ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܒܰܝܢܳܬ ܟܶܢ̈ܫܶܐ ܩܳܐܶܡ ܗ̱ܘܳܐ: ܒܪܳܐ ܕܶܐܬܳܐ ܠܡܰܥܡܽܘܕܺܝܬܳܐ: ܝܽܘܚܰܢܳܢ ܐܰܙܥܶܩ ܘܶܐܡܰܪ: ܕܗܳܢܰܘ ܐܶܡܪܶܗ ܕܰܐܠܳܗܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܢܚܶܬ ܡܳܪܰܢ ܠܝܽܘܪܕܢܳܢ ܢܰܗܪܳܐ: ܕܢܶܥܡܰܕ ܡܶܢ ܐܺܝ̈ܕܰܝ ܥܰܒܕܶܗ: ܘܰܐܙܥܶܩ ܐܰܒܳܐ ܡܶܢ ܪܰܘܡܳܐ: ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܪܽܘܚܩܽܘܕܫܳܐ ܒܰܕܡܽܘܬ ܝܰܘܢܳܐ: ܥܰܠ ܪܺܝܫܶܗ ܕܰܒܪܳܐ ܫܶܟܢܰܬ: ܕܰܬܚܰܘܶܐ ܕܗܽܘܝܽܘ ܚܰܬܢܳܐ: ܕܥܺܕܰܬ ܩܽܘܕܫܳܐ ܡܗܰܝܡܰܢܬܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܒܪܺܝܟ ܫܶܡܫܳܐ ܕܙܰܕܺܝܩܽܘܬܳܐ: ܕܰܕܢܰܚ ܝܰܘܡܳܢ ܒܰܒܪܺܝܬܳܐ: ܘܫܰܡܠܺܝ ܡ̈ܶܠܶܐ ܕܰܢܒܺܝ̈ܶܐ. ܕܰܒܪܽܘܚܳܐ ܐܰܟܪܶܙܘ ܥܠܰܘܗ̱ܝ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ: ܕܩܰܕܶܫܬ ܠܰܢ ܡܰܥܡܽܘܕܺܝܬܳܐ: ܕܒܰܥܡܳܕܳܟ ܡܰܥܒܶܕ ܚܰܝ̈ܶܐ: ܬܶܥܒܶܕ ܠܰܢ ܒܢܰܝ̈ܳܐ ܠܰܐܒܽܘܟ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܬܥܺܝܪ ܚܰܛܳܝܳܐ

ܒܰܥܡܳܕܶܗ ܕܰܒܪܳܐ܆ ܕܰܒܝܽܘܪܕܢܳܢ ܢܰܗܪܳܐ ܐܶܬܩܰܕܰܫܘ ܗ̱ܘܰܘ܆ ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܀

ܓܢܺܝܙ ܗ̱ܘܳܐ ܗܰܘ ܩܳܠܳܐ܆ ܕܰܫܡܰܥ ܝܽܘܚܰܢܳܢ ܒܝܽܘܪܕܢܳܢ ܢܰܗܪܳܐ܆ ܐܰܒܳܐ ܕܩܳܥܶܐ ܕܗܳܢܰܘ ܒܶܪܝ܆ ܘܪܽܘܚܳܐ ܠܣܳܗܕܽܘܬܶܗ ܫܰܪܰܪ܀

ܝܰܘܡܳܢ ܗܳܐ ܚܳܕܶܝܢ܆ ܢܒܺܝ̈ܶܐ ܕܰܫܠܶܡܘ ܗ̱ܘܰܘ ܓܶܠ̈ܝܳܢܰܝܗܽܘܢ܆ ܘܐ̱ܪ̈ܳܙܶܐ ܘܝܽܘܩ̈ܢܶܐ ܘܦ̈ܶܠܳܐܬܳܐ܆ ܒܰܥܡܳܕܶܗ ܗܳܐ ܐܶܣܬܰܝܰܟܘ܀

ܫܽܘܒܚܳܐ

ܫܽܘܒܚܳܐ ܠܗܰܘ܆ ܨܶܡܚܳܐ ܕܰܨܡܰܚ ܡܶܢ ܐܰܒܳܐ ܐܰܠܳܗܳܐܺܝܬ܆ ܒܰܥܡܳܕܶܗ ܕܡܶܢ ܝܽܘܚܰܢܳܢ܆ ܐܰܢܗܰܪ ܠܰܐܪܒܰܥ ܦܶܢ̈ܝܳܬܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ
ܒܨܰܦܪܳܐ ܩܰܕܶܡ ܒܰܪ ܡܰܠܟܳܐ ܕܢܶܐܓܽܘܪ (ܣܳܠܶܩ: ܒܡܰܪܝܰܡ ܝܳܠܕܰܬ ܐܰ‌ܠܳܗܳܐ)

ܒܪܺܝܟ ܕܰܐܠܒܶܫ ܙܰܝܢܳܐ ܕܪܽܘܚܳܐ ܡܶܢ ܓܰܘ ܡܰܝ̈ܳܐ܆ ܠܳܐܕܳܡ ܥܰܦܪܳܢܳܐ ܘܰܛܡܰܪ ܒܶܗ ܚܡܺܝܪܳܐ ܕܚܰܝ̈ܶܐ܆ ܦܰܓܪܶܗ ܘܰܕܡܶܗ ܕܢܶܬܚܰܣܶܐ ܡܶܢ ܟܽܘ̈ܬܡܳܬܶܗ܆ ܘܢܶܠܒܰܫ ܫܽܘܒܚܳܐ ܕܰܫܠܰܚ ܒܦܰܪܕܰܝܣܳܐ܀

ܫܽܘܒܚܳܐ

ܡܶܫܚܳܐ ܗܰܘ ܕܰܡܫܺܝܚܽܘܬܳܐ ܩܽܘܕܫܳܐ ܩܰܕܶܫ ܡܽܘܫܶܐ ܠܺܝܣܪܳܐܶܝܠ܆ ܥܰܠ ܡܰܠ̈ܟܶܐ ܘܟܳܗ̈ܢܶܐ ܐܶܬܢܣܶܟ ܡܶܢ ܗܰܘ ܕܳܪܳܐ܆ ܘܡܶܢ ܕܶܐܬܳܐ ܡܫܺܝܚܳܐ ܘܰܥܡܰܕ܆ ܗܘܳܐ ܝܽܘܒܳܠܶܗ ܥܰܠ ܟܽܠܗܽܘܢ ܕܳܪ̈ܶܐ܀

ܡܰܕܪܳܫܳܐ

ܩܳܠܳܐ ܒܩ̄: ܐܳܕܳܡ ܚܛܳܐ ܘܰܩܢܳܐ

ܥܽܘܢܺܝܬܳܐ: ܬܶܫܒܽܘܚܬܳܐ ܠܰܐܒܳܐ ܕܝܰܗܒܳܟ ܠܰܢ܆ ܕܒܰܥܡܳܕܳܟ ܬܺܐܬܶܐ ܬܩܰܕܶܫ ܠܰܢ.

ܒܡܰܝ̈ܳܐ ܗܘܰܘ ܐܰܚ̈ܶܐ ܠܰܡܫܺܝܚܳܐ܆ ܥܡܺܝ̈ܕܶܐ ܐܶܬܩܰܕܰܫܘ ܒܰܥܡܳܕܶܗ܆ ܕܰܢܚܶܬܘ ܣܘܰܚܘ ܥܰܡܶܗ ܦܰܓܪ̈ܳܢܶܐ܆ ܘܫܰܚܠܶܦ ܥܒܰܕ ܐܶܢܽܘܢ ܪ̈ܽܘܚܳܢܶܐ܆ ܒܝܰܠܕܳܐ ܬܪܰܝܳܢܳܐ ܕܡܶܢ ܡܰܝ̈ܳܐ܀

ܐܰܒܳܐ ܠܚܽܘܕ ܐܰܘܠܶܕ ܡܶܢ ܝܳܬܶܗ܆ ܘܚܰܕ ܠܶܗ ܒܪܳܐ ܒܰܠܚܽܘܕ ܒܰܟܝܳܢܶܗ܆ ܘܪܶܟܢܰܬ ܛܰܝܒܽܘܬܶܗ ܘܥܶܒܕܰܬ ܠܶܗ܆ ܥܰܡ ܗܰܘ ܒܪܳܐ ܒܢܰܝ̈ܳܐ ܣܰܓܺܝ̈ܐܶܐ܆ ܒܝܰܕ ܚܽܘܒܶܗ ܕܠܳܐ ܚܣܰܡ ܒܥܰܙܪܽܘܪ̈ܶܐ܀

ܒܢܰܝ̈ܳܐ ܗܘܰܘ ܠܳܐܕܳܡ ܩܰܕܡܳܝܳܐ܆ ܘܟܽܠܗܽܘܢ ܐܶܬܚܢܶܩܘ ܒܛܰܘܦܳܢܳܐ܆ ܫܠܰܚ ܐܰܒܳܐ ܠܰܒܪܶܗ ܚܰܒܺܝܒܳܐ܆ ܘܰܥܡܰܕ ܘܰܐܘܠܶܕ ܠܰܢ ܬܶܢܝܳܢܽܘܬ܆ ܘܰܚܝܰܘ ܒܡܰܘܠܳܕܶܗ ܬܪܰܝܳܢܳܐ܀

ܠܰܒܫܽܘܗ̱ܝ ܡܶܢ ܡܰܝ̈ܳܐ ܠܺܝܚܺܝܕܳܐ܆ ܕܰܢܚܶܬ ܠܒܶܫ ܐܶܢܽܘܢ ܡܶܢ ܟܰܪܣܳܐ܆ ܕܢܶܗܘܽܘܢ ܠܶܗ ܐܰܚ̈ܶܐ ܒܛܰܝܒܽܘܬܳܐ܆ ܘܢܶܩܪܽܘܢ ܠܰܐܒܳܐ ܐܰܒܽܘܢ ܕܰܫܦܰܪ ܠܶܗ܆ ܢܚܰܕܶܬ ܟܽܠ ܒܰܒܪܶܗ ܡܶܢ ܡܰܝ̈ܳܐ܀

ܪܽܘܚܳܐ ܩܰܕܺܝܫܳܐ ܡܶܢ ܡܰܝ̈ܳܐ܆ ܐܰܝܟ ܣܳܦܪܳܐ ܪܰܒܳܐ ܗܳܐ ܟܳܬܶܒ܆ ܫܡܳܗ̈ܶܐ ܕܰܥܡܺܝ̈ܕܶܐ ܘܰܡܩܰܪܶܒ܆ ܠܰܐܒܳܐ ܕܢܶܗܘܽܘܢ ܠܶܗ ܝܳܪ̈ܽܘܬܶܐ܆ ܒܰܥܕܶܢ ܕܣܳܦܶܩ ܗ̱ܘܳܐ ܠܣܰܓܺܝ̈ܐܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܳܘ ܢܰܦܫܳܐ ܨܽܘܪܬܳܐ

ܥܽܘܢܺܝܬܳܐ: ܒܪܺܝܟ ܕܰܐܘܠܶܕ ܒܢܰܝ̈ܳܐ ܣܰܓܺܝ̈ܶܐܐ: ܡܶܢ ܥܽܘܒܳܐ ܕܰܟܝܳܐ ܕܡܰܥܡܽܘܕܺܝܬܳܐ.

ܚܳܪ ܘܰܚܙܳܐ ܕܣܰܓܺܝܺܐܝܢ ܫܽܘ̈ܚܢܰܝ: ܐܰܬܩܶܢ ܠܺܝ ܡܥܺܝܢܳܐ ܕܒܳܗ̇ ܐܶܣܚܶܐ: ܘܒܳܗ̇ ܫܽܘ̈ܚܢܰܝ ܟܽܠܗܽܘܢ ܡܶܬܚܰܠܡܺܝܢ܀

ܡܰܘܠܳܕܳܐ ܐܰܘܠܕܰܢܝ ܬܪܰܝܳܢܳܐ: ܘܰܛܠܺܝܬܳܐ ܥܰܒܕܰܢܝ ܒܓܰܘ ܡܰܝ̈ܳܐ: ܘܰܒܙܽܘܦܶܗ ܕܰܟܝܰܢܝ ܕܛܰܡܳܐܐ ܗ̱ܘܺܝܬ܀

ܒܰܫ̈ܡܳܗܶܐ ܬܠܳܬܳܐ ܥܡܺܝܕܳܐ ܐ̱ܢܳܐ: ܠܚܰܕ ܚܰܬܢܳܐ ܫܒܺܝܚܳܐ ܡܟܺܝܪܳܐ ܐ̱ܢܳܐ: ܒܥܶܙܰܩܬܳܐ ܕܡܰܠܟܳܐ ܛܒܺܝܥܳܐ ܐ̱ܢܳܐ܀

ܡܶܢ ܒܺܐܪܳܐ ܚܕܰܬܳܐ ܕܶܐܬܦܰܬܚܰܬ: ܥܰܠ ܪܰܘܡܳܐ ܪܳܡܳܐ ܕܓܳܓܽܘܠܬܳܐ: ܪܕܳܐ ܫܶܩܝܳܐ ܘܶܐܫܬܺܝܬ ܕܨܰܗܝܳܐ ܗ̱ܘܺܝܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܰܘ̈ܕܝܳܢܶܐ
ܕܽܘܨ ܟܶܢܫܳܐ ܕܰܥܠܰܝ̈ܡܳܬܳܐ

ܥܽܘܢܺܝܬܳܐ: ܒܪܺܝܟ ܕܰܐܘܠܕܰܢ ܪܽܘܚܳܢܳܐܺܝܬ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ.

ܡܰܥܡܽܘܕܺܝܬܳܐ ܗܘܳܬ ܐܶܡܳܐ܆ ܕܝܳܠܕܳܐ ܟܽܠܝܽܘܡ ܪ̈ܽܘܚܳܢܶܐ܆ ܘܰܡܩܺܝܡܳܐ ܒܢܰܝ̈ܳܐ ܚܰܕ̱̈ܬܶܐ. ܠܰܐܠܳܗܳܐ ܩܰܕܺܝܫܳܐܺܝܬ܆ ܒܪܺܝܟ ܕܰܐܘܠܶܕ ܠܰܢ ܬܶܢܝܳܢܽܘܬ܀

ܚܶܘܝܳܐ ܣܳܦܪܳܐ ܗܰܦܟܳܝܳܐ܆ ܟܬܰܒ ܥܰܠ ܚܰܘܳܐ ܚܰܘ̈ܒܳܬܳܐ܆ ܘܰܙܩܺܝܦܳܐ ܒܡܰܝ̈ܳܐ ܚܰܢܩܶܗ܆ ܠܚܶܘܝܳܐ ܡܚܰܒܶܠ ܬܰܩ̈ܢܳܬܳܐ܆ ܘܰܠܚܰܘܳܐ ܝܰܗ̱ܒ ܫܽܘܒܩܳܢܳܐ܀

ܠܢܽܘ̈ܟܬܳܬܶܗ ܕܚܶܘܝܳܐ ܚܰܪܡܳܐ܆ ܚܙܳܐ ܡܪܰܚܡܳܢܳܐ ܘܟܶܪܝܰܬ ܠܶܗ܆ ܘܰܐܪܡܺܝ ܒܰܐܪܥܳܐ ܥܶܩܳܪܳܐ܆ ܕܡܶܢ ܐܰܪܥܳܐ ܨܗܺܝܬܳܐ ܢܶܥܒܶܕ܆ ܐܳܣܝܽܘܬܳܐ ܠܟܽܠ ܕܰܢܟܺܝܬܺܝܢ܀

ܒܓܰܘ ܡܰܝ̈ܳܐ ܛܰܫܺܝ ܥܽܘܙܶܗ܆ ܘܰܢܓܰܕ ܨܶܐܕܰܘܗ̱ܝ ܚܰܣܺܝܪ̈ܶܐ܆ ܕܢܶܚܬܽܘܢ ܢܶܣܒܽܘܢ ܡܶܢ ܬܰܡܳܢ܆ ܓܰܙܳܐ ܡܰܥܬܰܪ ܣܰܓܺܝ̈ܐܶܐ܆ ܘܰܒܥܽܘܬܪܶܗ ܪܰܒܳܐ ܢܶܚܕܽܘܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܙܥܰܩ ܗ̱ܘܳܐ ܒܟܶܢ̈ܫܶܐ ܘܡܶܢ ܨܶܝܕ ܢܰܗܪܳܐ ܐܰܥܪܶܩ ܐܶܢܽܘܢ܆ ܕܢܶܕܰܥ ܟܽܠܢܳܫ ܥܰܠ ܡܰܢ ܪܶܬܚܰܬ ܡܰܥܡܽܘܕܺܝܬܳܐ܆ ܪܡܰܙ ܠܰܚ̈ܕܽܘܓܶܐ ܘܝܰܗ̱ܒܘ ܠܶܗ ܐܰܬܪܳܐ ܒܰܝܢܳܬ ܣܶܕܪ̈ܶܐ܆ ܕܢܶܬܚܰܘܶܐ ܗ̱ܘܳܐ ܬܰܡܳܢ ܚܰܬܢܳܐ ܠܟܽܠܗܽܘܢ ܥܰܡ̱̈ܡܶܐ܀

ܠܗܳܢܳܐ ܓܰܒܪܳܐ ܡܟܰܪܬܶܟܝ ܥܺܕ̱ܬܳܐ ܡܶܢ ܫܽܘܪܳܝܳܐ܆ ܒܰܫܡܳܐ ܕܗܳܢܳܐ ܡܰܘܬܶܒ ܗ̱ܘܺܝܬ ܠܶܟܝ ܡܶܢ ܟܰܕ ܐܶܬܺܝܬ܆ ܘܟܰܕ ܝܺܕܰܥܬܶܗ ܥܺܕ̱ܬܳܐ ܠܰܒܪܳܐ ܡܶܢ ܝܽܘܚܳܢܳܢ܆ ܙܶܡܪܰܬ ܫܽܘܒܚܳܐ ܠܰܐܒܳܐ ܕܫܰܠܚܶܗ ܘܰܠܪܽܘܚ ܩܽܘܕܫܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀