܪ̈ܳܢܶܐ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܛܳܒܳܐ ܕܰܦܬܺܝܚ܆ ܬܰܪܥܶܗ ܠܛܳܒ̈ܶܐ ܘܰܠܒܺܝ̈ܫܶܐ܆ ܦܬܰܚ ܠܳܗ̇ ܬܰܪܥܳܟ܆ ܠܰܨܠܽܘܬܰܢ ܘܰܠܒܳܥܽܘܬܰܢ܆ ܡܒܰܪܟܳܐ ܓܶܝܪ ܐܺܝܬܰܝܟ ܀

ܫܽܘܒܚܳܐ ܠܰܐܒܳܐ܆ ܘܬܰܘܕܺܝܬܳܐ ܠܰܒܪܳܐ ܕܡܶܢܶܗ܆ ܘܰܠܪܽܘܚ ܩܽܘܕܫܳܐ܆ ܚܰܕ ܚܰܝܠܳܐ ܘܚܰܕ ܫܽܘܠܛܳܢܳܐ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܙܳܥ ܗ̱ܘܳܐ ܝܰܘܣܶܦ

ܐܰܠܳܗܳܐ ܡܳܪܳܐ ܕܟܽܘܠܳܐ ܡܪܰܚܡܳܢܳܐ ܒܰܟܝܳܢܳܐ. ܣܰܓܺܝ ܛܰܝܒܽܘܬܳܐ ܘܩܽܘܫܬܳܐ ܫܰܟܶܢ ܪ̈ܰܚܡܶܐ ܘܰܚܢܳܢܳܐ܆ ܠܥܳܢ̈ܳܐ ܦܪܺܝܩܰܬ ܒܰܨܠܺܝܒܳܟ܆ ܒܗܰܝܡܳܢܽܘܬܳܐ ܕܰܫܪܳܪܳܐ܆ ܡܩܰܕܡܳܐ ܐܰܦܰܝ̈ܟ ܒܬܰܘܕܺܝܬܳܐ. ܘܰܡܩܰܪܒܳܐ ܠܰܐܠܳܗܽܘܬܳܟ܆ ܩ̈ܳܠܶܐ ܕܩܽܘܒܳܠ ܛܰܝܒܽܘܬܳܐ܀

ܬܝܳܒܽܘܬܳܐ ܕܥܶܒܕܰܬ ܢܺܝܢܘܶܐ ܡܰܚܙܺܝܬܳܐ ܗܘܳܬ ܒܰܒܪܺܝܬܳܐ܆ ܘܒܳܗ̇ ܐܶܬܪܰܥܺܝ ܐܰܠܳܗܳܐ ܘܒܰܛܶܠ ܡܶܢܳܗ̇ ܓܙܳܪ ܕܺܝܢܳܐ܆ ܘܣܰܡܟܳܗ̇ ܒܪ̈ܰܚܡܶܐ ܕܠܳܐ ܬܶܦܶܠ܆ ܘܫܰܝܢܳܐ ܐܰܡܠܶܟ ܥܰܠ ܝܰܠ̈ܕܶܝܗ̇܆ ܫܽܘܒܚܳܐ ܠܗܰܘ ܛܳܒܳܐ ܕܰܦܬܺܝܚ܆ ܬܰܪܥܶܗ ܠܰܐܝܢܳܐ ܕܢܳܩܶܫ ܒܶܗ܀

ܢܺܝܢܘܶܐ ܡܕܺܝܢܰܬ ܓܰܢ̱ܒܳܪ̈ܶܐ ܕܰܛܥܳܬ ܒܰܣܪܺܝܩܽܘܬܳܐ܆ ܠܳܐ ܫܒܰܩܬܳܗ̇ ܪܳܚܶܡܢܳܫܳܐ ܕܬܶܗܘܶܐ ܡܢܳܬܳܐ ܠܰܚܛܺܝܬܳܐ܆ ܐܶܠܳܐ ܒܪܶܚܡܰܬ ܐ̱ܢܳܫܽܘܬܳܟ܆ ܫܰܘܙܶܒܬܳܗ̇ ܡܶܢ ܐܰܒܕܳܢܳܐ܆ ܕܶܐܚܕܰܬ ܓܰܘܣܳܐ ܒܰܚܢܳܢܳܟ܆ ܩܢܳܬ ܦܽܘܪܩܳܢܳܐ ܒܛܰܝܒܽܘܬܳܟ܀

ܐܰܟܡܳܐ ܕܩܰܒܶܠܬ ܠܰܨܠܽܘܬܶܗ ܕܝܰܘܢܳܢ ܡܶܢ ܓܰܘ ܝܰܡܳܐ܆ ܘܦܰܨܺܝܬ ܠܢܺܝܢܘܶܐ ܡܶܢ ܪܽܘܓܙܳܐ ܘܰܒܪ̈ܰܚܡܶܐ ܕܡܶܢܳܟ ܣܡܰܟܬܳܗ̇܆ ܩܰܒܶܠ ܠܰܨܠܽܘܬܳܐ ܕܥܰܒ̈ܕܰܝܟ܆ ܙܒܺܝ̈ܢܰܝ ܒܰܕܡܳܟ ܝܰܩܺܝܪܳܐ܆ ܘܶܐܬܬܢܺܝܚ ܒܨܰܘܡܳܐ ܘܒܰܨܠܽܘܬܗܽܘܢ܆ ܘܚܰܣܳܐ ܘܰܫܒܽܘܩ ܚܰܘ̈ܒܰܝܗܽܘܢ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܫܡܰܝܳܐ ܡܕܺܝܢ̱ܬܳܐ ܕܡܰܠܰܐܟ̈ܶܐ

ܢܺܝܢܘܶܐ ܐܶܡܳܐ ܕܓܰܢ̱ܒܳܪ̈ܶܐ܆ ܡܶܢ ܚܰܕ ܚܰܠܳܫܳܐ ܕܶܚܠܰܬ ܐܰܪܝܽܘܬܳܐ܆ ܒܡܰܪܒܽܘܥܺܝܬܳܗ̇܆ ܐܶܬܪܰܗܒܰܬ ܡܶܢ ܥܶܒܪܳܝܳܐ܀

ܢܶܗܡܰܬ ܐܳܬܽܘܪ ܒܰܒܪܺܝܬܳܐ܆ ܘܩܳܠܶܗ ܕܝܰܘܢܳܢ ܢܳܗܶܡ ܒܳܗ̇܆ ܙܰܪܥܶܗ ܕܢܶܡܪܽܘܕ ܓܰܢ̱ܒܳܪܳܐ܆ ܗܳܢܳܐ ܟܽܠܶܗ ܐܶܫܬܰܦܰܠ܀

ܝܰܗ̱ܒ ܡܰܠܟܳܐ ܡܶܠܟܳܐ ܛܳܒܳܐ܆ ܠܚܰܝ̈ܠܰܘܳܬܶܗ ܟܰܕ ܐܳܡܰܪ܆ ܕܡܳܠܶܟ ܐ̱ܢܳܐ ܠܟܽܘܢ ܚܰܒܺܝ̈ܒܰܝ܆ ܕܳܐܦ ܗܳܫܳܐ ܠܳܐ ܢܶܬܪܰܦܶܐ܀

ܢܶܬܟܰܬܰܫ ܐܰܝܟ ܓܰܢ̱ܒܳܪ̈ܶܐ܆ ܕܠܳܐ ܢܺܐܒܰܕ ܐܰܝܟ ܚܰܠܳܫ̈ܶܐ܆ ܢܶܙܕܰܝܰܢ ܐܳܦ ܢܶܬܓܰܒܰܪ܆ ܕܢܶܬܠܰܒܰܒ ܐܳܦ ܢܶܬܢܰܨܰܚ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܡܶܢ ܗܳܢ ܥܳܠܡܳܐ ܥܳܒܽܘܪܳܐ (ܓܽܘܫܡܳܐ)

ܪܰܒܽ ܗ̱ܘ ܚܰܝܠܳܗ̇ ܕܰܨܠܽܘܬܳܐ܆ ܡܳܐ ܕܰܒܚܰܫܳܐ ܡܶܬܩܰܪܒܳܐ܆ ܙܰܝܢܳܐ ܗ̱ܝ ܠܰܐܝܢܳܐ ܕܠܳܒܶܫ ܠܳܗ̇܆ ܕܠܳܐ ܬܽܘܒ ܡܨܶܐ ܚܳܐܶܒ܆ ܠܝܰܘܢܳܢ ܕܰܠܝܰܬ ܡܶܢ ܝܰܡܳܐ܆ ܠܢܺܝܢܘܶܐ ܦܰܨܝܰܬ ܡܶܢ ܪܽܘܓܙܳܐ܆ ܘܰܠܚܶܙܰܩܝܳܐ ܪܰܡܪܶܡܬܶܗ܆ ܘܰܠܣܳܢܰܐܘ̈ܗ̱ܝ ܣܶܚܦܰܬ܀

ܫܽܘܒܚܳܐ

ܡܳܪܳܐ ܕܠܳܐ ܟܳܠܶܐ ܪ̈ܰܚܡܰܘܗ̱ܝ܆ ܡܶܢ ܚܰܛܳܝ̈ܶܐ ܕܩܳܪܶܝܢ ܠܶܗ܆ ܒܬܰܪܥܳܐ ܕܪ̈ܰܚܡܰܝܟ ܢܳܩܫܺܝܢܰܢ. ܐܶܬܪܰܚܰܡܥܠܰܝܢ܆ ܘܩܰܒܶܠ ܨܰܘܡܰܢ ܘܰܨܠܽܘܬܰܢ܆ ܘܶܐܬܪܰܥܳܐ ܒܰܬܝܳܒܽܘܬܰܢ܆ ܐܰܝܟ ܒܳܥܽܘܬܳܐ ܕܢܺܝܢ̈ܘܳܝܶܐ܆ ܕܚܰܣܺܝܬ ܚܰܘ̈ܒܰܝܗܽܘܢ܀

ܡܶܢ ܥܳܠܰܡ

ܡܶܢ ܗܳܢ ܥܳܠܡܳܐ ܥܳܒܽܘܪܳܐ. ܘܡܶܢ ܩܶܢܝܳܢܳܐ ܕܠܳܐ ܡܩܰܘܶܐ. ܛܽܘܒܰܘܗ̱ܝ ܠܰܐܝܢܳܐ ܕܩܳܢܶܐ ܠܶܗ ܪܳܚܡܳܐ ܐܰ‌ܠܳܗܳܐ. ܕܰܒܚܰܝܰܘ̈ܗ̱ܝ ܗܳܘܶܐ ܥܰܡܶܗ. ܘܰܒܡܰܘܬܶܗ ܠܳܐ ܡܰܪܦܶܐ ܠܶܗ. ܘܰܒܝܰܘܡܳܐ ܕܗܳܘܶܐ ܕܺܝܢܳܐ: ܥܳܒܶܕ ܥܠܰܘܗ̱ܝ ܪ̈ܰܚܡܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܩܳܝܳܐ
ܐܰܒܽܘܢ ܕܒܰܫܡܰܝܳܐ ܥܢܺܝ ܠܰܢ (ܩܺܝܢܬܳܐ ܕܺܝܠܳܢܳܝܬܳܐ ܕܨܰܘܡܳܐ)

ܥܰܠ ܗܳܝ ܢܺܝܢܘܶܐ ܥܳܒܰܪ ܗ̱ܘܺܝܬ ܘܰܚܙܺܝܬ ܬܰܡܳܢ܆ ܒܳܥܽܘܬܳܐ ܕܠܳܐ ܒܰܥܝܳܕܳܐ ܕܶܐܬܪܰܥܺܝ ܡܳܪܝܳܐ܆ ܐܶܡܪ̈ܶܐ ܒܪܺܝܪ̈ܶܐ܆ ܝܰܠܽܘ̈ܕܶܐ ܘܫܰܒܪ̈ܶܐ܆ ܘܝܰܠܳܕ̈ܳܬܳܐ܆ ܕܒܳܟ̈ܝܳܢ ܒܟܰܪܝܽܘܬܳܐ܆ ܫܽܘ̈ܩܶܐ ܕܰܡܠܶܝܢ ܐܽܘܠ̈ܝܳܬܳܐ ܘܚܰܫܳܐ ܪܰܒܳܐ܆ ܘܣܳܒ̈ܶܐ ܘܰܥܠܰܝ̈ܡܶܐ ܕܩܳܥܶܝܢ ܐܶܬܪܰܚܰܡ ܥܠܰܝܢ܆ ܗ̄ܘܗ̄܀

ܫܽܘܒܚܳܐ

ܒܳܥܽܘܬܳܐ ܘܰܬܝܳܒܽܘܬܳܐ ܕܥܶܒܕܰܬ ܢܺܝܢܘܶܐ܆ ܠܳܐ ܗܘܳܐ ܐܰܟܘܳܬܳܗ̇ ܒܕܳܪ̈ܶܐ ܩܰܕ̈ܡܶܐ ܘܰܐ̱ܚܪ̈ܳܝܶܐ܆ ܡܰܠܟܳܐ ܠܒܺܝܫ ܗ̱ܘܳܐ܆ ܣܰܩܳܐ ܥܰܠ ܓܽܘܫܡܶܗ܆ ܘܟܽܠܗܽܘܢ ܚܺܐܪ̈ܶܐ܆ ܒܪܶܟܘ ܗ̱ܘܰܘ ܒܰܨܠܽܘܬܳܐ܆ ܐܰܒܳܗ̈ܶܐ ܥܰܡ ܝܰܠܽܘ̈ܕܶܐ ܩܳܥܶܝܢ ܘܳܐܡܪܺܝܢ ܗ̱ܘܰܘ܆ ܐܰܠܳܗܳܐ ܕܺܐܝܬ ܠܳܟ ܪ̈ܰܚܡܶܐ ܚܽܘܣ ܘܶܐܬܪܰܚܰܡ ܥܠܰܝܢ܆ ܗ݊ ܘܩܰܒܶܠ ܬܝܳܒܽܘܬܰܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ ܕܨܰܘܡܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܫܰܪܺܝ ܢܒܺܝܳܐ ܒܟܳܪܽܘܙܽܘܬܳܐ ܕܡܰܠܝܳܐ ܚܰܫܳܐ܆ ܘܥܰܙܺܝܙ ܩܳܠܶܗ ܕܢܶܥܩܽܘܪ ܟܰܪܟܳܐ ܘܠܳܐ ܢܶܬܝܰܬܰܒ܆ ܘܳܝܠܶܟܝ ܢܺܝܢܘܶܐ ܡܕܺܝܢ̱ܬܳܐ ܚܬܺܝܪܬܳܐ ܕܰܣܓܺܝ ܥܰܘܠܶܟܝ܆ ܗܳܐ ܫܡܺܝܛ ܣܰܝܦܳܐ ܠܰܡܚܰܒܳܠܽܘ ܠܟܽܠܶܗ ܫܽܘܦܪܶܟܝ܀

ܐܰܪܒܥܺܝܢ ܝܰܘ̈ܡܺܝܢ ܩܰܝܳܡܺܝܢ ܠܶܟܝ ܐܳܘ ܒܰܪ̱ܬ ܥܰܡ̱̈ܡܶܐ܆ ܘܳܐܬܶܐ ܪܽܘܓܙܳܐ ܕܢܶܥܒܕܶܟܝ ܬܶܠܠܳܐ ܡܠܶܐ ܣܽܘܪܳܕܳܐ܆ ܗܳܐ ܥܰܕ ܩܰܠܺܝܠ ܡܛܳܐ ܠܶܗ ܪܽܘܓܙܳܐ ܥܰܠ ܓܰܐܝܽܘܬܶܟܝ܆ ܗܳܐ ܥܰܕ ܩܰܠܺܝܠ ܡܶܬܚܰܒܰܠ ܠܶܗ ܟܽܠܶܗ ܫܽܘܦܪܶܟܝ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܦܶܬܓܳܡܳܐ: ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ܆ ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܡܰܥܢܺܝܬܳܐ ܕܡܳܪܝ ܣܶܘܶܝܪܺܝܳܘܣ

ܐܰܫܘܳܐ ܠܰܢ ܒܪ̈ܰܚܡܰܝܟ ܡܳܪܶܐ ܟܽܠ: ܕܰܒܝܰܘܡܳܐ ܗܳܢܳܐ ܕܠܳܐ ܟܽܘ̈ܬܡܳܬܳܐ ܕܰܚܛܺܝܬܳܐ ܒܙܰܕܺܝܩܽܘܬܳܐ ܢܶܬܢܛܰܪ ܡܒܰܪܟܳܐ ܐܺܝܬܰܝܟ܀

ܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ: ܡܪܰܡܪܰܡ ܘܰܡܫܰܒܰܚ ܫܡܳܐ ܕܺܝܠܳܟ ܠܥܳܠܰܡ ܥܳܠܡܺܝܢ܀

ܬܶܗܘܶܐ ܡܳܪܝ ܛܰܝܒܽܘܬܳܟ ܥܠܰܝܢ ܐܳܦ ܪ̈ܰܚܡܰܝܟ: ܐܰܟܡܳܐ ܕܰܥܠܰܝܟܽ ܗ̱ܘ ܣܰܒܪܰܢ ܡܒܰܪܟܳܐ ܐܺܝܬܰܝܟ܀

ܡܳܪܝܳܐ ܐܰܠܶܦܰܝܢ ܐܳܦ ܚܰܘܳܢ ܐܽܘܪܚܳܐ ܕܦܽܘܩ̈ܕܳܢܰܝܟ ܡܒܰܪܟܳܐ ܐܺܝܬܰܝܟ܀

ܡܳܪܝܳܐ ܣܰܟܶܠܰܝܢ ܒܛܰܝܒܽܘܬܳܟ ܐܽܘܪܚܳܐ ܕܢܳܡܽܘ̈ܣܰܝܟ ܡܒܰܪܟܳܐ ܐܽܝܬܰܝܟ܀

ܩܰܕܺܝܫܳܐ ܐܰܢܗܰܪ ܠܰܢ ܒܟܽܠܗܽܘܢ ܙܰܠ̈ܓܶܐ ܕܺܝܠܳܟ: ܡܳܪܝܳܐ ܪ̈ܰܚܡܰܝܟ ܥܠܰܝܢ ܠܥܳܠܰܡ ܥܳܠܡܺܝܢ܀

ܡܳܪܝܳܐ ܠܰܥܒܳܕܳܐ ܕܺܐܝ̈ܕܰܝܟ ܠܳܐ ܬܰܪܦܶܐ ܘܬܶܫܒܽܘܩ: ܠܳܟ ܝܳܐܶܐ ܫܽܘܒܚܳܐ: ܠܳܟ ܦܰܐܝܳܐ ܬܶܫܒܽܘܚܬܳܐ: ܘܠܳܟ ܦܐܶܐ ܩܽܘܠܳܣܳܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܶܢ ܐܳܡܪܺܝܢܰܢ ܬܠܳܬ ܙܰܒܢܺܝ̈ܢ

ܛܳܒ ܠܡܰܘܕܳܝܽܘ ܠܡܳܪܝܳܐ ܘܰܠܡܶܙܡܰܪ ܠܰܫܡܳܟ ܡܪܰܝܡܳܐ ܘܠܰܡܚܰܘܳܝܽܘ ܒܨܰܦܪܳܐ ܛܰܝܒܽܘܬܳܟ ܘܗܰܝܡܳܢܽܘܬܳܟ ܒܠܰܝ̈ܠܰܘܳܬܐ܀

ܘܳܐܡܪܺܝܢܰܢ ܬܠܳܬ ܙܰܒܢܺܝ̈ܢ

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܶܠܬܳܢܳܐ. ܩܰܕܺܫܰܬ ܠܳܐ ܡܳܝܽܘܬܳܐ ܕܶܐܨܠܶܒܬ ܚܠܳܦܰܝܢ ܐܶܬܪܰܚܰܡܥܠܰܝܢ܀

ܡܳܪܝܳܐ ܚܽܘܢܳܝܗ̱ܝ ܠܥܰܡܳܐ ܕܺܝܠܳܟ: ܡܳܪܝܳܐ ܚܰܣܳܐ ܘܰܫܒܽܘܩ ܚܛܳܗ̈ܶܐ ܕܟܽܠܰܢ: ܩܰܕܺܝܫܳܐ ܐܰܓܶܢ ܥܠܰܝܢ ܝܰܡܺܝܢܳܟ ܘܰܐܣܳܐ ܟܪܺܝܗܽܘܬܰܢ: ܡܶܛܽܠ ܫܡܳܐ ܕܺܝܠܳܟ܀

ܫܽܘܒܚܳܐ ܠܳܟ ܡܳܪܰܢ: ܫܽܘܒܚܳܐ ܠܳܟ ܡܳܪܰܢ: ܫܽܘܒܚܳܐ ܠܳܟ ܣܰܒܪܰܢ ܠܥܳܠܰܡ ܒܰܪܶܟܡܳܪܝ܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀