ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܒܪ̈ܰܚܡܰܝܟ ܡܳܪܝ ܣܰܓܺܝ̈ܶܐܐ

ܗܰܘ ܕܰܒܕܶܢܚܳܐ ܕܺܝܠܶܗ܆ ܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܐܶܡܳܐ ܕܗܺܝ ܝܳܠܕܳܐ܆ ܒܢܰܝ̈ܳܐ ܚܰܕ̱̈ܬܶܐ ܠܡܰܠܟܽܘܬܳܐ܀

ܒܰܥܡܳܕܳܟ ܩܰܕܺܝܫܳܐ܆ ܨܶܡܚܳܐ ܡܬܽܘܡܳܝܶܗ ܕܰܐܒܳܐ܆ ܥܺܕܬܳܐ ܐܶܬܢܰܗܪܰܬ܆ ܒܙܰܠ̈ܓܶܐ ܕܰܬܠܺܝܬܳܝܽܘܬܳܐ܀

ܒܰܥܡܳܕܳܟ ܩܰܕܺܝܫܳܐ܆ ܒܡܰܚܰܬܬܳܟ ܕܰܠܓܰܘ ܝܽܘܪܕܢܳܢ܆ ܚܰܣܳܐ ܠܺܝ ܚܰܘ̈ܒܰܝ܆ ܘܪܰܚܶܡ ܥܠܰܝ ܐܰܠܳܗܳܐ܀

ܩܪܶܒ ܗ̱ܘܳܐ ܡܳܪܰܢ ܕܢܶܥܡܰܕ܆ ܘܝܽܘܚܰܢܳܢ ܟܳܠܶܐ ܗ̱ܘܳܐ ܠܶܗ܆ ܟܰܕ ܐܳܡܰܪ ܠܘܳܬܶܗ܆ ܕܰܐܢ̱ܬ ܦܳܪܽܘܩܰܢ ܐܰܥܡܶܕܰܝܢܝ܀

ܝܰܘܡܳܢܳܐ ܐܶܬܚܰܙܝܰܬ܆ ܬܠܺܝܬܳܝܽܘܬܳܐ ܡܫܰܒܰܚܬܳܐ. ܥܰܠ ܝܽܘܪܕܢܳܢ ܢܰܗܪܳܐ܆ ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܺܝܟ ܕܚܰܕܺܝ ܠܰܫ̈ܡܰܝܳܢܶܐ

ܒܪܺܝܟ ܝܰܠܕܳܟ ܘܰܒܪܺܝܟ ܕܶܢܚܳܟ: ܝܶܫܽܘܥ ܦܳܪܽܘܩܰܢ: ܘܫܽܘܒܚܳܐ ܠܰܥܡܳܕܳܟ ܡܳܪܰܢ: ܕܦܰܪܩܰܢ ܡܶܢ ܛܽܘܥܝܰܝ܀

ܡܰܠܰܐܟ̈ܶܐ ܛܦܰܣܘ ܒܰܚ̈ܕܳܕܶܐ: ܘܚܰܦܺܝܘ ܐܰܦܰܝ̈ܗܽܘܢ: ܣܪ̈ܳܦܶܐ ܕܰܚܙܰܘ ܡܽܘܟܳܟܳܟ: ܡܶܠܬܳܐ ܐܰܠܳܗܳܐ܀

ܕܢܰܚ ܐܰܝܟ ܢܽܘܗܪܳܐ ܥܰܙܺܝܙܳܐ: ܡܶܢ ܥܽܘܒܶܗ ܕܰܐܒܳܐ: ܘܰܢܚܶܬ ܘܰܥܡܰܕ ܐܰܝܟ ܕܰܨܒܳܐ: ܒܓܰܘ ܝܽܘܪܕܢܳܢ ܢܰܗܪܳܐ܀

ܡܠܶܟ ܡܰܠ̈ܟܶܐ ܘܩܳܛܰܪ ܬܳܓ̈ܶܐ: ܕܶܐܬܳܐ ܠܰܥܡܳܕܳܐ: ܐܰܫܪܳܐ ܫܰܝܢܳܟ ܘܰܫܠܳܡܳܟ: ܒܥܰܡܳܟ ܘܰܒܥܺܕܬܳܟ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܫܡܰܝ̈ܳܢܶܐ ܫܽܘܒܚܳܐ ܙܳܡܪܺܝܢ

ܗܳܐ ܦܬܺܝܚܳܐ ܡܰܥܡܽܘܕܺܝܬܳܐ܆ ܘܰܫܓܺܝܪܳܐ ܒܢܽܘܪܳܐ ܘܪܽܘܚܳܐ܆ ܘܩܳܪܝܳܐ ܠܟܽܠܗܽܘܢ ܚܰܛܳܝ̈ܶܐ܆ ܬܰܘ ܚܽܘܬܘ ܘܰܣܚܰܘ ܘܶܐܬܕܰܟܰܘ܀

ܒܪܺܝܟ ܕܰܐܠܒܶܫ ܙܰܝܢܳܐ ܠܳܐܕܳܡ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܘܰܛܡܰܪ ܒܶܗ ܦܰܓܪܶܗ ܘܰܕܡܶܗ܆ ܪܰܗܒܽܘܢܳܐ ܕܚܰܝ̈ܶܐ ܚܰܕ̈ܬܶܐ܀

ܐܺܝܠܳܢܳܐ ܕܶܐܡܰܪ ܕܰܘܺܝܕ܆ ܕܰܢܨܺܝܒ ܥܰܠ ܬܰܦܳܐ ܕܡܰܝ̈ܳܐ܆ ܗܽܘܝܽܘ ܡܫܺܝܚܳܐ ܒܰܫܪܳܪܳܐ܆ ܕܰܢܨܺܝܒ ܥܰܠ ܡܰܥܡܽܘܕܺܝܬܳܐ܀

ܒܗܳܢܳܐ ܝܰܘܡܳܐ ܢܚܶܬ ܘܰܥܡܰܕ܆ ܬܠܺܝܬܳܝܳܗ̇ ܕܰܐܠܳܗܽܘܬܳܐ܆ ܘܩܰܕܶܫ ܡܰܝ̈ܳܐ ܒܰܥܡܳܕܶܗ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܀

ܒܗܳܢܳܐ ܝܰܘܡܳܐ ܐܶܬܚܰܙܝܰܬ܆ ܬܠܺܝܬܳܝܽܘܬܳܐ ܥܰܠ ܢܰܗܪܳܐ܆ ܒܪܳܐ ܕܥܳܡܶܕ ܘܰܐܒܳܐ ܕܩܳܥܶܐ܆ ܘܪܽܘܚܳܐ ܕܢܳܚܶܬ ܥܰܠ ܪܺܝܫܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܒܶܕ ܡܳܪܝ ܕܽܘܟܪܳܢܳܐ

ܩܽܘܡܝ ܥܺܕܬܳܐ ܘܰܙܡܰܪܝ ܫܽܘܒܚܳܐ: ܠܰܐܠܳܗܳܐ ܒܗܳܢܳܐ ܝܰܘܡܳܐ: ܕܰܢܚܶܬ ܘܰܥܡܰܕ ܒܓܰܘ ܡܰܝ̈ܳܐ: ܡܶܢ ܝܽܘܚܰܢܳܢ ܟܳܪܽܘܙܶܗ܀

ܐܰܒܳܐ ܐܰܙܥܶܩ ܡܶܢ ܪܰܘܡܳܐ: ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ: ܕܰܢܚܶܬ ܗ̱ܘܳܐ ܕܢܶܦܪܽܘܩ ܠܳܐܕܳܡ: ܘܢܰܦܢܶܝܘܗ̱ܝ ܠܰܥܕܶܝܢ ܕܰܐܘܒܶܕ ܗ̱ܘܳܐ܀

ܥܡܰܕ ܗ̱ܘܳܐ ܒܝܽܘܪܕܢܳܢ ܦܳܪܽܘܩܰܢ: ܘܪܽܘܚ ܩܽܘܕܫܳܐ ܒܰܕܡܽܘܬ ܝܰܘܢܳܐ: ܦܶܪܚܰܬ ܢܶܚܬܰܬ ܡܶܢ ܪܰܘܡܳܐ: ܘܥܰܠ ܪܺܝܫܶܗ ܕܰܒܪܳܐ ܫܶܟܢܰܬ܀

ܒܪܺܝܟܽ ܗ̱ܘ ܕܬܰܚܬܺܝ ܪܰܒܽܘܬܶܗ: ܘܰܢܚܶܬ ܠܰܐܪܥܳܐ ܒܝܰܕ ܪ̈ܰܚܡܰܘܗ̱ܝ: ܕܰܠܓܶܢܣܳܐ ܕܰܒܢܰܝ̈ܢܳܫܳܐ: ܢܰܣܶܩ ܥܰܡܶܗ ܠܰܫܡܰܝܳܐ܀

ܗܳܐ ܐܶܬܳܐ ܐܰܝܟܰܢ ܕܶܐܡܰܪ: ܘܰܐܚܺܝܕ ܪܰܦܫܳܐ ܒܝܰܡܺܝܢܶܗ: ܚ̈ܶܛܶܐ ܟܳܢܶܫ ܠܰܐܘܨܪ̈ܰܘܗ̱ܝ: ܘܰܠܬܶܒܢܳܐ ܒܢܽܘܪܳܐ ܡܰܘܩܶܕ܀

ܢܚܶܬ ܩܰܕܺܝܫܳܐ ܠܓܰܘ ܢܰܗܪܳܐ: ܕܢܶܥܡܰܕ ܒܶܗ ܡܶܢ ܝܽܘܚܰܢܳܢ: ܘܟܽܠܶܗ ܛܰܪܛܰܥ ܡܶܢ ܪܶܬܚܳܐ: ܕܫܰܠܗܶܒܺܝܬܳܐ ܕܫܰܪܝܳܐ ܒܶܗ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܒܪܳܐ ܕܰܫܪܳܐ ܒܡܰܪܒܥܳܐ

ܚܕܺܝܘ ܥܶܠܳܝ̈ܶܐ ܒܝܽܘܡ ܕܶܢܚܳܟ܆ ܘܰܚܒܰܨܘ ܗ̱ܘܰܘ ܕܰܢܚܽܘܪܽܘܢ ܒܳܟ܆ ܘܪܶܘܙܰܬ ܬܺܒܶܝܠ ܒܰܡܠܳܐܳܗ̇. ܠܰܡܫܰܒܳܚܽܘ ܠܺܐܝܩܳܪܳܟ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܒܪܺܝܟ ܫܶܡܫܳܐ ܕܙܰܕܺܝܩܽܘܬܳܐ. ܕܚܰܕܺܝ ܠܰܐܪܥܳܐ ܘܠܰܫܡܰܝܳܐ܆ ܒܪܺܝܟܽ ܗ̱ܘ ܡܫܺܝܚܳܐ ܕܰܕܢܰܚ ܠܰܢ. ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܗܳܐ ܓܰܒܪܳܐ ܘܰܫܡܶܗ ܕܶܢܚܳܐ. ܙܟܰܪܝܳܐ ܢܒܺܝܳܐ ܐܰܟܪܶܙ ܠܰܢ܆ ܒܪܺܝܟܽ ܗ̱ܘ ܡܫܺܝܚܳܐ ܕܰܕܢܰܚ ܠܰܢ܆ ܘܫܰܡܠܺܝ ܡ̈ܶܠܶܐ ܕܰܢܒܺܝ̈ܶܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܝܽܘܚܰܢܳܢ ܒܪܶܗ ܕܰܙܟܰܪܝܳܐ܆ ܠܥܶܠ ܡܶܢ ܢܰܗܪܳܐ ܩܳܐܶܡ ܗ̱ܘܳܐ܆ ܩܥܳܐ ܘܶܐܡܰܪ ܕܗܳܢܰܘ ܐܶܡܪܶܗ. ܘܰܒܪܶܗ ܚܰܝܳܐ ܕܰܐܠܳܗܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܢܚܶܬ ܟܺܝܬ ܢܽܘܗܪܳܐ ܥܶܠܳܝܳܐ܆ ܘܰܐܕܢܰܚ ܫܽܘܦܪܶܗ ܡܶܢ ܦܰܓܪܳܐ܆ ܕܶܢܚܳܐ ܕܰܐܡܺܝܪ ܒܰܙܟܰܪܝܳܐ܆ ܝܰܘܡܳܢ ܐܰܙܠܶܓ ܥܰܠ ܢܰܗܪܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܐܶܠܽܘ ܐܺܝܬ ܗ̱ܘܳܐ ܠܰܢ ܥܰܝܢܳܐ܆ ܕܡܰܨܝܳܐ ܕܬܶܚܙܶܐ ܟܰܣܝܳܐܺܝܬ܆ ܚܳܙܝܳܐ ܗ̱ܘܳܬ ܗܳܫܳܐ ܥܰܡܰܢ܆ ܟܶܢ̈ܫܶܐ ܕܢܽܘܪܳܐ ܘܰܕܪܽܘܚܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܚܙܳܟ ܝܽܘܚܰܢܳܢ ܟܰܕ ܡܰܥܡܶܕ܆ ܘܰܬܟܰܣ ܐܺܝܕܶܗ ܕܠܳܐ ܢܰܥܡܶܕ܆ ܟܰܕ ܐܳܡܰܪ ܗ̱ܘܳܐ ܕܠܰܘ ܕܺܝܠܺܝ ܗ̱ܝ. ܐܶܠܳܐ ܕܽܘܟܬܳܐ ܡܳܠܶܐ ܐ̱ܢܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܐܶܢܳܐ ܒܡܰܝ̈ܳܐ ܡܰܥܡܶܕ ܐ̱ܢܳܐ܆ ܘܗܰܘ ܕܳܐܬܶܐ ܒܢܽܘܪܳܐ ܘܪܽܘܚܳܐ܆ ܗܰܘ ܕܶܐܢܳܐ ܠܳܐ ܫܳܘܶܐ ܐ̱ܢܳܐ܆ ܐܶܫܪܶܐ ܥܰܪ̈ܩܶܐ ܕܰܡܣܳܐܢܰܘ̈ܗ̱ܝ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܡܰܠܰܐܟܳܐ ܕܢܽܘܗܪܳܐ ܘܕܰܪܘܳܙܳܐ

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܟܰܕ ܥܰܒܕܳܐ ܠܡܳܪܶܗ ܡܰܥܡܶܕ ܗ̱ܘܳܐ܆ ܘܠܳܐ ܝܺܩܶܕ ܡܶܢ ܓܰܘܙܰܠܬܳܐ܆ ܘܫܰܠܗܶܒܺܝܬܳܐ ܕܰܐܠܳܗܽܘܬܶܗ܆ ܕܗܰܘ ܡܳܪܳܐ ܕܟܽܠܳܐ܀

ܐܶܢܳܐ ܒܡܰܝ̈ܳܐ ܡܰܥܡܶܕ ܐ̱ܢܳܐ܆ ܠܰܬܝܳܒܽܘܬܳܐ ܕܰܚ̈ܛܳܗܶܐ܆ ܗܽܘ ܕܶܝܢ ܢܰܥܡܶܕܟܽܘܢ ܒܢܽܘܪܳܐ ܘܰܒܪܽܘܚܳܐ܆ ܘܰܢܩܰܕܶܫܟܽܘܢ ܒܰܚܢܳܢܶܗ ܗܰܘ ܡܰܚܶܐ ܡܺܝ̈ܬܶܐ܀

ܢܚܶܬ ܘܰܥܡܰܕ ܐܰܝܟ ܒܰܪܢܳܫܳܐ܆ ܗܰܘ ܡܳܪܳܐ ܕܝܰܡ̱̈ܡܶܐ ܘܰܬܗܽܘ̈ܡܶܐ܆ ܘܠܰܢ ܩܰܕܶܫ ܡܰܥܡܽܘܕܺܝܬܳܐ ܒܰܚܢܳܢܶܗ܆ ܕܰܚܢܰܢ ܛܰܡ̈ܐܶܐ ܢܶܬܩܰܕܰܫ܆ ܒܰܥܡܳܕܶܗ ܚܰܣܝܳܐ܀

ܚܙܳܬܶܗ ܥܺܕܬܳܐ ܠܝܽܘܚܰܢܳܢ܆ ܘܣܶܒܪܰܬ ܠܳܗ̇ ܕܗܽܘܝܽܘ ܡܫܺܝܚܳܐ܆ ܐܰܙܥܶܩ ܗ̱ܘܳܐ ܕܠܳܐ ܐܺܝܬܰܝ ܡܫܺܝܚܳܐ܆ ܐܶܠܳܐ ܐܺܝܙܓܰܕܳܐ܆ ܕܶܐܫܬܰܕܪܶܬ ܩܕܳܡܰܘܗ̱ܝ܀

ܩܳܝܡܺܝܢ ܟܶܢ̈ܫܶܐ ܥܰܠ ܢܰܗܪܳܐ܆ ܡܶܬܝܰܐܒܺܝܢ ܗ̱ܘܰܘ ܕܢܶܚܙܽܘܢ ܠܰܒܪܳܐ܆ ܝܽܘܚܰܢܳܢ ܒܨܶܒܥܳܐ ܚܰܘܝܶܗ ܗ̱ܘܳܐ܆ ܕܗܳܢܰܘ ܐܶܡܪܶܗ ܕܰܐܠܳܗܳܐ܆ ܕܦܳܪܶܩ ܒܶܪ̈ܝܳܬܳܐ܀

ܝܰܘܡܳܢܳܐ ܥܡܰܕ ܗ̱ܘܳܐ ܦܳܪܽܘܩܰܢ܆ ܡܶܢ ܝܽܘܚܰܢܳܢ ܒܝܽܘܪܕܢܳܢ ܢܰܗܪܳܐ܆ ܘܩܰܕܶܫ ܠܰܢ ܒܪܽܘܚܳܐ ܕܩܽܘܕܫܳܐ܆ ܘܰܥܒܰܕ ܠܰܢ ܒܢܰܝ̈ܳܐ ܠܰܐܒܽܘܗ̱ܝ܆ ܫܽܘܒܚܳܐ ܠܛܰܝܒܽܘܬܶܗ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܣܳܓܶܕ ܠܳܟ ܡܳܪܝܳܐ ܢܽܘܗܪܳܐ

ܐܶܢܳܐ ܒܡܰܝ̈ܳܐ ܡܰܥܡܶܕ ܐ̱ܢܳܐ: ܘܗܰܘ ܕܳܐܬܶܐ ܒܢܽܘܪܳܐ ܘܪܽܘܚܳܐ: ܗܰܘ ܕܶܐܢܳܐ ܠܳܐ ܫܳܘܶܐ ܐ̱ܢܳܐ: ܐܶܫܪܶܐ ܥܰܪ̈ܩܶܐ ܕܰܡܣܳܐܢܰܘ̈ܗ̱ܝ܀

ܕܢܰܚ ܐܰܝܟ ܢܽܘܗܪܳܐ ܥܰܙܺܝܙܳܐ: ܡܶܢ ܥܽܘܒܳܐ ܓܢܺܝܙܳܐ ܕܰܐܒܽܘܗ̱ܝ: ܘܰܢܚܶܬ ܘܰܥܡܰܕ ܒܓܰܘ ܝܽܘܪܕܢܳܢ: ܘܩܰܕܶܫ ܠܰܢ ܡܰܥܡܽܘܕܺܝܬܳܐ܀

ܢܚܶܬ ܡܳܪܰܢ ܠܝܽܘܪܕܢܳܢ ܢܰܗܪܳܐ: ܘܰܥܡܰܕ ܡܶܢ ܐܺܝ̈ܕܰܝ ܥܰܒܕܶܗ: ܘܩܰܕܶܫ ܐܳܦ ܠܰܢ ܒܰܥܡܳܕܶܗ: ܘܰܥܒܕܰܢ ܝܳܪ̈ܬܶܐ ܒܡܰܠܟܽܘܬܶܗ܀

ܥܡܰܕ ܗ̱ܘܳܐ ܒܝܽܘܪܕܢܳܢ ܦܳܪܽܘܩܰܢ: ܕܰܢܩܰܕܶܫ ܠܰܢ ܒܰܥܡܳܕܶܗ: ܠܰܘ ܕܰܣܢܺܝܩ ܗ̱ܘܳܐ ܥܰܠ ܩܽܘܕܫܳܐ: ܐܶܠܳܐ ܕܠܰܢ ܛܰܡ̈ܶܐܐ ܢܩܰܕܶܫ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܡ ܟܶܢ̈ܫܶܐ ܫܡܰܝ̈ܳܢܶܐ

ܒܥܰܝܢܳܐ ܕܰܢܒܺܝܽܘܬܳܐ܆ ܚܙܳܝܗ̱ܝ ܗ̱ܘܳܐ ܕܰܘܺܝܕ ܠܰܒܪܳܐ ܟܰܕ ܥܳܡܶܕ܆ ܬܠܳܐ ܩܳܠܶܗ ܘܫܰܪܺܝ ܐܳܡܰܪ܆ ܚܙܰܐܽܘܟ ܡܳܪܝ ܡܰܝ̈ܳܐ ܘܰܕܚܶܠܘ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܥܡܰܕ ܘܰܣܠܶܩ ܡܶܢ ܡܰܝ̈ܳܐ܆ ܘܝܰܗ̱ܒ ܠܰܢ ܙܰܝܢܳܐ ܫܒܺܝܚܳܐ ܒܰܥܡܳܕܶܗ܆ ܒܪܺܝܟ ܕܰܐܪܟܶܢ ܪܰܘܡܳܐ ܕܪܰܒܽܘܬܶܗ܆ ܘܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܩܳܠܶܗ ܕܰܐܒܳܐ ܟܰܕ ܡܰܙܥܶܩ܆ ܘܰܒܪܳܐ ܕܥܳܡܶܕ ܒܡܰܝ̈ܳܐ ܣܰܓܺܝ̈ܐܶܐ܆ ܐܰܠܳܗܳܐ ܡܫܰܒܚܳܐ ܪܥܶܡ܆ ܘܚܰܘܺܝ ܫܽܘܒܚܶܗ ܠܒܶܪ̈ܝܳܬܳܐ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܐܶܫܰܥܝܳܐ ܩܥܳܐ ܘܣܰܒܪܳܗ̇܆ ܠܥܺܕܰܬ ܩܽܘܕܫܳܐ ܥܰܠ ܝܰܘܡܳܐ ܕܕܶܢܚܶܗ܆ ܕܦܳܪܽܘܩܰܢ ܕܳܐܬܶܐ ܘܡܰܦܨܰܚ ܠܳܗ̇܆ ܘܙܳܡܪܳܐ ܫܽܘܒܚܳܐ ܥܰܡ ܝܰܠ̈ܕܶܝܗ̇܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܒܙܰܘܥܳܐ ܩܪܶܒ ܝܽܘܚܰܢܳܢ܆ ܘܣܳܡ ܝܰܡܺܝܢܶܗ ܥܰܠ ܪܺܝܫܶܗ ܕܰܒܪܳܐ܆ ܘܪܽܘܚ ܩܽܘܕܫܳܐ ܒܰܕܡܽܘܬܳܐ ܕܝܰܘܢܳܐ܆ ܢܶܚܬܰܬ ܩܰܘܝܰܬ ܥܰܠ ܪܺܝܫܶܗ܀

ܥܡܰܕ ܘܰܣܠܶܩ ܡܶܢ ܡܰܝ̈ܳܐ܆ ܘܫܰܡܠܺܝ ܐ̱ܪ̈ܳܙܶܐ ܫܒܺܝ̈ܚܶܐ ܒܰܥܡܳܕܶܗ܆ ܩܪܶܒܘ ܟܶܢ̈ܫܶܐ ܘܰܒܪܶܟܘ ܘܰܣܓܶܕܘ ܠܶܗ܆ ܠܡܳܪܳܐ ܛܳܒܳܐ ܕܰܣܥܰܪ ܐܶܢܽܘܢ܆ ܥܰܡ̱̈ܡܶܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܣܳܓܕܺܝܢܰܢ ܠܰܨܠܺܝܒܳܐ

ܡܰܘܕܶܝܢܰܢ ܒܰܥܡܳܕܳܟ ܕܒܶܗ ܐܶܬܕܰܟܺܝܢܰܢ ܡܶܢ ܛܰܡܐܽܘܬܳܐ܆ ܘܰܗܘܰܝܢܰܢ ܒܢܰܝ̈ܳܐ ܠܝܳܠܽܘܕܳܟ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܒܝܽܘܡ ܕܶܢܚܶܗ ܕܡܳܪܶܐ ܟܽܠ ܕܒܶܗ ܐܶܬܚܰܪܰܪ̈ܝ ܟܽܠ ܒܶܪ̈ܝܳܬܳܐ܆ ܘܗܳܐ ܙܳܡܪ̈ܳܢ ܒܶܗ ܬܶܫܒܽܘܚܬܳܐ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܝܰܘܡܳܢܳܐ ܢܚܶܬ ܘܰܥܡܰܕ ܒܓܰܘ ܝܽܘܪܕܢܳܢ ܢܰܗܪܳܐ ܦܳܪܽܘܩܰܢ܆ ܘܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܒܰܥܡܳܕܳܟ ܦܳܪܽܘܩܰܢ ܐܶܬܩܰܕܫܰܬ ܗ̱ܘܳܬ ܡܰܥܡܽܘܕܺܝܬܳܐ܆ ܐܶܡܳܐ ܕܝܳܠܕܳܐ ܪ̈ܽܘܚܳܢܶܐ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܫܽܘܒܚܳܐ

ܒܪܺܝܟܽ ܗ̱ܘ ܝܰܘܡܶܗ ܕܕܶܢܚܳܟ ܝܺܚܺܝܕܳܝܳܐ ܡܶܠܬܶܗ ܕܰܐܒܳܐ܆ ܕܕܰܟܺܝܬܳܢ ܡܶܢ ܛܰܡܐܽܘܬܳܐ܆ ܡܫܺܝܚܳܐ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܫܽܘܒܚܳܐ ܠܳܟ ܡܫܺܝܚܳܐ

ܒܰܥܡܳܕܳܟ ܡܳܪܰܢ: ܗܳܐ ܚܳܕܝܳܐ ܥܺܕܬܳܐ: ܘܙܳܡܪܳܐ ܬܶܫܒܽܘܚܬܳܐ: ܠܗܰܘ ܕܫܰܠܚܳܟ ܨܶܝܕܰܝܢ: ܡܫܺܝܚܳܐ ܐܰܠܳܗܳܐ ܕܺܝܠܰܢ܀

ܢܚܶܬܬ ܡܳܪܰܢ ܘܰܥܡܰܕܬ: ܒܓܰܘ ܝܽܘܪܕܢܳܢ ܢܰܗܪܳܐ: ܘܩܰܕܶܫܬ ܠܚܰܛܳܝ̈ܶܐ ܒܰܥܡܳܕܳܟ ܚܰܣܝܳܐ: ܡܫܺܝܚܳܐ ܐܰܠܳܗܳܐ ܕܺܝܠܰܢ܀

ܫܽܘܒܚܳܐ

ܒܰܥܡܳܕܳܟ ܡܳܪܰܢ: ܗܳܐ ܚܳܕܝܳܐ ܥܺܕܬܳܐ: ܘܙܳܡܪܳܐ ܬܶܫܒܽܘܚܬܳܐ: ܠܗܰܘ ܕܰܐܢܗܰܪ ܐܰܦܶܝ̈ܗ̇: ܕܚܶܫܽܘ̈ܟܳܢ ܗ̱ܘܰܝ̈ ܒܰܚܛܺܝܬܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ
ܨܪܳܐ ܢܽܘܪܳܢܳܐ ܠܓܰܘܙܰܠܬܳܐ (ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܒܪܺܝܟܽ ܗ̱ܘ ܝܰܘܡܶܗ ܕܰܥܡܳܕܳܟ܆ ܐܰܠܳܗܳܐ ܦܳܪܽܘܩܶܗ ܕܥܳܠܡܳܐ. ܕܒܶܗ ܗܽܘ ܫܰܟܶܢܬ ܠܒܶܪ̈ܝܳܬܳܐ܆ ܡܰܥܡܽܘܕܺܝܬܳܐ ܕܚܽܘܣܳܝܳܐ܆ ܠܗܳܕܶܐ ܣܚܳܬܳܐ ܐܶܬܪܰܓܪܰܓ܆ ܢܒܺܝܳܐ ܕܰܘܺܝܕ ܟܰܕ ܐܳܡܰܪ܆ ܕܡܶܢ ܬܰܠܓܳܐ ܐܶܚܘܰܪ܆ ܒܝܰܕ ܙܽܘܦܳܟ ܕܰܡܚܰܘܰܪ ܠܺܝ܀

ܫܽܘܒܚܳܐ

ܩܪܶܒ ܡܳܪܰܢ ܠܝܽܘܪܕܢܳܢ ܢܰܗܪܳܐ܆ ܨܶܝܕ ܝܽܘܚܰܢܳܢ ܕܢܶܥܡܰܕ ܡܶܢܶܗ. ܘܙܳܥ ܥܰܒܕܳܐ ܘܰܩܥܳܐ ܘܶܐܡܰܪ܆ ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶܥܡܰܕ܆ ܘܶܐܡܰܪ ܠܶܗ ܕܰܫܒܽܘܩ ܗܳܫܳܐ܆ ܕܗܳܟܰܢ ܦܐܶܐ ܠܰܢ ܕܰܢܫܰܡܠܶܐ܆ ܟܽܠܳܗ̇ ܢܒܺܝܽܘܬܳܐ܆ ܕܰܢܒܺܝ̈ܶܐ ܥܠܰܝ ܐܶܬܢܰܒܺܝܘ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܰܫܩܰܠܘ̱ ܦܰܓܪܳܟ܆ ܘܒܰܕܡܳܟ ܚܰܝܳܐ ܬܽܘܒ ܐܶܬܚܰܣܺܝܘ. ܥܒܶܕ ܠܗܽܘܢ ܡܳܪܰܢ ܕܽܘܟܪܳܢܳܐ܆ ܒܽܐܘܪܺܫܠܶܝܡ ܗܳܝ ܕܒܰܫܡܰܝܳܐ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡܶܢ ܒܺܝ̈ܫܶܐ. ܒܰܐܦ̈ܶܐ ܓܰܠ̈ܝܳܬܳܐ܆ ܢܩܽܘܡܽܘܢ ܡܳܪܝ ܡܶܢ ܝܰܡܺܝܢܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܺܝܢ ܣܳܗ̈ܕܶܐ ܡܶܛܽܠܡܳܢܳܐ
ܐܺܝܢ ܣܳܗ̈ܕܶܐ ܡܶܛܽܠ ܡܳܢܳܐ (ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܟܶܢ̈ܫܶܐ ܟܽܠܗܽܘܢ ܐܶܬܒܰܩܺܝܘ ܒܰܒܪܳܐ ܕܥܳܡܶܕ܆ ܘܥܳܪܩܺܝܢ ܡܰܝ̈ܳܐ ܕܝܽܘܪܕܢܳܢ ܒܙܰܘܥܳܐ ܡܶܢ ܩܽܘܕܡܰܘܗ̱ܝ܆ ܝܰܗ̱ܒܘ ܐܰܬܪܳܐ ܘܝܰܗ̱ܒܘ ܙܰܠܺܝ̈ܩܶܐ ܕܫܰܠܗܶܒܺܝܬܳܐ܆ ܘܰܠܥܰܒܕܳܐ ܩܪܳܝܗ̱ܝ ܢܽܘܪܳܢܳܐ ܕܰܢܣܺܝܡ ܥܠܰܘܗ̱ܝ ܐܺܝܕܳܐ܀

ܫܽܘܒܚܳܐ

ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ ܗܳܐ ܡܶܙܕܰܝܰܚ܆ ܗܰܘ ܕܰܚܙܰܘ ܥܰܡ̱̈ܡܶܐ ܘܟܶܢ̈ܫܶܐ ܕܳܐܬܶܐ ܠܓܰܘ ܢܰܗܪܳܐ܆ ܝܰܡܳܐ ܚܙܳܝܗ̱ܝ ܗ̱ܘܳܐ ܘܰܥܪܰܩ ܠܶܗ ܐܳܦ ܐܶܬܕܰܠܰܚ܆ ܘܶܐ̈ܠܦܶܐ ܕܰܒܓܰܘܶܗ ܐܶܬܬܙܺܝܥ̈ܝ ܘܰܢ̈ܩܰܫܝ ܠܰܚ̈ܕܳܕܶܐ܀

ܡܶܢ ܥܳܠܰܡ

ܒܥܶܛܪܳܐ ܕܒܶܣ̈ܡܶܐ ܢܶܬܚܰܣܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ: ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܕܡܳܟ ܚܰܝܳܐ: ܘܰܢܩܽܘܡܽܘܢ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ: ܘܢܰܣܩܽܘܢ ܠܳܟ ܫܽܘܒܚܳܐ ܡܫܺܝܚܳܐ ܕܰܐܢܬܽ ܗ̱ܘ ܡܢܰܚܡܳܢܗܽܘܢ܀

ܦܶܬܓܳܡܳܐ: ܡܳܐ ܠܳܟ ܝܰܡܳܐ ܕܰܥܪܰܩܬ: ܘܝܽܘܪܕܢܳܢ ܕܰܗܦܰܟܬ ܠܒܶܣܬܪܳܟ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢܬܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܣܪ̈ܳܦܶܐ ܡܚܰܦܶܝܢ ܟܶܢ̈ܫܶܐ ܙܪܺܝܒܺܝܢ ܛܶܟ̈ܣܶܐ ܝܳܩܕܺܝܢ܆ ܚܰܝ̈ܠܶܐ ܪܳܥܠܺܝܢ ܓܽܘ̈ܕܶܐ ܪܗܺܝܒܺܝܢ ܐܰܠ̈ܦܶܐ ܪܳܐܬܺܝܢ܆ ܫܰܠܗܶܒܺܝܬܳܐ ܩܳܝܡܳܐ ܠܰܣܛܰܪ ܟܰܕ ܪܰܬܺܝܬܳܐ܆ ܘܰܢܚܶܬ ܢܶܥܡܰܕ ܡܶܢ ܕܰܚܺܝܚܳܐ ܕܰܓܒܰܠ̈ܝ ܐܺܝ̈ܕܰܘܗ̱ܝ܀

ܫܽܘܒܚܳܐ ܠܰܐܒܳܐ ܕܰܒܝܰܕ ܩܳܠܳܐ ܓܠܳܐ ܠܚܰܒܺܝܒܶܗ܆ ܘܣܶܓܕܬܳܐ ܠܰܒܪܳܐ ܕܰܓܠܳܐ ܢܰܦܫܶܗ ܠܟܳܪܽܘܙ ܩܽܘܫܬܳܐ܆ ܬܰܘܕܺܝ ܠܪܽܘܚܳܐ ܕܰܓܠܳܐ ܘܚܰܘܺܝ ܥܰܠ ܡܰܢܽܘ ܫܟܶܢ܆ ܚܰܕܽ ܗ̱ܘ ܐ̱ܪܳܙܳܐ ܚܰܕ ܐܰܠܳܗܳܐ ܠܶܗ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀