ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܛܰܥܢܶܗ ܫܶܡܥܽܘܢ ܠܰܒܪܳܐ܆ ܥܰܠ ܕܪ̈ܳܥܰܘܗ̱ܝ ܟܰܕ ܡܶܬܟܰܫܰܦ܆ ܕܗܳܐ ܚܙܰܝ̈ ܥܰܝ̈ܢܰܝ܆ ܠܰܚܢܳܢܳܟ ܝܰܠܕܳܐ ܦܰܐܝܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܰܡܩܰܒܶܠ ܕܶܒ̈ܚܶܐ܆ ܘܩܽܘܪ̈ܒܳܢܶܐ ܥܰܡ ܝܳܠܽܘܕܶܗ܆ ܝܰܘܡܳܢ ܐܶܬܳܐ. ܕܰܢܩܰܪܶܒ ܐܰܝܟ ܢܳܡܽܘܣܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܰܠܫܶܡܥܽܘܢ ܣܳܒܳܐ܆ ܕܰܒܗܰܝܟܰܠ ܩܽܘܕܫܳܐ ܛܰܥܢܳܟ܆ ܐܶܬܟܰܫܰܦ ܠܳܟ܆ ܚܰܢܬܳܝܗ̱ܝ ܐܰܝܟ ܪܳܚܶܡܢܳܫܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܚܙܳܝܗ̱ܝ ܫܶܡܥܽܘܢ ܠܰܡܫܺܝܚܳܐ܆ ܕܰܛܥܺܝܢ ܙܰܘܓܳܐ ܕܫܽܘ̈ܦܢܺܝܢܶܐ܆ ܘܰܐܝܟ ܝܰܠܽܘܕܳܐ܆ ܥܰܠ ܕܰܢܩܰܪܶܒ ܩܽܘܪ̈ܒܳܢܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܫܪܺܝܢܝ ܒܰܫܠܳܡܳܐ ܩܥܳܐ ܗ̱ܘܳܐ܆ ܫܶܡܥܽܘܢ ܣܳܒܳܐ ܠܰܡܫܺܝܚܳܐ܆ ܗܳܫܳܐ ܐܶܬܬܢܺܝܚ܆ ܥܰܠ ܐܰܪܥܳܐ ܕܰܚܙܺܝܬܳܟ ܡܳܪܝ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܝܰܘܡܳܢܳܐ ܩܰܒܶܠ ܗ̱ܘܳܐ܆ ܟܳܗܢܳܐ ܕܶܒܚܳܐ ܡܶܢ ܡܳܪܶܗ܆ ܘܥܰܠ ܕܰܢܩܰܪܶܒ܆ ܚܠܳܦ ܡܳܪܳܐ ܕܟܽܠ ܒܶܪ̈ܝܳܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܰܡܩܰܒܶܠ ܕܶܒ̈ܚܶܐ܆ ܘܩܽܘܪ̈ܒܳܢܶܐ ܕܰܒܢܳܡܽܘܣܳܐ܆ ܒܺܐܝ̈ܕܰܝ ܫܶܡܥܽܘܢ܆ ܙܰܘܓܳܐ ܕܫܽܘ̈ܦܢܺܝܢܶܐ ܩܰܪܶܒ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗܕܳܢܳܐ

ܡܫܺܝܚܳܐ ܐܰܠܳܗܳܐ ܕܰܐܝܟ ܢܳܡܽܘܣܳܐ܆ ܠܗܰܝܟܠܳܐ ܣܠܶܩ ܠܰܡܫܰܡܳܫܽܘ܆ ܘܶܐܬܛܥܶܢ ܥܰܠ ܐܺܝ̈ܕܰܝ ܫܶܡܥܽܘܢ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܐܰܠܳܗܳܐ ܕܰܨܒܳܐ ܘܰܗܘܳܐ ܥܽܘܠܳܐ܆ ܘܰܠܗܰܝܟܠܳܐ ܣܠܶܩ ܕܢܶܬܒܰܪܰܟ܆ ܐܰܝܟ ܕܰܐܟܪܙܽܘܗ̱ܝ ܢܒܺܝ̈ܶܐ ܕܰܐܒܽܘܗ̱ܝ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܗܰܘ ܕܰܠܫܶܡܥܽܘܢ܆ ܣܳܒܳܐ ܝܰܩܺܝܪܳܐ ܐܶܣܰܪܬ܆ ܥܕܰܡܳܐ ܕܢܶܚܙܶܐ ܡܰܘܠܳܕܳܟ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܰܐܝܟ ܢܳܡܽܘܣܳܐ ܕܰܐܪܒܥܺܝܢ ܝܰܘ̈ܡܺܝܢ܆ ܕܒܳܬܰܪ ܡܰܘܠܳܕܳܐ ܥܰܠ ܗ̱ܘܳܐ܆ ܠܗܰܝܟܠܳܐ ܒܢܶܕܪ̈ܶܐ ܘܩܽܘܪ̈ܒܳܢܶܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܰܠܥܶܠܽ ܗ̱ܘ ܒܪ̈ܰܘܡܶܐ ܥܶܠܳܝ̈ܶܐ܆ ܫܶܡܥܽܘܢ ܣܳܒܳܐ ܡܦܺܝܣ ܗ̱ܘܳܐ ܠܶܗ܆ ܕܰܫܪܺܝܢܝ ܡܳܪܝ ܨܶܝܕ ܫܽܘܠܳܡܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܰܠܫܶܡܥܽܘܢ ܣܳܒܳܐ ܐܰܣܺܝܪܳܐ܆ ܕܰܡܣܰܟܶܐ ܗ̱ܘܳܐ ܠܰܚܙܳܬܳܟ܆ ܫܰܟܶܢܬ ܠܶܗ ܐܰܝܟ ܫܶܐܠܶܬܶܗ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܩܝܳܡܬܳܐ ܕܶܢܚܰܬ ܒܰܒܪܺܝܬܳܐ

ܒܗܳܢܳܐ ܝܰܘܡܳܐ ܛܰܥܢܶܗ ܗ̱ܘܳܐ܆ ܫܶܡܥܽܘܢ ܣܳܒܳܐ ܠܦܳܪܽܘܩܰܢ܆ ܘܶܐܬܟܰܫܰܦ ܠܶܗ ܒܰܚܢܰܓܬܳܐ܆ ܕܰܫܪܺܝܢܝ ܡܶܟܺܝܠ ܒܰܚܢܳܢܳܟ܆ ܘܶܐܚܽܘܬ ܐܰܟܪܶܙ ܠܥܰܢܺܝ̈ܕܶܐ܆ ܕܰܢܣܰܟܽܘܢ ܠܳܟ ܒܓܰܘ ܩܰܒܪ̈ܶܐ܀

ܚܙܳܝܗ̱ܝ ܫܶܡܥܽܘܢ ܠܓܽܘܪܝܳܐ ܕܰܐܪܝܳܐ܆ ܕܰܛܥܺܝܢܳܐ ܠܶܗ ܒܰܪ̱ܬ ܕܰܘܺܝܕ܆ ܘܺܐܝܬ ܥܰܡܶܗ ܬܪܶܝܢ ܫܽܘ̈ܦܢܺܝܢܶܐ܆ ܕܰܢܩܰܪܶܒ ܐܰܝܟ ܢܳܡܽܘܣܳܐ܆ ܘܶܐܡܰܪ ܠܶܗ ܫܽܘܒܚܳܐ ܠܪ̈ܰܚܡܰܝܟ܆ ܕܡܶܛܽܠܳܬܰܢ ܐܶܬܬܰܚܬܺܝܬ܀

ܥܰܠ ܕܪ̈ܳܥܰܘܗ̱ܝ ܛܰܥܢܶܗ ܫܶܡܥܽܘܢ܆ ܠܒܰܪ ܐܰܠܳܗܳܐ ܕܶܐܬܓܰܫܰܡ܆ ܘܫܰܪܺܝ ܡܦܺܝܣ ܠܶܗ ܕܰܫܪܺܝܢܝ ܡܳܪܝ܆ ܕܗܳܐ ܚܙܰܝ̈ ܥܰܝܢܰܝ̈ ܠܰܚܢܳܢܳܟ܆ ܢܽܘܗܪܳܐ ܠܓܶܠܝܳܢܳܐ ܕܥܰܡ̱̈ܡܶܐ܆ ܘܫܽܘܒܚܳܐ ܕܥܰܡܳܟ ܝܺܣܪܳܐܶܝܠ܀

ܟܪܽܘܒܳܐ ܕܒܶܣܪܳܐ ܗܘܳܐ ܫܶܡܥܽܘܢ܆ ܘܰܣܪܳܦܳܐ ܗܘܳܐ ܒܕܽܘܒܳܪ̈ܰܘܗ̱ܝ܆ ܘܒܰܕܪ̈ܳܥܰܘܗ̱ܝ ܐܰܝܟ ܕܰܒ̈ܓܶܦܶܐ܆ ܠܡܳܪܶܐ ܟܪ̈ܽܘܒܶܐ ܡܙܰܝܰܚ ܗ̱ܘܳܐ܆ ܫܪܺܝ ܠܥܰܒܕܳܟ ܡܳܪܝ ܐܶܡܰܪ ܠܶܗ܆ ܕܰܡܦܳܣ ܗ̱ܘܳܐ ܒܶܗ ܕܰܐܠܳܗܰܐ ܗ̱ܘ܀

ܪܽܘܚܳܐ ܩܪܳܐ ܠܶܗ ܠܥܰܬܺܝܩܳܐ܆ ܕܩܽܘܡ ܩܰܒܶܠ ܢܽܘܗܪܳܐ ܦܰܐܝܳܐ܆ ܕܗܽܘܝܽܘ ܫܳܪܶܐ ܣܰܝܒܽܘܬܳܟ܆ ܘܰܡܢܺܝܚ ܠܳܟ ܒܝܰܕ ܥܽܘܢܕܳܢܳܐ܆ ܕܗܽܘܝܽܘ ܕܰܐܣܪܳܟ ܩܕܳܡ ܕܳܪ̈ܶܐ܆ ܒܚܽܘܛܳܐ ܕܚܰܝ̈ܶܐ ܐܰܝܟ ܕܰܨܒܳܐ܀

ܩܢܰܘ ܒܳܟ ܟܽܘܡܪ̈ܶܐ ܚܽܘܣܳܝܳܐ܆ ܘܩܽܘܕܫܳܐ ܐܰܘܫܶܛܬ ܠܰܡ̈ܟܰܬܡܶܐ܆ ܐܰܥܒܰܪܬ ܕܶܒ̈ܚܶܐ ܕܒܶܝܬ ܠܶܘܺܝ܆ ܕܰܗܘܰܝܬ ܚܠܳܦܰܝܢ ܩܽܘܪܒܳܢܳܐ܆ ܘܰܐܢ̱ܬ ܠܳܟ ܩܰܪܶܒܬ ܠܝܳܠܽܘܕܳܟ܆ ܕܢܶܬܪܰܥܶܐ ܠܰܪܓܺܝܙܽܘܬܰܢ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܩܳܠܳܐ ܕܫܽܘܒܚܳܐ

ܡܩܰܒܶܠ ܕܶܒ̈ܚܶܐ. ܐܳܦ ܩܽܘܪ̈ܒܳܢܶܐ ܥܰܡ ܝܳܠܽܘܕܶܗ܆ ܝܰܘܡܳܢ ܩܰܪܶܒܬܶܗ ܡܰܪܝܰܡ܆ ܒܗܰܝܟܰܠ ܩܽܘܕܫܳܐ܆ ܥܰܡ ܩܽܘܪ̈ܒܳܢܶܐ ܐܰܝܟ ܢܳܡܽܘܣܳܐ܆ ܕܺܐܝܬ ܗ̱ܘܳܐ ܠܥܰܡܳܐ ܕܺܝܣܪܳܐܶܝܠ܀

ܒܗܰܝܟܰܠ ܩܽܘܕܫܳܐ. ܫܶܡܥܽܘܢ ܠܰܒܪܳܐ ܡܶܬܟܰܫܰܦ ܗ̱ܘܳܐ܆ ܘܰܡܦܺܝܣ ܗ̱ܘܳܐ ܠܶܗ ܟܰܕ ܐܳܡܰܪ܆ ܕܗܳܐ ܚܙܰܝ̈ ܥܰܝܢܰܝ̈. ܚܢܳܢܳܟ ܪܰܒܳܐ ܒܳܥܶܐ ܐ̱ܢܳܐ ܡܳܪܝ܆ ܚܽܘܢ ܣܰܝܒܽܘܬܝ ܘܪܰܚܶܡ ܥܠܰܝ܀

ܬܳܐ ܒܰܫܠܳܡܳܐ. ܐܶܡܪܳܐ ܚܰܝܳܐ ܕܰܐܠܳܗܽܘܬܳܐ܆ ܬܳܐ ܒܰܫܠܳܡ ܢܽܘܗܪܳܐ ܕܥܰܡ̱̈ܡܶܐ܆ ܕܠܳܟ ܚܳܐܰܪ ܗ̱ܘܺܝܬ܆ ܢܽܘܓܪܳܐ ܪܰܒܳܐ ܘܗܳܐ ܚܙܰܝ̈ ܥܰܝܢܰܝ̈܆ ܠܰܚܢܳܢܳܟ ܫܪܺܝܢܝ ܒܰܫܠܳܡܳܐ܀

ܗܳܐ ܫܶܠܡܰܬ ܠܳܗ̇. ܬܰܢܘܰܝ ܕܰܗܘܳܬ ܐ̱ܪܳܙܳܢܳܐܺܝܬ܆ ܦܩܽܘܕ ܠܶܗ ܠܡܰܘܬܳܐ ܡܢܺܝܚ ܣܰܝܒܽܘܬܝ. ܕܰܐܘܒܶܠ ܣܒܰܪܬܳܐ ܕܡܰܠܝܳܐ ܚܰܝ̈ܶܐ ܠܳܐܕܳܡ ܕܰܥܓܺܝܢ܆ ܥܰܠ ܥܰܦܪܳܐ ܒܰܦܣܳܩ ܣܰܒܪܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܝܰܘܡܳܢܳܐ

ܠܳܟ ܛܽܘܒܰܝܟ: ܐܳܘ ܫܶܡܥܽܘܢ ܕܥܰܠ ܕܪ̈ܳܥܰܝܟ ܛܥܶܢܬܳܝܗ̱ܝ ܠܰܡܫܺܝܚܳܐ: ܘܰܒܬܰܟܫܶܦܬܳܐ ܘܰܒܒܳܥܽܘܬܳܐ ܠܶܗ ܐܳܡܰܪ ܗ̱ܘܰܝܬ: ܕܗܳܐ ܚܙܰܝ̈ ܥܰܝܢܰܝ̈ ܠܰܚܢܳܢܳܟ: ܫܪܺܝܢܝ ܡܳܪܝ ܒܰܫܠܳܡܳܐ܀

ܝܰܘܡܳܢܳܐ ܫܩܰܠ ܗ̱ܘܳܐ ܣܳܒܳܐ ܫܽܘܘܕܳܝܳܐ: ܕܝܰܗܒ ܪܽܘܚܳܐ ܠܫܶܡܥܽܘܢ ܕܠܳܐ ܠܰܡ ܬܡܽܘܬ: ܥܕܰܡܳܐ ܕܬܶܚܙܺܝܘܗ̱ܝ ܠܒܰܪܳܐ ܒܽܘܟܪܳܐ: ܕܶܐܬܳܐ ܒܰܒܣܰܪ ܠܦܽܘܪܩܳܢܳܐ ܕܟܽܠܗܶܝܢ ܒܶܪ̈ܝܳܬܳܐ܀

ܢܰܘܕܶܐ ܟܽܠܰܢ: ܠܰܡܫܺܝܚܳܐ ܗܰܘ ܕܶܐܬܳܐ ܡܶܛܽܠ ܦܽܘܪܩܳܢܰܢ: ܘܰܐܝܟ ܝܰܠܽܘܕܳܐ ܛܰܥܢܶܗ ܫܶܡܥܽܘܢ ܒܗܰܝܟܰܠ ܩܽܘܕܫܳܐ: ܘܝܰܗ̱ܒ ܠܶܗ ܢܝܳܚܳܐ ܒܥܽܘܢܕܳܢܳܐ: ܐܰܟܡܳܐ ܕܶܐܫܬܰܘܕܺܝ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܓܰܘ ܥܺܕܰܬ ܩܽܘܕܫܳܐ

ܗܰܘ ܕܝܰܗ̱ܒ ܢܳܡܽܘܣܳܐ ܠܡܽܘܫܶܐ܆ ܘܟܳܗܢܽܘܬܳܐ ܠܰܐܗܪܽܘܢ ܐܰܚܽܘܗ̱ܝ܆ ܝܰܘܡܳܢ ܠܟܳܗܢܳܐ ܐܶܬܩܰܪܰܒ܆ ܥܰܡ ܩܽܘܪ̈ܒܳܢܶܐ ܕܢܳܡܽܘܣܳܐ܀

ܪܽܘܚܳܐ ܓܠܳܐ ܠܫܶܡܥܽܘܢ ܣܳܒܳܐ܆ ܕܰܠܪܰܒ ܟܳܗ̈ܢܶܐ ܡܙܰܝܰܚ ܐܰܢ̱ܬ܆ ܒܥܺܝ ܠܳܟ ܡܶܢܶܗ ܫܽܘܒܩܳܢܳܐ܆ ܕܰܒܚܰܝ̈ܶܐ ܘܡܰܘܬܳܐ ܫܰܠܺܝܛ܀

ܫܳܪܶܐ ܠܰܐܪܥܳܐ ܘܠܰܫܡܰܝܳܐ܆ ܫܪܺܝ ܡܳܪܝ ܣܰܝܒܽܘܬܝ ܒܰܫܠܳܡܳܐ܆ ܕܢܽܘܓܪܳܐ ܠܺܝ ܕܰܡܣܰܟܶܐ ܐ̱ܢܳܐ܆ ܕܶܐܚܙܶܐ ܚܢܳܢܳܟ ܡܳܐ ܕܳܐܬܶܝܬ܀

ܛܽܘܒܰܝܟ ܫܶܡܥܽܘܢ ܕܶܐܬܥܰܠܺܝܬ܆ ܕܬܶܛܥܰܢ ܠܰܒܪܳܐ ܕܰܐܠܳܗܳܐ܆ ܗܰܘ ܕܰܒܪܺܝܫܺܝܬ ܐܺܝܬܰܘܗ̱ܝ ܗ̱ܘܳܐ܆ ܥܰܡ ܐܰܒܽܘܗ̱ܝ ܕܠܳܐ ܫܽܘܪܳܝܳܐ܀

ܫܰܩܠܶܗ ܫܶܡܥܽܘܢ ܥܰܠ ܕܪ̈ܳܥܰܘܗ̱ܝ܆ ܘܰܡܙܰܝܰܚ ܠܶܗ ܒܒܶܝܬ ܩܽܘܕܫܳܐ܆ ܘܫܰܪܺܝ ܡܦܺܝܣ ܠܶܗ ܒܰܚܢܰܓܬܳܐ܆ ܐܰܝܟ ܕܰܠܡܳܪܳܐ ܕܒܶܪ̈ܝܳܬܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܦܰܐܝܳܐ ܠܳܗ̇ ܠܡܰܪܝܰܡ܆ ܟܰܕ ܛܥܺܝܢܳܐ ܠܶܗ ܠܒܰܪ ܐܰܠܳܗܳܐ܆ ܘܳܐܡܪܳܐ ܠܶܗ ܠܫܶܡܥܽܘܢ ܣܳܒܳܐ ܕܩܰܒܶܠ ܩܽܘܪܒܳܢܝ܆ ܟܳܗܢܳܐ ܒܪܺܝܟܳܐ܆ ܡܶܛܽܠ ܕܒܶܪܝ ܨܒܳܐ ܕܰܢܩܰܪܶܒ܀

ܫܽܘܒܚܳܐ

ܒܳܥܽܘܬܳܐ ܡܩܰܪܶܒ ܗ̱ܘܳܐ܆ ܫܶܡܥܽܘܢ ܠܰܒܪܳܐ ܒܗܰܝܟܰܠ ܩܽܘܕܫܳܐ܆ ܕܠܳܐ ܙܰܘܥܳܐ ܕܰܦܠܺܝܓܽܘܬܳܐ ܟܰܕ ܚܳܐܰܪ ܒܶܗ܆ ܒܪܰܘܡܳܐ ܕܰܠܥܶܠ܆ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܛܥܶܢܬܶܗ ܡܰܪܝܰܡ܆ ܘܰܠܒܶܝܬ ܩܽܘܕܫܳܐ ܐܰܣܶܩܬܶܗ܆ ܘܶܐܡܰܪ ܠܶܗ ܫܶܡܥܽܘܢ ܣܳܒܳܐ ܕܰܫܪܺܝܢܝ ܡܳܪܝ ܐܶܬܬܢܺܝܚ܆ ܐܶܬܕܰܟܪܰܝܢ ܡܳܪܝܳܐ܀

ܗܰܘ ܕܰܠܫܶܡܥܽܘܢ܆ ܐܶܫܬܰܘܕܺܝܬ ܕܢܶܚܙܶܟ ܒܰܒܣܰܪ܆ ܚܰܝܠܳܐ ܘܥܽܘܫܢܳܐ ܐܰܩܢܺܝܬܳܝܗ̱ܝ܆ ܘܰܚܙܳܟ ܘܶܐܬܒܰܝܰܐ܆ ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܫܽܘܒܚܳܐ ܠܳܟ ܡܳܪܝ܆ ܕܶܐܬܬܰܚܬܺܝܬ ܘܰܠܒܶܫܬ ܦܰܓܪܳܐ܆ ܘܥܰܠ ܕܪ̈ܳܥܰܘܗ̱ܝ ܕܫܶܡܥܽܘܢ ܐܶܙܕܰܝܰܚܬ܆ ܕܰܨܒܰܝܬ ܕܬܶܦܪܽܘܩ ܠܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܳܐ ܕܰܒܚܽܘܒܶܗ

ܠܗܰܝܟܰܠ ܩܽܘܕܫܳܐ: ܥܰܠ ܗ̱ܘܳܐ ܡܫܺܝܚܳܐ ܕܰܢܩܰܪܶܒ: ܩܽܘܪ̈ܒܳܢܶܐ ܐܰܝܟ ܢܳܡܽܘܣܳܐ ܕܺܝܣܰܪ̈ܠܳܝܶܐ: ܘܥܰܡܶܗ ܙܰܘܓܳܐ ܕܫܽܘܦܢܺܝ̈ܢܶܐ: ܐܰܘ ܬܪܶܝܢ ܦܰܪ̈ܽܘܓܶܐ ܕܝܰܘ̈ܢܶܐ: ܘܛܰܥܢܶܗ ܫܶܡܥܽܘܢ ܘܰܡܦܺܝܣ ܠܶܗ ܕܰܫܪܺܝ ܠܥܰܒܕܳܟ ܒܰܫܠܳܡܳܐ܀

ܒܪܳܐ ܕܰܒܝܰܠܕܶܗ: ܚܰܠܛܰܢ ܒܟܶܢ̈ܫܶܐ ܥܶܠܳܝ̈ܶܐ: ܘܰܚܕܳܐ ܓܽܘܕܳܐ ܕܡܰܠܰܐܟ̈ܶܐ ܘܕܰܒܢܰܝ̈ܢܳܫܳܐ ܥܒܰܕ: ܘܰܩܥܰܘ ܟܽܠܗܽܘܢ ܫܰܘܝܳܐܺܝܬ ܫܽܘܒܚܳܐ ܠܝܰܠܕܳܐ ܕܡܶܢ ܡܰܪܝܰܡ: ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ ܪܳܚܶܡ ܐ̱ܢܳܫ̈ܳܐ܀

ܚܰܢܰܐ ܟܢܺܝܟܬܳܐ: ܡܰܠܠܰܬ ܥܰܠ ܒܪܳܐ ܕܰܐܠܳܗܳܐ: ܕܰܚܙܳܬܶܗ ܒܰܕܡܽܘܬ ܫܰܒܪܳܐ ܒܗܰܝܟܰܠ ܩܽܘܕܫܳܐ: ܘܰܬܗܰܪܘ ܟܶܢ̈ܫܶܐ ܟܰܕ ܚܳܙܶܝܢ ܠܚܰܢܰܐ ܘܫܶܡܥܽܘܢ ܕܰܡܫܰܒܚܺܝܢ: ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ ܪܳܚܶܡ ܐ̱ܢܳܫ̈ܳܐ܀

ܫܽܘܒܚܳܐ

ܠܰܐܪܒܥܺܝܢ ܝܰܘܡܺܝ̈ܢ: ܣܠܶܩ ܕܰܢܩܰܪܶܒ ܩܽܘܪ̈ܒܳܢܶܐ: ܫܽܘܦܢܺܝ̈ܢܶܐ ܘܰܒܢܰܝ̈ ܝܰܘ̈ܢܶܐ ܗܰܘ ܕܰܒܪܳܐ ܥܳܠ̈ܡܶܐ: ܘܛܰܥܢܶܗ ܫܶܡܥܽܘܢ ܥܰܠ ܕܪ̈ܳܥܰܘܗ̱ܝ: ܘܰܬܒܰܥ ܡܶܢܶܗ ܫܽܘܒܩܳܢܳܐ: ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ ܪܳܚܶܡ ܐ̱ܢܳܫ̈ܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܒܗܰܝܟܰܠ ܩܽܘܕܫܳܐ ܛܰܥܢܶܗ ܗ̱ܘܳܐ܆ ܫܶܡܥܽܘܢ ܣܳܒܳܐ ܠܰܡܫܺܝܚܳܐ܆ ܘܶܐܡܰܪ ܠܶܗ ܕܰܫܪܺܝܢܝ ܡܶܢ ܚܰܝ̈ܶܐ܆ ܡܪܰܚܡܳܢܳܐ ܫܳܒܶܩ ܚܰܘ̈ܒܶܐ܆ ܫܳܪܶܐ ܠܰܐܪܥܳܐ ܘܠܰܫܡܰܝܳܐ܆ ܫܪܺܝ ܠܥܰܒܕܳܟ ܡܳܪܝ ܒܰܫܠܳܡܳܐ܆ ܕܢܽܘܓܪܳܐ ܠܺܝ ܕܰܡܣܰܟܶܐ ܐ̱ܢܳܐ܆ ܐܶܚܙܶܐ ܚܢܳܢܳܟ ܡܳܐ ܕܳܐܬܶܝܬ܆ ܚܰܢܳܢܳܐ ܕܕܳܡܶܐ ܠܰܐܒܽܘܗ̱ܝ܀

ܫܽܘܒܚܳܐ

ܠܳܟ ܛܽܘܒܰܝܟ ܫܶܡܥܽܘܢ ܐܰܣܺܝܪܳܐ܆ ܣܳܒܳܐ ܙܰܗܝܳܐ ܘܢܰܨܺܝܚܳܐ܆ ܕܰܛܥܶܢܬܳܝܗ̱ܝ ܠܰܒܪܳܐ ܕܰܐܠܳܗܳܐ܆ ܥܰܠ ܐܺܝ̈ܕܰܝܟ ܒܗܰܝܟܰܠ ܩܽܘܕܫܳܐ܆ ܣܪ̈ܳܦܶܐ ܡܚܰܦܶܝܢ ܐܰܦܰܝ̈ܗܽܘܢ܆ ܕܠܳܐ ܢܺܐܩܕܽܘܢ ܡܶܢ ܓܰܘܙܰܠܬܶܗ܆ ܘܰܐܢ̱ܬ ܒܰܕܪ̈ܳܥܰܝܟ ܙܰܝܰܚܬܳܝܗ̱ܝ܆ ܘܰܐܦܺܝܣܬܳܝܗ̱ܝ ܕܰܫܪܺܝܢܝ ܡܶܟܺܝܠ܆ ܕܗܳܐ ܚܙܰܝ̈ ܥܰܝ̈ܢܰܝ ܠܰܚܢܳܢܳܟ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܥܶܠ ܡܶܢ ܫܽܘܦܪ̈ܶܐ
(ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܛܽܘܒܰܝܟ ܕܰܗܘܰܘ ܠܶܗ ܕܪ̈ܳܥܰܝܟ ܡܰܪܟܰܒܬܳܐ܆ ܠܗܰܘ ܕܡܰܪܟܰܒܬܳܐ ܕܰܟܪ̈ܽܘܒܶܐ ܟܕܰܢ ܠܺܐܝܩܳܪܶܗ܆ ܕܰܫܪܺܝܢܝ ܐܶܬܬܢܺܝܚ ܒܰܫܠܳܡܳܐ ܐܰܦܺܝܣܬܳܝܗ̱ܝ܆ ܠܢܽܘܗܪܳܐ ܕܶܐܬܳܐ ܠܓܶܠܝܳܢܳܐ܆ ܕܟܽܠܗܽܘܢ ܥܰܡ̱̈ܡܶܐ܀

ܫܽܘܒܚܳܐ

ܫܽܘܒܚܳܐ ܠܳܟ ܡܳܪܝ ܕܰܐܝܟ ܫܰܒܪܳܐ ܒܶܝܬ ܩܽܘܕܫܳܐ܆ ܥܰܠ ܐܺܝ̈ܕܰܘܗ̱ܝ ܛܰܥܢܳܟ ܫܶܡܥܽܘܢ ܘܶܐܬܟܰܫܰܦ ܠܳܟ܆ ܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ ܘܡܶܢ ܥܳܠ̈ܡܶܐ܆ ܫܪܺܝܢܝ ܥܰܕ ܗܳܘܶܐ ܢܽܘܚܳܡܳܐ܆ ܘܶܐܚܙܶܐ ܚܢܳܢܳܟ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܰܫܩܰܠܘ ܦܰܓܪܳܟ ܦܳܪܽܘܩܰܢ: ܘܐܶܫܬܺܝܘ ܟܳܣܳܐ ܕܦܽܘܪܩܳܢܳܐ ܕܡܳܟ ܝܰܩܺܝܪܳܐ: ܢܰܚܶܡ ܐܶܢܽܘܢ ܡܶܢ ܩܰܒܖ̈ܶܐ ܕܠܳܐ ܚܒܳܠܳܐ: ܘܰܐܠܒܶܫ ܐܶܢܽܘܢ ܬܶܫܒܽܘܚܬܳܐ ܕܠܳܟܽ ܗ̱ܘ ܡܣܰܟܶܝܢ܀

ܦܶܬܓܳܡܳܐ: ܐܺܬܶܐ ܠܒܰܝܬܳܟ ܒܺܐܝܩܳܪܳܐ ܘܶܐܦܪܥܳܟ ܢܶܕܪ̈ܰܝ܆ ܡܶܕܶܡ ܕܰܦܬܰܚ̈ܝ ܣܶܦ̈ܘܳܬܝ܆ ܗܰܠܶܠܽܘܝܰܗ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ

ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ ܘܣܳܒܳܐ ܩܰܝܳܡ܆

ܒܪܺܝܟܽ ܗ̱ܘ ܕܡܰܥܒܰܪ ܠܟܽܠܗܽܘܢ ܕܳܪ̈ܶܐ ܘܗܽܘ ܠܳܐ ܥܳܒܰܪ܀

ܬܰܢܘܰܝ ܐܺܝܬ ܗ̱ܘܳܐ ܒܶܝܬ ܠܺܗ ܘܠܰܐܒܽܘܟ ܘܰܠܪܽܘܚ ܩܽܘܕܫܳܐ܆ ܕܠܳܐ ܢܶܩܪܽܘܒ ܗ̱ܘܳܐ ܡܰܘܬܳܐ ܨܶܐܕܰܝ ܥܕܰܡܳܐ ܕܶܐܚܙܶܝܟ܆ ܗܳܐ ܫܶܠܡܰܬ ܠܳܗ̇ ܬܰܢܘܰܝ ܕܰܗܘܳܬ ܐ̱ܪܳܙܳܢܳܐܺܝܬ܆ ܫܪܺܝܢܝ ܕܰܐܣܺܝܪ ܐ̱ܢܳܐ ܐܶܡܽܘܬ ܡܶܟܺܝܠ ܐܶܢ ܦܳܩܶܕ ܐܰܢ̱ܬ܀

ܫܽܘܒܚܳܐ ܠܰܐܒܳܐ ܕܰܐܣܪܶܗ ܠܫܶܡܥܽܘܢ ܒܚܰܝ̈ܶܐ ܕܙܰܒܢܳܐ܆ ܘܣܶܓܕܬܳܐ ܠܰܒܪܳܐ ܕܰܕܢܰܚ ܘܰܫܪܳܝܗ̱ܝ ܓܶܠܝܳܢܳܐܺܝܬ܆ ܬܰܘܕܺܝ ܠܪܽܘܚܳܐ ܕܶܐܬܚܰܝܰܠ ܒܶܗ ܕܢܺܐܡܰܪ ܠܰܒܪܳܐ܆ ܫܪܺܝܢܝ ܒܰܫܠܳܡܳܐ ܕܗܳܐ ܚܙܺܝܬ ܚܢܳܢܳܟ ܠܳܟ ܬܶܫܒܽܘܚܬܳܐ܀

ܥܢܳܢ̈ܶܐ ܩܪܰܐܽܘܟ ܕܬܶܚܽܘܬ ܠܡܶܨܪܶܝܢ ܒܚܰܝܠܳܐ ܘܓܽܘܢܚܳܐ܆

ܘܰܛܥܺܝܢܰܬ ܠܶܗ ܠܡܳܪܳܐ ܕܟܽܠܗܽܘܢ ܐܰܬܪ̈ܰܘܳܬܳܐ܀