ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܚܛܺܝܬ ܠܳܟ ܚܳܐܶܢ

ܡܳܐ ܦܐܶܐ ܝܰܘܡܳܐ ܕܕܽܘܟܪܳܢܶܗ܆ ܕܡܳܪܝ ܒܰܪܨܰܘܡܳܐ ܒܰܐܪܒܰܥ ܦܶܢ̈ܝܳܬܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܒܥܰܡ̈ܠܶܐ ܟܺܝܬ ܕܥܳܢܘܳܝܽܘܬܳܐ܆ ܠܥܶܠ ܡܶܢ ܟܝܳܢܳܐ ܓܰܒܝܳܐ ܒܰܪܨܰܘܡܳܐ܆ ܡܶܬܥܰܢܘܶܐ ܗ̱ܘܰܝܬ ܙܰܗܝܳܐܺܝܬ ܒܟܽܠܗܽܘܢ ܝܰܘܡܰܝ̈ܟ܀

ܡܫܺܝܚܳܐ ܐܰܠܳܗܳܐ ܕܺܝܠܰܢ܆ ܒܰܨ̈ܠܰܘܳܬܶܗ ܕܓܰܒܝܳܐ ܒܰܪܨܰܘܡܳܐ܆ ܫܰܟܶܢ ܠܰܢ ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢ ܚܰܘ̈ܒܶܐ܀

ܥܰܢܺܝ̈ܕܶܐ ܕܶܐܟܰܠܘ ܦܰܓܪܳܟ܆ ܘܶܐܫܬܺܝܘ ܠܰܕܡܳܟ ܘܰܫܟܶܒܘ ܥܰܠ ܣܰܒܪܳܟ܆ ܢܩܽܘܡܽܘܢ ܡܳܪܝ ܡܶܢ ܝܰܡܺܝܢܳܟ ܡܳܐ ܕܳܐܬܶܐ ܐܰܢ̱ܬ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܒܪܳܐ ܕܰܫܪܳܐ ܒܡܰܪܒܥܳܐ

ܝܰܘܡܳܢ ܚܳܕ̈ܝܳܢ ܪ̈ܽܘܚܳܬܳܐ܆ ܕܰܐܒܳܗ̈ܳܬܳܐ ܩܰܕܺܝ̈ܫܶܐ܆ ܘܙܳܡܪ̈ܳܢ ܫܽܘܒܚܳܐ ܠܰܐܠܳܗܳܐ܆ ܒܕܽܘܟܪܳܢܳܟ ܡܳܪܝ ܒܰܪܨܰܘܡܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܢܶܚܕܶܐ ܝܰܘܡܳܢ ܘܰܢܫܰܒܰܚ܆ ܟܽܠܶܗ ܬܶܓܡܳܐ ܕܰܐܒܺܝ̈ܠܶܐ܆ ܕܰܒܛܽܘܪ̈ܶܐ ܐܳܦ ܕܰܡܥܰܪ̈ܶܐ܆ ܕܒܰܪ ܥܶܢܝܳܢܗܽܘܢ ܡܶܙܕܰܝܰܚ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܢܶܚܕܽܘܢ ܡܰܠ̈ܟܶܐ ܒܬܳܓܰܝ̈ܗܽܘܢ܆ ܕܰܚܙܰܐܽܘܟ ܡܳܪܝ ܒܰܪܨܰܘܡܳܐ܆ ܘܶܐܬܒܰܪܰܟܘ ܒܰܨ̈ܠܰܘܳܬܳܟ܆ ܘܰܐܣܶܩܘ ܫܽܘܒܚܳܐ ܠܗܰܘ ܕܰܐܘܪܒܳܟ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܒܥܰܪܝܳܐ ܘܩܽܘܪܳܐ ܡܣܰܝܒܰܪ ܗ̱ܘܰܝܬ܆ ܒܟܰܦܢܳܐ ܘܨܰܗܝܳܐ ܟܰܕ ܚܳܕܶܝܬ܆ ܘܡܶܛܽܠ ܚܰܝ̈ܶܐ ܕܰܡܠܺܝܟܺܝܢ܆ ܟܽܠ ܢܶܣܝܳܘ̈ܢܺܝܢ ܣܳܒܶܠ ܗ̱ܘܰܝܬ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܒܡܶܨܥܰܬ ܫܰܠܗܶܒܺܝܬܳܐ

ܬܰܘ ܟܽܠ ܦܳܪ̈ܽܘܫܶܐ܆ ܒܚܽܘܒܳܐ ܘܰܒܗܰܝܡܳܢܽܘܬܳܐ܆ ܢܝܰܩܰܪ ܘܰܢܩܰܠܶܣ ܠܕܽܘܟܪܳܢܶܗ܆ ܕܩܰܕܺܝܫܳܐ ܡܳܪܝ ܒܰܪܨܰܘܡܳܐ ܒܚܰܕܽܘܬܳܐ ܘܢܶܙܡܰܪ ܬܶܫܒܽܘܚܬܳܐ܆ ܡܗܰܝܡ̈ܢܶܐ ܠܡܳܪܝܳܐ ܫܰܒܰܚܘ܆ ܘܰܐܘܕܰܘ ܠܶܗ ܘܪܰܡܪܡܽܘܗ̱ܝ ܘܒܰܪܟܽܘܗ̱ܝ ܠܥܳܠܰܡ ܥܳܠܡܺܝܢ܀

ܡܰܢ ܣܳܦܶܩ ܢܩܰܠܶܣ܆ ܠܢܶܨ̈ܚܳܢܶܐ ܕܰܡܝܰܬܪ̈ܳܬܳܟ܆ ܐܳܘ ܢܰܨܺܝܚܳܐ ܡܳܪܝ ܒܰܪܨܰܘܡܳܐ܆ ܙܳܟܶܝܢ ܕܶܝܢ ܐܳܦ ܥܳܠܒܺܝܢ ܕܽܘܒܳܪ̈ܰܝܟ ܠܡܶܠܬܳܐ ܘܠܶܫܳܢܳܐ܆ ܡܗܰܝܡ̈ܢܶܐ ܠܡܳܪܝܳܐ ܫܰܒܰܚܘ܆ ܘܰܐܘܕܰܘ ܠܶܗ ܘܪܰܡܪܡܽܘܗ̱ܝ ܘܒܰܪܟܽܘܗ̱ܝ ܠܥܳܠܰܡ ܥܳܠܡܺܝܢ܀

ܡܰܝ̈ܳܐ ܝܰܗ̱ܒܬ ܘܚܰܠܺܝܬ܆ ܘܰܠܡܰܘܬܳܐ ܟܠܰܝܬ ܒܰܨܠܽܘܬܳܟ܆ ܐܳܘ ܢܰܨܺܝܚܳܐ ܡܳܪܝ ܒܰܪܨܰܘܡܳܐ܆ ܘܣܰܝܒܰܪܬ ܥܰܡ̈ܠܶܐ ܩܫܰܝ̈ܳܐ ܟܽܠ ܝܰܘ̈ܡܰܝ ܚܰܝܰܝ̈ܟ ܘܚܳܕܶܝܬ ܘܳܐܡܪܰܬ܆ ܡܗܰܝܡ̈ܢܶܐ ܠܡܳܪܝܳܐ ܫܰܒܰܚܘ܆ ܘܰܐܘܕܰܘ ܠܶܗ ܘܪܰܡܪܡܽܘܗ̱ܝ ܘܒܰܪܟܽܘܗ̱ܝ ܠܥܳܠܰܡ ܥܳܠܡܺܝܢ܀

ܦܬܰܚ ܦܽܘܡܳܟ ܐܰܒܽܘܢ܆ ܘܒܰܪܶܟ ܟܶܢܫܳܐ ܕܰܡܗܰܝ̈ܡܢܶܐ܆ ܕܨܳܒܘ ܘܶܐܬܰܘ ܡܶܢܟܽܠ ܦܶܢ̈ܝܳܢ܆ ܕܢܶܬܒܰܪܟܽܘܢ ܒܝܰܕ ܨܠܰܘ̈ܳܬܳܟ ܘܢܶܣܒܽܘܢ ܡܶܢܳܟ ܥܽܘܕܪ̈ܳܢܶܐ܆ ܡܗܰܝܡ̈ܢܶܐ ܠܡܳܪܝܳܐ ܫܰܒܰܚܘ܆ ܘܰܐܘܕܰܘ ܠܶܗ ܘܪܰܡܪܡܽܘܗ̱ܝ ܘܒܰܪܟܽܘܗ̱ܝ ܠܥܳܠܰܡ ܥܳܠܡܺܝܢ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܣܳܓܕܺܝܢܰܢ ܠܰܨܠܺܝܒܳܐ

ܟܽܠܢܳܫ ܚܰܝܳܒ ܕܰܢܩܰܠܶܣ. ܠܢܶܨܚܳܢܰܝ̈ܟ ܓܰܒܝܳܐ ܒܰܪܨܰܘܡܳܐ܆ ܘܢܶܙܡܰܪ ܫܽܘܒܚܳܐ ܠܗܰܘ ܕܰܓܒܳܟ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܫܽܘܒܚܳܐ ܠܛܳܒܳܐ ܕܚܰܝܠܳܟ. ܘܰܙܟܰܝܬ ܩܰܕܺܝܫܳܐ ܒܰܪܨܰܘܡܳܐ܆ ܒܫܰܗܪܳܐ ܘܨܰܘܡܳܐ ܐܰܡܺܝܢܳܐ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܫܰܡܶܫ ܥܰܡ ܡܰܠܰܐܟ̈ܶܐ܆ ܘܶܐܬܚܰܠܰܛ ܥܰܡ ܥܺܝܪ̈ܶܐ ܕܰܠܥܶܠ܆ ܘܟܽܠܫܳܥ ܡܰܘܕܶܐ ܘܳܐܡܰܪ܆ ܡܺܫܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܫܰܦܺܝܪ ܗ̱ܘܳܐ ܠܒܰܪܨܰܘܡܳܐ. ܟܰܕ ܩܳܐܶܡ ܗ̱ܘܳܐ ܩܕܳܡ ܐܰܠܳܗܳܐ܆ ܘܰܒܚܶܢ̈ܓܳܬܳܐ ܠܶܗ ܡܦܺܝܣ ܗ̱ܘܳܐ܆ ܡܺܫܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܝܰܘܡܳܢܳܐ ܐܶܬܟܰܢܰܫܘ. ܡܶܢ ܟܽܠ ܐܰܬܪܳܐ ܟܶܢ̈ܫܶܐ ܕܰܡܗܰܝ̈ܡܢܶܐ܆ ܕܢܶܬܒܰܪܟܽܘܢ ܘܢܶܣܒܽܘܢ ܥܽܘܕܪ̈ܳܢܶܐ܆ ܡܺܫܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܫܽܘܒܚܳܐ ܠܛܳܒܳܐ ܕܰܓܒܳܝܗ̱ܝ. ܠܣܳܒܳܐ ܙܰܗܝܳܐ ܡܳܪܝ ܒܰܪܨܰܘܡܳܐ܆ ܕܢܶܗܘܶܐ ܢܰܘܣܳܐ ܠܪܽܘܚܩܽܘܕܫܳܐ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܥܶܕܳܢ ܨܰܦܪܳܐ

ܒܪܺܝܟܽ ܗ̱ܘ ܡܫܺܝܚܳܐ܆ ܕܰܠܓܰܒܝܳܐ ܒܰܪܨܰܘܡܳܐ ܢܰܨܰܚ܆ ܒܥܺܕܰܬ ܩܽܘܕܫܳܐ ܡܗܰܝܡܰܢܬܳܐ ܘܗܳܐ ܩܳܥܝܳܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܠܫܶܡܫܳܐ ܕܡܰܢܗܰܪ܆ ܒܰܥ̈ܢܳܢܶܐ ܕܳܡܶܝܬ ܒܰܪܨܰܘܡܳܐ܆ ܘܥܺܕܬܳܐ ܢܶܗܪܰܬ ܒܝܽܘܠܦܳܢܳܟ ܘܗܳܐ ܩܳܥܝܳܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܪܳܚܡܶܗ ܕܡܳܪܝܳܐ܆ ܘܪܰܒ ܒܰܝܬܶܗ ܐܺܝܬܰܝܟ ܩܰܕܺܝܫܳܐ܆ ܘܠܳܐ ܟܳܠܶܐ ܠܳܟ ܫܶܐܠܳــ̈ܬܳܟ ܥܰܠܗܳܝ ܢܶܩܥܶܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܠܳܟ ܫܽܘܒܚܳܐ ܡܫܺܝܚܳܐ܆ ܡܚܰܝܶܠ ܠܰܪ̈ܚܽܘܡܰܘܗ̱ܝ܆ ܒܰܨܠܽܘܬܗܽܘܢ ܡܳܪܰܢ. ܚܰܝܶܠ ܡܚܺܝܠܽܘܬܰܢ܀

ܒܥܰܪܝܳܐ ܘܚܽܘܡܳܐ܆ ܐܶܬܟܰܠܰܠܬ ܓܰܒܝܳܐ ܒܰܪܨܰܘܡܳܐ܆ ܒܩܽܘܪܳܐ ܘܝܰܩܕܳܢܳܐ ܕܫܶܡܫܳܐ ܟܰܕ ܡܰܙܥܶܩܬ܆ ܫܽܘܒܚܳܐ ܠܳܟ ܐܰܠܳܗܳܐ܀

ܡܰܢ ܠܳܐ ܢܶܬܗܰܪ܆ ܟܰܕ ܚܳܙܶܐ ܠܪܰܒܳܐ ܒܰܪܨܰܘܡܳܐ܆ ܕܒܰܓܠܺܝܕܳܐ ܘܬܰܠܓܳܐ ܘܰܒܦܰܪܙܠܳܐ ܡܶܬܢܰܨܰܚ܆ ܫܽܘܒܚܳܐ ܠܳܟ ܐܰܠܳܗܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܒܪܳܐ ܕܰܒܚܽܘܒܶܗ

ܛܽܘܒܰܝܟ ܐܰܒܽܘܢ܆ ܢܰܨܺܝܚܳܐ ܡܳܪܝ ܒܰܪܨܰܘܡܳܐ܆ ܕܚܰܝܠܳܟ ܡܳܪܳܟ ܒܰܐܓܽܘܢܳܐ ܘܰܙܟܰܝܬܳܗ̱ܝ ܠܒܺܝܫܳܐ܆ ܘܰܐܥܕܺܝܬ ܟܠܺܝܠܳܐ ܕܙܳܟܽܘܬܳܐ ܕܰܒܚܰܫܰܝ̈ܟ ܐܶܬܛܰܝܰܒ ܠܳܟ܆ ܐܶܬܕܰܟܪܰܝܢ ܡܳܪܝܳܐ܀

ܬܶܚܕܶܐ ܘܬܶܪܘܰܙ. ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܕܰܡܙܰܝܚܳܐ ܠܝܽܘܡ ܕܽܘܟܪܳܢܳܟ ܓܰܒܝܳܐ ܒܰܪܨܰܘܡܳܐ܆ ܘܫܳܐܠܳܐ ܪ̈ܰܚܡܶܐ ܡܶܢ ܡܳܪܳܟ ܕܰܒܥܰܕܥܺܐܕܳܟ ܢܶܬܶܠ ܠܳܗ̇܆ ܐܶܬܕܰܟܪܰܝܢ ܡܳܪܝܳܐ܀

ܐܰܝܟ ܐܺܝܠܳܢܳܐ܆ ܕܰܢܨܺܝܒ ܥܰܠ ܬܰܦܳܐ ܕܡܰܝ̈ܳܐ܆ ܐܺܝܬܰܝܟ ܐܰܒܽܘܢ ܒܰܪܨܰܘܡܳܐ ܠܰܐܝܢܳܐ ܕܩܳܪܶܒ ܠܳܟ܆ ܕܰܒܝܰܕ ܫܽܘܦܪܳܐ ܕܕܽܘܒܳܪ̈ܰܝܟ ܦܳܐܰܚ ܪܺܝܚܳܟ ܒܰܣܺܝܡܳܐ܆ ܐܶܬܕܰܟܪܰܝܢ ܡܳܪܝܳܐ܀

ܒܗܳܢܳܐ ܝܰܘܡܳܐ܆ ܢܶܚܕܶܐ ܫܶܡܥܽܘܢ ܙܰܕܺܝܩܳܐ܆ ܘܟܽܠܶܗ ܬܶܓܡܳܐ ܕܥܳܢܘܳܝ̈ܶܐ ܘܰܐܒܳܗ̈ܳܬܳܐ܆ ܕܒܰܪ ܥܶܢܝܳܢܗܽܘܢ ܡܶܙܕܰܝܰܚ ܒܥܺܕ̈ܳܬܳܐ ܘܰܒܕܰܝܪ̈ܳܬܳܐ܆ ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܐܰܒܽܘܢ ܙܰܗܝܳܐ܆ ܘܢܰܨܺܝܚܳܐ ܡܳܪܝ ܒܰܪܨܰܘܡܳܐ܆ ܐܰܦܺܝܣ ܕܢܶܫܬܘܶܐ ܠܚܽܘܣܳܝ ܚܰܘ̈ܒܶܐ ܘܰܚ̈ܛܳܗܶܐ܆ ܐܰܝܢܳܐ ܕܝܰܩܰܪ ܥܰܕܥܺܐܕܳܟ ܘܰܐܝܢܳܐ ܕܰܪܫܰܡ ܩܽܘ̈ܠܳܣܰܝܟ܆ ܐܶܬܕܰܟܪܰܝܢ ܡܳܪܝܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܥܒܶܕ ܠܗܽܘܢ ܢܝܳܚܳܐ ܕܽܘܟܪܳܢܳܐ

ܠܥܳܠܰܡ ܢܶܗܘܶܐ ܕܽܘܟܪܳܢܳܟ܆ ܩܰܕܺܝܫܳܐ ܡܳܪܝ ܒܰܪܨܰܘܡܳܐ܆ ܘܰܠܕܳܪܕܳܪ̈ܺܝܢ ܢܶܨܚܳܢܰܝ̈ܟ܆ ܟܳܗܢܳܐ ܙܰܗܝܳܐ ܘܩܰܕܺܝܫܳܐ܆ ܕܰܠܡܰܠܰܐܟ̈ܶܐ ܕܰܫܡܰܝܳܐ܆ ܐܰܦܨܰܚܬ ܐܶܢܽܘܢ ܒܕܽܘܒܳܪ̈ܰܝܟ܆ ܘܰܐܟܘܳܬܗܽܘܢ ܗܳܫܳܐ ܚܳܕܶܝܬ܆ ܒܰܓܢܽܘܢ ܢܽܘܗܪܳܐ ܕܚܰܕ̈ܘܳܬܳܐ܆ ܨܠܽܘܬܳܟ ܫܽܘܪܳܐ ܬܶܗܘܶܐ ܠܰܢ܀

ܫܽܘܒܚܳܐ

ܐܰܝܟ ܡܽܘܫܶܐ ܡܰܝ̈ܳܐ ܐܰܒܰܥܬ܆ ܩܰܕܺܝܫܳܐ ܡܳܪܝ ܒܰܪܨܰܘܡܳܐ܆ ܘܰܐܝܟ ܐܶܠܺܝܫܳܥ ܛܽܘܒܳܢܳܐ܆ ܚܰܠܺܝܬ ܐܶܢܽܘܢ ܒܰܨܠܽܘܬܳܟ܆ ܘܰܐܝܟ ܐܶܠܺܝܳܐ ܛܰܢܳܢܳܐ܆ ܡܶܛܪܳܐ ܝܰܗ̱ܒܬ ܘܰܐܚܺܝܬ ܡܺܝܬܳܐ܆ ܘܗܳܐ ܡܶܬܢܰܨܰܚ ܕܽܘܟܪܳܢܳܟ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܆ ܡܶܢ ܣܰܘ̈ܦܶܐ ܠܣܰܘ̈ܦܶܝܗ̇ ܕܰܐܪܥܳܐ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܰܬܚܽܘܡܳܐ ܕܗܰܝܡܳܢܽܘܬܳܐ
ܥܰܢܺܝ̈ܕܶܐ ܕܰܒܚܰܝܰܝ̈ܗܽܘܢ ܙܡܰܪܘ ܫܽܘܒܚܳܐ

ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ܆ ܢܶܗܘܶܐ ܐܰܒܽܘܢ ܕܽܘܟܪܳܢܳܟ܆ ܒܓܽܘ̈ܕܶܐ ܕܥܺܝܪ̈ܶܐ ܒܰܝܢܳܬ ܡܰܠܰܐܟ̈ܶܐ܆ ܕܰܐܟܘܳܬܗܽܘܢ ܡܶܬܕܰܒܰܪ ܗ̱ܘܰܝܬ܆ ܕܥܰܡܗܽܘܢ ܬܺܐܪܰܬ ܡܰܠܟܽܘܬܳܐ܆ ܕܠܳܗ̇ ܗ̱ܘ ܣܰܟܺܝܬ ܟܽܠ ܝܰܘ̈ܡܰܝ ܚܰܝܰܝ̈ܟ܆ ܗܳܐ ܡܳܪܳܟ ܐܰܝܟ ܕܶܐܫܬܰܘܕܺܝ܆ ܦܳܪܰܥ ܠܳܟ ܐܰܓܪܳܐ ܕܥܰܡܠܰܝ̈ܟ܆ ܗ̄ ܨܠܽܘܬܳܟ ܬܥܰܕܰܪ ܠܰܢ܀

ܫܽܘܒܚܳܐ

ܒܰܕܡܽܘܬ ܥܰܡܽܘܕܳܐ ܕܢܽܘܗܪܳܐ܆ ܕܰܡܗܰܕܶܐ ܗ̱ܘܳܐ ܒܓܰܘ ܕܰܒܪܳܐ܆ ܠܥܰܡܳܐ ܕܰܐܦܶܩ ܡܽܘܫܶܐ ܡܶܢ ܡܶܨܪܶܝܢ܆ ܗܳܟܰܢܳܐ ܒܳܗ̇ ܒܰܕܡܽܘܬܳܐ܆ ܐܺܝܬܰܝܟ ܐܰܒܽܘܢ ܒܰܒܪܺܝܬܳܐ܆ ܘܒܳܟܽ ܗ̱ܘ ܢܳܗܪܺܝܢ ܟܽܠܗܽܘܢ ܚܶܫܽܘ̈ܟܶܐ܆ ܘܛܳܥܰܝ̈ܳܐ ܒܳܟ ܡܶܬܦܰܢܶܝܢ܆ ܡܶܢ ܬܰܘܫܳܐ ܠܽܐܘܪܚܳܐ ܕܚܰܝ̈ܶܐ ܗ̄ ܨܠܽܘܬܳܟ ܬܥܰܕܰܪ ܠܰܢ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܰܒܚܰܝܰܝ̈ܗܽܘܢ. ܙܡܰܪܘ ܫܽܘܒܚܳܐ ܒܠܶܫܳܢܰܝ̈ܗܽܘܢ܆ ܠܥܶܠ ܒܰܫܡܰܝܳܐ: ܢܶܗܘܶܐ ܕܽܘܟܪܳܢܗܽܘܢ: ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ. ܘܒܰܝܢܳܬ ܪ̈ܽܘܚܳܬܳܐ ܕܟܺܐܢ̈ܶܐ܆ ܕܰܦܠܰܚܘ ܩܽܘܕܡܰܝܟ: ܘܰܥܒܰܕܘ ܨܶܒܝܳܢܳܟ. ܠܳܐ ܬܶܥܽܘܠ ܠܕܺܝ̣ܢܳܐ ܥܰܡܗܽܘܢ. ܕܰܐܢ̱ܬ ܗ̣ܽܘ ܠܚܽܘܕܰܝܟ ܙܰܟܳܝܳܐ: ܘܰܡܢܰܚܡܳܢܳܐ: ܕܟܽܠܗܽܘܢ ܥܰܢܺܝ̈ܕܶܐ. ܦܰܓܪܳܟ ܘܰܕܡܳܟ ܢܶܗܘܶܐ ܠܗܽܘܢ. ܐܽܘܪܚܳܐ ܘܓܺܝܫܪܳܐ ܘܡܰܥܒܰܪܬܳܐ: ܘܒܶܗ ܢܶܬܡܰܢܥܽܘܢ ܠܰܓܢܽܘܢ ܚܰܕܘ̈ܳܬܳܐ܀

ܦܶܬܓܳܡܳܐ: ܘܰܢܫܰܒܚܽܘܢ ܝܳܬܒܰܝ̈ ܫܩܺܝ̈ܦܶܐ܆ ܘܡܶܢ ܪ̈ܺܝܫܶܐ ܕܛܽܘܪ̈ܶܐ ܢܶܩܥܽܘܢ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܓܢܺܝܙܬܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܡܳܪܝ ܒܰܪܨܰܘܡܳܐ܆

ܘܰܒܝܰܕ ܨܠܽܘܬܶܗ ܢܶܬܒܰܪܰܟ܆ ܟܶܢܫܳܐ ܕܙܰܝܰܚ ܕܽܘܟܪܳܢܶܗ܀

ܫܰܦܺܝܪ ܐܶܬܟܰܢܺܝ ܠܶܗ ܫܡܳܐ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܫܰܦܺܝܪ ܠܶܥܙܰܬ ܪܽܘܚܩܽܘܕܫܳܐ܆ ܒܦܽܘܡܶܗ ܕܟܳܗܢܳܐ ܕܠܶܗ ܐܰܥܡܶܕ܆ ܨܰܘܡܳܐ ܗܘܳܐ ܠܶܗ ܐܰܝܟ ܐܰܒܳܐ܆ ܘܰܨܠܽܘܬܳܐ ܡܪܰܒܝܳܢܺܝܬܳܐ܆ ܢܦܰܩ ܦܳܗܶܐ ܒܰܝܢܳܬ ܛܽܘܪ̈ܶܐ܆ ܥܰܡ ܚܰܝ̈ܘܳܬܳܐ ܕܰܒܕܰܒܪܳܐ܆ ܘܥܶܩܳܪ̈ܶܐ ܘܦܺܐܪ̈ܶܐ ܕܰܐܪܥܳܐ܆ ܫܳܩܶܠ ܗ̱ܘܳܐ ܟܺܝܬ ܡܳܙܽܘܢܳܐ܆ ܘ݉ܠܳܐ ܚܠܰܛ ܥܰܡܗܽܘܢ ܕܙܰܪ̈ܥܽܘܢܶܐ ܚܰܒܺܝ̈ܒܰܝ܆ ܛܥܳܡ݉ܬܳܐ ܕܡܶܕܶܡ ܕܡܶܢ ܫܰܝܢܳܐ܆ ܨܠܽܘܬܶܗ ܥܰܡܰܢ܀

ܫܽܘܒܚܳܐ ܠܶܗ ܠܰܐܒܳܐ ܕܰܓܒܳܝܗ̱ܝ܆ ܘܠܰܒܪܳܐ ܕܰܐܘܪܶܒ ܕܽܘܟܪܳܢܶܗ܆ ܘܰܠܪܽܘܚ ܩܽܘܕܫܳܐ ܕܗܽܘ ܟܰܠܠܶܗ܆ ܒܰܟܠܺܝܠܳܐ ܕܫܳܘܶܐ ܠܥܰܡ̈ܠܰܘܗ̱ܝ܆ ܥܒܰܕ ܚܰܝ̈ܠܶܐ ܘܰܬܡܺܝ̈ܗܳܬܳܐ܆ ܐܰܝܟ ܡܽܘܫܶܐ ܘܝܶܫܽܘܥ ܒܰܪܢܽܘܢ܆ ܘܰܠܫܶܡܫܳܐ ܘܣܰܗܪܳܐ ܟܠܳܐ ܗ̱ܘܳܐ܆ ܡܶܢ ܪܶܗܛܳܐ ܕܕܽܘܒܳܪ̈ܰܝܗܽܘܢ܆ ܟܽܘܪ̈ܗܳܢܶܐ ܡܶܢ ܒܢܰܝ̈ܢܳܫܳܐ܆ ܘܡܶܢ ܚܰܝ̈ܘܳܬܳܐ ܛܳܪܶܕ ܗ̱ܘܳܐ܆ ܘܥܰܢܺܝ݉ܕܳܐ ܡܶܢ ܬܪܰܥ ܩܰܒܪܳܐ ܚܰܒܺܝ̈ܒܰܝ܆ ܒܰܕ݉ܡܽܘܬ ܡܳܪܶܗ ܐܰܗܦܶܟ ܗ̱ܘܳܐ܆ ܨܠܽܘܬܶܗ ܥܰܡܰܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܡܳܪܝ ܒܰܪܨܰܘܡܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ: ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀