ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܥܰܕܠܳܐ ܢܺܐܙܽܠ̱ܘܢ ܚܰܘ̈ܒܰܝ

ܒܛܽܘܪܶܗ ܕܝܰܥܩܽܘܒ ܥܺܕܬܳܐ ܬܶܩܢܰܬ ܬܰܡܺܝܡܳܐܺܝܬ܆ ܕܒܳܗ̇ ܐܶܫܬܰܡܰܫܘ ܟܽܠܗܽܘܢ ܛܽܘ̈ܦܣܶܐ ܕܫܰܪܺܝܪ̈ܳܬܳܐ܆ ܐܶܬܪܰܚܰܡ ܥܠܰܝܢ܀

ܥܺܕܬܳܐ ܕܰܒܢܳܐ ܣܠܶܩ ܚܰܘܺܝ ܠܶܗ ܠܡܽܘܫܶܐ ܪܰܒܳܐ܆ ܒܓܰܘ ܥܰܪ̈ܦܶܠܶܐ ܐܽܘܪܫܠܶܡ ܗ̱ܘܳܬ ܚܺܐܪܬܳܐ ܕܰܠܥܶܠ܆ ܐܶܬܪܰܚܰܡ ܥܠܰܝܢ܀

ܫܽܘܒܚܳܐ ܠܰܐܒܳܐ ܕܰܒܢܳܐ ܠܥܺܕܬܳܐ ܗܳܐ ܡܶܢ ܠܽܘܩܕܰܡ܆ ܘܣܶܓܕܬܳܐ ܠܰܒܪܳܐ ܕܣܳܡ ܒܳܗ̇ ܦܰܓܪܶܗ ܠܚܽܘܣܳܝ ܚܰܘ̈ܒܶܐ܆ ܐܶܬܪܰܚܰܡ ܥܠܰܝܢ܀

ܥܺܕܬܳܐ ܕܰܒܢܳܐ ܣܠܶܩ ܚܰܘܺܝ ܠܶܗ ܠܡܽܘܫܶܐ ܪܰܒܳܐ܆ ܒܓܰܘ ܥܰܪ̈ܦܶܠܶܐ ܐܽܘܪܫܠܶܡ ܗ̱ܘܳܬ ܚܺܐܪܬܳܐ ܕܰܠܥܶܠ܆ ܐܶܬܪܰܚܰܡ ܥܠܰܝܢ܀

ܐܶܠܽܘܠܳܐ ܚܙܳܐ ܡܽܘܫܶܐ ܒܥܰܝܢܰܘ̈ܗ̱ܝ ܥܺܕ̄ܬܳܐ ܕܒܰܢܝܳܐ܆ ܠܳܐ ܣܳܦܶܩ ܗ̱ܘܳܐ ܕܟܽܠܳܗ̇ ܨܶܒܬܳܗ̇ ܢܶܚܽܘܬ ܢܶܥܒܶܕ܆ ܐܶܬܪܰܚܰܡ ܥܠܰܝܢ܀

ܚܙܳܐ ܠܰܫܟܺܝܢܬܳܐ ܕܫܰܪܝܳܐ ܒܓܰܘܳܗ̇ ܒܰܩܕܽܘܫ ܩܽܘ̈ܕܫܺܝܢ܆ ܘܰܡܝܰܒܒܺܝܢ ܒܳܗ̇ ܬܶܓ̈ܡܰܝ ܢܽܘܪܳܐ ܒܩܳܠܰܝ̈ ܫܽܘܒܚܳܐ܆ ܐܶܬܪܰܚܰܡ ܥܠܰܝܢ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗ̱ܕܳܢܳܐ

ܗܰܘ ܕܰܒܥܺܕܬܶܗ ܐܰܬܩܶܢ ܒܛܰܝܒܽܘܬܶܗ܆ ܡܰܕܒܰܚ ܩܽܘܕܫܳܐ ܪܽܘܚܳܢܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܰܒܛܽܘ̈ܦܣܶܐ ܫܡܰܝܳܢ̈ܶܐ ܐܰܩܺܝܡ܆ ܠܥܺܕܬܶܗ ܘܰܡܠܳܗ̇ ܡܶܢ ܫܽܘܒܚܶܗ܆ ܘܣܳܡ ܒܳܗ̇ ܡܰܕܒܚܳܐ ܡܚܰܣܝܳܢܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܰܠܥܺܕܬܶܗ ܨܰܒܶܬ ܒܰܚܢܳܢܶܗ܆ ܒܰܢ̈ܒܺܝܶܐ ܫܠܺܝ̈ܚܶܐ ܘܣܳܗ̈ܕܶܐ܆ ܘܰܡܠܳܗ̇ ܫܽܘ̈ܟܳܢܶܐ ܕܪܽܘܚܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܡܳܪܰܢ ܕܰܐܬܩܶܢ ܫܶܬܶܐܣܶܝ̈ܗ̇܆ ܕܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܥܰܠ ܐܺܝ̈ܕܰܘܗ̱ܝ ܩܰܕܺܝ̈ܫܳܬܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܰܒܚܽܘܒܶܗ ܐܰܪܟܶܢ ܪܰܒܽܘܬܶܗ܆ ܘܰܢܚܶܬ ܘܰܫܪܳܐ ܒܓܰܘ ܥܺܕܬܶܗ܆ ܘܕܰܟܝܳܗ̇ ܗ̱ܘܳܐ ܡܶܢ ܛܰܡܽܐܘܬܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܒܰܙܩܺܝܦܶܗ ܚܰܪܰܪ ܒܶܪ̈ܝܳܬܳܐ܆ ܘܒܰܕܡܶܗ ܚܰܝܳܐ ܦܪܰܩ ܥܳܠ̈ܡܶܐ܆ ܘܥܰܡ̱̈ܡܶܐ ܠܥܺܕܬܶܗ ܟܰܢܶܫ ܗ̱ܘܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܒܰܩܝܳܡܬܶܗ ܕܡܰܠܟܳܐ

ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܙܡܰܪܝ ܠܶܗ ܬܶܫܒܽܘܚܬܳܐ ܒܠܺܠܝܳܐ ܘܒܺܐܝܡܳܡܳܐ܆ ܠܗܰܘ ܕܰܒܚܽܘܒܶܗ ܐܶܬܬܰܚܬܺܝ܆ ܕܢܶܦܪܽܘܩ ܨܰܠܡܶܗ ܕܰܐܒܺܝܕ ܗ̱ܘܳܐ܆ ܘܢܰܣܩܶܗ ܥܰܡܶܗ ܠܰܫܡܰܝܳܐ܆ ܘܢܰܘܬܒܶܗ ܥܰܡܶܗ ܒܬܶܫܒܽܘܚܬܳܐ܀

ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܐܰܘܕܳܝ ܘܫܰܒܰܚܝ ܠܶܗ ܠܡܰܠܟܳܐ ܡܫܺܝܚܳܐ܆ ܕܦܰܪܩܶܟܝ ܒܰܕܡܶܗ ܩܰܕܺܝܫܳܐ܆ ܡܶܢ ܕܶܚܠܰܬ ܫ̈ܺܐܕܶܐ ܛܰܢ̈ܦܶܐ܆ ܘܣܳܡ ܒܶܟܝ ܦܰܓܪܶܗ ܘܰܕܡܶܗ܆ ܚܽܘܣܳܝܳܐ ܘܫܽܘܒܩܳܢܳܐ ܠܰܒܢܰܝ̈ܟܝ܀

ܒܰܨܠܽܘܬ ܐܶܡܳܟ ܦܳܪܽܘܩܰܢ܆ ܘܒܰܨܠܽܘܬ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ܆ ܐܰܫܪܳܐ ܫܰܝܢܳܟ ܘܰܫܠܳܡܳܟ܆ ܒܥܺܕܬܳܐ ܦܪܺܝܩܰܬ ܒܰܨܠܺܝܒܳܟ܆ ܘܚܰܣܳܐ ܚܰܘ̈ܒܶܐ ܕܥܰܢܺܝ̈ܕܶܐ܆ ܕܰܫܟܶܒܘ ܒܰܬܪܺܝܨܽܘܬ ܫܽܘܒܚܳܐ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܩܳܠܳܐ ܕܫܽܘܒܚܳܐ

ܒܪܺܝܟܽ ܗ̱ܘ ܡܫܺܝܚܳܐ. ܕܰܐܬܩܶܢ ܘܰܒܢܳܗ̇ ܠܥܺܕܰܬ ܩܽܘܕܫܳܐ܆ ܒܕܽܘܡ̈ܣܶܐ ܬܠܳܬܳܐ ܫܰܪܺܝܪ̈ܶܐ܆ ܢܒܺܝ̈ܶܐ ܫܠܺܝ̈ܚܶܐ. ܘܣܳܗ̈ܕܶܐ ܒܪ̈ܺܝܟܶܐ ܘܣܳܡ ܒܳܗ̇ ܥܰܪ̈ܩܶܐ܆ ܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ܀

ܛܽܘܒܰܝܟܝ ܥܺܕܬܳܐ. ܕܩܳܠܶܗ ܕܰܒܪܳܐ ܗܳܐ ܪܳܥܶܡ ܒܶܟܝ܆ ܘܠܳܐ ܡܶܬܬܙܺܝ̈ܥܳܢ ܫܶܬܶܐܣܰܝ̈ܟܝ܆ ܨܠܺܝܒܳܐ ܒܓܰܘܶܟܝ܆ ܐܰܝܟ ܢܳܛܽܘܪܳܐ ܘܡܰܕܒܰܚ ܩܽܘܕܫܳܐ܆ ܠܚܽܘܣܳܝ ܚܰܘ̈ܒܶܐ ܘܰܚܛܳܗ̈ܶܐ܀

ܐܶܡܰܪ ܡܳܪܰܢ. ܠܥܺܕܰܬ ܩܽܘܕܫܳܐ ܟܰܕ ܐܶܬܥܰܠܺܝ܆ ܡܶܢ ܛܽܘܪ ܙܰܝ̈ܬܶܐ ܠܘܳܬ ܐܰܒܽܘܗ̱ܝ܆ ܕܠܳܐ ܡܰܐܟܶܝܢ ܠܶܟܝ܆ ܡܽܘܟ̈ܠܶܐ ܕܰܫܝܽܘܠ ܐܳܦܠܳܐ ܛܪ̈ܽܘܢܶܝܗ̇܆ ܕܶܐܢܳܐ ܐܺܝܬܰܝ ܢܳܛܽܘܪܶܟܝ܀

ܠܟܽܠܗܽܘܢ ܥܰܡ̱̈ܡܶܐ. ܩܪܳܐ ܦܳܪܽܘܩܰܢ ܢܺܐܬܽܘܢ ܢܶܚܕܽܘܢ܆ ܒܰܚܠܽܘܠܳܗ̇ ܕܥܺܕܰܬ ܩܽܘܕܫܳܐ܆ ܦܰܓܪܶܗ ܘܰܕܡܶܗ. ܣܶܕܪܰܬ ܣܳܡܰܬ ܒܒܶܝܬ ܚܽܘܣܳܝܳܐ܆ ܘܫܳܩܠܳܐ ܠܶܗ ܠܚܽܘܣܳܝ ܚܰܘ̈ܒܶܐ܀

ܪܳܡ ܘܰܡܥܰܠܰܝ. ܝܽܘܡ ܚܽܘܕܳܬܶܟܝ ܥܺܕܰܬ ܩܽܘܕܫܳܐ܆ ܟܰܠܬܶܗ ܫܒܺܝ݂ܚܬܳܐ ܕܰܡܪܰܝܡܳܐ܆ ܒܪܺܝܟܽ ܗ̱ܘ ܕܡܰܟܪܶܟܝ. ܘܰܫܪܳܐ ܒܓܰܘܶܟܝ ܘܒܶܟܝ ܐܶܫܬܰܡܠܺܝܘ܆ ܐ̱ܪ̈ܳܙܶܐ ܫܒܺܝ݂̈ܚܶܐ ܘܩܰܕܺܝ̈ܫܶܐ܀

ܒܰܪ ܐܰܠܳܗܳܐ. ܕܪܰܡܪܶܡ ܩܰܪܢܳܗ̇ ܕܥܺܕܰܬ ܩܽܘܕܫܳܐ܆ ܒܰܛܶܠ ܡܶܢܳܗ̇ ܚܶܪ̈ܝܳܢܶܐ܆ ܫܰܪܰܪ ܣܶܟܶܝ̈ܗ̇. ܘܰܡܬܽܘܚ ܛܽܘ̈ܢܒܶܝܗ̇ ܥܰܠ ܟܽܠ ܥܰܡ̱̈ܡܺܝܢ܆ ܕܢܰܣܩܽܘܢ ܫܽܘܒܚܳܐ ܠܪܰܒܽܘܬܳܟ܀

ܫܡܰܝ̈ܳܐ ܚܳܕܶܝܢ. ܘܰܐܪܥܳܐ ܪܳܘܙܳܐ ܘܝܰܡܳܐ ܕܳܐܶܨ܆ ܒܚܽܘܕܳܬܳܗ̇ ܕܥܺܕܰܬ ܩܽܘܕܫܳܐ܆ ܘܢܰܣܩܽܘܢ ܫܽܘܒܚܳܐ. ܠܰܒܪܳܐ ܕܦܰܪܩܳܗ̇ ܒܚܰܫܶܗ ܘܡܰܘܬܶܗ܆ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ܀

ܫܽܘܒܚܳܐ ܠܰܐܒܳܐ. ܘܣܶܓܕܬܳܐ ܠܰܒܪܳܐ ܘܬܰܘܕܺܝ ܠܪܽܘܚܳܐ܆ ܩܰܕܺܝܫܳܐ ܐܳܦ ܡܰܚܝܳܢܳܐ܆ ܬܠܺܝܬܳܝܽܘܬܳܐ ܣܓܺܕܰܬ. ܡܶܢ ܟܽܠ ܕܩܰܕܫܰܬ ܠܥܺܕܬܳܐ܆ ܡܶܢ ܕܶܒ̈ܚܶܐ ܕܫ̈ܺܐܕܶܐ ܛܰܢ̈ܦܶܐ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܠܗܰܘ ܕܰܛܥܺܝܢܳܐ ܡܰܪܟܰܒܬܳܐ

ܒܪܺܝܟ ܕܰܒܢܳܐ ܠܥܺܕܰܬ ܩܽܘܕܫܳܐ: ܘܨܰܒܬܳܗ̇ ܒܥܽܘܬܪ̈ܶܐ ܫܡܰܝܳܢ̈ܶܐ: ܘܚܰܕܺܝ ܒܝܰܘܡܳܐ ܕܚܽܘܕܳܬܳܗ̇: ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ: ܗ̄ܘܗ̄܀

ܛܽܘܒܰܝܟܝ ܥܺܕܬܳܐ ܡܗܰܝܡܰܢܬܳܐ: ܕܡܳܪܝܳܐ ܫܰܡܠܺܝ ܩܽܘܕܳܫܶܟܝ: ܨܰܒܶܬܝ ܠܰܒܢܰܝ̈ܟܝ ܕܰܟܝܳܐܺܝܬ: ܕܢܰܣܩܽܘܢ ܫܽܘܒܚܳܐ ܠܡܳܪܽܘܬܶܗ: ܗ̄ܘܗ̄܀

ܛܽܘܒܰܝܟܝ ܕܥܰܠ ܦܰܣܰܬ ܐܺܝ̈ܕܰܘܗܝ: ܒܢܳܐ ܗ̱ܘܳܐ ܘܫܰܪܰܪ ܫܶܬܶܐܣܰܝ̈ܟܝ: ܙܡܰܪܝ ܫܽܘܒܚܳܐ ܒܦܽܘܡܳܐ ܕܝܰܠ̈ܕܰܝܟܝ: ܕܒܰܕܡܶܗ ܦܰܪܩܶܟܝ ܡܶܢ ܛܽܘܥܝܰܝ: ܗ̄ܘܗ̄܀

ܢܰܛܰܪܶܝܗ̇ ܡܳܪܝ ܒܰܨܠܺܝܒܳܟ: ܠܥܺܕܰܬ ܩܽܘܕܫܳܐ ܡܗܰܝܡܰܢܬܳܐ: ܘܰܚܬܽܘܡ ܝܰܠ̈ܕܶܝܗ̇ ܒܰܨܠܺܝܒܳܟ: ܕܢܰܘܕܽܘܢ ܠܳܟ ܥܰܠ ܦܳܘܪܩܳܢܳܟ: ܗ̄ܘܗ̄܀

ܐܰܚܕܰܪ ܠܳܗ̇ ܫܽܘܪܳܐ ܪܳܡܳܐ: ܐܰܠܳܗܳܐ ܣܰܓܺܝ ܪ̈ܰܚܡܶܐ: ܘܰܙܓܽܘܪ ܡܶܢܳܗ̇ ܒܰܚܢܳܢܳܟ: ܣܶܕ̈ܩܶܐ ܒܺܝ̈ܫܶܐ ܘܚܶܪ̈ܝܳܢܶܐ: ܗ̄ܘܗ̄܀

ܐܰܘܕܳܝ ܠܶܗ ܥܺܕܰܬ ܩܽܘܕܫܳܐ: ܠܗܰܘ ܕܶܐܬܳܐ ܘܦܰܪܩܶܟܝ ܒܰܕܡܶܗ: ܘܰܐܣܶܩܝ ܩܳܠܰܝ̈ ܬܶܫܒܽܘܚܬܳܐ: ܠܡܳܪܝܳܐ ܡܚܰܣܝܳܢܳܐ ܕܚܰܘ̈ܒܰܝܟܝ: ܗ̄ܘܗ̄܀

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ: ܕܩܰܕܫܳܗ̇ ܗ̱ܘܳܐ ܠܥܺܕܰܬ ܩܽܘܕܫܳܐ: ܘܰܡܠܳܗ̇ ܩܽܘܕܫܳܐ ܕܰܣܪ̈ܳܦܶܐ: ܐܰܝܟܰܢ ܕܰܚܙܳܐ ܐܶܫܰܥܝܳܐ: ܗ̄ܘܗ̄܀

ܓܰܢ̱ܒܳܪ ܥܳܠ̈ܡܶܐ ܕܰܒܬܽܘܩܦܶܗ: ܐܰܬܩܶܢ ܥܳܠ̈ܡܶܐ ܘܦܶܢ̈ܝܳܬܳܐ: ܨܰܒܶܬ ܡܳܪܝ ܠܥܺܕܰܬ ܩܽܘܕܫܳܐ: ܒܚܰܝܠܳܐ ܕܪܽܘܚܳܐ ܩܰܕܺܝܫܳܐ: ܗ̄ܘܗ̄܀

ܐ̱ܚܪܺܢܳܐ

ܩܳܠܳܐ ܒܩ̄: ܒܓܰܘ ܥܺܕܰܬ ܩܽܘܕܫܳܐ

ܦܬܰܚܝ ܬܰܪ̈ܥܰܝܟܝ ܘܠܳܐ ܢܶܬܬܰܚܕܽܘܢ܆ ܠܳܐ ܒܠܺܠܝܳܐ ܘܠܳܐ ܒܺܐܝܡܳܡܳܐ܆ ܕܢܶܥܠܽܘܢ ܡܰܠ̈ܟܶܐ ܒܬܳܓܰܝ̈ܗܽܘܢ܆ ܘܥܰܡ̱̈ܡܶܐ ܟܰܕ ܙܳܡܪܺܝܢ ܫܽܘܒܚܳܐ܀

ܒܪܺܝܟ ܕܰܕܒܰܚ ܢܰܦܫܶܗ ܚܠܳܦܰܝܟܝ܆ ܘܦܰܓܪܶܗ ܝܰܗ̱ܒܠܶܟܝ ܡܶܐܟܽܘܠܬܳܐ܆ ܘܰܕܡܶܗ ܟܳܣܳܐ ܕܦܽܘܪܩܳܢܳܐ܆ ܚܽܘܣܳܝܳܐ ܠܶܟܝ ܘܰܠܝܰܠ̈ܕܰܝܟܝ܀

ܒܪܺܝܟ ܕܥܰܒܕܳܗ̇ ܠܥܺܕܰܬ ܩܽܘܕܫܳܐ܆ ܒܶܝܬ ܓܰܘܣܳܐ ܠܟܽܠܗܽܘܢ ܥܰܡ̱̈ܡܶܐ܆ ܕܥܳܐܠܺܝܢ ܠܳܗ̇ ܒܣܽܘܓܳܐܐ ܕܚܰܘ̈ܒܶܐ܆ ܘܢܳܦܩܺܝܢ ܡܶܢܳܗ̇ ܙܰܟܳܝ̈ܶܐ܀

ܒܰܨܠܽܘܬܳܐ ܕܥܺܕܰܬ ܩܽܘܕܫܳܐ܆ ܥܰܡ ܕܰܢܒܺܝ̈ܶܐ ܘܰܠܫܠܺܝ̈ܚܶܐ܆ ܚܰܣܳܐ ܡܳܪܰܢ ܒܛܰܝܒܽܘܬܳܟ܆ ܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ܀

ܫܰܝܶܢ ܡܳܪܰܢ ܒܰܨܠܺܝܒܳܟ܆ ܠܰܐܪܒܰܥ ܦܶܢ̈ܝܳܬܶܗ ܕܥܳܠܡܳܐ܆ ܘܒܰܛܶܠ ܣܶܕ̈ܩܶܐ ܘܚܶܪ̈ܝܳܢܶܐ܆ ܡܶܢ ܥܺܕ̈ܳܬܳܐ ܘܕܰܝܪ̈ܳܬܳܐ܀

ܩܰܕܺܝܫ ܩܰܕܺܝܫ ܩܰܕܺܝܫܰܬ܆ ܐܰܠܳܗܳܐ ܫܪܶܐ ܒܩܰܕܺܝ̈ܫܶܐ܆ ܒܪܺܝܟ ܐܰܢ̱ܬ ܡܶܢ ܢܽܘܗܪܳܐ ܕܰܪܕܰܦ܆ ܠܚܶܫܽܘܟܳܐ ܡܶܢ ܦܶܢ̈ܝܳܬܳܐ܀

ܬܶܥܽܘܠ ܒܳܥܽܘܬܰܢ ܩܕܳܡܰܝܟ܆ ܒܪܳܐ ܕܰܐܠܳܗܳܐ ܡܪܰܚܡܳܢܳܐ܆ ܘܢܰܛܰܪ ܠܥܺܕܬܳܟ ܘܰܠܝܰܠ̈ܕܶܝܗ̇܆ ܕܗܳܐ ܙܳܡܪܺܝܢ ܠܳܟ ܬܶܫܒܽܘܚܬܳܐ܀

ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ܆ ܕܰܡܟܰܪܬ ܠܥܺܕܬܳܐ ܩܰܕܺܝܫܬܳܐ܆ ܘܰܫܪܰܝܬ ܒܳܗ̇ ܚܰܝ݂ܠܳܐ ܕܩܽܘܕܫܳܟ܆ ܘܗܳܐ ܙܳܡܪܳܐ ܠܳܟ ܬܶܫܒܽܘܚܬܳܐ܀

ܒܰܫܡܰܝܳܐ ܐܺܝܬܰܘܗܝ ܟܽܘܪܣܝܳܟ: ܘܰܒܬܺܒܶܝܠ ܣܳܡܬܳܗ̇ ܠܥܺܕܬܳܟ: ܘܨܰܒܶܬܬܳܗ̇ ܐܳܦ ܗܰܕܰܪܬܳܗ̇: ܘܗܳܐ ܙܳܡܪܳܐ ܠܳܟ ܬܶܫܒܽܘܚܬܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܥܺܕܰܬ ܩܽܘܕܫܳܐ܆ ܙܡܰܪܝ ܫܽܘܒܚܳܐ ܠܰܡܩܰܕܫܳܢܶܟܝ܆ ܕܟܰܢܶܫ ܝܰܠ̈ܕܰܝܟܝ ܠܓܰܘ ܥܽܘܒܶܟܝ ܘܩܽܘܕܫܳܐ ܡܠܳܐ ܐܶܢܽܘܢ܆ ܐܶܬܕܰܟܪܰܝܢ ܡܳܪܝܳܐ܀

ܐܳܡܪܳܐ ܥܺܕܬܳܐ܆ ܕܠܳܐ ܕܳܚܠܳܐ ܐ̱ܢܳܐ ܡܶܢ ܒܺܝܫܳܐ܆ ܕܫܽܘܪ̈ܶܐ ܪ̈ܳܡܶܐ ܟܪܺܝܟܺܝܢ ܠܺܝ ܘܰܐܠܳܗܳܐ ܒܓܰܘܝ ܫܪܶܐ܆ ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܒܪܺܝܟܽ ܗ̱ܘ ܡܫܺܝܚܳܐ܆ ܕܰܓܒܳܟܝ ܥܺܕܬܳܐ ܩܰܕܺܝܫܬܳܐ܆ ܘܝܰܗ̱ܒ ܠܶܟܝ ܦܰܓܪܶܗ ܘܰܕܡܶܗ ܚܽܘܣܳܝܳܐ ܠܝܰܠ̈ܕܰܝܟܝ܆ ܐܶܬܕܰܟܪܰܝܢ ܡܳܪܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܳܐ ܕܰܒܚܽܘܒܶܗ

ܥܺܕܰܬ ܩܽܘܕܫܳܐ: ܙܡܰܪܝ ܫܽܘܒܚܳܐ ܠܚܰܬܢܳܐ ܕܡܰܟ̰ܪܶܟܝ: ܘܰܟܬܰܒ ܦܶܪܢܺܝܬܶܟܝ ܒܰܕܡܶܗ: ܘܰܐܬܩܶܢ ܒܶܟܝ ܡܰܕܒܚܳܐ: ܘܝܰܗ̱ܒ ܠܶܟܝ ܦܰܓܪܶܗ ܩܰܕܺܝܫܳܐ: ܘܰܕܡܶܗ ܚܽܘܣܳܝܳܐ ܕܚܰܘ̈ܒܶܐ: ܙܡܰܪܝ ܠܶܗ ܫܽܘܒܚܳܐ ܥܰܡ ܝܰܠ̈ܕܰܝܟܝ: ܐܺܝܡܳܡܳܐ ܘܠܺܠܝܳܐ܀

ܫܽܘܒܚܳܐ

ܡܳܪܰܢ ܝܶܫܽܘܥ: ܕܪܳܥܶܗ ܐܳܦ ܬܽܘܩܦܶܗ ܕܰܐܒܳܐ: ܢܰܚܶܡ ܒܚܰܝܠܳܟ ܥܰܫܺܝܢܳܐ ܠܡܺܝ̈ܬܶܐ ܕܰܒܩܰܒܪ̈ܶܐ: ܘܰܐܠܒܶܫ ܐܶܢܽܘܢ ܬܶܫܒܽܘܚܬܳܐ ܘܡܶܢ ܝܰܡܺܝܢܳܟ ܢܶܬܒܰܣܡܽܘܢ: ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ ܪܳܚܶܡ ܐ̱ܢܳܫ̈ܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܙܳܕܶܩ ܕܢܶܗܘܶܐ
ܬܳܐ ܐܰܒܪܳܗܳܡ ܒܰܕܶܩ ܠܰܢ

ܠܡܺܐܢܳܐ ܗ̱ܝ ܪܰܒܳܐ܆ ܘܒܶܝܬ ܓܰܘܣܳܐ ܥܺܕܬܳܐ ܒܰܝܬܳܐ ܕܰܨܠܰܘ̈ܳܬܳܐ܆ ܕܟܽܠ ܫܽܘ̈ܟܳܢܺܝܢ܆ ܐܳܦ ܫܽܘܒܩܳܢܳܐ ܕܰܚܛܳܗ̈ܶܐ ܡܫܰܟܢܳܐ ܘܝܳܗܒܳܐ܆ ܥܰܠܘ ܚܰܛܳܝ̈ܶܐ܆ ܘܰܗܘܰܘ ܬܰܝܳܒ̈ܶܐ܆ ܥܰܠܘ ܙܰܠܺܝ̈ܠܶܐ ܘܰܗܘܰܘ ܬܰܡܺܝ̈ܡܶܐ܆ ܥܰܠܘ ܠܳܗ̇ ܒܺܝ̈ܫܶܐ ܘܶܐܫܬܰܚܠܰܦܘ ܘܰܗܘܰܘ ܛܳܒܷ̈ܐ܆ ܘܗܳܐ ܡܰܣܩܺܝܢ ܠܶܗ ܫܽܘܒܚܳܐ܆ ܒܗܳܢܳܐ ܝܰܘܡܳܐ ܕܚܽܘܕܳܬܳܗ̇܆ ܠܡܰܠܟܳܐ ܡܫܺܝܚܳܐ܆ ܕܰܢܚܶܬ ܘܰܫܪܳܐ ܒܣܳܚܪ̈ܳܬܳܗ̇܆ ܗ̄ ܒܪܺܝܟܽ ܗ̱ܘ ܕܰܒܢܳܗ̇܀

ܫܽܘܒܚܳܐ

ܪܰܒ ܗ̱ܽܘ ܐ̱ܪܳܙܶܟܝ܆ ܘܰܫܒܺܝ݂ܚ ܫܽܘܠܛܳܢܳܐ ܕܝܰܗ̱ܒ ܠܶܟܝ ܒܰܪ ܐܰܠܳܗܳܐ܆ ܕܰܒܪܽܘܚ ܩܽܘܕܫܳܐ܆ ܐܶܨܛܰܒܰܬܘ ܟܽܠܗܽܘܢ ܝܰܠ̈ܕܰܝܟܝ ܒܗܰܝܡܳܢܽܘܬܳܐ܆ ܪܳܥܝܶܟܝ ܗܳܐ ܡܠܶܐ ܪܽܘܚܳܐ ܩܰܕܺܝܫܳܐ܆ ܕܶܐܬܝܰܗܒܰܬ ܠܶܗ ܣܝܳܡ ܐܺܝܕ ܟܳܗܢܽܘܬܳܐ܆ ܡܶܢ ܗܳܝ ܕܡܰܣܪܰܚ܆ ܟܳܗ̈ܢܶܐ ܙܗܰܝ̈ܳܐ ܘܫܰܡܳܫ̈ܶܐ ܘܰܡܩܰܒܠܺܝܢ ܪܽܘܚ ܩܽܘܕܫܳܐ܆ ܘܡܰܘܗܰܒܬܳܐ ܕܦܰܪܰܩܠܺܝܛܳܐ܆ ܘܩܳܪܶܐ ܠܪܽܘܚܳܐ܆ ܘܰܡܩܰܕܶܫ ܦܰܓܪܳܐ ܘܰܕܡܳܐ܆ ܗ̄ ܠܚܽܘܣܳܝ ܚܰܘ̈ܒܶܐ܀

ܡܶܢ ܥܳܠܰܡ

ܙܳܕܶܩ ܕܢܶܗܘܶܐ: ܕܽܘܟܪܳܢܳܐ ܠܟܺܐܢ̈ܶܐ ܕܰܫܟܶܒܘ ܒܗܰܝܡܳܢܽܘܬܳܐ. ܕܡ̣ܶܢ ܫܽܘܪܳܝܳܐ: ܠܫܽܘܠܳܡܳܐ ܫܦܰܪܘ ܠܰܐܠܳܗܳܐ ܒܕܽܘܒܳܪ̈ܰܝܗܽܘܢ. ܗܳܢܽܘܢ ܕܰܗܘܰܘ: ܗܰܝܟ̈ܠܶܐ ܪ̈ܽܘܚܳܢܶܐ: ܘܰܒܗܽܘܢ ܥܶܡܪܰܬ݀: ܪܽܘܚܶܗ ܕܰܡܫܺܝܚܳܐ. ܗܳܢܽܘܢ ܕܳܐܬܶܐ ܡܳܪܗܽܘܢ ܒܝܰܘܡܶܗ ܕܢܽܘܚܳܡܳܐ ܘܰܡܢܰܚܶܡ ܘܰܡܚܰܕܶܬ: ܘܡܰܠܒܶܫ ܫܽܘܒܚܳܐ ܠܦܰܓܪ̈ܰܝܗܽܘܢ: ܘܥܳܐܠܺܝܢ ܥܰܡܶܗ: ܠܰܓܢܽܘܢܳܐ ܡܠܶܐ ܚܰܕܘ̈ܳܬܳܐ ܗ̄ ܘܝܳܪܬܺܝܢ ܚܰܝ̈ܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܕܠܳܐ ܫܶܩܝܳܐ ܕܙܰܒܢܳܐ ܐܰܦܪܰܥ ܗ̱ܘܳܐ

ܐܳܡܪܳܐ ܠܶܗ ܥܺܕܬܳܐ ܠܰܡܫܺܝܚܳܐ܆ ܕܙܳܢܺܝܬܳܐ ܗ̱ܘܺܝܬ ܡܛܰܢܰܦܬܳܐ܆ ܥܒܶܕܰܝܢܝ ܠܳܟ ܟܰܠܬܳܐ ܘܰܡܟܺܝܪܬܳܐ܆ ܩܰܕܺܝܫܳܐ ܘܒܰܪ ܩܰܕܺܝܫܳܐ܆ ܩܰܕܶܫܰܝܢܝ ܡܶܢ ܨܳܐܝܽܘܬܳܐ܆ ܘܚܰܠܶܠܰܝܢܝ ܡܶܢ ܛܰܡܽܐܘܬܳܐ܆ ܘܶܐܡܰܪ ܠܺܝ ܕܗܳܐ ܐܶܬܩܰܕܰܫܬܝ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܘܰܗܘܰܝܬܝ ܟܰܠܬܳܐ ܡܫܰܒܰܚܬܳܐ܀

ܫܽܘܒܚܳܐ

ܒܰܬܠܳܬܳܐ ܐ̱ܪ̈ܳܙܶܐ ܩܰܕܺܝ̈ܫܶܐ܆ ܪܫܺܝܡܳܐ ܥܺܕܬܳܐ ܘܰܡܩܰܕܫܳܐ܆ ܒܡܽܘܪܽܘܢ ܕܰܟܝܳܐ ܘܩܰܕܺܝܫܳܐ܆ ܘܦܰܓܪܳܐ ܘܰܕܡܳܐ ܡܚܰܣܝܳܢܳܐ܆ ܙܳܥ ܒܺܝܫܳܐ ܕܰܚܙܳܐ ܫܽܘܦܪ̈ܶܝܗ̇܆ ܘܫܽܘ̈ܟܳܢܶܝܗ̇ ܐܰܠܳܗܳܝ̈ܶܐ܆ ܘܫܰܪܺܝ ܡܰܝܠܶܠ ܟܰܕ ܐܳܡܰܪ܆ ܕܗܳܐ ܢܳܛܽܘܪܳܗ̇ ܐܰܠܳܗܳܐ܆ ܘܒܳܗܶܬ ܐ̱ܢܳܐ ܕܰܐܩܪܶܒ ܥܰܡܳܗ̇܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܦܶܬܓܳܡܳܐ: ܒܢܳܐ ܥܰܠ ܪܰܘܡܳܐ ܡܰܩܕܫܶܗ: ܘܰܐܬܩܢܶܗ ܒܰܐܪܥܳܐ ܥܕܰܡܳܐ ܠܥܳܠܰܡ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܐܰܘܕܳܝ ܥܺܕܬܳܐ ܒܰܙܡܺܝܪ̈ܳܬܶܟܝ ܫܰܦܺܝܪ̈ܳܬܳܐ܆

ܘܩܰܪܶܒܝ ܠܰܒܪܳܐ ܕܳܫ̈ܢܶܐ ܕܫܽܘܒܚܳܐ ܒܝܽܘܡ ܚܽܘܕܳܬܶܟܝ܀

ܒܰܪ ܐܰܠܳܗܳܐ ܗܰܒ ܠܳܗ̇ ܫܰܝܢܳܐ ܠܥܺܕܰܬ ܩܽܘܕܫܳܐ܆ ܘܰܙܓܽܘܪ ܡܶܢܳܗ̇ ܣܶܕ̈ܩܶܐ ܘܟܶܫ̈ܠܶܐ ܘܰܦܠܺܝ̈ܓܘܳܬܳܐ܆ ܚܬܽܘܡ ܒܝܰܕ ܨܠܺܝܒܳܟ ܬܰܪ̈ܥܶܝܗ̇ ܪ̈ܳܡܶܐ ܡܶܢ ܢܶܟܝ̈ܳܢܶܐ܆ ܘܠܳܐ ܢܶܥܽܘܠ ܠܳܗ̇ ܕܪܳܫܳܐ ܫܓܺܝܫܳܐ ܡܶܢ ܒܳܨܽܘܝ̈ܶܐ܀

ܬܶܬܡܰܟܰܟ ܒܳܗ̇ ܥܰܙܺܝܙܽܘܬܳܐ ܕܫܰܠܺܝܛܳܢ̈ܶܐ܆ ܘܗܺܝ ܒܰܠܚܽܘܕܶܝܗ̇ ܬܶܐܚܽܘܕ ܐܰܪܥܳܐ ܡܳܪܳܢܳܐܺܝܬ܆ ܘܰܬܕܺܝܫ ܡܰܠ̈ܟܶܐ ܒܥܶܩܒܳܐ ܪܳܡܬܳܐ ܕܰܨܠܺܝܒܽܘܬܳܟ܆ ܘܡܳܪ̈ܰܘܳܬܳܐ ܒܢܺܝܪܳܐ ܕܫܰܝܢܳܐ ܬܶܟܕܽܘܢ ܐܶܢܽܘܢ܀

ܐܰܝܢܳܐ ܕܡܰܩܪܶܒ ܥܰܡܶܟܝ ܥܺܕܬܳܐ ܣܽܘܣܝܶܗ ܢܶܦܶܠ܆

ܘܰܒܗܰܘ ܓܶܐܪܳܐ ܕܡܳܬܚܳܐ ܩܶܫܬܶܗ ܒܣܶܛܪܶܗ ܢܶܒܠܰܥ܀