ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܒܗܰܘ ܢܽܘܗܪܳܐ ܓܰܐܝܳܐ

ܗܳܐ ܢܒܺܝ̈ܶܐ ܟܽܠܗܽܘܢ ܚܳܕܶܝܢ ܒܳܟ: ܕܰܢܦܰܩ̈ܝ ܠܓܶܠܝܳܐ ܡܶܠܰܝ̈ܗܽܘܢ: ܕܰܒܕܶܢܚܳܐ ܕܺܝܠܳܟ ܦܳܪܽܘܩܰܢ: ܐܶܫܬܰܪܰܪ̈ܝ ܗ̱ܘܰܝ̈ ܡܶܠܰܝ̈ܗܽܘܢ܀

ܐܳܘ ܠܡܰܣܚܽܘܬܳܐ ܩܰܕܺܝܫܬܳܐ: ܕܫܰܟܢܰܬ ܠܰܢ ܚܰܝ̈ܶܐ ܚܰܕ̈ܬܶܐ: ܕܰܢܚܶܬ ܥܶܠܳܝܳܐ ܠܓܰܘ ܢܰܗܪܳܐ: ܕܢܰܣܶܩ ܬܰܚ̈ܬܳܝܶܐ ܠܪܰܘܡܳܐ܀

ܡܦܺܝܣܺܝܢܰܢ ܠܳܟ ܦܳܪܽܘܩܰܢ: ܒܗܳܢܳܐ ܝܰܘܡܳܐ ܕܰܥܡܳܕܳܟ: ܕܰܒܗܰܘ ܥܺܐܕܳܐ ܕܠܳܐ ܥܳܒܰܪ: ܢܫܰܒܚܳܟ ܒܰܝܢܳܬ ܩܰܕܺܝ̈ܫܰܝܟ܀

ܒܪܺܝܟܽ ܗ̱ܘ ܕܰܒܝܰܠܕܶܗ ܐܰܦܨܰܚ ܠܰܢ: ܒܪܺܝܟ ܕܒܰܥܡܳܕܶܗ ܩܰܕܶܫ ܠܰܢ ܒܪܺܝܟ ܕܥܰܒܕܰܢ ܠܶܗ ܐܰܚ̈ܶܐ: ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܝܳܗܽܘܒܳܐ ܕܟܰܟܪ̈ܶܐ

ܐܶܡܰܪ ܡܳܪܰܢ ܠܝܽܘܚܰܢܳܢ܆ ܫܒܽܘܩ ܗܳܫܳܐ ܘܰܫܠܺܝ ܘܰܫܬܽܘܩ܆ ܝܳܐܶܐ ܠܰܢ ܓܶܝܪ ܕܰܢܡܰܠܶܐ܆ ܟܺܐܢܽܘܬܳܐ ܐܰܝܟܰܢ ܕܰܟܬܺܝܒ܆ ܐܶܬܪܰܚܰܡ ܥܠܰܝܢ ܐܰܠܳܗܳܐ܀

ܐܶܡܰܪ ܡܳܪܰܢ ܠܝܽܘܚܰܢܳܢ܆ ܐܺܝܕܳܟ ܒܰܠܚܽܘܕ ܣܺܝܡ ܥܰܠ ܪܺܝܫܝ܆ ܘܶܐܢܳܐ ܠܡܰܝ̈ܳܐ ܡܩܰܕܶܫ ܐ̱ܢܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܆ ܐܶܬܪܰܚܰܡ ܥܠܰܝܢ ܐܰܠܳܗܳܐ܀

ܡܦܺܝܣܺܝܢܰܢ ܠܳܟ ܦܳܪܽܘܩܰܢ܆ ܒܗܳܢܳܐ ܝܰܘܡܳܐ ܕܰܥܡܳܕܳܟ܆ ܕܰܒܗܰܘ ܥܺܐܕܳܐ ܕܠܳܐ ܥܳܒܰܪ܆ ܢܫܰܒܚܳܟ ܒܰܝܢܳܬ ܩܰܕܺܝܫܰܝ̈ܟ܆ ܐܶܬܪܰܚܰܡ ܥܠܰܝܢ ܐܰܠܳܗܳܐ܀

ܒܪܺܝܟ ܕܰܒܝܰܠܕܶܗ ܐܰܦܨܰܚ ܠܰܢ܆ ܒܪܺܝܟ ܕܒܰܥܡܳܕܶܗ ܩܰܕܶܫ ܠܰܢ܆ ܒܪܺܝܟܽ ܗ̱ܘ ܕܥܰܒܕܰܢ ܠܶܗ ܐܰܚ̈ܶܐ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܒܬܽܘܠܬܳܐ ܩܰܕܺܝܫܬܳܐ

ܡܫܺܝܚܳܐ ܕܒܰܥܡܳܕܶܗ: ܐܰܦܨܰܚ ܒܶܪ̈ܝܳܬܳܐ: ܩܰܒܶܠ ܬܶܫܡܶܫܬܰܢ: ܘܶܐܬܪܰܚܰܡܥܠܰܝܢ܀

ܒܝܰܘܡܶܗ ܕܰܥܡܳܕܳܟ: ܪܽܘܚܳܐ ܥܠܰܝܟ ܐܰܓܶܢ: ܘܫܰܪܰܪ ܠܥܺܝܢ ܟܶܢ̈ܫܶܐ: ܠܣܳܗܕܽܘܬܶܗ ܕܰܐܒܳܐ܀

ܒܗܳܢ ܝܰܘܡܳܐ ܕܕܶܢܚܳܟ: ܢܽܘܗܪܳܐ ܕܢܰܚ ܒܰܐܪܥܳܐ: ܐܰܢܗܰܪ ܠܢܰܦ̈ܫܳܬܰܢ: ܕܢܰܘܕܶܐ ܘܢܶܣܓܽܘܕ ܠܳܟ܀

ܒܪܺܝܟܽ ܗ̱ܘ ܕܒܰܥܡܳܕܶܗ: ܚܰܪܪܰܢ ܡܶܢ ܛܽܘܥܝܰܝ: ܘܡܶܢ ܡܰܝ̈ܳܐ ܘܪܽܘܚܳܐ: ܥܰܒܕܰܢ ܠܶܗ ܐܰܚ̈ܶܐ܀

ܒܪܳܐ ܕܡܶܛܽܠ ܚܽܘܒܶܗ: ܪܟܶܢ ܘܶܐܬܳܐ ܠܘܳܬܰܢ: ܚܰܣܳܢ ܒܝܰܕ ܪ̈ܰܚܡܰܝܟ: ܕܢܶܙܡܰܪ ܠܳܟ ܫܽܘܒܚܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܝܰܡܳܐ ܕܶܐܬܦܰܠܰܓ

ܢܒܺܝܳܐ ܕܬܶܗܪܳܐ ܒܰܪ ܐܺܝܫܰܝ ܕܰܚܙܳܟ ܐܰܙܥܶܩ܆ ܘܶܐܬܢܰܒܺܝ ܒܪܽܘܚܳܐ ܕܩܽܘܕܫܳܐ ܡܶܛܽܠܳܬܳܟ܆ ܚܙܰܐܽܘܟ ܡܰܝ̈ܳܐ ܐܰܠܳܗܳܐ܆ ܚܙܰܐܽܘܟ ܡܳܪܝ ܡܰܝ̈ܳܐ ܘܰܕܚܶܠܘ܆ ܐܳܦ ܬܗܽܘ̈ܡܶܐ ܙܳܥܘ ܘܰܥܢܳܢ̈ܶܐ ܪ̈ܰܣܝ ܗ̱ܘܰܝ̈ ܛܰܠܳܐ܆ ܘܝܰܗ̱ܒܘ ܩܳܠܳܐ ܫܡܰܝ̈ ܫܡܰܝܳܐ܆ ܡܶܛܽܠ ܕܰܡܫܰܒܚܳܐ ܐܺܝܬܰܘܗ̱ܝ܀

ܐܶܡܰܪ ܡܳܪܰܢ ܠܝܽܘܚܰܢܳܢ ܩܪܽܘܒ ܐܰܥܡܶܕܰܝܢܝ܆ ܘܶܐܡܰܪ ܠܶܗ ܕܕܳܚܶܠ ܐ̱ܢܳܐ ܡܳܪܝ ܐܶܩܪܽܘܒ ܨܶܐܕܰܝܟ܆ ܥܰܒܕܳܐ ܐ̱ܢܳܐ ܘܠܳܐ ܡܰܡܪܰܚ ܐ̱ܢܳܐ܆ ܐܶܣܺܝܡ ܐܺܝܕܝ ܥܰܠ ܓܰܘܙܰܠܬܳܐ܆ ܘܶܐܡܰܪ ܠܶܗ ܕܰܫܒܽܘܩ ܗܳܫܳܐ ܕܥܰܠ ܗܳܝ ܐܶܬܺܝܬ܆ ܐܺܝܕܳܟ ܒܰܠܚܽܘܕ ܣܺܝܡ ܥܰܠ ܪܺܝܫܝ ܘܶܐܢܳܐ ܡܶܚܕܳܐ ܥܳܡܶܕ ܐ̱ܢܳܐ܀

ܒܝܽܘܡ ܕܶܢܚܶܗ ܕܒܰܪ ܐܰܠܳܗܳܐ ܬܶܚܕܶܐ ܥܺܕܬܳܐ܆ ܘܬܶܙܡܰܪ ܫܽܘܒܚܳܐ ܘܬܰܘܕܺܝܬܳܐ ܠܰܐܒܳܐ ܕܫܰܕܰܪ܆ ܠܺܝܚܺܝܕܶܗ ܘܰܢܚܶܬ ܘܰܥܡܰܕ܆ ܒܓܰܘ ܝܽܘܪܕܢܳܢ ܡܶܢ ܝܽܘܚܰܢܳܢ܆ ܩܰܕܶܫ ܠܰܢ ܡܰܥܡܽܘܕܺܝܬܳܐ ܕܳܐܦ ܚܢܰܢ ܢܶܥܡܰܕ܆ ܘܢܶܬܚܰܣܶܐ ܡܶܢ ܚܰܘ̈ܒܳܬܰܢ ܘܢܺܐܪܰܬ ܚܰܝ̈ܶܐ ܕܰܠܥܳܠܰܡ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܩܳܠܳܐ ܕܫܽܘܒܚܳܐ

ܐܶܡܰܪ ܡܳܪܰܢ. ܠܒܰܪ ܥܰܩܪܽܘܬܳܐ ܩܪܽܘܒ ܐܰܥܡܶܕܰܝܢܝ܆ ܕܠܰܘ ܕܶܐܬܩܰܕܰܫ ܒܳܥܶܐ ܐ̱ܢܳܐ܆ ܕܥܰܠ ܗܳܝ ܐܶܬܺܝܬ܆ ܕܒܺܝ ܢܶܬܩܰܕܫܽܘܢ ܝܰܠ̈ܕܰܘܗ̱ܝ ܕܳܐܕܳܡ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܀

ܝܰܗ̱ܒܘ ܗ̱ܘܰܘ ܩܳܠܳܐ. ܫܡܰܝ̈ ܫܡܰܝܳܐ ܒܗܰܘ ܥܶܕܳܢܳܐ܆ ܕܰܥܡܰܕ ܗ̱ܘܳܐ ܒܪܳܐ ܕܰܐܠܳܗܳܐ܆ ܘܰܢܚܶܬ ܪܽܘܚܳܐ܆ ܫܟܶܢ ܥܰܠ ܪܺܝܫܶܗ ܘܝܰܕܥܽܘܗ̱ܝ ܟܶܢ̈ܫܶܐ܆ ܕܗܽܘܝܽܘ ܐܶܡܪܶܗ ܕܰܐܠܳܗܳܐ܀

ܠܰܘ ܕܰܣܢܺܝܩ ܗ̱ܘܳܐ. ܗܽܘ ܐܰܠܳܗܳܐ ܥܰܠ ܬܰܕܟܺܝܬܳܐ܆ ܐܶܬܳܐ ܗ̱ܘܳܐ ܠܡܰܥܡܽܘܕܺܝܬܳܐ܆ ܕܗܽܘ ܡܚܰܣܶܐ ܟܽܠ܆ ܘܰܡܩܰܕܶܫ ܟܽܠ܆ ܒܝܰܕ ܡܰܝ̈ܳܐ ܕܡܰܥܡܽܘܕܺܝܬܳܐ܀

ܐܶܡܰܪ ܡܳܪܰܢ ܩܪܽܘܒ ܝܽܘܚܰܢܳܢ ܘܺܐܝܕܳܟ ܒܰܠܚܽܘܕ܆ ܣܺܝܡ ܥܰܠ ܪܺܝܫܝ ܟܰܕ ܥܳܡܶܕ ܐ̱ܢܳܐ܆ ܐܶܢܳܐ ܠܡܰܝ̈ܳܐ܆ ܡܩܰܕܶܫ ܐ̱ܢܳܐ ܠܗܽܘܢ ܕܢܶܗܘܽܘܢ ܠܚܰܝ̈ܶܐ܆ ܘܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܀

ܐ̱ܚܪܺܢܳܐ

ܩܳܠܳܐ ܒܩ̄: ܕܳܠܰܬ ܪܽܘܚܳܐ ܡܶܢ ܪܰܘܡܳܐ

ܕܳܠܰܬ ܪܽܘܚܳܐ ܡܶܢ ܪܰܘܡܳܐ: ܘܩܰܕܫܰܬ ܡܰܝ̈ܳܐ ܒܪܽܘܚܳܦܳܗ̇: ܒܡܰܥܡܽܘܕܺܝܬܶܗ ܕܝܽܘܚܰܢܳܢ: ܫܶܒܩܰܬ ܟܽܠ ܘܰܫܪܳܬ ܥܰܠ ܚܰܕ: ܘܗܳܫܳܐ ܕܶܝܢ ܢܶܚܬܰܬ ܘܰܫܪܳܬ: ܥܰܠ ܟܽܠ ܕܺܝܠܺܝܕ ܡܶܢ ܡܰܝ̈ܳܐ܀

ܕܽܘܡܳܪܰܐ ܗ̱ܘ ܡܳܪܝ ܐܳܦ ܗܳܫܳܐ: ܕܟܰܕ ܡܰܝ̈ܳܐ ܡܠܶܝܢ ܡܰܒܽܘ̈ܥܶܐ: ܡܰܝ̈ܳܐ ܕܶܝܢ ܕܡܰܥܡܽܘܕܺܝܬܳܐ: ܡܨܶܝܢ ܒܰܠܚܽܘܕ ܠܰܡܚܰܣܳܝܽܘ: ܚܰܝܠ̈ܬܳܢܺܝܢ ܝܰܡ̱̈ܡܶܐ ܒܡܰܝ̈ܳܐ: ܘܰܡܚܺܝܠܺܝܢ ܡܶܢ ܕܰܢܚܰܣܽܘܢ܀

ܙܳܥ ܗ̱ܘܳܐ ܕܰܚܙܳܟ ܝܽܘܪܕܢܳܢ: ܟܰܕ ܩܳܐܶܡ ܗ̱ܘܰܝܬ ܒܶܝܬ ܟܶܢ̈ܫܶܐ: ܘܰܒܨܶܒܥܳܐ ܚܰܘܝܳܟ ܘܶܐܡܰܪ: ܕܗܳܢܰܘ ܐܶܡܪܶܗ ܕܰܐܠܳܗܳܐ: ܕܠܰܚܛܺܝܬܶܗ ܕܥܳܠܡܳܐ ܫܳܩܶܠ: ܘܦܳܪܶܩ ܠܶܗ ܡܶܢ ܛܳܥܝܽܘܬܳܐ܀

ܬܗܰܪܘ ܗ̱ܘܰܘ ܟܶܢ̈ܫܶܐ ܥܶܠܳܝ̈ܶܐ: ܟܰܕ ܚܳܙܶܝܢ ܠܳܟ ܡܳܪܶܐ ܟܽܠ: ܕܰܐܝܟ ܚܰܝܳܒܳܐ ܠܰܥܡܳܕܳܐ: ܐܶܬܰܝܬ ܕܬܶܣܚܶܐ ܒܓܰܘ ܡܰܝ̈ܳܐ: ܟܰܕ ܐܰܢ̱ܬ ܐܺܝܬܰܝܟ ܡܕܰܟܝܳܢܳܐ: ܘܰܡܚܰܣܝܳܢܳܐ ܕܚܰܛܳܝ̈ܶܐ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܝܰܘܡܳܢܳܐ. ܐܰܙܥܶܩ ܐܰܒܳܐ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܚܰܒܺܝܒܝ܆ ܘܰܢܚܶܬ ܪܽܘܚܳܐ ܘܰܕܚܶܠܘ ܟܶܢ̈ܫܶܐ ܘܙܳܥ ܝܽܘܚܰܢܳܢ܆ ܘܝܰܒܶܒܘ ܕܰܠܥܶܠ ܥܰܡ ܕܰܠܬܰܚܬ܆ ܒܪܺܝܟ ܕܶܢܚܳܟ ܡܳܪܰܢ܀

ܬܳܐ ܝܽܘܚܰܢܳܢ܆ ܒܪܶܗ ܕܰܙܟܰܪܝܳܐ ܐܰܥܡܶܕܰܝܢܝ ܐܶܡܰܪ ܦܳܪܽܘܩܰܢ܆ ܐܺܝܕܳܟ ܒܰܠܚܽܘܕ ܬܳܐ ܣܺܝܡ ܥܰܠ ܪܺܝܫܝ ܕܰܨܒܺܝܬ ܐܶܥܡܰܕ܆ ܘܠܳܐ ܬܶܬܩܰܢܰܛ ܝܽܘܚܰܢܳܢ ܡܶܢܳܗ̇ ܕܓܰܘܙܰܠܬܳܐ܀

ܝܰܘܡܳܢܳܐ. ܬܗܰܪܘ ܗ̱ܘܰܘ ܥܺܝܪ̈ܶܐ ܘܡܰܠܰܐܟ̈ܶܐ ܘܟܶܢ̈ܫܶܐ ܕܥܰܠ ܢܰܗܪܳܐ܆ ܕܰܚܙܰܘ ܠܰܒܪܳܐ ܕܶܐܬܳܐ ܕܢܶܥܡܰܕ ܡܶܢ ܝܽܘܚܰܢܳܢ܆ ܘܰܠܪܽܘܚ ܩܽܘܕܫܳܐ ܐܰܝܟ ܝܰܘܢܳܐ܆ ܕܢܶܚܬܰܬ ܥܰܠ ܪܺܝܫܶܗ܀

ܝܰܘܡܳܢܳܐ. ܬܶܗܪܳܐ ܪܰܒܳܐ ܚܙܺܝܬ ܐܰܚܰܝ̈ ܥܰܠ ܢܰܗܪܳܐ ܝܽܘܪܕܢܳܢ܆ ܥܰܒܕܳܐ ܕܡܰܥܡܶܕ ܘܡܳܪܳܐ ܕܥܳܡܶܕ ܘܪܽܘܚܳܐ ܕܢܳܚܶܬ܆ ܘܰܐܒܳܐ ܕܩܳܥܶܐ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܚܰܒܺܝܒܝ܀

ܠܳܟ ܬܶܫܒܽܘܚܬܳܐ܆ ܦܳܪܽܘܩܰܢ ܕܒܰܥܡܳܕܳܟ ܐܶܬܩܰܕܰܫܘ ܡܰܝ̈ܳܐ܆ ܘܰܗܘܰܘ ܥܽܘܒܳܐ ܪܽܘܚܳܢܳܝܳܐ ܠܓܶܢܣܳܐ ܕܐ̱ܢܳܫ̈ܳܐ܆ ܕܪܽܘܚܳܢܳܐܺܝܬ ܢܶܬܝܰܠܕܽܘܢ. ܒܽܘܟܪ̈ܶܐ ܫܡܰܝ̈ܳܢܶܐ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܓܰܘ ܥܺܕܰܬ ܩܽܘܕܫܳܐ

ܒܝܽܘܪܕܢܳܢ ܢܰܗܪܳܐ ܡܰܥܡܶܕ ܗ̱ܘܳܐ܆ ܝܽܘܚܰܢܳܢ ܗܰܘ ܟܳܪܽܘܙܳܐ܆ ܘܶܐܬܳܐ ܡܳܪܶܗ ܕܝܽܘܚܰܢܳܢ܆ ܘܗܽܘ ܩܰܕܶܫ ܡܰܥܡܽܘܕܺܝܬܳܐ܀

ܐܶܡܰܪ ܡܳܪܰܢ ܠܝܽܘܚܰܢܳܢ܆ ܫܒܽܘܩ ܗܳܫܳܐ ܘܰܫܬܽܘܩ ܘܰܫܠܺܝ܆ ܝܳܐܶܐ ܠܰܢ ܓܶܝܪ ܕܰܢܡܰܠܶܐ܆ ܟܺܐܢܽܘܬܳܐ ܐܰܟܡܳܐ ܕܰܟܬܺܝܒ܀

ܐܶܡܰܪ ܡܳܪܰܢ ܠܝܽܘܚܰܢܳܢ: ܕܺܐܝܕܳܟ ܒܰܠܚܽܘܕ ܣܺܝܡ ܥܰܠ ܪܺܝܫܝ: ܘܶܐܢܳܐ ܠܡܰܝ̈ܳܐ ܡܩܰܕܶܫ ܐ̱ܢܳܐ: ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܀

ܩܪܶܒ ܥܰܒܕܳܐ ܘܰܐܪܺܝܡ ܐܺܝܕܶܗ܆ ܘܣܳܡܳܗ̇ ܥܰܠ ܪܺܝܫ ܓܳܒܽܘܠܶܗ܆ ܘܰܩܥܳܐ ܐܰܒܳܐ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܀

ܐܶܡܰܪ ܝܽܘܚܰܢܳܢ ܠܰܒܪܳܐ܆ ܕܕܳܚܶܠ ܐ̱ܢܳܐ ܡܳܪܝ ܐܶܩܪܽܘܒ ܠܳܟ܆ ܕܠܳܐ ܐܺܩܰܕ ܡܶܢ ܓܰܘܙܰܠܬܳܟ܆ ܘܡܶܢ ܥܽܘܙܳܐ ܕܝܳܩܽܘܕܽܘܬܳܟ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܐܶܬܕܰܟܪܰܝܢܝ ܒܪܳܐ ܕܰܐܠܳܗܳܐ

ܒܗܳܢܳܐ ܝܰܘܡܳܐ ܐܶܬܥܡܶܕ܆ ܒܪܳܐ ܕܰܐܠܳܗܳܐ܆ ܡܶܢ ܝܽܘܚܰܢܳܢ ܟܳܪܽܘܙܶܗ܀

ܣܠܶܩ ܡܶܚܕܳܐ ܡܶܢ ܓܰܘ ܡܰܝ̈ܳܐ܆ ܒܪܳܐ ܕܰܐܠܳܗܳܐ܆ ܘܩܰܕܶܫ ܠܳܐܕܳܡ ܘܰܠܝܰܠ̈ܕܰܘܗ̱ܝ܀

ܚܠܺܝܛܺܝܢ ܟܶܢ̈ܫܶܐ ܥܰܠ ܢܰܗܪܳܐ܆ ܕܥܺܝܪ̈ܶܐ ܘܐ̱ܢܳܫ̈ܳܐ܆ ܘܙܳܡܪܺܝܢ ܫܽܘܒܚܳܐ ܠܰܐܠܳܗܳܐ܀

ܒܪܺܝܟܽ ܗ̱ܘ ܕܰܥܡܰܕ ܒܓܰܘ ܝܽܘܪܕܢܳܢ܆ ܡܶܛܽܠܳܬܰܢ܆ ܘܰܡܪܰܩ ܘܚܰܠܶܠ ܟܽܘ̈ܬܡܳܬܰܢ܀

ܫܽܘܒܚܳܐ

ܢܰܘܕܶܐ ܠܶܗ ܠܗܰܘ ܕܶܐܬܬܰܚܬܺܝ܆ ܘܰܥܡܰܕ ܒܝܽܘܪܕܢܳܢ܆ ܘܩܰܕܶܫ ܠܰܢ ܡܰܥܡܽܘܕܺܝܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܢܽܘܚܳܡܳܟ ܡܳܪܰܢ

ܒܕܶܚܠܳܐ ܪܰܒܳܐ ܗܘܳܐ܆ ܘܒܰܪܬܺܝܬܳܐ ܩܳܡ ܝܽܘܚܰܢܳܢ܆ ܥܰܠ ܢܰܗܪܳܐ ܟܰܕ ܡܰܥܡܶܕ ܠܶܗ܆ ܠܦܳܪܽܘܩܶܗ ܕܥܳܠܡܳܐ܆ ܕܰܨܒܳܐ ܕܰܢܚܰܪܰܪ ܟܽܠܳܐ܀

ܫܡܰܥ ܗ̱ܘܳܐ ܝܽܘܚܰܢܳܢ܆ ܩܳܠܶܗ ܕܰܐܒܳܐ ܟܰܕ ܐܳܡܰܪ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܆ ܕܶܐܢܳܐ ܒܶܗ ܐܶܨܛܒܺܝܬ܆ ܕܰܢܚܰܪܰܪ ܟܽܠ ܒܶܪ̈ܝܳܬܳܐ܀

ܚܙܰܐܽܘܟ ܡܳܪܝ ܡܰܝ̈ܳܐ܆ ܦܳܪܽܘܩܰܢ ܚܙܰܐܽܘܟ ܘܰܕܚܶܠܘ܆ ܕܩܰܕܶܫܬ ܐܶܢܽܘܢ ܒܰܥܡܳܕܳܟ܆ ܕܰܢܚܰܣܽܘܢ ܚܰܘ̈ܒܶܐ܆ ܕܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ܀

ܫܽܘܒܚܳܐ

ܥܰܢܺܝ̈ܕܶܐ ܡܳܪܰܢ܆ ܕܠܰܒܫܽܘܟ ܡܶܢ ܡܰܥܡܽܘܕܺܝܬܳܐ܆ ܘܶܐܟܰܠܘ ܦܰܓܪܳܟ ܩܰܕܺܝܫܳܐ. ܥܰܡܳܟ ܢܶܬܒܰܣܡܽܘܢ܆ ܒܡܰܠܟܽܘܬܳܐ ܫܡܰܝܳܢܺܝܬܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܬܗܰܪ ܓܰܒܪܺܐܶܝܠ
ܛܽܘܒܰܝܟܝ ܡܰܪܝܰܡ ܕܰܫܘܰܝܬܝ ܕܬܶܗܘܶܝܢ

ܒܰܝܢܳܬ ܟܶܢ̈ܫܶܐ. ܩܳܐܶܡ ܗ̱ܘܳܐ ܒܪܶܗ ܕܰܙܟܰܪܝܳܐ܆ ܕܠܳܐ ܫܳܘܶܝܢ ܐܶܫܪܶܐ ܥܰܪ̈ܩܶܐ܆ ܕܰܡܣܳܐܢܰܝ̈ ܚܰܬܢܳܐ ܕܶܐܬܳܐ. ܟܰܕ ܩܳܥܶܐ ܥܰܠ ܝܽܘܪܕܢܳܢ ܢܰܗܪܳܐ܆ ܘܣܳܡ ܝܰܡܺܝܢܶܗ ܥܰܠ ܪܺܝܫܶܗ܆ ܘܰܚܙܳܐ ܪܽܘܚܳܐ ܐܰܝܟ ܝܰܘܢܳܐ܆ ܕܢܳܚܬܳܐ ܡܶܢ ܪܰܘܡܳܐ. ܘܰܐܒܳܐ ܐܰܣܗܶܕ ܟܰܕ ܐܳܡܰܪ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܆ ܝܺܚܺܝܕܳܝܳܐ ܕܒܶܗ ܐܶܨܛܒܺܝܬ܀

ܫܽܘܒܚܳܐ

ܟܰܕ ܐܶܬܬܰܚܬܺܝ. ܡܶܠܬܶܗ ܕܰܐܒܳܐ ܠܰܥܡܳܕܳܐ܆ ܩܦܰܣ ܐܺܝܕܶܗ ܒܰܪ ܥܰܩܪܽܘܬܳܐ܆ ܕܰܐܪܓܶܫ ܗ̱ܘܳܐ ܒܶܗ ܕܰܐܠܳܗܰܐ ܗ̱ܘ. ܘܙܳܥ ܗ̱ܘܳܐ ܡܶܢܶܗ ܟܳܪܽܘܙܳܐ ܕܩܽܘܫܬܳܐ܆ ܕܺܐܝܕܶܗ ܢܣܺܝܡ ܗ̱ܘܳܐ ܥܰܠ ܪܺܝܫܶܗ܆ ܘܰܠܪܽܘܚ ܩܽܘܕܫܳܐ ܐܰܝܟ ܝܰܘܢܳܐ܆ ܢܶܚܬܰܬ ܡܶܢ ܪܰܘܡܳܐ. ܫܽܘܒܚܳܐ ܠܶܗ ܟܡܳܐ ܐܶܬܡܰܟܰܟ. ܡܶܛܽܠ ܓܶܢܣܰܢ ܡܳܝܽܘܬܳܐ. ܕܢܰܘܪܶܬ ܠܰܢ ܡܰܠܟܽܘܬ ܪܰܘܡܳܐ܀

ܡܶܢ ܥܳܠܰܡ

ܥܰܠ ܒܶܝܬ ܕܺܝܢܳܐ. ܥܳܒܰܪ ܗܘܺܝܿܬ ܕܩܳܠܳܐ ܫܶܡܥܶܬ. ܢܰܦܫܳܐ ܕܳܐܡܪܳܐ ܠܶܗ ܠܦܰܓܪܳܐ. ܠܘܰܝ ܕܶܝܢ ܦܰܓܪܳܐ ܠܳܐ ܚܙܺܝܬܳܟ. ܐܳܦܠܳܐ ܠܒܶܫܬܳܟ ܐܳܦܠܳܐ ܥܶܡ̇ܪܶܬ ܒܳܟ. ܕܫܰܕܰܠܬܳܢܝ ܒܰܪ̈ܓܺܝܓܳܬܳܟ: ܘܓܳܪܶܬ ܘܓܶܢܒܶܬ ܐܳܦ ܩܶܛܠܶܬ: ܘܕܰܝܳܢܳܐ ܠܚܺܝ̣ܡ ܥܠܰܝ. ܘܶܐܢ ܡܳܪܝܳܐ ܠܳܐ ܡܥܰܕܰܪ ܠܺܝ. ܡܰܢ ܗܳܘܶܐ ܠܺܝ ܥܳܕܽܘܪܳܐ. ܒܗܳܝ ܫܳܥܬܳܐ ܕܦܳܣܺܝ̈ܩܳܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܙܳܕܶܩ ܕܢܶܗܘܶܐ
ܬܳܐ ܐܰܒܪܳܗܳܡ ܒܰܕܶܩ ܠܰܢ ܥܰܠ ܐܺܝܠܳܢܳܐ

ܗܰܘ ܕܰܣܪ̈ܳܦܶܐ. ܡܩܰܕܫܺܝܢ ܠܶܗ ܥܰܠ ܡܰܪܟܰܒܬܳܐ ܗܳܝ ܕܰܟܪ̈ܽܘܒܶܐ܆ ܐܰܝܟ ܒܰܪܢܳܫܳܐ. ܐܶܬܬܰܚܬܺܝ ܠܘܳܬ ܝܽܘܚܳܢܳܢ ܕܢܶܥܡܰܕ ܡܶܢܶܗ܆ ܥܢܳܐ ܝܽܘܚܰܢܳܢ. ܘܗܳܟܰܢ ܐܶܡܰܪ ܠܶܗ܆ ܕܶܐܢܳܐ ܣܢܺܝܩ ܐ̱ܢܳܐ܆ ܡܳܪܝ ܕܶܐܥܡܰܕ ܡܶܢܳܟ܆ ܘܰܐܝܟܰܢ ܐܰܡܪܰܚ ܐܶܬܩܰܪܰܒ ܨܶܝܕ ܓܰܘܙܰܠܬܳܟ. ܘܶܐܡܰܪ ܠܶܗ ܐܶܬܚܰܝܰܠ. ܘܶܐܬܥܰܫܰܢ ܗܳܢܰܘ ܨܶܒܝܳܢܝ܆ ܕܶܐܥܡܰܕ ܡܶܢܳܟ܆ ܘܶܐܩܰܕܶܫ ܡܰܥܡܽܘܕܺܝܬܳܐ ܗ̄ ܠܚܽܘܣܳܝ ܚܰܘ̈ܒܶܐ܀

ܫܽܘܒܚܳܐ

ܢܚܶܬ ܩܰܕܺܝܫܳܐ. ܘܩܰܕܶܫ ܡܰܝ̈ܳܐ ܒܰܥܡܳܕܶܗ ܒܝܽܘܪܕܢܳܢ ܢܰܗܪܳܐ܆ ܘܰܢܚܶܬ ܪܽܘܚܳܐ. ܡܶܢ ܪܰܘܡܳܐ ܒܰܕܡܽܘܬ ܝܰܘܢܳܐ ܘܰܫܟܶܢ ܥܠܰܘܗ̱ܝ. ܘܰܐܒܳܐ ܕܩܳܥܶܐ܆ ܕܗܳܢܰܘ ܒܶܪܝ ܚܰܒܺܝܒܝ܆ ܬܠܺܝܬܳܝܽܘܬܳܐ. ܕܠܰܝܬ ܒܳܗ̇ ܦܽܘܠܳܓܳܐ܆ ܐܰܒܳܐ ܕܩܳܥܶܐ. ܒܪܳܐ ܕܥܳܡܶܕ ܐܰܝܟ ܒܰܪܢܳܫܳܐ܆ ܘܪܽܘܚܩܽܘܕܫܳܐ ܦܰܪܰܩܠܺܝܛܳܐ܆ ܬܠܺܝܬܳܝܳܗ̇ ܕܰܐܠܳܗܽܘܬܳܐ܆ ܬܰܘ ܢܶܙܡܰܪ ܠܶܗ܆ ܫܽܘܒܚܳܐ ܒܝܰܘܡܳܐ ܕܰܥܡܳܕܶܗ ܗ̄ ܒܟܽܠ ܥܶܕܳܢܺܝ̈ܢ܀

ܡܶܢ ܥܳܠܰܡ

ܙܳܕܶܩ ܕܢܶܗܘܶܐ: ܕܽܘܟܪܳܢܳܐ ܠܟܺܐܢ̈ܶܐ ܕܰܫܟܶܒܘ ܒܗܰܝܡܳܢܽܘܬܳܐ. ܕܡ̣ܶܢ ܫܽܘܪܳܝܳܐ: ܠܫܽܘܠܳܡܳܐ ܫܦܰܪܘ ܠܰܐܠܳܗܳܐ ܒܕܽܘܒܳܪ̈ܰܝܗܽܘܢ. ܗܳܢܽܘܢ ܕܰܗܘܰܘ: ܗܰܝܟ̈ܠܶܐ ܪ̈ܽܘܚܳܢܶܐ: ܘܰܒܗܽܘܢ ܥܶܡܪܰܬ݀: ܪܽܘܚܶܗ ܕܰܡܫܺܝܚܳܐ. ܗܳܢܽܘܢ ܕܳܐܬܶܐ ܡܳܪܗܽܘܢ ܒܝܰܘܡܶܗ ܕܢܽܘܚܳܡܳܐ ܘܰܡܢܰܚܶܡ ܘܰܡܚܰܕܶܬ: ܘܡܰܠܒܶܫ ܫܽܘܒܚܳܐ ܠܦܰܓܪ̈ܰܝܗܽܘܢ: ܘܥܳܐܠܺܝܢ ܥܰܡܶܗ: ܠܰܓܢܽܘܢܳܐ ܡܠܶܐ ܚܰܕܘ̈ܳܬܳܐ ܗ̄ ܘܝܳܪܬܺܝܢ ܚܰܝ̈ܶܐ܀

ܦܶܬܓܳܡܳܐ: ܚܙܰܐܽܘܟ ܡܰܝ̈ܳܐ ܐܰܠܳܗܳܐ܆ ܚܙܰܐܽܘܟ ܡܳܪܝ ܡܰܝ̈ܳܐ ܘܰܕܚܶܠܘ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܟܶܢܫܰܬ ܩܳܡܰܬ ܥܺܕܬܳܐ ܒܚܽܘܪܒܳܐ ܨܶܝܕ ܝܽܘܚܰܢܳܢ܆ ܟܰܕ ܒܰܚ̈ܕܽܘܓܶܐ ܡܰܐܨܕܳܐ ܕܬܶܚܙܶܐ ܕܰܐܝܢܰܘ ܚܰܬܢܳܐ܆ ܟܪܰܟܬܶܗ ܠܢܰܗܪܳܐ ܘܶܐܫܕܰܬ ܥܰܝ̈ܢܶܝܗ̇ ܒܰܝܢܳܬ ܫܶܦܥܰܘ̈ܗ̱ܝ܆ ܕܰܬܩܰܒܠܶܗ ܗ̱ܘܳܬ ܠܚܰܬܢܳܐ ܕܩܽܘܫܬܳܐ ܡܶܢ ܓܰܘ ܡܰܝ̈ܳܐ܀

ܡܣܰܟܶܐ ܗ̱ܘܳܐ ܠܶܗ ܐܳܦ ܝܽܘܚܰܢܳܢ ܕܶܐܡܰܬܝ ܢܺܐܬܶܐ܆ ܕܒܶܗ ܬܶܫܬܰܡܠܶܐ ܡܰܥܡܽܘܕܺܝܬܶܗ ܕܰܒܨܺܝܪܳܐ ܗ̱ܘܳܬ܆ ܢܳܛܰܪ ܗ̱ܘܳܐ ܠܶܗ ܠܐ̱ܪܳܙܳܐ ܕܺܐܝܬ ܗ̱ܘܳܐ ܒܶܝܬ ܠܶܗ ܘܠܰܐܒܳܐ܆ ܘܚܳܐܰܪ ܗ̱ܘܳܐ ܠܳܗ̇ ܠܪܽܘܚܳܐ ܕܬܶܣܗܰܕ ܥܰܠ ܫܰܪܺܝܪܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀