ܕܰܬܠܳܬܳܐ ܒܫܰܒܳܐ

ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܠܰܨܠܽܘܬܳܐ. ܕܟܺܝܬܳܐ ܕܡܶܢ ܝܰܘܢܳܢ܆ ܒܟܰܪܣܶܗ ܕܢܽܘܢܳܐ ܡܶܢ ܓܰܘ ܝܰܡܳܐ ܫܡܰܥ܆ ܪܰܚܶܡܥܠܰܝܢ ܐܰܠܳܗܳܐ܀

ܗܰܘ ܕܰܒܨܰܘܡܳܐ. ܙܰܗܝܳܐ ܘܩܰܕܺܝܫܳܐ ܠܢܺܝܢܘܶܐ ܡܕܺܝܢ̱ܬܳܐ܆ ܡܶܢ ܝܰܕ ܪܽܘܓܙܳܐ ܦܪܰܩ܆ ܪܰܚܶܡ ܥܠܰܝܢ ܐܰܠܳܗܳܐ܀

ܚܽܘܢ ܚܰܢܳܢܳܐ܆ ܠܚܰܛܳܝ̈ܶܐ ܕܬܳܝܒܺܝܢ܆ ܘܩܰܒܶܠ ܕܶܡ̈ܥܶܐ ܕܰܩܕܳܡܰܝܟ ܐܳܫܕܺܝܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܦܰܨܳܢ ܡܳܪܰܢ. ܡܶܢ ܩܪ̈ܳܒܶܐ ܘܩܺܐܪ̈ܣܶܐ܆ ܘܡܶܢ ܝܰܕ ܥܰܡ̱̈ܡܶܐ ܕܠܰܫܡܳܟ ܠܳܐ ܝܳܕܥܺܝܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܫܽܘܒܚܳܐ ܠܰܐܒܳܐ. ܘܬܰܘܕܺܝܬܳܐ ܠܰܒܪܳܐ܆ ܘܰܠܪܽܘܚ ܩܽܘܕܫܳܐ ܐܺܝܩܳܪܳܐ ܘܣܶܓܕܬܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܣܳܓܶܕ ܠܳܟ ܡܳܪܝܳܐ

ܗܳܝ ܛܰܝܒܽܘܬܳܐ ܕܰܣܡܰܟܬܳܗ̇܆ ܠܢܺܝܢܘܶܐ ܡܕܺܝܢ̱ܬܳܐ ܕܠܳܐ ܬܶܦܶܠ܆ ܗܺܝ ܬܶܣܡܽܘܟ ܠܥܺܕܬܳܐ ܘܝܰܠ̈ܕܶܝܗ̇܆ ܡܶܟܺܝܠ ܘܰܥܕܰܡܳܐ ܠܥܳܠܰܡ܀

ܐܰܒܳܐ ܕܡܰܫܦܰܥ ܛܰܝܒܽܘܬܶܗ܆ ܥܰܠ ܛܳܒ̈ܶܐ ܐܳܦ ܥܰܠ ܒܺܝ̈ܫܶܐ܆ ܐܰܫܦܰܥ ܥܠܰܝܢ ܡܳܪܝ ܛܰܝܒܽܘܬܳܟ܆ ܘܫܰܘܙܶܒ ܠܰܢ ܡܶܢ ܒܺܝ̈ܫܳܬܳܐ܀

ܪܽܘܚ ܩܽܘܕܫܳܐ ܦܰܪܰܩܠܺܝܛܳܐ܆ ܡܩܰܒܠܳܢܳܐ ܕܟܽܠ ܬܰܝܳܒ̈ܶܐ܆ ܩܰܒܶܠ ܨܰܘܡܰܢ ܘܰܨܠܽܘܬܰܢ܆ ܘܦܰܢܳܐ ܒܪ̈ܰܚܡܰܝܟ ܫܶܐܠܳــ̈ـܬܰܢ܀

ܛܳܒܳܐ ܕܠܳܐ ܐܳܠܶܡ ܠܥܳܠܰܡ܆ ܠܳܐ ܬܰܗܡܶܐ ܚܝܳܪܳܟ ܡܶܢܰܢ܆ ܘܰܐܝܟ ܕܪܰܚܶܡܬ ܥܰܠ ܢܺܝܢ̈ܘܳܝܶܐ܆ ܚܰܣܳܐ ܠܰܢ ܕܰܚܛܰܝܢܰܢ ܠܳܟ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܗܰܘ ܕܥܽܘܗܕܳܢܳܐ

ܡܫܺܝܚܳܐ ܐܰܠܳܗܳܐ ܕܶܐܬܳܐ ܕܢܶܩܪܶܐ܆ ܠܚܰܛܳܝ̈ܶܐ ܠܰܬܝܳܒܽܘܬܳܐ܆ ܘܢܰܘܪܶܬ ܐܶܢܽܘܢ ܡܰܠܟܽܘܬܶܗ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܗܰܘ ܕܰܠܝܰܘܢܳܢ܆ ܡܶܢ ܟܰܪܣܶܗ ܕܢܽܘܢܳܐ ܫܰܘܙܶܒܬ܆ ܘܐ̱ܪ̈ܳܙܶܐ ܕܰܩܝܳܡܬܳܟ ܛܰܦܶܣܬ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܕܨܶܝܕ ܢܺܝܢ̈ܘܳܝܶܐ܆ ܠܝܰܘܢܳܢ ܒܰܪ ܡܰܬܰܝ ܫܰܕܰܪ܆ ܕܢܰܠܶܦ ܐܶܢܽܘܢ ܬܝܳܒܽܘܬܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܗܰܘ ܕܶܐܬܪܰܥܺܝ܆ ܠܢܺܝܢ̈ܘܳܝܶܐ ܕܰܒܝܰܕ ܨܰܘܡܳܐ܆ ܐܶܬܩܰܪܰܒܘ ܠܰܬܝܳܒܽܘܬܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܚܰܣܳܐ ܒܪ̈ܰܚܡܰܝܟ ܚܰܘ̈ܒܶܐ ܕܡܰܪܥܺܝܬܳܟ܆ ܕܰܠܢܳܡܽܘܣܳܟ ܗܳܐ ܢܳܩܦܳܐ܆ ܘܠܰܚܢܳܢܳܟ ܗܳܐ ܡܶܬܟܰܫܦܳܐ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܝܰܘܡܳܢܳܐ܆ ܥܳܩܬܳܐ ܪܰܒܬܳܐ ܗܘܳܬ ܠܝܰܘܢܳܢ ܢܒܺܝܳܐ ܥܶܒܪܳܝܳܐ܆ ܕܰܥܒܰܪ ܪܽܘܓܙܳܐ ܡܶܢ ܢܺܝܢ̈ܘܳܝܶܐ ܘܶܐܫܬܰܚܠܦܰܬ ܠܳܗ̇܆ ܟܳܪܽܘܙܽܘܬܶܗ ܕܰܢܒܺܝܳܐ܆ ܕܶܐܬܪܰܥܺܝ ܡܳܪܝܳܐ܀

ܛܳܒܳܐ ܕܓܳܠܘ܆ ܪ̈ܰܚܡܰܘܗ̱ܝ ܥܰܠ ܢܺܝܢܘܶܐ ܡܕܺܝܢ̱ܬܳܐ܆ ܘܦܰܪܩܳܗ̇ ܡܶܢ ܪܽܘܓܙܳܐ܆ ܦܪܽܘܩ ܠܰܢ ܒܪ̈ܰܚܡܰܝܟ ܡܶܢ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܆ ܕܰܐܢ̱ܬܽ ܗ̱ܘ ܛܳܒܳܐ ܒܰܠܚܽܘܕܰܝܟ܆ ܘܨܳܒܶܐ ܒܬܰܝܳܒ̈ܶܐ܀

ܦܳܪܽܘܩܰܢ܆ ܕܶܐܫܬܰܘܕܺܝ ܒܰܣܒܰܪܬܶܗ ܣܰܒܪܳܐ ܠܬܰܝܳܒ̈ܶܐ܆ ܚܽܘܢ ܒܰܚܢܳܢܳܟ ܠܰܐܒܺܝܕܽܘܬܶܗ ܕܓܶܢܣܰܢ ܫܺܝܛܳܐ܆ ܘܦܰܢܳܐ ܒܪ̈ܰܚܡܰܝܟ ܫܶܐܠܳــ̈ܬܰܢ܆ ܛܳܒܳܐ ܡܠܶܐ ܪ̈ܰܚܡܶܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ
ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ

ܢܺܝܢ̈ܘܳܝܶܐ ܕܰܫܡܰܥ ܩܳܠܶܗ܆ ܕܒܰܪ ܡܰܬܰܝ ܕܡܰܟܪܶܙ ܗܦܽܘܟܝܳܐ܆ ܗܦܰܟܘ ܟܽܠܗܽܘܢ ܡܶܢ ܒܺܝ̈ܫܳܬܳܐ܆ ܘܶܐܚܰܕܘ ܓܰܘܣܳܐ ܒܰܬܝܳܒܽܘܬܳܐ܆ ܘܰܒܝܰܕ ܨܰܘܡܳܐ ܘܰܨܠܽܘܬܳܐ܆ ܥܶܒܪܰܬ ܡܶܢܗܽܘܢ ܡܰܪܕܽܘܬܳܐ܆ ܐܰܟܘܳܬܗܽܘܢ ܡܳܪܰܢ܆ ܐܰܥܒܰܪ ܪܽܘܓܙܳܐ ܡܶܢ ܥܰܒ̈ܕܰܝܟ܀

ܫܽܘܒܚܳܐ

ܕܚܺܝܠ ܗ̱ܘܳܐ ܩܳܠܶܗ ܕܝܰܘܢܳܢ܆ ܕܰܒܫܽܘ̈ܩܰܝ ܢܺܝܢܘܶܐ ܡܰܟܪܶܙ ܗ̱ܘܳܐ܆ ܕܰܠܬܳܓܶܗ ܕܡܰܠܟܳܐ ܐܰܪܡܺܝ܆ ܘܰܠܪ̈ܺܝܫܳܢܶܐ ܥܰܠ ܩܶܛܡܳܐ ܘܥܰܦܪܳܐ܆ ܘܓܰܢ̱ܒܳܪ̈ܶܐ ܕܰܫ̈ܡܳܗܳܬܳܐ܆ ܐܰܫܦܶܠܘ ܘܡܶܢܶܗ ܘܶܐܬܥܰܕܰܠܘ܆ ܘܰܗܘܳܐ ܠܗܽܘܢ ܩܠܺܝܕܳܐ܆ ܕܦܳܬܰܚ ܬܰܪ̈ܥܶܐ ܕܰܚܢܳܢܳܐ܀

ܡܶܢ ܥܳܠܰܡ

ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ. ܒܪܳܐ ܬܰܝܳܒܳܐ ܩܕܳܡ ܐܰܒܽܘܝܗܝ ܩܥܳܐ. ܚܛܺܝܬ ܒܰܫܡܰܝܳܐ ܘܰܩܕܳܡܰܝܟ܆ ܠܳܐ ܫܳܘܶܐ ܐ̱ܢܳܐ ܕܰܒܪܳܟ ܐܶܬܩܪܶܐ. ܩܰܒܶܠܰܝܢ ܐܰܝܟ ܐܰܓܺܝܪܳܐ܆ ܘܶܐܗܘܶܐ ܒܒܰܝܬܳܟ ܐܰܝܟ ܥܰܒܕܳܐ. ܘܰܫܒܽܘܩ ܠܺܝ ܣܰܟܠܽܘܬܝ̱܆ ܐܰܢ̱ܬ ܐܰܠܳܗܳܐ ܡܪܰܚܡܳܢܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܬܰܪܥܳܟ ܡܳܪܰܢ ܢܳܩܶܫ
ܩܺܝܢܬܳܐ ܕܓܽܘܫܡܳܐ

ܡܰܠܟܳܐ ܕܢܺܝܢܘܶܐ ܓܙܰܪ ܨܰܘܡܳܐ܆ ܒܚܰܫܳܐ ܪܰܒܳܐ ܘܩܰܪܶܒ ܒܳܥܽܘܬܳܐ܆ ܘܰܐܠܶܦ ܨܰܘܡܳܐ ܠܚܰܝ̈ܘܳܬܳܐ ܘܠܰܒ̈ܢܰܝ ܐ̱ܢܳܫ̈ܳܐ܆ ܘܰܒܫܽܘܠܳܡ ܐܰܪܒܥܺܝܢ ܝܰܘ̈ܡܺܝܢ ܕܰܦܣܰܩܘ ܣܰܒܪܳܐ. ܕܢܰܚܘ ܪ̈ܰܚܡܶܐ ܥܠܰܝܗܽܘܢ܀

ܫܽܘܒܚܳܐ

ܒܨܰܘܡܳܐ ܕܨܳܡܘ ܗ̱ܘܰܘ ܢܺܝܢ̈ܘܳܝܶܐ܆ ܗܺܝ ܒܳܥܽܘܬܗܽܘܢ ܦܶܪܩܰܬ ܚܰܝܰܝ̈ܗܽܘܢ܆ ܘܰܒܨܰܘܡܳܐ ܕܗܳܐ ܨܳܝܡܺܝܢܰܢ ܐܳܘ ܚܰܢܳܢܳܐ܆ ܚܢܳܢܳܐ ܢܺܐܬܶܐ ܡܶܢ ܓܰܙܳܟ ܘܪ̈ܰܚܡܰܝܟ ܢܶܗܘܽܘܢ. ܥܰܠ ܟܽܠܰܢ ܥܰܒ̈ܕܰܝܟ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ ܕܨܰܘܡܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܨܰܘܡܳܐ ܠܫܰܒܪ̈ܶܐ ܐܶܠܳܐ ܒܢܺܝܢܘܶܐ ܠܳܐ ܐܶܫܬܰܡܰܗ܆ ܚܰܫܳܐ ܕܰܐܝܟ ܗܰܘ ܐܶܠܳܐ ܬܰܡܳܢ ܠܳܐ ܐܶܬܡܰܠܰܠ܆ ܓܳܥܶܝܢ ܪ̈ܰܚܡܶܐ ܘܫܳܦܰܥ ܚܰܠܒܳܐ ܡܶܢ ܡܰܝܢܰܩܬܳܐ܆ ܘܰܚܣܺܝܠ ܫܰܒܪܳܐ ܟܰܕ ܠܳܐ ܝܳܕܰܥ ܥܶܠܬܳܐ ܡܳܢܳܐ ܗ̱ܝ܀

ܢܶܬܠܽܘܢ ܫܽܘܒܚܳܐ ܣܳܒ̈ܶܐ ܕܦܰܨܺܝܬ ܡܶܢ ܡܰܪܕܽܘܬܳܐ܆ ܘܰܢܒܰܪܟܽܘܢܳܟ ܥܠܰܝ̈ܡܶܐ ܕܰܚܣܰܟܬ ܡܶܢ ܚܽܘܝܳܒܳܐ܆ ܢܰܘܕܶܐ ܡܰܠܟܳܐ ܕܩܳܡ ܒܰܐܓܽܘܢܳܐ ܓܰܢ̱ܒܳܪܳܐܺܝܬ܆ ܘܰܐܝܟ ܕܰܒܚܰܝܠܳܐ ܒܳܟ ܐܶܬܢܰܨܰܚ ܠܳܟ ܬܶܫܒܽܘܚܬܳܐ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܦܶܬܓܳܡܳܐ: ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ܆ ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܡܰܥܢܺܝܬܳܐ ܕܡܳܪܝ ܣܶܘܶܝܪܺܝܳܘܣ

ܐܰܫܘܳܐ ܠܰܢ ܒܪ̈ܰܚܡܰܝܟ ܡܳܪܶܐ ܟܽܠ: ܕܰܒܝܰܘܡܳܐ ܗܳܢܳܐ ܕܠܳܐ ܟܽܘ̈ܬܡܳܬܳܐ ܕܰܚܛܺܝܬܳܐ ܒܙܰܕܺܝܩܽܘܬܳܐ ܢܶܬܢܛܰܪ ܡܒܰܪܟܳܐ ܐܺܝܬܰܝܟ܀

ܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ: ܡܪܰܡܪܰܡ ܘܰܡܫܰܒܰܚ ܫܡܳܐ ܕܺܝܠܳܟ ܠܥܳܠܰܡ ܥܳܠܡܺܝܢ܀

ܬܶܗܘܶܐ ܡܳܪܝ ܛܰܝܒܽܘܬܳܟ ܥܠܰܝܢ ܐܳܦ ܪ̈ܰܚܡܰܝܟ: ܐܰܟܡܳܐ ܕܰܥܠܰܝܟܽ ܗ̱ܘ ܣܰܒܪܰܢ ܡܒܰܪܟܳܐ ܐܺܝܬܰܝܟ܀

ܡܳܪܝܳܐ ܐܰܠܶܦܰܝܢ ܐܳܦ ܚܰܘܳܢ ܐܽܘܪܚܳܐ ܕܦܽܘܩ̈ܕܳܢܰܝܟ ܡܒܰܪܟܳܐ ܐܺܝܬܰܝܟ܀

ܡܳܪܝܳܐ ܣܰܟܶܠܰܝܢ ܒܛܰܝܒܽܘܬܳܟ ܐܽܘܪܚܳܐ ܕܢܳܡܽܘ̈ܣܰܝܟ ܡܒܰܪܟܳܐ ܐܽܝܬܰܝܟ܀

ܩܰܕܺܝܫܳܐ ܐܰܢܗܰܪ ܠܰܢ ܒܟܽܠܗܽܘܢ ܙܰܠ̈ܓܶܐ ܕܺܝܠܳܟ: ܡܳܪܝܳܐ ܪ̈ܰܚܡܰܝܟ ܥܠܰܝܢ ܠܥܳܠܰܡ ܥܳܠܡܺܝܢ܀

ܡܳܪܝܳܐ ܠܰܥܒܳܕܳܐ ܕܺܐܝ̈ܕܰܝܟ ܠܳܐ ܬܰܪܦܶܐ ܘܬܶܫܒܽܘܩ: ܠܳܟ ܝܳܐܶܐ ܫܽܘܒܚܳܐ: ܠܳܟ ܦܰܐܝܳܐ ܬܶܫܒܽܘܚܬܳܐ: ܘܠܳܟ ܦܐܶܐ ܩܽܘܠܳܣܳܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܶܢ ܐܳܡܪܺܝܢܰܢ ܬܠܳܬ ܙܰܒܢܺܝ̈ܢ

ܛܳܒ ܠܡܰܘܕܳܝܽܘ ܠܡܳܪܝܳܐ ܘܰܠܡܶܙܡܰܪ ܠܰܫܡܳܟ ܡܪܰܝܡܳܐ ܘܠܰܡܚܰܘܳܝܽܘ ܒܨܰܦܪܳܐ ܛܰܝܒܽܘܬܳܟ ܘܗܰܝܡܳܢܽܘܬܳܟ ܒܠܰܝ̈ܠܰܘܳܬܐ܀

ܘܳܐܡܪܺܝܢܰܢ ܬܠܳܬ ܙܰܒܢܺܝ̈ܢ

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܶܠܬܳܢܳܐ. ܩܰܕܺܫܰܬ ܠܳܐ ܡܳܝܽܘܬܳܐ ܕܶܐܨܠܶܒܬ ܚܠܳܦܰܝܢ ܐܶܬܪܰܚܰܡܥܠܰܝܢ܀

ܡܳܪܝܳܐ ܚܽܘܢܳܝܗ̱ܝ ܠܥܰܡܳܐ ܕܺܝܠܳܟ: ܡܳܪܝܳܐ ܚܰܣܳܐ ܘܰܫܒܽܘܩ ܚܛܳܗ̈ܶܐ ܕܟܽܠܰܢ: ܩܰܕܺܝܫܳܐ ܐܰܓܶܢ ܥܠܰܝܢ ܝܰܡܺܝܢܳܟ ܘܰܐܣܳܐ ܟܪܺܝܗܽܘܬܰܢ: ܡܶܛܽܠ ܫܡܳܐ ܕܺܝܠܳܟ܀

ܫܽܘܒܚܳܐ ܠܳܟ ܡܳܪܰܢ: ܫܽܘܒܚܳܐ ܠܳܟ ܡܳܪܰܢ: ܫܽܘܒܚܳܐ ܠܳܟ ܣܰܒܪܰܢ ܠܥܳܠܰܡ ܒܰܪܶܟܡܳܪܝ܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀