ܩܰܘܡܳܐ ܬܠܺܝܬܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢܺܝܚ ܡܳܪܝܳܐ ܠܥܰܢܺܝ̈ܕܰܝܢ. ܒܰܐܘ̈ܘܳܢܶܐ ܕܺܝܠܳܟ ܡܫܰܒ̈ܚܶܐ. ܠܗܽܘܢ ܡܳܪܰܢ ܐܰܢܺܝܚ: ܘܰܥܠܰܝܢ ܐܶܬܪܰܚܰܡ. ܟܰܕ ܫܳܒܶܩ ܐܰܢ̱ܬ ܘܡܰܥܒܰܪ ܐܰܢ̱ܬ. ܤܰܟܠ̈ܘܳܬܳܐ ܕܺܝܠܰܢ ܘܕܺܝܠܗܽܘܢ܀

ܩܳܠܳܐ ܒܩ̄: ܒܟܽܠܡܶܕܶܡ ܐܶܬܒܰܩܺܝܬ

ܦܶܬܓܳܡܳܐ: ܐܰܢ̱ܬ ܡܳܪܝܳܐ ܐܰܢܺܝܚ ܐܶܢܽܘܢ: ܐܰܒܳܗܰܝ̈ܢ ܘܰܐܚܰܝ̈ܢ ܕܰܫܟܶܒܘ. ܘܫܰܢܺܝܘ ܡܶܢ ܚܰܝ̈ܶܐ ܕܙܰܒܢܳܐ. ܥܰܕ ܗܳܘܶܐ ܝܰܘܡܳܐ ܕܰܩܝܳܡܬܳܐ ܕܕܰܡ̈ܟܶܐ. ܐܰܢܺܝܚ ܡܳܪܝܳܐ ܢܰܦ̈ܫܳܬܗܽܘܢ ܒܰܐܘ̈ܘܳܢܶܐ ܕܢܽܘܗܪܳܐ. ܘܢܰܪܓܫܽܘܢ ܒܩܰܒܪ̈ܶܐ ܓܰܪ̈ܡܰܝܗܽܘܢ ܒܝܰܘܡܳܐ ܕܥܽܘܗܕܳܢܗܽܘܢ. ܘܡܳܐ ܕܰܡܢܰܚܶܡ ܦܽܘܩܕܳܢܳܟ. ܠܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ. ܢܶܬܥܰܛܦܽܘܢ ܙܺܝܘܳܐ ܘܗܶܕܪܳܐ. ܘܢܶܥܠܽܘܢ ܥܰܡܳܟ ܠܰܓܢܽܘܢܳܟ. ܘܢܰܤܩܽܘܢ ܠܳܟ ܫܽܘܒܚܳܐ܆ ܕܰܐܢ̱ܬ ܗ̱ܽܘ ܡܢܰܚܡܳܢܗܽܘܢ܀

ܚܰܫܳܐ ܢܶܠܒܰܫ ܡܶܢ ܗܳܪܟܳܐ. ܥܰܕ ܡܳܛܶܐ ܠܶܗ ܗܰܘ ܝܰܘܡܳܐ. ܕܰܒܩܳܠ ܫܺܝܦܽܘܪܳܐ ܩܰܒܪ̈ܶܐ ܡܶܬܦܰܬܚܺܝܢ. ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ ܒܥܰܢܺܝ̈ܕܶܐ ܘܩܳܝܡܺܝܢ. ܐܺܝܬ ܕܰܡܤܰܟܶܝܢ ܠܗܰܘ ܝܰܘܡܳܐ. ܘܺܐܝܬ ܠܶܗ ܕܠܳܐ ܚܳܝܪܺܝܢ. ܙܰܕܺܝ̈ܩܶܐ ܒܳܥܶܝܢ ܕܢܶܡܛܶܐ. ܘܪ̈ܰܫܺܝܥܶܐ ܩܳܢܛܺܝܢ ܡܶܢܶܗ. ܚ̈ܶܛܶܐ ܠܡܶܛܪܳܐ ܡܶܬܝ̈ܰܐܒܳܢ. ܘܝܰܥܪܳܐ ܫܳܘܶܐ ܠܝܰܩܕܳܢܳܐ. ܐܰܫܘܳܢ ܕܥܰܡ ܚ̈ܶܛܶܐ܆ ܠܰܐܘܨܪ̈ܰܝܟ ܢܶܬܟܰܢܰܫ܀

ܫܽܘܒܚܳܐ

ܛܽܘܒ ܠܰܐܝܢܳܐ ܕܥܳܒܕܺܝܢ ܗܳܪܟܳܐ. ܚܰܝ̈ܶܐ ܚܠܳܦܰܘܗ̱ܝ ܩܽܘܪ̈ܒܳܢܶܐ. ܕܰܠܥܶܠ ܒܰܫܡܰܝܳܐ. ܕܽܘܟܪܳܢܶܗ ܡܶܬܪܫܶܡ. ܘܶܐܢ ܡܽܘܫܶܐ ܫܡܳܗ̈ܶܐ ܕܫܰܒ̈ܛܶܐ ܒܠܽܘ̈ܚܶܐ ܕܟܺܐܦܳܐ ܪܫܰܡ. ܕܰܠܕܽܘܟܪܳܢܳܐ ܐܰܡܺܝܢܳܐ ܩܕܳܡ ܡܳܪܝܳܐ ܢܶܥܠܽܘܢ. ܒܰܦܪܺܝܤܬܳܐ ܡܰܠܝܰܬ ܚܰܝ̈ܶܐ. ܪܫܽܘܡܘ ܫܡܳܗ̈ܶܐ ܕܥܰܢܺܝܕܰܝ̈ܟܽܘܢ. ܕܗܳܪܟܳܐ ܒܥܺܕܬܳܐ ܢܶܬܕܰܟܪܽܘܢ. ܠܥܶܠ ܒܰܫܡܰܝܳܐ ܢܶܬܟܰܬܒܽܘܢ. ܘܡܳܐ ܕܳܐܬܶܐ ܡܫܺܝܚܳܐ܆ ܥܰܡܶܗ ܢܶܬܒܰܤܡܽܘܢ܀

ܡܶܢ ܥܳܠܰܡ

ܡܫܺܝܚܳܐ ܕܰܡܠܰܟ ܢܽܘܚܳܡܳܐ. ܠܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ. ܕܶܐܡܰܪ ܒܰܤܒܰܪܬܶܗ. ܠܰܐܝܠܶܝܢ ܕܗܰܝܡܶܢܘ ܒܶܗ. ܕܟܽܠ ܐܰܝܢܳܐ ܕܳܐܟܶܠ ܡܶܢ ܦܰܓܪܝ܆ ܘܫܳܬܶܐ ܕܶܡܝ ܚܰܝܳܐ. ܗܽܘ ܒܺܝ ܡܩܰܘܶܐ ܘܶܐܢܳܐ ܒܶܗ. ܘܰܠܚܰܪܬܳܐ ܒܺܝ ܢܩܽܘܡ. ܢܰܚܶܡ ܘܰܐܚܳܐ ܒܛܰܝܒܽܘܬܳܟ. ܠܥܰܒ̈ܕܰܝܟ ܕܰܫܟܶܒܘ ܥܰܠ ܤܰܒܪܳܟ. ܘܡܳܐ ܕܳܐܬܶܐ ܐܰܢ̱ܬ ܒܬܶܫܒܽܘܚܬܳܐ. ܒܟܶܢ̈ܫܶܐ ܫܒܺܝ̈ܚܶܐ ܕܡܰܠܰܐܟܰܝ̈ܟ. ܥܰܡܳܟ ܡܳܪܝ ܢܶܥܠܽܘܢ ܠܰܓܢܽܘܢ ܚܰܕܘ̈ܳܬܳܐ܀

ܒܳܥܽܘܬܳܐ ܕܡܳܪܝ ܒܰܠܰܝ

ܚܰܕܶܬ ܡܠܶܐ ܪ̈ܰܚܡܶܐ: ܒܪܺܝܬܳܟ ܒܢܽܘܚܳܡܳܐ܀

ܠܥܰܒܕܰܝ̈ܟ ܘܤܳܓܽܘܕܰܝ̈ܟ: ܕܰܫܟܶܒܘ ܥܰܠ ܤܰܒܪܳܟ܀

ܐܰܢܺܝܚ ܘܚܰܤܳܐ ܠܗܽܘܢ: ܡܳܪܝܳܐ ܠܥܰܢܺܝ̈ܕܰܝܢ. ܕܰܫܟܶܒܘ ܥܰܠ ܤܰܒܪܳܟ: ܘܚܳܝܪܺܝܢ ܠܡܶܐܬܺܝܬܳܟ܀

ܐܰܢܺܝܚ ܠܰܩܒܺܝܪ̈ܶܐ: ܡܰܠܟܳܐ ܫܡܰܝܳܢܳܐ. ܘܰܐܤܓܳܐ ܫܽܘܒܩܳܢܳܐ: ܠܥܰܢܺܝܕ̈ܶܐ ܡܗܰܝ̈ܡܢܶܐ܀

ܒܥܽܘܒܶܗ ܕܰܐܒܪܳܗܳܡ: ܕܺܐܝܤܚܳܩ ܘܰܕܝܰܥܩܽܘܒ. ܐܰܫܪܳܐ ܡܳܪܝ ܠܥܰܒܕܰܝ̈ܟ: ܕܰܫܟܶܒܘ ܥܰܠ ܤܰܒܪܳܟ܀

ܫܽܘܒܚܳܐ ܠܰܡܫܺܝܚܳܐ: ܕܩܳܪܶܐ ܠܥܰܢܺܝ̈ܕܶܐ. ܘܩܳܝܡܺܝܢ ܕܠܳܐ ܚܒܳܠܳܐ: ܘܙܳܡܪܺܝܢ ܬܶܫܒܽܘܚܬܳܐ܀

ܦܰܓܪ̈ܶܐ ܘܢܰܦ̈ܫܳܬܳܐ: ܢܶܩܥܽܘܢ ܫܰܘܝܳܐܺܝܬ܀

ܒܪܺܝܟ ܕܶܐܬܳܐ ܘܳܐܬܶܐ: ܘܰܡܢܰܚܶܡ ܡܺܝ̈ܬܶܐ܀

ܗܰܠܶܠܽܘܝܰܗ ܘܗܰܠܶܠܽܘܝܰܗ ܘܗܰܠܶܠܽܘܝܰܗ. ܫܽܘܒܚܳܐ ܠܳܟ ܐܰܠܳܗܳܐ܀ ܓ̄ ܙܰܒܢܺܝ̈ܢ܀
ܚܽܘܢ ܠܰܢ ܒܪ̈ܰܚܡܰܝܟ ܚܰܢܳܢܳܐ. ܡܳܪܝܳܐ ܪܰܚܶܡ ܥܠܰܝܢ ܘܥܰܕܰܪܰܝܢ.

ܦܶܬܓܳܡܳܐ: ܒܩܽܘܪ̈ܒܳܢܶܐ ܘܒܰܨܠܰܘ̈ܳܬܳܐ: ܢܶܬܕܟܰܪ ܐܶܢܽܘܢ ܠܰܐܒܳܗܰܝ̈ܢ. ܕܡܰܠܦܺܝܢ ܗ̱ܘܰܘ ܠܰܢ ܟܰܕ ܚܰܝܺܝ̈ܢ ܕܢܶܗܘܶܐ ܒܢܰܝ̈ܳܐ ܠܰܐܠܳܗܳܐ ܒܗܳܢ ܥܳܠܡܳܐ ܕܥܳܒܰܪ. ܒܪܳܐ ܕܰܐܠܳܗܳܐ ܢܢܺܝܚ ܐܶܢܽܘܢ. ܒܗܳܝ ܡܰܠܟܽܘܬܳܐ ܕܰܫܡܰܝܳܐ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ. ܒܥܳܠܡܳܐ ܕܠܳܐ ܥܳܒܰܪ܀

ܡܰܘܪܒܳܐ

ܩܳܠܳܐ ܒܩ̄: ܠܶܟܝ ܢܶܬܟܰܫܰܦ

ܬܗܰܪ ܗ̱ܘܳܐ ܫܶܡܥܽܘܢ: ܕܰܚܙܳܝܗ̱ܝ ܠܰܒܪܳܐ ܟܰܕ ܥܳܐܶܠ ܠܗܰܝܟܰܠ ܩܽܘܕܫܳܐ: ܘܰܩܪܶܒ ܛܰܥܢܶܗ: ܟܰܕ ܒܳܥܶܐ ܘܡܶܬܟܰܫܰܦ ܠܶܗ ܕܰܫܪܺܝܢܝ̱ ܡܶܟܺܝܠ: ܟܰܣܝܳܐ ܕܶܐܬܳܐ ܠܓܶܠܝܳܐ ܕܢܶܦܪܽܘܩ ܨܰܠܡܶܗ ܕܳܐܕܳܡ ܕܰܒܠܺܝ ܒܰܚܛܺܝܬܳܐ܀

ܛܥܶܢܬܶܗ ܡܰܪܝܰܡ: ܠܰܛܥܺܝܢ ܟܽܠ ܐܰܝܟ ܢܳܡܽܘܣܳܐ ܕܒܶܝܬ ܐܺܝܣܪܳܐܶܝܠ ܕܝܰܗܒ ܠܶܗ ܡܳܪܝܳܐ: ܕܟܽܠ ܕܶܟܪܳܐ ܕܦܳܬܰܚ ܡܰܪܒܥܳܐ ܩܰܕܺܝܫܳܐ ܢܶܬܩܪܶܐ: ܘܢܶܬܠܽܘܢ ܚܠܳܦܰܘܗ̱ܝ ܕܶܒܚܳܐ܆ ܬܪܶܝܢ ܦܰܪ̈ܽܘܓܶܐ ܕܝܳܘ̈ܢܶܐ ܐܰܘ ܬܪܶܝܢ ܫܽܘܦܢܺܝ̈ܢܶܐ܀

ܗܳܐ ܫܶܡܠܰܬ ܠܳܗ̇: ܬܰܢܘܰܝ ܪܰܒܬܳܐ ܗܳܝ ܕܰܗܘܳܬ ܐ̱ܪܳܙܳܢܳܐܺܝܬ: ܦܩܽܘܕ ܠܶܗ ܠܡܰܘܬܳܐ: ܦܳܪܽܘܩܰܢ ܗܳܫܳܐ ܡܢܺܝܚ ܠܺܝ ܐܰܝܟ ܫܽܘܘܕܳܝܳܟ: ܒܪܽܘܚܳܐ ܕܩܽܘܕܫܳܐ ܐܶܬܬܙܺܝܥ: ܣܳܒܳܐ ܠܽܘܩܒܰܠ ܫܰܒܪܳܐ: ܘܝܰܕܥܶܗ ܕܰܐܠܳܗܰܐ ܗ̱ܘ܀

ܫܽܘܒܚܳܐ

ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ ܕܰܗܘܰܝܬ ܐ̱ܢܳܫܳܐ ܡܶܢ ܒܰܪ̱ܬ ܕܰܘܺܝܕ: ܘܡܶܢ ܕܶܐܬܓܰܫܰܡܬ: ܥܰܠ ܐܺܝ̈ܕܰܘܗ̱ܝ ܕܫܶܡܥܽܘܢ ܣܳܒܳܐ ܡܶܙܕܰܝܰܚ ܗ̱ܘܰܝܬ: ܕܰܫܪܺܝܢܝ ܡܶܟܺܝܠ ܡܳܪܝܳܐ: ܐܶܬܬܢܺܝܚ ܡܶܬܟܰܫܰܦ ܗ̱ܘܳܐ ܠܳܟ: ܕܗܳܐ ܚܙܺܝܬ ܠܰܚܢܳܢܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܶܟܝ ܕܟܺܝܬܳܐ ܙܰܗܝܰܬ

ܟܰܕ ܩܰܒܠܶܗ ܗ̱ܘܳܐ ܥܰܠ ܕܪ̈ܳܥܰܘܗ̱ܝ܆ ܫܶܡܥܽܘܢ ܣܳܒܳܐ ܠܰܡܫܺܝܚܳܐ܆ ܫܰܪܺܝ ܡܦܺܝܣ ܠܶܗ ܟܰܕ ܐܳܡܰܪ܆ ܕܗܳܐ ܚܙܰܝ̈ ܥܰܝܢܰܝ̈ ܠܰܚܢܳܢܳܟ܆ ܫܪܺܝܢܝ ܡܳܪܝ ܐܶܬܬܢܺܝܚ ܒܰܫܠܳܡܳܐ܆ ܡܫܺܝܚܳܐ ܕܶܐܬܳܐ ܠܦܽܘܪܩܳܢܰܢ܀

ܒܪܶܗ ܕܰܐܒܳܐ ܒܪܳܗ̇ ܕܰܒܬܽܘܠܬܳܐ܆ ܐܰܠܳܗܳܐ ܕܰܗܘܳܐ ܫܰܒܪܳܐ܆ ܡܰܘܕܶܐ ܐ̱ܢܳܐ ܐܳܡܰܪ ܫܶܡܥܽܘܢ܆ ܫܪܺܝܢܝ ܡܳܪܰܢ ܐܰܝܟ ܕܶܐܫܬܰܘܕܺܝܬ܆ ܐܺܙܰܠ ܐܶܣܰܒܰܪ ܒܰܫܝܽܘܠ܆ ܕܳܐܬܶܐ ܒܳܬܰܪܝ ܡܢܰܚܡܳܢܟܽܘܢ܀

ܫܶܡܥܽܘܢ ܟܰܕ ܐܶܣܬܰܟܰܠ ܗ̱ܘܳܐ܆ ܘܶܐܬܒܰܝܰܢ ܒܪܽܘܚܳܐ ܕܩܽܘܕܫܳܐ܆ ܕܗܰܘ ܕܰܛܥܺܝܢ ܡܰܠܟܳܐ ܘܡܳܪܳܐ܆ ܕܚܰܝ̈ܶܐ ܘܰܕܡܺܝ̈ܬܶܐ ܐܺܝܬܰܘܗ̱ܝ܆ ܐܰܙܥܶܩ ܠܘܳܬܶܗ ܟܰܕ ܐܳܡܰܪ܆ ܕܰܫܪܺܝܢܝ ܡܶܟܺܝܠ ܡܶܢ ܚܰܝ̈ܶܐ܀

ܫܽܘܒܚܳܐ

ܗܰܘ ܕܥܰܠ ܚܰܨܳܐ ܕܰܟܪ̈ܽܘܒܶܐ܆ ܡܶܙܕܰܝܰܚ ܒܰܐܬܪܶܗ ܪܳܡܳܐ܆ ܒܓܰܘ ܗܰܝܟܰܠ ܩܽܘܕܫܳܐ ܛܰܥܢܶܗ܆ ܫܶܡܥܽܘܢ ܣܳܒܳܐ ܥܰܠ ܕܪ̈ܳܥܰܘܗ̱ܝ܆ ܫܪܺܝܢܝ ܠܰܡ ܡܶܟܺܝܠ ܒܰܫܠܳܡܳܐ܆ ܕܗܳܐ ܚܙܰܝ̈ ܥܰܝ̈ܢܰܝ ܠܰܚܢܳܢܳܟ܀

ܥܶܢܝܳܢܳܐ: ܐܰܡܺܝܢ ܡܳܐ ܛܳܒ ܘܡܳܐ ܫܰܦܺܝܪ

ܛܶܟܣܳܐ ܕܬܶܫ̈ܡܶܫܳܬܳܐ: ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ

ܬܽܘܒ: ܬܶܫܡܶܫܬܳܐ ܕܚܰܕ ܩܢܽܘܡܳܐ ܕܩܰܕܺܝ̈ܫܶܐ

ܬܽܘܒ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܓܰܘܳܢܳܝܬܳܐ ܕܡܳܪܝ ܐܰܦܪܶܝܡ

ܡܳܪܰܢ ܐܶܬܪܰܚܰܡܥܠܰܝܢ: ܒܰܨܠܽܘܬ ܐܶܡܳܟ ܘܩܰܕܺܝ̈ܫܰܝܟ܀

ܒܰܨܠܽܘܬ ܐܶܡܳܟ ܘܩܰܕܺܝ̈ܫܰܝܟ: ܚܰܤܳܐ ܠܰܢ ܘܰܠܥܰܢܺܝ̈ܕܰܝܢ܀

ܡܰܠܰܐܟܳܐ ܕܰܐܝܬܺܝ ܫܠܳܡܳܐ: ܘܤܰܒܪܳܗ̇ ܠܰܒܬܽܘܠܬܳܐ ܡܰܪܝܰܡ. ܗܽܘ ܢܺܐܬܶܐ ܘܰܢܤܰܒܰܪ ܠܰܢ: ܕܶܐܬܪܰܥܺܝ ܠܰܢ ܐܰܠܳܗܳܐ܀

ܡܰܠܰܐܟܳܐ ܕܚܰܝܶܠ ܠܤܳܗ̈ܕܶܐ: ܘܰܢܚܶܬܘ ܩܳܡܘ ܒܶܗ ܒܰܐܓܽܘܢܳܐ. ܗܽܘ ܢܺܐܬܶܐ ܘܰܢܚܰܝܶܠ ܠܰܢ: ܕܢܶܙܟܶܐ ܠܒܺܝܫܳܐ ܘܰܠܚܰܝܠܶܗ܀

ܡܰܠܰܐܟܳܐ ܕܪܰܣ ܗ̱ܘܳܐ ܛܰܠܳܐ: ܠܰܛܠܳܝ̈ܶܐ ܕܒܶܝܬ ܚܰܢܰܢܝܳܐ. ܗܽܘ ܢܶܪܽܘܣ ܛܰܠܳܐ ܕܪ̈ܰܚܡܶܐ: ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ܀

ܡܰܠܰܐܟܳܐ ܢܰܤܶܩ ܫܽܘܒܚܰܢ: ܠܰܬܠܺܝܬܳܝܽܘܬܳܐ ܤܓܺܝܕܬܳܐ. ܒܕܽܘܟܪܳܢ ܝܳܠܕܰܬ ܐܰܠܳܗܳܐ: ܘܰܕܩܰܕܺܝ̈ܫܶܐ ܘܥܰܢܺܝ̈ܕܶܐ܀

ܡܳܪܰܢ ܐܶܬܪܰܚܰܡܥܠܰܝܢ: ܒܰܨܠܽܘܬ ܐܶܡܳܟ ܘܩܰܕܺܝ̈ܫܰܝܟ܀

ܒܰܨܠܽܘܬ ܐܶܡܳܟ ܘܩܰܕܺܝ̈ܫܰܝܟ: ܚܰܤܳܐ ܠܰܢ ܘܰܠܥܰܢܺܝ̈ܕܰܝܢ܀

ܬܶܫܒܽܘܚܬܳܐ ܕܡܰܠܰܐܟ̈ܶܐ

ܟܳܗܢܳܐ: ܐܰܟܡܳܐ ܕܰܡܫܰܒܚܺܝܢ ܡܰܠܰܐܟ̈ܶܐ ܘܟܶܢ̈ܫܶܐ ܕܪ̈ܰܒܰܝ ܡܰܠܰܐܟ̈ܶܐ ܕܒܰܫܡܰܝܳܐ: ܘܰܚܢܰܢ ܡܚܺܝ̈ܠܶܐ ܘܚܰܛܳܝ̈ܶܐ܆ ܡܳܟ̈ܶܐ ܘܥܰܦܪ̈ܳܢܶܐ ܐܰܟܘܳܬܗܽܘܢ ܡܫܰܒܚܺܝܢܰܢ ܟܰܕ ܐܳܡܪܺܝܢܰܢ ܒܟܽܠܙܒܰܢ ܘܰܒܟܽܠܥܶܕܳܢ:

ܥܰܡܳܐ: ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܫܰܝܢܳܐ ܘܤܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ܀

ܡܫܰܒܚܺܝܢܰܢ ܠܳܟ܆ ܡܒܰܪܟܺܝܢܰܢ ܠܳܟ܆ ܤܳܓܕܺܝܢܰܢ ܠܳܟ܆ ܡܡܰܠܠܽܘܬ ܫܽܘܒܚܳܐ ܡܰܤܩܺܝܢܰܢ ܠܳܟ܀

ܡܰܘܕܶܝܢܰܢ ܠܳܟ܆ ܡܶܛܽܠ ܪܰܒܽܘܬܳܐ ܕܫܽܘܒܚܳܐ ܕܺܝܠܳܟ܆ ܡܳܪܝܳܐ ܥܳܒܽܘܕܳܐ܆ ܡܰܠܟܳܐ ܫܡܰܝܳܢܳܐ܆ ܐܰܠܳܗܳܐ ܐܰܒܳܐ ܐܰܚܺܝܕ ܟܽܠ܀

ܡܳܪܝܳܐ ܐܰܠܳܗܳܐ܆ ܒܪܳܐ ܝܺܚܺܝܕܳܝܳܐ܆ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀

ܡܳܪܝܳܐ ܐܰܠܳܗܳܐ܆ ܐܶܡܪܶܗ ܕܰܐܠܳܗܳܐ܆ ܒܪܳܐ ܘܡܶܠܬܶܗ ܕܰܐܒܳܐ܆ ܗܰܘ ܕܫܳܩܶܠ ܐܰܘܟܺܝܬ ܫܩܰܠ ܚܛܺܝܬܶܗ ܕܥܳܠܡܳܐ ܐܶܬܪܰܚܰܡܥܠܰܝܢ܀

ܗܰܘ ܕܫܳܩܶܠ ܐܰܘܟܺܝܬ ܫܩܰܠ ܚܛܺܝܬܶܗ ܕܥܳܠܡܳܐ ܨܠܺܝ ܠܰܢ ܐܶܕܢܳܟ ܘܩܰܒܶܠ ܒܳܥܽܘܬܰܢ܆ ܗܰܘ ܕܝܳܬܶܒ ܒܫܽܘܒܚܳܐ ܡܶܢ ܝܰܡܺܝܢܳܐ ܕܰܐܒܽܘܗ̱ܝ ܚܽܘܤ ܘܶܐܬܪܰܚܰܡܥܠܰܝܢ܀

ܡܶܛܽܠ ܕܰܐܢ̱ܬ ܗ̱ܽܘ ܠܚܽܘܕܰܝܟ܆ ܩܰܕܺܝܫܰܬ ܗ̱ܽܘ ܠܚܽܘܕܰܝܟ܆ ܡܳܪܝܳܐ ܝܶܫܽܘܥ ܡܫܺܝܚܳܐ ܘܥܰܡ ܪܽܘܚܳܟ ܩܰܕܺܝܫܳܐ܀

ܫܽܘܒܚܶܗ ܕܰܐܠܳܗܳܐ ܐܰܒܳܐ ܐܰܡܺܝܢ ܒܟܽܠܙܒܰܢ ܘܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܐܶܒܰܪܟܳܟ ܐܳܦ ܐܶܫܰܒܰܚ ܠܰܫܡܳܟ ܩܰܕܺܝܫܳܐ܆ ܡܒܰܪܟܳܐ ܠܥܳܠܰܡ ܗܰܘ ܕܺܐܝܬܰܘܗ̱ܝ ܡܩܰܘܶܐ ܠܥܳܠܰܡ ܥܳܠܡܺܝܢ܀

ܡܒܰܪܰܟ ܐܰܢ̱ܬ ܡܳܪܝܳܐ ܐܰܚܺܝܕ ܟܽܠ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ܆ ܘܰܡܫܰܒܰܚ ܫܡܳܟ ܘܰܡܗܰܕܰܪ ܒܬܶܫܒ̈ܚܳܬܳܟ ܠܥܳܠܰܡ ܥܳܠܡܺܝܢ܀

ܠܳܟ ܝܳܐܶܐ ܫܽܘܒܚܳܐ܆ ܠܳܟ ܦܰܐܝܳܐ ܬܶܫܒܽܘܚܬܳܐ܆ ܘܠܳܟ ܦܶܐܐ ܩܽܘܠܳܤܳܐ܆ ܐܰܠܳܗܳܐ ܕܟܽܠ ܐܰܒܳܐ ܕܰܫܪܳܪܳܐ ܥܰܡ ܒܪܳܐ ܝܺܚܺܝܕܳܝܳܐ ܐܳܦ ܠܪܽܘܚܳܐ ܚܰܝܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܳܪܰܢ ܝܶܫܽܘܥ ܡܫܺܝܚܳܐ

ܡܳܪܰܢ ܝܶܫܽܘܥ ܡܫܺܝܚܳܐ: ܬܰܪܥܳܐ ܕܪܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܆ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬܪܰܚܰܡܥܠܰܝܢ܀

ܚܽܘܒܳܟ ܐܰܚܬܳܟ ܡܶܢ ܐܰܬܪܳܟ ܨܶܐܕܰܝܢ ܡܳܪܝ܆ ܕܰܒܝܰܕ ܡܰܘܬܳܟ ܐܶܬܒܰܛܠܰܬ ܡܺܝܬܽܘܬܰܢ ܐܶܬܪܰܚܰܡܥܠܰܝܢ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܶܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀