ܨܠܰܘ̈ܳܬܳܐ ܕܡܶܨܛܰܠܝܳܢ ܩܕܳܡ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܚܰܕ ܐܰܠܳܗܳܐ ܫܰܪܺܝܪܳܐ ܐܰܡܺܝܢ܀

ܩܰܕܺܝܫ ܩܰܕܺܝܫ ܩܰܕܺܝܫ ܡܳܪܝܳܐ ܚܰܝܠܬ̣ܳܢܳܐ ܗܰܘ ܕܰܡܠܶܝܢ ܫܡܰܝܳܐ ܘܰܐܪܥܳܐ ܡܶܢ ܬܶܫܒ̈ܚܳܬܶܗ ܐܽܘܫܰܥܢܳܐ ܒܰܡܪ̈ܰܘܡܶܐ. ܒܪܺܝܟ ܕܶܐܬ̣ܳܐ ܘܳܐܬ̣ܶܐ ܒܰܫܡܶܗ ܕܡܳܪܝܳܐ. ܬܶܫܒܽܘܚܬܳܐ ܒܰܡܪ̈ܰܘܡܶܐ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܶܐܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܶܐܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܰܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܽܘܬܳܐ ܕܰܡܥܺܝܪܳܢܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܟܶܢ ܡܰܙܡܽܘܪܳܐ. ܒܪܟܡܪܝ: H

ܒܰܪܶܟܘ ܠܡܳܪܝܳܐ ܟܽܠܟܽܘܢ ܥܰܒܕܰܘ̈ܗܝ ܕܡܳܪܝܳܐ܀

ܐܰܥܺܝܪ ܘܰܐܩܺܝܡܰܝܢܝ. ܡܶܢ ܫܶܢܬܳܐ ܕܡܰܗܡܝܳܢܽܘܬܳܐ ܠܬܶܫܒܽܘܚܬܳܐ ܕܪܰܒܽܘܬܳܟ. ܡܳܪܝܳܐ ܐܰܠܳܗܳܐ܀

ܒܰܪܶܟܡܳܪܝ: ܐܰܝܠܶܝܢ ܕܩܳܝܡܺܝܢ ܒܒܰܝܬܶܗ ܕܡܳܪܝܳܐ ܒܠܰܝ̈ܠܰܘܳܬܳܐ܀

ܪ̈ܰܚܡܰܝܟ ܐܰܥܺܝܪܽܘܢܝ. ܕܰܒܦܶܠܓܶܗ ܕܠܺܠܝܳܐ ܐܶܫܰܒܚܳܟ. ܫܰܟܶܢ ܠܺܝ ܫܽܘܒܩܳܢ ܚܰܘ̈ܒܶܐ. ܡܳܪܝܳܐ ܐܰܠܳܗܳܐ܀

ܐܰܪܺܝܡܘ ܐܺܝܕܰܝ̈ܟܽܘܢ ܠܩܽܘܕܫܳܐ ܘܒܰܪܶܟܘ ܠܡܳܪܝܳܐ܀

ܐܶܬܕܰܟܪܶܬ ܒܠܺܠܝܳܐ. ܠܰܫܡܳܟ ܣܓܺܝܕܳܐ ܘܩܰܕܺܝܫܳܐ. ܘܩܳܡܶܬ ܕܰܐܘܕܶܐ ܠܳܟ ܘܶܐܫܰܒܚܳܟ ܪܳܚܶܡܢܳܫܳܐ܀

ܢܒܰܪܟܳܟ ܡܳܪܝܳܐ ܡܶܢ ܨܶܗܝܽܘܢ ܗܰܘ ܕܰܥܒܰܕ ܫܡܰܝܳܐ ܘܰܐܪܥܳܐ܀

ܐܶܬܕܰܟܪܶܬ ܠܺܝ ܬܽܘܒ. ܕܥܺܝܪ̈ܶܐ ܡܶܡܬܽܘܡ ܠܳܐ ܕܳܡܟܺܝܢ. ܘܩܳܡܶܬ ܕܰܐܟܘܳܬܗܽܘܢ. ܐܶܫܰܒܚܳܟ ܪܳܚܶܡܢܳܫܳܐ܀

ܬܶܥܽܘܠܝ ܬܶܫܒܽܘܚܬܝ ܩܕܳܡܰܝܟ ܡܳܪܝܳܐ ܘܰܒܡܶܠܬܳܟ ܐܰܚܳܢܝ. ܬܶܥܽܘܠܝ ܒܳܥܽܘܬܝ ܩܕܳܡܰܝܟ ܡܳܪܝܳܐ ܘܰܒܡܺܐܡܪܳܟ ܦܰܨܳܢܝ܀

ܚܰܘܒܰܝ̈ ܤܰܓܺܝܺܐܝ̈ܢ ܘܒܶܝܬ ܕܺܝܢܳܐ ܗܳܐ ܚܳܝܪܺܝܢ ܠܺܝ. ܢܓܽܘܠܽܘܢ ܥܠܰܝ ܪ̈ܰܚܡܰܝܟ. ܘܚܰܤܳܐ ܠܺܝ ܟܽܠ ܕܰܚܛܺܝܬ ܠܳܟ܀

ܢܰܒܰܥ ܠܶܫܳܢܝ ܡܺܐܡܪܳܟ ܡܶܛܽܠ ܕܟܽܠܗܽܘܢ ܦܽܘܩܕܳܢܰܝ̈ܟ ܒܙܰܕܺܝܩܽܘܬܳܐ܀

ܐܰܝܟ ܕܚܰܤܺܝܬ ܚܰܘܒܶܝ̈ܗ̇. ܕܗܳܝ ܚܰܛܳܝܬܳܐ ܕܒܶܝܬ ܫܶܡܥܽܘܢ. ܚܰܤܳܐ ܠܺܝ ܚܰܘ̈ܒܰܝ. ܡܳܪܝܳܐ ܐܰܠܳܗܳܐ܀

ܢܡܰܠ̈ܠܳܢ ܤܶܦ̈ܘܳܬܝ ܬܶܫܒ̈ܚܳܬܳܟ ܟܰܕ ܬܰܠܶܦܰܝܢܝ ܦܽܘܩܕܳܢܰܝ̈ܟ. ܬܥܰܕܪܰܢܝ ܐܺܝܕܳܟ ܡܶܛܽܠ ܕܰܨܒܺܝܬ ܒܦܽܘܩܕܳܢܰܝ̈ܟ܀

ܚܛܺܝܬ ܡܳܪܝ ܘܠܳܐ ܬܒܰܥܬܳܢܝ. ܘܬܳܒܶܬ ܘܩܰܒܶܠܬܳܢܝ. ܢܓܽܘܠܽܘܢ ܥܠܰܝ ܪ̈ܰܚܡܰܝܟ. ܘܚܰܤܳܐ ܠܺܝ ܟܽܠ ܕܰܚܛܺܝܬ ܠܳܟ܀

ܤܰܟܝܰܬ ܢܰܦܫܝ ܠܦܽܘܪܩܳܢܳܟ ܘܰܒܢܳܡܽܘܤܳܟ ܪܢܺܝܬ. ܬܺܚܶܐ ܢܰܦܫܝ ܘܰܬܫܰܒܚܳܟ ܘܕܺܝܢܳܟ ܗ̱ܽܘ ܢܥܰܕܪܰܢܝ܀

ܫܳܡܰܥ ܘܠܳܐ ܡܰܗܡܶܐ. ܘܥܳܢܶܐ ܘܦܳܪܶܩ ܘܰܡܫܰܘܙܶܒ. ܚܽܘܢܰܝܢܝ̱ ܒܛܰܝܒܽܘܬܳܟ ܘܚܰܣܳܢܝ̱ ܒܰܡܪܰܚܡܳܢܽܘܬܳܟ܀

ܐܶܬܛܥܺܝܬ ܐܰܝܟ ܥܶܪܒܳܐ ܐܰܒܺܝܕܳܐ. ܒܥܺܝܘܗ̱ܝ ܠܥܰܒܕܳܟ ܡܶܛܽܠ ܕܦܽܘܩ̈ܕܳܢܰܝܟ ܠܳܐ ܛܥܺܝܬ. ܘܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܐܶܬܕܰܟܪܶܬ ܕܰܚܛܺܝܬ. ܘܰܒܚܰܫܳܐ ܫܦܰܥ̈ܝ ܗ̱ܘܰܝ̈ ܕܶܡ̈ܥܰܝ. ܢܓܽܘܠܽܘܢ ܥܠܰܝ ܪ̈ܰܚܡܰܝܟ. ܘܚܰܤܳܐ ܠܺܝ ܟܽܠ ܕܰܚܛܺܝܬ ܠܳܟ܀

ܫܰܒܰܚܘ ܠܡܳܪܝܳܐ ܟܽܠܟܽܘܢ ܥܰܡ̱̈ܡܶܐ. ܫܰܒܚܳܝ̈ܗ̱ܝ ܟܽܠܗܶܝܢ ܐܶܡܘ̈ܳܬܳܐ. ܡܶܛܽܠ ܕܥܶܫܢܰܬ ܥܠܰܝܢ ܛܰܝܒܽܘܬܶܗ. ܘܫܰܪܺܝܪܳܐܺܝܬ ܕܡܳܪܝܰܐ ܗ̱ܘ ܠܥܳܠܰܡ܀

ܒܽܐܘܪܺܫܠܶܡ ܕܰܠܥܶܠ. ܘܰܒܥܺܕܬܳܐ ܕܒܶܝܬ ܐܰܪ̈ܥܳܢܶܐ. ܥܒܶܕ ܡܳܪܝ ܕܽܘܟܪܳܢܳܐ. ܠܥܰܒܕܰܝ̈ܟ ܕܰܫܟܶܒܘ ܥܰܠ ܤܰܒܪܳܟ܀

ܫܽܘܒܚܳܐ: ܫܽܘܒܚܳܐ ܠܳܟ ܡܳܪܰܢ. ܕܥܺܝܪ̈ܶܐ ܠܳܐ ܡܨܶܝܢ ܚܳܙܶܝܢ ܠܳܟ. ܘܳܐܕܳܡ ܥܰܦܪܳܢܳܐ. ܥܰܠ ܐܺܝܕܰܘ̈ܗ̱ܝ ܗܳܐ ܡܙܰܝܰܚ ܠܳܟ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܘܡܐ ܩܕܡܝܐ ܕܠܠܝܐ

ܕܝܳܠܕܰܬ ܐܰܠܳܗܳܐ
ܨܠܘܬܐ ܕܒܬܪ ܡܥܝܪܢܐ
ܥܶܩܒܳܐ ܒܩ̄: ܗܳܢܰܘ ܝܰܪܚܳܐ H

ܒܬܽܘܠܬܳܐ ܩܪܳܬܰܢܝ. ܕܺܐܡܰܪ ܫܰܪܒܳܗ̇ ܟܰܕ ܬܳܗܰܪ ܐ̱ܢܳܐ. ܗܰܒܠܺܝ ܬܶܗܪܳܟ ܒܰܪ ܐܰܠܳܗܳܐ. ܘܶܐܥܬܰܪ ܟܶܢܳܪܝ ܡܶܢ ܡܰܘܗܰܒܬܳܟ. ܕܰܠܝܳܠܶܕܬܳܟ ܐܶܨܽܘܪ ܨܰܠܡܳܐ ܕܰܡܠܶܐ ܫܽܘܦܪ̈ܶܐ܀

ܣܶܕܪܳܐ ܕܝܳܠܕܰܬ ܐܰܠܳܗܳܐ

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܢܽܘܗܪܳܐ ܡܬܽܘܡܳܝܳܐ ܕܡܶܢ ܢܽܘܗܪܳܐ ܐܰܠܳܗܳܝܳܐ ܨܡܰܚ. ܘܡܶܢ ܥܽܘܒܳܐ ܒܬܽܘܠܳܝܳܐ ܘܟܰܪܣܳܐ ܐܶܡܗܳܝܬܳܐ ܣܰܒܪܳܐ ܕܚܰܝ̈ܶܐ ܫܘܰܚ. ܠܗܰܘ ܕܰܠܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ ܐܰܘܪܶܒ ܘܙܰܝܰܚ. ܕܠܶܗ ܝܳܐܶܐ ܫܽܘܒܚܳܐ ܐܺܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܐܰܝܠܶܝܢ ܠܶܫܳܢ̈ܶܐ ܣܳܦܩܺܝܢ ܕܰܢܡܰܠܠܽܘܢ ܩܽܘܠܳܣܰܝ̈ܟܝ̱ ܐܳܘ ܒܬܽܘܠܬܳܐ ܕܟܺܝܬܳܐ ܘܡܰܠܝܰܬ ܟܽܠ ܫܽܘܦܪ̈ܺܝܢ ܐܶܡܶܗ ܕܰܡܫܺܝܚܳܐ ܦܳܪܽܘܩܰܢ. ܗܰܘ ܕܰܒܝܰܕ ܡܶܬܓܰܠܝܳܢܽܘܬܶܗ ܦܳܪܽܘܩܳܝܬܳܐ ܛܰܠܶܩ ܡܶܢܰܢ ܠܚܶܫܽܘܟܽܘܬܳܐ ܕܰܚܛܺܝܬܳܐ. ܘܰܠܛܽܘܥܝܰܝ ܕܡܶܬܚܰܒܠܳܢܽܘܬܳܐ. ܒܰܕܓܽܘܢ ܠܶܟܝ̱ ܝܳܕܥܺܝܢܰܢ ܐܳܘ ܡܥܺܝܢܳܐ ܕܚܰܝ̈ܶܐ ܢܶܒܥܳܐ ܕܦܽܘܪܩܳܢܳܐ ܚܰܩܠܳܐ ܡܒܰܪܰܟܬܳܐ ܘܣܶܒܶܠܬܳܐ ܕܡܰܣܩܳܐ ܠܰܫܡܰܝܳܐ. ܘܥܰܠ ܗܳܕܶܐ ܟܰܕ ܬܳܗܪܺܝܢܰܢ ܐܳܡܪܺܝܢܰܢ: ܛܽܘܒܰܝܟܝ̱ ܡܰܪܟܰܒܬܳܐ ܒܶܣܪܳܢܳܝܬܳܐ ܕܡܳܪܳܐ ܕܡܰܠܰܐܟ̈ܶܐ ܒܶܟܝ̱ ܫܪܳܐ. ܛܽܘܒܰܝܟܝ̱ ܣܰܢܝܳܐ ܡܶܬܝܰܕܥܳܢܳܐ ܕܳܐܪܽܘܢܶܗ ܕܪܳܡܳܐ ܡܶܢܶܟܝ ܐܶܬܚܙܺܝ. ܘܗܳܫܳܐ ܐܳܘ ܡܰܠܝܰܬ ܛܰܝܒܽܘܬܳܐ. ܐܰܦܺܝܣܝ̱ ܥܰܡܰܢ ܠܰܒܪܳܐ ܡܬܽܘܡܳܝܳܐ ܕܡܶܢܶܟܝ̱ ܕܢܰܚ. ܕܠܰܚܛܳܗܰܝ̈ܢ ܢܶܠܚܶܐ ܒܛܰܝܒܽܘܬܶܗ ܘܰܠܣܰܟܠ̈ܘܳܬܰܢ ܢܶܥܛܶܐ ܒܰܚܢܳܢܶܗ. ܘܢܰܫܘܶܐ ܠܰܢ ܘܰܠܥܰܢܺܝ̈ܕܰܝܢ ܠܰܐܘܳܢ̈ܶܐ ܐܽܘܪ̈ܺܫܠܶܡܳܝܶܐ ܘܰܠܥܽܘ̈ܒܶܐ ܐܰܒܪ̈ܳܗܳܡܳܝܶܐ. ܐܰܝܟܰܢܳܐ ܕܡܶܢ ܦܽܘܡ ܟܽܠܰܢ ܫܽܘܒܚܳܐ ܢܶܣܰܩ ܠܶܗ ܘܠܰܐܒܽܘܗܝ ܘܰܠܪܽܘܚܶܗ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ ܐܰܡܺܝܢ܀

ܩܠܐ ܒܩ̄: ܕܩܘܩܝܐ: H

ܚܕܳܐ ܛܠܺܝܬܳܐ ܡܶܢ ܒܶܝܬ ܕܰܘܺܝܕ ܕܰܫܡܳܗ̇ ܡܰܪܝܰܡ. ܗܘܳܬ ܡܰܪܟܰܒܬܳܐ ܘܰܛܥܶܢܬܶܗ ܠܦܳܪܽܘܩܶܗ ܕܥܳܠܡܳܐ. ܡܶܤܬܰܒܪܳܐ ܠܺܝ ܕܗܺܝ ܪܰܒܳܐ ܗ̱ܝ ܤܰܓܺܝ. ܡܶܢ ܡܰܪܟܰܒܬܳܐ ܕܰܚܙܳܐ ܚܰܙܩܺܝܐܶܠ. ܠܗܳܝ ܐܺܝܬ ܠܳܗ̇ ܐܰܦ̈ܶܐ ܘܓܺܝܓ̈ܠܶܐ ܡ̈ܰܠܳܠܳܬܳܐ. ܘܰܠܡܰܪܝܰܡ ܦܽܘܡܳܐ ܕܙܳܡܰܪ ܠܳܟ ܫܽܘܒܚܳܐ ܡܳܪܝܳܐ ܗ̄ ܨܠܽܘܬܳܗ̇ ܬܥܰܕܰܪܝ ܠܰܢ܀

ܡܽܘܢ ܐܶܩܪܶܝܟܝ ܐܳܘ ܒܰܪ̱ܬ ܕܰܘܺܝܕ ܠܳܐ ܝܳܕܰܥ ܐ̱ܢܳܐ. ܘܰܐܝܢܳܐ ܫܡܳܐ ܠܶܟܝ ܐܶܟܰܢܶܐ ܡܰܪܝܰܡ ܠܳܐ ܪܓܺܝܫ ܐ̱ܢܳܐ. ܒܬܽܘܠܬܳܐ ܐܶܩܪܶܝܟܝ ܒܪܳܐ ܝܺܢܶܩ ܡܶܢܶܟܝ. ܐܶܡܳܐ ܐܶܩܪܶܝܟܝ ܒܬܽܘܠܰܝ̈ܟܝ ܩܰܝܳܡܺܝܢ. ܡܶܟܺܝܠ ܝܳܠܕܰܬ ܐܰܠܳܗܳܐ ܩܳܪܶܐ ܐ̱ܢܳܐ ܠܶܟܝ. ܘܢܶܒܗܰܬ ܤܳܦܪܳܐ ܕܳܪܽܘܫܳܐ ܕܒܳܨܶܐ ܠܶܗ ܠܝܰܠܕܶܟܝ ܗ̄ ܚܪܶܡ ܗ̱ܽܘ ܕܒܳܨܶܐ ܠܶܗ܀

ܫܽܘܒܚܳܐ: ܝܳܠܕܰܬ ܐܰܠܳܗܳܐ ܒܬܽܘܠܬܳܐ ܕܽܘܟܪܳܢܶܟܝ ܠܒܽܘܪܟܬܳܐ. ܠܪ̈ܰܚܺܝܩܶܐ ܘܰܠܩܰܪ̈ܺܝܒܶܐ ܦܰܢܳܝ ܫ̈ܶܐܠܳܬܗܽܘܢ. ܠܰܐܝܢܳܐ ܕܰܟܪܺܝܗ ܗܰܒܝ ܠܶܗ ܚܽܘܠܡܳܢܳܐ. ܘܰܐܝܢܳܐ ܕܰܡܥܳܩ ܒܥܳܝ ܠܶܗ ܠܽܘܒܳܒܳܐ. ܘܰܐܝܢܳܐ ܕܒܺܝܫܳܐ ܫܳܚܶܩ ܠܶܗ ܛܪܽܘܕܺܝܘܗ̱ܝ ܡܶܢܶܗ. ܒܰܨܠܽܘܬܶܟܝ ܘܰܒܒܳܥܽܘܬܶܟܝ ܪ̈ܰܚܡܶܐ ܢܶܗܘܽܘܢ ܥܠܰܝܢ ܗ̄ ܨܠܽܘܬܶܟܝ ܬܥܰܕܰܪܝ ܠܰܢ܀

ܡܶܢ ܥܳܠܰܡ: ܟܽܠܳܗ̇ ܐܰܪܥܳܐ ܕܶܐܦܶܤܳܘܤ ܛܰܠܳܐ ܪܶܤܡܰܬ. ܟܰܕ ܐܰܝܬܺܝ ܡܳܪܝ ܝܽܘܚܰܢܳܢ ܟܬܳܒ̈ܶܐ ܕܰܒܬܽܘܠܬܳܐ. ܕܰܪܫܺܝܡ ܗ̱ܘܳܐ ܒܗܽܘܢ ܕܢܶܗܘܶܐ ܕܽܘܟܪܳܢܳܗ̇. ܕܰܡܒܰܪܰܟܬܳܐ ܬܠܳܬ ܙܰܒܢܺܝ̈ܢ ܒܫܰܢ̱ܬܳܐ. ܒܟܳܢܽܘܢ ܢܶܗܘܶܐ ܥܰܠ ܙܰܪ̈ܥܶܐ ܘܒܺܐܝܳܪ ܥܰܠ ܫܶܒ̈ܠܶܐ. ܘܒܳܐܒ ܝܰܪܚܳܐ ܡܶܛܽܠ ܓܽܘܦ̈ܢܶܐ ܕܐ̱ܪܳܙ ܚܰܝ̈ܶܐ ܨܺܝܪ ܒܗܶܝܢ ܗ̄ ܨܠܽܘܬܳܗ̇ ܬܥܰܕܰܪܝ ܠܰܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ H

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ. ܠܰܨܠܰܘ̈ܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܤܶܐ ܠܰܢ܀

ܡܰܠܝܰܬ ܪ̈ܰܚܡܶܐ ܐܰܦܺܝܤܝ ܘܰܒܥܳܝ ܠܰܡܠܶܐ ܪ̈ܰܚܡܶܐ. ܕܢܶܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܳܐ ܕܫ̈ܳܐܠܳܢ ܪ̈ܰܚܡܶܐ܀

ܒܬܽܘܠܬܳܐ ܕܩܽܘܕܫܳܐ ܩܪܳܬܰܢܝ ܝܰܘܡܳܢ ܕܶܐܡܰܠܶܠ ܠܳܗ̇: ܢܫܰܦܶܐ ܫܶܡܥܰܢ ܠܫܰܪܒܳܗ̇ ܦܰܐܝܳܐ ܕܠܳܐ ܢܶܨܛܰܥܰܪ. ܫܡܰܝܳܐ ܕܬܰܪܬܶܝܢ ܕܰܫܪܳܐ ܒܥܽܘܒܳܗ̇ ܡܳܪܶܐ ܪܰܘܡܳܐ: ܘܰܕܢܰܚ ܡܶܢܳܗ̇ ܕܢܶܛܪܽܘܕ ܚܶܫܟܳܐ ܡܶܢ ܦܶܢ̈ܝܳܬܳܐ܀

ܒܪܺܝܟܬܳܐ ܕܢܶܫ̈ܶܐ ܕܠܰܘܛܬܳܐ ܕܰܐܪܥܳܐ ܒܳܗ̇ ܐܶܬܥܰܩܪܰܬ: ܘܰܓܙܳܪ ܕܺܝܢܳܐ ܡܶܢܳܗ̇ ܘܰܠܟܳܐ ܫܩܰܠ ܫܽܘܠܳܡܳܐ. ܢܰܟܦܬܳܐ ܕܐ̱ܪ̈ܳܙܶܐ ܘܡܰܠܝܰܬ ܫܽܘܦܪ̈ܶܐ ܕܩܰܕܺܝܫܽܘܬܳܐ: ܕܰܙܥܽܘܪ ܗ̱ܽܘ ܦܽܘܡܝ ܕܢܶܬܡܰܠܰܠ ܒܶܗ ܫܰܪܒܳܐ ܕܰܥܠܶܝܗ̇܀

ܒܰܪ̱ܬ ܡܶܤ̈ܟܺܢܶܐ ܕܰܗܘܳܬ ܐܶܡܳܐ ܠܒܰܪ ܐܰܠܳܗܳܐ: ܘܝܶܗܒܰܬ ܥܽܘܬܪܳܐ ܠܥܳܠܡܳܐ ܤܢܺܝܩܳܐ ܕܢܺܚܶܐ ܡܶܢܶܗ. ܐܶܠܦܳܐ ܕܛܶܥܢܰܬ ܛܽܘܒ̈ܶܐ ܘܓܰܙ̈ܶܐ ܡܶܢ ܒܶܝܬ ܐܰܒܳܐ. ܘܶܐܬܳܬ ܤܰܦܩܰܬ ܥܽܘܬܪܳܐ ܒܰܐܬܪܰܢ ܕܰܡܓܰܙܰܝ ܗ̱ܘܳܐ܀

ܫܽܘܒܚܳܐ ܠܰܐܒܳܐ ܕܰܓܒܳܐ ܠܡܰܪܝܰܡ ܕܡܶܤܟܺܢܬܳܐ ܗ̱ܘܳܬ: ܘܤܶܓܕܬܳܐ ܠܰܒܪܳܐ ܕܡܶܤܟܺܢܳܐܺܝܬ ܢܚܶܬ ܘܰܫܪܳܐ ܒܳܗ̇. ܬܰܘܕܺܝ ܠܪܽܘܚܳܐ ܕܰܒܡܶܤ̈ܟܺܢܶܐ ܦܫܺܝܩ ܠܶܗ ܕܢܶܥܡܰܪ: ܚܰܕ ܗ̱ܽܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

ܒܰܨܠܰܘ̈ܳܬܳܗ̇ ܕܗܳܝ ܕܰܛܥܶܢܬܳܟ ܝܰܪ̈ܚܶܐ ܬܶܫܥܳܐ. ܒܰܪ ܐܰܠܳܗܳܐ ܐܰܥܒܰܪ ܡܶܢܰܢ ܫܰܒ̈ܛܶܐ ܕܪܽܘܓܙܳܐ܀

ܨܠܽܘܬܳܐ

ܥܰܡ ܡܰܠܰܐܟ̈ܶܐ ܕܒܰܫܡܰܝܳܐ ܕܠܳܐ ܫܳܠܶܝܢ ܡܶܢ ܬܶܫܒܽܘܚܬܳܐ ܢܰܙܥܶܩ ܘܢܺܐܡܰܪ ܬܠܳܬ ܙܰܒܢܺܝ̈ܢ:

ܒܪܺܝܟ ܗܽܘ ܐܺܝܩܳܪܶܗ ܕܡܳܪܝܳܐ ܡܶܢ ܐܰܬܪܶܗ ܠܥܳܠܰܡ܀
ܒܪܺܝܟ ܗܽܘ ܐܺܝܩܳܪܶܗ ܕܡܳܪܝܳܐ ܡܶܢ ܐܰܬܪܶܗ ܠܥܳܠܰܡ܀
ܡ̇ܒܰܪܰܟ ܗܽܘ ܐܺܝܩܳܪܶܗ ܕܡܳܪܝܳܐ ܡܶܢ ܐܰܬܪܶܗ ܠܥܳܠܡܺܝܢ܀

ܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܐܶܬܪܰܚܰܡܝ̱ ܥܠܰܝܢ܀
ܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܐܶܬܪܰܚܰܡܝ̱ ܥܠܰܝܢ܀
ܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܚܽܘܣܝ̱ ܘܶܐܬܪܰܚܰܡܝ̱ ܥܠܰܝܢ܀

ܩܰܕܺܝܫܰܬ ܘܰܡ̇ܫܰܒܰܚ ܐܰܢ̱ܬ ܠܥܳܠܰܡ܀
ܩܰܕܺܝܫܰܬ ܘܰܡ̇ܫܰܒܰܚ ܐܰܢ̱ܬ ܠܥܳܠܰܡ܀
ܩܰܕܺܝܫܰܬ ܘܰܡ̇ܒܰܪܰܟ ܫܡܳܟ ܠܥܳܠܡܺܝܢ܆
ܫܽܘܒܚܳܐ ܠܳܟ ܡܳܪܰܢ܆ ܫܽܘܒܚܳܐ ܠܳܟ ܡܳܪܰܢ܆
ܫܽܘܒܚܳܐ ܠܳܟ ܣܰܒܪܰܢ ܠܥܳܠܰܡ܆ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܰܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܩܘܡܐ ܕܬܪܝܢ ܕܠܠܝܐ
ܕܩܰܕܺܝ̈ܫܶܐ

ܥܶܩܒܳܐ ܒܩ̄: ܗܳܢܰܘ ܝܰܪܚܳܐ H

ܒܪܺܝܟ ܗ̱ܽܘ ܚܰܝܠܳܐ ܕܚܰܝܶܠ ܐܶܢܽܘܢ ܠܤܳܗ̈ܕܶܐ ܒܪ̈ܺܝܟܶܐ. ܒܪܺܝܟ ܗ̱ܽܘ ܕܰܐܘܪܶܒ ܕܽܘܟܪ̈ܳܢܰܝܗܽܘܢ. ܘܝܰܩܰܪ ܐܶܢܽܘܢ ܒܰܐܪܒܰܥ ܦܶܢ̈ܝܳܢ. ܒܪܺܝܟ ܗ̱ܽܘ ܕܰܐܪܡܺܝ ܡܠܽܘܐܳܐ ܕܚܽܘܒܶܗ ܒܪ̈ܶܥܝܳܢܰܝܗܽܘܢ܀

ܣܶܕܪܳܐ ܕܩܰܕܺܝ̈ܫܶܐ

ܦܪܽܘܡܝܽܘܢ

ܬܶܫܒܽܘܚܬܳܐ ܠܚܰܕ ܐܰܒܳܐ ܩܰܕܺܝܫܳܐ ܕܰܒܢܰܦ̈ܫܳܬܳܐ ܕܕܳܚ̈ܠܰܘܗ̱ܝ ܥܳܡܰܪ܆ ܠܚܰܕ ܒܪܳܐ ܤܓܺܝܕܳܐ ܕܰܒܓܰܪ̈ܡܶܐ ܕܩܰܕܺܝܫܰܘ̈ܗ̱ܝ ܡܕܰܝܰܪ܆ ܠܚܰܕ ܪܽܘܚܳܐ ܩܰܕܺܝܫܳܐ ܕܰܟܠܺܝ̈ܠܶܐ ܕܫܽܘܒܚܳܐ ܠܰܐܬܠܺܝ̈ܛܰܘܗ̱ܝ ܓܳܕܶܠ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝܺܢ.

ܣܶܕܪܳܐ

ܟܰܕ ܠܰܢܒܺܝ̈ܶܐ ܘܠܰܫܠܺܝ̈ܚܶܐ ܘܰܠܤܳܗ̈ܕܶܐ ܩܰܕܺܝ̈ܫܶܐ ܡܩܰܠܤܺܝܢܰܢ ܘܒܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܡܪܰܡܪܡܺܝܢܰܢ. ܡܶܠܬܳܐ ܡܰܢ ܒܨܺܝܪܳܐ ܘܬܰܪܥܺܝܬܳܐ ܒܰܤܝܳܢܳܐ ܕܰܚܛܺܝܬܳܐ ܛܰܒܺܝܥܳܐ. ܘܕܰܬܩܰܠܶܤܝ ܐܶܢܽܘܢ ܐܰܝܟ ܕܘܳܠܝܳܐ ܘܙܳܕܩܳܐ ܠܳܐ ܡܰܨܝܳܐ. ܘܟܰܕ ܡܦܺܝ̈ܤܳܢܶܐ ܘܒܰܥܳܝ̈ܶܐ ܚܠܳܦܰܝܢ ܥܒܺܝ̈ܕܺܝܢ ܘܥܰܠ ܓܰܙܰܝ̈ ܡܳܪܗܽܘܢ ܫܰܠܺܝ̈ܛܺܝܢ. ܒܰܕܓܽܘܢ ܨܠܰܘ̈ܳܬܰܢ ܠܘܳܬܗܽܘܢ ܢܩܰܪܶܒ ܘܬܰܟܫ̈ܦܳܬܰܢ ܠܘܳܬܗܽܘܢ ܢܫܰܘܫܶܛ ܐܰܝܟܰܢܳܐ ܕܗܶܢܽܘܢ ܢܶܫܶܐܠܽܘܢ ܡܶܢ ܡܳܪܗܽܘܢ ܕܰܢܫܰܟܶܢ ܠܰܢ ܒܝܰܕ ܨܠܰܘ̈ܳܬܗܽܘܢ ܚܽܘܤܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ. ܠܰܢ ܘܰܠܟܽܠܗܽܘܢ ܝܰܠܕܶܝ̈ܗ̇ ܕܥܺܕܬܳܐ ܩܰܕܺܝܫܬܳܐ. ܐܰܝܟܰܢܳܐ ܕܰܚܢܰܢ ܘܗܶܢܽܘܢ ܢܰܤܶܩ ܫܽܘܒܚܳܐ ܘܢܶܬܶܠ ܬܰܘܕܺܝܬܳܐ ܠܰܐܒܳܐ ܤܓܺܝܕܳܐ ܡܢܰܨܚܳܢܗܽܘܢ. ܘܠܰܒܪܳܐ ܫܒܺܝܚܳܐ ܡܟܰܠܠܳܢܗܽܘܢ ܘܰܠܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܕܰܐܓܽܘܢܰܝ̈ܗܽܘܢ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܠܐ ܒ̄ܩ: ܕܩܽܘܩܳܝܳܐ. H

ܕܟܺܝܪ ܡܽܘܫܶܐ ܪܺܝܫ ܡܰܒܽܘܥܳܐ ܕܰܢܒܺܝܽܘܬܳܐ. ܘܫܶܡܥܽܘܢ ܪܺܝܫܳܐ ܕܰܫܠܺܝ̈ܚܶܐ ܘܦܰܘܠܳܘܣ ܐܰܪܕܺܝܟܠܳܐ. ܕܗܽܘ ܐܰܟܬܶܒ ܠܰܢ ܒܶܐܓܰܪܬܳܐ ܕܪܽܘܡܺܝ. ܕܰܠܕܽܘܟܪܳܢܳܐ ܕܟܺܐܢ̈ܶܐ ܢܶܫܬܰܘܬܰܦ. ܗܳܢܽܘܢ ܕܰܐܚܶܒܘ ܠܰܐܠܳܗܳܐ ܡܶܢ ܟܽܠܶܗ ܠܶܒܗܽܘܢ. ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܪ̈ܰܚܡܶܐ ܢܶܗܘܽܘܢ ܥܠܰܝܢ ܗ̄ ܨܠܽܘܬܗܽܘܢ ܬܥܰܕܰܪܝ ܠܰܢ܀

ܡܽܘܫܶܐ ܪܺܝܫܳܐ ܕܥܰܬܺܝܩܬܳܐ ܘܫܶܡܥܽܘܢ ܕܰܚܕܰܬܳܐ. ܬܪ̈ܰܝܗܽܘܢ ܕܳܡܶܝܢ ܠܰܚܕܳܕ̈ܶܐ ܘܰܐܠܳܗܳܐ ܒܗܽܘܢ ܫܪܶܐ. ܡܽܘܫܶܐ ܐܰܚܶܬ ܠܽܘܚ̈ܶܐ ܕܢܳܡܽܘܤܳܐ. ܘܫܶܡܥܽܘܢ ܩܰܒܶܠ ܩܠܺܝ̈ܕܶܐ ܕܡܰܠܟܽܘܬܳܐ. ܡܽܘܫܶܐ ܒܢܳܐ ܡܰܫܟܰܢܙܰܒܢܳܐ ܘܫܶܡܥܽܘܢ ܥܺܕܬܳܐ ܒܢܳܐ. ܡܶܢ ܥܰܬܺܝܩܬܳܐ ܘܰܚܕܰܬܳܐ ܠܳܟ ܫܽܘܒܚܳܐ ܡܳܪܝܳܐ ܗ̄ ܨܠܽܘܬܗܽܘܢ ܬܥܰܕܰܪܝ ܠܰܢ܀

ܫܽܘܒܚܳܐ: ܝܽܘܚܰܢܳܢ ܟܳܪܽܘܙ ܩܽܘܫܬܳܐ ܘܶܐܤܛܶܦܰܢܳܘܣ. ܘܬܶܐܳܘܕܳܘܪܳܘܣ ܢܰܨܺܝܚܳܐ ܘܓܶܘܰܪܓܺܝܣ ܤܳܗܕܳܐ. ܤܰܪܟܺܝܣ ܘܒܰܟܽܘܣ ܦܳܠ̈ܚܶܐ ܢܰܨܺܝ̈ܚܶܐ. ܘܡܳܪܝ ܩܽܘܪܝܰܩܳܘܣ ܘܝܽܘܠܺܝܛܺܝ ܐܶܡܶܗ. ܫܡܽܘܢܺܝ ܐܶܡܳܐ ܡܒܰܪܰܟܬܳܐ ܥܰܡ ܫܰܒܥܳܐ ܝܰܠ̈ܕܶܝܗ̇. ܘܰܐܪܒܥܺܝܢ ܤܳܗ̈ܕܶܐ ܩܰܕܺܝ̈ܫܶܐ ܘܓܰܒܝܳܐ ܡܳܪܝ ܒܶܗܢܰܡ ܗ̄ ܨܠܽܘܬܗܽܘܢ ܬܥܰܕܰܪܝ ܠܰܢ܀

ܡܶܢ ܥܳܠܰܡ: ܬܠܳܬܳܐ ܛܰܒ̈ܥܶܐ ܫܰܪܺܝܪ̈ܶܐ ܐܺܝܬܰܝܗܽܘܢ ܤܳܗ̈ܕܶܐ. ܘܠܳܐ ܡܨܶܐ ܒܺܝܫܳܐ ܢܳܟܽܘܠܳܐ ܥܳܐܶܠ ܒܰܝܢܳܬܗܽܘܢ. ܩܛܺܝܠ ܝܽܘܚܰܢܳܢ ܒܤܰܝܦܶܗ ܕܺܐܝܪܽܘܕܺܝܣ. ܘܶܐܤܛܶܦܰܢܳܘܣ ܒܰܪܓܽܘܡܝܳܐ ܕܟܺܐܦ̈ܶܐ. ܡܳܪܝ ܓܶܘܰܪܓܺܝܣ ܢܰܨܺܝܚܳܐ ܡܶܢ ܓܶܝܓܠܳܐ ܠܤܰܝܦܳܐ. ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ ܪ̈ܰܚܡܶܐ ܢܶܗܘܽܘܢ ܥܠܰܝܢ ܗ̄ ܨܠܽܘܬܗܽܘܢ ܬܥܰܕܰܪܝ ܠܰܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ H

ܡܳܪܰܢ ܐܶܬܪܰܚܰܡܥܠܰܝܢ: ܒܰܨܠܽܘܬܗܽܘܢ ܕܰܡܢܺܝ̈ܚܳܢܰܝܟ܀

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ: ܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܢܒܺܝ̈ܶܐ ܕܰܒܪܽܘܚܳܐ ܡܰܠܠܽܘܟ: ܫܠܺܝ̈ܚܶܐ ܕܤܰܒܰܪܘ ܓܶܠܝܳܢܳܟ. ܘܤܳܗ̈ܕܶܐ ܕܡܺܝܬܘ ܡܶܛܽܠ ܚܽܘܒܳܟ. ܢܦܺܝܤܽܘܢܳܟ ܪܰܚܶܡܥܠܰܝܢ܀

ܠܰܢܒܺܝ̈ܶܐ ܫܠܺܝ̈ܚܶܐ ܘܤܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀

ܐܰܦܺܝܤܘ ܥܰܡܰܢ ܩܰܕܺܝ̈ܫܶܐ: ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ. ܕܢܰܥܒܰܪ ܘܰܢܒܰܛܶܠ ܡܶܢܰܢ: ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

ܫܽܘܒܚܳܐ ܠܚܰܝܠܳܐ ܕܚܰܝܶܠܟܽܘܢ: ܢܒܺܝ̈ܶܐ ܘܰܫܠܺܝ̈ܚܶܐ ܘܤܳܗ̈ܕܶܐ. ܕܰܙܟܰܝܬܽܘܢ ܘܶܐܬܢܰܨܰܚܬܽܘܢ: ܒܢܺܝܫܶܗ ܪܰܒܳܐ ܕܰܨܠܺܝܒܳܐ܀

ܡܳܪܰܢ ܐܶܬܪܰܚܰܡܥܠܰܝܢ: ܒܰܨܠܽܘܬܗܽܘܢ ܕܰܡܢܺܝ̈ܚܳܢܰܝܟ܀

ܒܰܨܠܽܘܬܗܽܘܢ ܘܰܒܒܳܥܽܘܬܗܽܘܢ: ܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܨܠܽܘܬܳܐ

ܥܰܡ ܡܰܠܰܐܟ̈ܶܐ ܕܒܰܫܡܰܝܳܐ ܕܠܳܐ ܫܳܠܶܝܢ ܡܶܢ ܬܶܫܒܽܘܚܬܳܐ ܢܰܙܥܶܩ ܘܢܺܐܡܰܪ ܬܠܳܬ ܙܰܒܢܺܝ̈ܢ:

ܒܪܺܝܟ ܗܽܘ ܐܺܝܩܳܪܶܗ ܕܡܳܪܝܳܐ ܡܶܢ ܐܰܬܪܶܗ ܠܥܳܠܰܡ܀
ܒܪܺܝܟ ܗܽܘ ܐܺܝܩܳܪܶܗ ܕܡܳܪܝܳܐ ܡܶܢ ܐܰܬܪܶܗ ܠܥܳܠܰܡ܀
ܡ̇ܒܰܪܰܟ ܗܽܘ ܐܺܝܩܳܪܶܗ ܕܡܳܪܝܳܐ ܡܶܢ ܐܰܬܪܶܗ ܠܥܳܠܡܺܝܢ܀

ܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܐܶܬܪܰܚܰܡܝ̱ ܥܠܰܝܢ܀
ܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܐܶܬܪܰܚܰܡܝ̱ ܥܠܰܝܢ܀
ܬܠܺܝܬܳܝܽܘܬܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܚܽܘܣܝ̱ ܘܶܐܬܪܰܚܰܡܝ̱ ܥܠܰܝܢ܀

ܩܰܕܺܝܫܰܬ ܘܰܡ̇ܫܰܒܰܚ ܐܰܢ̱ܬ ܠܥܳܠܰܡ܀
ܩܰܕܺܝܫܰܬ ܘܰܡ̇ܫܰܒܰܚ ܐܰܢ̱ܬ ܠܥܳܠܰܡ܀
ܩܰܕܺܝܫܰܬ ܘܰܡ̇ܒܰܪܰܟ ܫܡܳܟ ܠܥܳܠܡܺܝܢ܆
ܫܽܘܒܚܳܐ ܠܳܟ ܡܳܪܰܢ܆ ܫܽܘܒܚܳܐ ܠܳܟ ܡܳܪܰܢ܆
ܫܽܘܒܚܳܐ ܠܳܟ ܣܰܒܪܰܢ ܠܥܳܠܰܡ܆ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܰܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܩܘܡܐ ܕܬܠܬܐ ܕܠܠܝܐ
ܕܰܬܝܳܒܽܘܬܳܐ

ܥܶܩܒܳܐ ܒܩ̄: ܗܳܢܰܘ ܝܰܪܚܳܐ H

ܘܳܝܠܺܝ ܕܰܗܘܺܝܬ ܒܰܝܢܳܬ ܟܺܐܢ̈ܶܐ ܘܠܳܐ ܐܶܬܥܰܕܪܶܬ. ܥܰܠ ܕܠܳܐ ܝܶܠܦܶܬ ܕܽܘܒܳܪ̈ܰܝܗܽܘܢ. ܗܘܺܝܬ ܢܽܘܟܪܳܝܳܐ ܠܰܚܠܽܘܠܰܝ̈ܗܽܘܢ. ܘܗܳܐ ܛܳܪܕܺܝܢ ܠܺܝ ܥܒ̈ܳܕܰܝ ܒܺܝ̈ܫܶܐ ܡܶܢ ܤܶܕܪ̈ܰܝܗܽܘܢ܀

ܣܶܕܪܳܐ ܕܰܬܝܳܒܽܘܬܳܐ

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܪܳܡܳܐ ܘܰܡܥܰܠܝܳܐ ܒܺܐܝܬܽܘܬܶܗ ܕܡܶܢ ܚܰܝ̈ܠܰܘܳܬܳܐ ܥܶܠܳܝ̈ܶܐ ܡܶܙܕܰܝܰܚ ܘܡܶܢ ܐܰܪ̈ܥܳܢܳܝܶܐ ܡܶܣܬܓܶܕ ܘܡܶܫܬܰܒܰܚ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ

ܣܶܕܪܳܐ

ܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܳܐ ܘܡܶܬܟܰܫܦܺܝܢܰܢ ܠܳܟ ܕܰܬܒܰܪܶܟ ܠܥܰܒ̈ܕܰܝܟ ܘܣܳܓܽܘܕܰܝ̈ܟ ܗܳܢܽܘܢ ܕܶܐܬܟܰܢܰܫܘ ܒܰܫܡܳܟ ܩܰܕܺܝܫܳܐ ܕܙܰܝܢܳܐ ܪܽܘܚܳܢܳܝܳܐ ܢܶܠܒܫܽܘܢ ܘܚܽܘܒܳܐ ܘܰܐܘܝܽܘܬܳܐ ܢܶܬܥܰܛܦܽܘܢ. ܠܒܺܝܫܳܐ ܘܰܠܚܰܝܠܶܗ ܢܶܙܟܽܘܢ. ܘܥܰܠ ܦܳܬܽܘܪܳܐ ܕܺܝܠܳܟ ܪܽܘܚܳܢܳܝܳܐ ܢܶܬܒܰܣܡܽܘܢ. ܚܰܣܳܐ ܚܰܘܒܰܝ̈ܗܽܘܢ ܫܒܽܘܩ ܒܽܘܨܳܪ̈ܰܝܗܽܘܢ ܘܰܐܥܒܰܪ ܣܰܟ̈ܠܘܳܬܗܽܘܢ ܒܣܽܘܓܳܐܐ ܕܪ̈ܰܚܡܰܝܟ. ܘܫܽܘܒܚܳܐ ܘܪܽܘܡܪܳܡܳܐ ܢܰܣܶܩ ܠܳܟ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܠܐ ܒܩ̄ ܕܩܽܘܩܳܝܳܐ: H

ܦܶܬܓܳܡܳܐ: ܢܰܘܕܽܘܢ ܠܳܟ ܡܳܪܝܳܐ ܥܰܒ̈ܕܰܝܟ ܗ̄: ܒܠܺܠܝܳܐ ܢܩܽܘܡ ܘܢܰܘܕܶܐ ܠܶܗ ܠܒܰܪ ܐܰܠܳܗܳܐ. ܕܰܒܠܺܠܝܳܐ ܗܳܘܝܳܐ ܩܥܳܬܳܐ ܕܳܐܬܶܐ ܒܶܗ ܡܳܪܝܳܐ. ܢܳܦܩܺܝܢ ܠܽܐܘܪܥܶܗ ܟܺܐܢ̈ܶܐ ܘܙܰܕܺܝ̈ܩܶܐ. ܢܒܺܝ̈ܶܐ ܫܠܺܝ̈ܚܶܐ ܘܤܳܗ̈ܕܶܐ ܩܰܕܺܝ̈ܫܶܐ. ܘܥܳܐܠܺܝܢ ܥܰܡܶܗ ܠܰܓܢܽܘܢܳܐ ܡܠܶܐ ܚܰܕܘ̈ܳܬܳܐ. ܘܝܳܪܬܺܝܢ ܚܰܝ̈ܶܐ ܘܡܰܠܟܽܘܬܳܐ ܘܬܶܫܒܽܘܚܬܳܐ ܙܳܡܪܺܝܢ ܗ̄ ܠܡܳܪܝܳܐ ܬܶܫܒܽܘܚܬܳܐ܀

ܠܰܝܬ ܠܺܠܝܳܐ ܕܠܳܐ ܐܶܬܕܟܰܪܬܳܟ ܥܰܠ ܬܰܫܘܺܝܬܝ ܡܳܪܝܳܐ. ܘܰܒܠܰܝ̈ܠܰܘܳܬܳܐ ܪܢܺܝܬ ܒܳܟ ܕܰܕܚܺܝܠ ܐܰܢ̱ܬ ܤܰܓܺܝ. ܩܳܠܳܐ ܫܶܡܥܶܬ ܕܳܐܡܰܪ ܕܳܢܺܝܐܝܶܠ. ܕܢܰܗܪܳܐ ܕܢܽܘܪܳܐ ܪܳܕܶܐ ܡܶܢ ܩܽܘܕܡܰܝܟ. ܘܳܝܠܺܝ ܕܚܰܘ̈ܒܰܝ ܤܰܓܺܝ̈ܺܐܝܢ ܘܒܶܗ ܥܳܒܰܪ ܐ̱ܢܳܐ. ܕܶܐܢ ܛܰܝܒܽܘܬܳܟ ܠܳܐ ܬܦܺܝܤܳܟ. ܪ̈ܰܚܡܰܝܟ ܢܶܗܘܽܘܢ ܥܠܰܝ ܗ̄ ܒܪ̈ܰܚܡܰܝܟ ܚܽܘܤ ܥܠܰܝ܀

ܫܽܘܒܚܳܐ: ܒܦܶܠܓܶܗ ܕܠܺܠܝܳܐ ܩܳܡ ܕܰܘܺܝܕ ܠܰܡܫܰܒܳܚܽܘ. ܥܰܠ ܬܶܗܪ̈ܶܝܗ̇ ܕܰܐܠܳܗܽܘܬܳܐ ܘܕܺܝ̈ܢܰܘܗ̱ܝ ܕܰܡܪܰܝܡܳܐ. ܚܳܪ ܒܰܫܡܰܝܳܐ. ܘܰܚܙܳܐ ܠܰܪܩܺܝܥܳܐ. ܘܰܠܢܰܗܺܝܪ̈ܶܐ ܘܫܽܘܦܪܳܐ ܕܪ̈ܶܗܛܰܝܗܽܘܢ. ܚܙܳܐ ܫܶܠܝܳܐ ܘܰܒܗܺܝܠܽܘܬܳܐ ܥܰܠ ܒܶܪ̈ܝܳܬܳܐ. ܘܶܐܬܡܰܠܝܰܬ ܢܰܦܫܶܗ ܬܶܗܪܳܐ ܘܰܐܘܕܺܝ ܠܳܟ ܡܳܪܝܳܐ ܗ̄ ܕܰܚܙܳܐ ܬܡܺܝ̈ܗܳܬܳܐ܀

ܡܶܢ ܥܳܠܰܡ: ܐܶܡܰܪ ܠܺܝ ܕܰܘܺܝܕ ܡܰܠܟܳܐ ܡܳܢܳܐ ܐܺܝܬܶܝܗ̇. ܬܶܫܒܽܘܚܬܳܐ ܕܰܡܙܰܡܰܪ ܐܰܢ̱ܬ ܐܺܝܡܳܡܳܐ ܘܠܺܠܝܳܐ. ܗܰܠܶܠܽܘܝܰܗ ܐܺܝܬܶܝܗ̇ ܬܶܫܒܽܘܚܬܳܐ. ܕܰܡܙܰܡܪܺܝܢ ܒܳܗ̇ ܥܺܝܪ̈ܶܐ ܘܡܰܠܰܐܟ̈ܶܐ. ܪܽܘܚ ܩܽܘܕܫܳܐ ܐܰܠܶܦܬܳܗ̇ ܠܺܝ ܘܶܐܢܳܐ ܠܟܳܗ̈ܢܶܐ. ܘܗܳܐ ܡܙܰܡܪ̈ܳܢ ܒܳܗ̇ ܥܺܕ̈ܬܳܐ ܘܕܰܝܪ̈ܳܬܳܐ ܐܰܟܚܕܳܐ ܗ̄ ܠܡܳܪܝܳܐ ܬܶܫܒܽܘܚܬܳܐ܀

ܒܳܥܽܘܬܳܐ ܕܡܳܪܝ ܒܰܠܰܝ H

ܚܳܐܶܢ ܠܚܰܛܳܝ̈ܶܐ: ܚܽܘܢ ܠܰܢ ܒܝܽܘܡ ܕܺܝܢܳܟ܀

ܘܰܫܒܽܘܩ ܠܰܢ ܚܰܘܒܰܝ̈ܢ: ܒܣܽܘܓܳܐܐ ܕܛܰܝܒܽܘܬܳܟ܀

ܒܬܰܪܥܳܟ ܚܰܢܳܢܳܐ: ܢܳܩܫܺܝܢ ܕܰܐܠܺܝܨܺܝܢ. ܦܰܢܳܐ ܫ̈ܶܐܠܳܬܗܽܘܢ: ܒܰܡܪܰܚܡܳܢܽܘܬܳܟ܀

ܬܰܪܥܳܟ ܬܪܰܥ ܪ̈ܰܚܡܶܐ: ܝܶܫܽܘܥ ܡܠܶܐ ܪ̈ܰܚܡܶܐ. ܕܥܳܐܶܠ ܛܥܺܝܢ ܚܰܘ̈ܒܶܐ: ܢܳܦܶܩ ܫܩܺܝܠ ܪ̈ܰܚܡܶܐ܀

ܐܰܒܽܘܢ ܕܒܰܫܡܰܝܳܐ: ܡܶܬܟܰܫܦܺܝܢܰܢ ܠܳܟ. ܩܰܒܶܠ ܬܶܫܡܶܫܬܰܢ: ܘܶܐܬܪܰܚܰܡܥܠܰܝܢ܀

ܫܽܘܒܚܳܐ ܠܗܰܘ ܕܶܐܡܰܪ: ܕܰܩܪܰܘ ܘܥܳܢܶܐ ܐ̱ܢܳܐ. ܘܩܽܘܫܽܘܢ ܘܦܳܬܰܚ ܐ̱ܢܳܐ: ܘܫܰܐܠܽܘܢ ܘܝܳܗܶܒ ܐ̱ܢܳܐ܀

ܡܳܪܳܐ ܕܥܶܠܳܝ̈ܶܐ: ܘܣܰܒܪܳܐ ܕܬܰܚܬܳܝ̈ܶܐ܀

ܩܰܒܶܠ ܬܶܫܡܶܫܬܰܢ ܘܶܐܬܪܰܚܰܡܥܠܰܝܢ܀

ܗܰܠܠܘܝܰܗ ܘܗܰܠܠܘܝܰܗ ܘܗܰܠܶܠܽܘܝܰܗ. ܫܽܘܒܚܳܐ ܠܳܟ ܐܠܰܗܐ܀ ܓ̄ ܙܰܒܢܺܝ̈ܢ܀ ܚܽܘܢ ܠܰܢ ܒܪ̈ܰܚܡܰܝܟ ܚܰܢܳܢܳܐ. ܡܳܪܝܳܐ ܪܰܚܶܡ ܥܠܰܝܢ ܘܥܰܕܰܪܰܝܢ. H

ܦܶܬܓܳܡܳܐ: ܒܩܽܘܪ̈ܒܳܢܶܐ ܘܒܰܨܠܰܘ̈ܳܬܳܐ: ܢܶܬܕܟܰܪ ܐܶܢܽܘܢ ܠܰܐܒܳܗܰܝ̈ܢ. ܕܡܰܠܦܺܝܢ ܗ̱ܘܰܘ ܠܰܢ ܟܰܕ ܚܰܝܺܝ̈ܢ ܕܢܶܗܘܶܐ ܒܢܰܝ̈ܳܐ ܠܰܐܠܳܗܳܐ ܒܗܳܢ ܥܳܠܡܳܐ ܕܥܳܒܰܪ. ܒܪܳܐ ܕܰܐܠܳܗܳܐ ܢܢܺܝܚ ܐܶܢܽܘܢ. ܒܗܳܝ ܡܰܠܟܽܘܬܳܐ ܕܰܫܡܰܝܳܐ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ. ܒܥܳܠܡܳܐ ܕܠܳܐ ܥܳܒܰܪ܀

ܣܶܕܪܳܐ ܓܰܘܳܢܳܝܐ

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܐܘܪܶܒ ܕܽܘܟܪܳܢ ܝܳܠܶܕܬܶܗ ܒܰܫܡܰܝܳܐ ܘܒܰܐܪܥܳܐ. ܘܢܰܨܰܚ ܕܽܘܟܪܳܢ ܩܰܕܺܝܫܰܘ̈ܗܝ ܒܟܽܠ ܐܰܬܰܪ ܘܦܶܢ̈ܝܳܢ ܘܛܰܠܳܐ ܕܪ̈ܰܚܡܶܐ ܘܕܰܚܢܳܢܳܐ ܪܰܣܶܣ ܥܰܠ ܓܰܪ̈ܡܰܝܗܽܘܢ ܕܥܰܢܺܝ̈ܕܶܐ ܡܗܰܝܡ̈ܢܶܐ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܟܰܕ ܥܽܘܗܕܳܢܳܐ ܪܚܺܝܡܳܐ ܘܚܰܒܺܝܒܳܐ ܘܰܡܝܰܩܪܳܐ ܥܳܒܕܺܝܢܰܢ. ܠܗܳܝ ܫܳܘܝܰܬ ܠܛܽܘ̈ܒܶܐ ܘܰܫܒܺܝܚܰܬ ܡ̣ܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܩܰܕܺܝܫܬܳܐ ܘܰܡܫܰܒܰܚܬܳܐ ܘܰܡܒܰܪܰܟܬܳܐ ܘܰܡܥܰܠܰܝܬܳܐ ܘܰܒܬܽܘܠܰܬ ܒܟܽܠܙܒܰܢ ܛܽܘܒܳܢܺܝܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ. ܥܰܡܳܗ̇ ܕܶܝܢ ܢܶܬܶܥ̱ܗܰܕ ܠܰܢ̈ܒܺܝܶܐ ܩܰܕܺܝ̈ܫܶܐ ܘܠܰܫܠܺܝ̈ܚܶܐ ܟܳܪ̈ܽܘܙܶܐ ܠܶܐܘܰܢܓܶܠܺܝ̈ܣܛܶܐ ܘܰܠܣܳܗ̈ܕܶܐ ܘܰܠܡܰܘܕ̈ܝܳܢܶܐ. ܠܟܺܐܢ̈ܶܐ ܘܰܠܟܳܗ̈ܢܶܐ ܘܠܰܐܒܳܗ̈ܳܬܳܐ ܩܰܕܺܝ̈ܫܶܐ ܘܪ̈ܳܥܰܘܳܬܳܐ ܫܰܪܺܝܪ̈ܶܐ ܘܡܰܠ̈ܦܳܢܶܐ ܬܪ̈ܺܝܨܰܝ ܫܽܘܒܚܳܐ ܒܬܽܘ̈ܠܶܐ ܘܩܰܕܺܝ̈ܫܶܐ ܘܢܰܟ̈ܦܶܐ ܘܨܰܝܳܡ̈ܶܐ ܝܺܚܺܝ̈ܕܳܝܶܐ ܘܕܰܝܪ̈ܳܝܶܐ ܘܟܽܠܗܽܘܢ ܣܳܥܪ̈ܰܝ ܫܰܦܺܝܪ̈ܳܬܳܐ. ܒܰܨܠܰܘ̈ܳܬܗܽܘܢ ܫܡܺܝ̈ܥܳܬܳܐ ܘܰܒܬܰܟܫ̈ܦܳܬܗܽܘܢ ܡܩܰܒ̈ܠܳܬܳܐ ܚܽܘܪ ܒܰܢ ܒܥܰܝܢܳܐ ܡܪܰܚܡܳܢܺܝܬܳܐ ܘܰܫܒܽܘܩ ܚܰܘܒܰܝ̈ܢ ܘܚܰܣܳܐ ܚܛܳܗܰܝ̈ܢ. ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܕܰܒܓܽܘܕܰܝ̈ܗܽܘܢ ܕܩܰܕܺܝ̈ܫܰܝܟ ܢܶܬܛܰܟܰܣ ܘܰܒܣܺܝ̈ܥܳܬܗܽܘܢ ܢܶܬܚܰܠܰܛ ܘܒܰܝܢܳܬܗܽܘܢ ܢܶܗܘܶܐ ܘܥܰܡܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܐܰܡܺܝܢ܀

ܡܰܘܪܒܳܐ

ܐܶܡܪܰܬ̣ ܡܰܪܝܰܡ ܡܰܘܪܒܳܐ ܠܢܰܦܫܝ̱ ܠܡܳܪܝܳܐ ܘܚܶܕܝܰܬ̣ ܪܽܘܚܝ̱ ܒܰܐܠܳܗܳܐ ܡܰܚܝܳܢܝ̱ ܕܚܳܪ ܒܡܽܘܟܳܟ̣ܳܐ ܕܰܐܡܬ̣ܶܗ. ܗܳܐ ܓܶܝܪ ܡ̣ܶܢ ܗܳܫܳܐ ܛܽܘܒܳܐ ܢܶܬ̣ܠܳــ̈ܢ ܠܺܝ ܫܰܪ̈ܒܳܬ̣ܳܐ ܟܽܠܗܶܝܢ܀

ܕܰܥܒܰܕ ܠܳܘܬ̣ܝ̱ ܪܰܘܪ̈ܒܳܬ̣ܳܐ ܗܰܘ ܕܚܰܝܶܠܬ̣ܳܢ ܘܩܰܕܺܝܫ ܫܡܶܗ ܘܰܚܢܳܢܶܗ ܠܕܳܪ̈ܶܐ ܘܫܰܪ̈ܒܳܬ̣ܳܐ ܥܰܠ ܐܰܝܠܶܝܢ ܕܕܳܚܠܺܝܢ ܠܶܗ܀

ܥܒܰܕ ܙܳܟ̣ܽܘܬ̣ܳܐ ܒܰܕܪܳܥܶܗ ܘܒܰܕܰܪ ܚܬܺܝܪ̈ܰܝ ܒܬܰܪܥܺܝܬ̣ܳܐ ܕܠܶܒܗܽܘܢ܇ ܣܰܚܶܦ ܬܰܩܺܝ̈ܦܶܐ ܡ̣ܶܢ ܟܽܪ̈ܣܰܘܳܬ̣ܳܐ ܘܰܐܪܺܝܡ ܡܰܟܺܝ̈ܟ̣ܶܐ܀

ܟܰܦ̈ܢܶܐ ܣܰܒܰܥ ܛܳܒ̈ܳܬ̣ܳܐ ܘܥܰܬܺܝܪ̈ܶܐ ܫܪܳܐ ܤܦܺܝܩܳܐܺܝܬ ܘܥܰܕܰܪ ܠܺܐܝܣܪܳܐܝܶܠ ܥܰܒܕܶܗ ܘܶܐܬ̣ܕܟ̣ܰܪ ܚܢܳܢܶܗ ܐܰܝܟ ܕܡܰܠܶܠ ܥܰܡ ܐܰܒܳܗܰܝ̈ܢ ܥܰܡ ܐܰܒܪܳܗܳܡ ܘܥܰܡ ܙܰܪܥܶܗ ܠܥܳܠܳܡ܀

ܡܰܘܪܒܳܐ ܓܰܘܳܢܳܝ̈ܳܬܳܐ

ܓܒܝ ܛܟܤܐ: ܐ ܒ ܓ ܕ ܗ ܘ ܙ ܚ

ܥܢܝܢܐ H

ܐܰܡܺܝܢ: ܡܳܐ ܛܳܒ ܘܡܳܐ ܫܰܦܺܝܪ܇ ܠܝܳܠܕܰܬ ܐܰܠܳܗܳܐ ܢܶܗܘܶܐ ܕܽܘܟܪܳܢܳܐ. ܘܠܰܢ ܒܰܨܠܽܘܬܳܗ̇ ܥܽܘܕܪ̈ܳܢܶܐ܀

ܠܰܐܚ̈ܶܐ ܡܳܐ ܕܥܳܡܪܺܝܢ ܐܰܟܚܕܳܐ܇ ܠܟܺܐܢ̈ܶܐ ܢܶܗܘܶܐ ܕܽܘܟܪܳܢܳܐ ܘܠܰܢ ܒܰܨܠܽܘܬܗܽܘܢ ܥܽܘܕܪ̈ܳܢܶܐ܀

ܐܰܝܟ ܡܶܫܚܳܐ ܕܢܳܚܶܬ ܥܰܠ ܪܺܝܫܳܐ ܘܥܰܠ ܕܰܩܢܳܐ܇ ܢܒܺܝ̈ܶܐ ܘܰܫܠܺܝ̈ܚܶܐ ܘܣܳܗ̈ܕܶܐ ܨܠܽܘܬܗܽܘܢ ܫܽܘܪܳܐ ܬܶܗܘܶܐ ܠܰܢ܀

ܕܰܩܢܶܗ ܕܰܐܗܪܽܘܢ ܕܢܳܚܶܬ ܥܰܠ ܒܰܪ ܨܰܘܪܳܐ ܕܟܽܘܬܺܝܢܶܗ܇ ܠܰܠܡܺܐܢ ܣܳܗ̈ܕܰܝܟ ܐܰܫܘܳܢ ܡܳܪܝ ܠܰܡܛܰܠ̱ـܠܰܝ̈ܗܽܘܢ ܕܰܪ̈ܚܽܘܡܰܝܟ܀

ܐܰܝܟ ܛܰܠܳܐ ܕܚܶܪܡܽܘܢ ܕܢܳܚܶܬ ܥܰܠ ܛܽܘܪܳܐ ܕܨܶܗܝܽܘܢ܇ ܚܰܢܳܢܳܐ ܘܰܡܠܶܐ ܪ̈ܰܚܡܶܐ ܒܝܽܘܡ ܕܺܝܢܳܟ ܪܰܚܶܡܥܠܰܝܢ܀

ܡܶܛܽܠ ܕܬܰܡܳܢ ܦܩܰܕ ܡܳܪܝܳܐ ܒܽܘܪܟܬܳܐ ܘܚܰܝ̈ܶܐ ܥܕܰܡܳܐ ܠܥܳܠܰܡ܇ ܒܪܺܝܟ ܗ̱ܽܘ ܕܠܳܐ ܟܳܠܶܐ ܪ̈ܰܚܡܰܘܗܝ ܡܶܢ ܚܰܛܳܝ̈ܶܐ ܕܩܳܪܶܝܢ ܠܶܗ܀

ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ: ܥܒܶܕ ܡܳܪܝ ܕܽܘܟܪܳܢܳܐ ܛܳܒܳܐ ܠܝܰܠܕܶܝ̈ܗ̇ ܕܥܺܕܬܳܐ ܡܗܰܝܡܰܢܬܳܐ܀

ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ: ܘܰܢܩܽܘܡܽܘܢ ܡܶܢ ܝܰܡܺܝܢܳܟ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܒܟܽܠܙܒܰܢ ܘܰܒܟܽܠܥܶܕܳܢ. ܒܬܽܘܠܬܳܐ ܝܳܠܕܰܬ ܐܰܠܳܗܳܐ ܨܠܽܘܬܳܗ̇ ܫܽܘܪܳܐ ܬܶܗܘܶܐ ܠܰܢ܀

ܒܰܨܠܰܘ̈ܳܬܗܽܘܢ ܕܩܰܕܺܝ̈ܫܶܐ ܒܰܛܶܠܳܝܗܝ ܠܒܺܝܫܳܐ ܡܶܢܰܢ ܕܟܽܠܫܳܥ ܦܰܚ̈ܶܐ ܨܳܠܶܐ ܠܰܢ܀

ܡܳܪܰܢ ܝܶܫܽܘܥ ܡܫܺܝܚܳܐ ܨܠܺܝܒܳܟ ܫܽܘܪܳܐ ܢܶܗܘܶܐ ܠܰܢ ܘܰܠܓܰܘ ܡܶܢܶܗ ܢܶܣܬܰܬܰܪ܀

ܝܶܫܽܘܥ ܡܶܠܬܳܐ ܐܰܠܳܗܳܐ ܠܚܰܝ̈ܶܐ ܢܰܛܰܪ ܒܰܨܠܺܝܒܳܟ ܠܥܰܢܺܝ̈ܕܶܐ ܚܰܣܳܐ ܒܪ̈ܰܚܡܰܝܟ܀

ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ. ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ ܠܰܐܒܳܐ ܘܠܰܒܪܳܐ ܘܪܽܘܚ ܩܽܘܕܫܳܐ ܒܟܽܠܥܶܕܳܢܺܝ̈ܢ܀

ܐܰܠܳܗܰܢ ܣܰܓܺܝ ܪ̈ܰܚܡܶܐ. ܒܝܰܘܡܳܟ ܪܰܒܳܐ ܡܳܐ ܕܳܐܬܶܝܬ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀

ܕܰܐܫܘܺܝܬܳܢ ܕܢܶܙܡܰܪ ܠܳܟ ܫܽܘܒܚܳܐ. ܒܥܶܕܳܢܳܐ ܗܳܢܳܐ ܐܰܫܘܳܢ ܕܢܺܐܪܰܬ ܡܰܠܟܽܘܬܳܟ܀

ܬܶܗܘܶܐ ܛܰܝܒܽܘܬܳܟ ܥܠܰܝܢ ܡܳܪܝܳܐ. ܡܳܪܳܐ ܕܡܰܘܬܰܢ ܘܰܕܚܰܝܰܝ̈ܢ. ܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ ܘܰܕܥܰܢܺܝ̈ܕܰܝܢ. ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ܀

ܡܙ̄ܡ. ܦܬܓ̄: ܐܶܬܬܥܺܝܪܘ̱ ܕܰܡ̈ܟܶܐ ܘܩܽܘܡܘ̱ ܫܰܒܰܚܘ̱܇ ܫܰܒܰܚܘ̱ ܠܡܳܪܝܳܐ ܡܶܢ ܫܡܰܝܳܐ ܫܰܒܚܽܘܗܝ ܒܰܡܪ̈ܰܘܡܶܐ܀

ܫܰܒܚܽܘܗܝ ܟܽܠܗܽܘܢ ܡܰܠܰܐܟܰܘ̈ܗܝ ܫܰܒܚܽܘܗܝ ܟܽܠܗܽܘܢ ܚܰܝ̈ܠܰܘܳܬܶܗ܀

ܫܰܒܚܽܘܗܝ ܫܶܡܫܳܐ ܘܣܰܗܪܳܐ ܫܰܒܚܽܘܗܝ ܟܽܠ ܟܰܘܟ̈ܒܶܐ ܘܢܽܘܗܪܳܐ. ܫܰܒܚܽܘܗܝ ܫܡܰܝ̈ ܫܡܰܝ̈ܳܐ ܡܰܝ̈ܳܐ ܕܰܠܥܶܠ ܡܶܢ ܫܡܰܝܳܐ ܢܫܰܒܚܽܘܢ ܠܰܫܡܶܗ ܕܡܳܪܝܳܐ܀

ܡܶܛܽܠ ܕܗܽܘ ܐܶܡܰܪ ܘܰܗܘܰܘ ܘܗܽܘ ܦܩܰܕ ܘܶܐܬܒܪܺܝܘ ܘܰܐܩܺܝܡ ܐܶܢܽܘܢ ܠܥܳܠܰܡ ܥܳܠܡܺܝܢ ܢܳܡܽܘܣܳܐ ܝܰܗܒ ܘܠܳܐ ܥܳܒܰܪ܀

ܫܰܒܰܚܘ ܠܡܳܪܝܳܐ ܡܶܢ ܐܰܪܥܳܐ ܬܰܢܺܝ̈ܢܶܐ ܘܟܽܠܗܽܘܢ ܬܗܽܘ̈ܡܶܐ. ܢܽܘܪܳܐ ܘܒܰܪܕܳܐ ܘܬܰܠܓܳܐ ܘܰܓܠܺܝܕܳܐ ܪ̈ܽܘܚܶܐ ܘܥܰܠ̈ܥܳܠܶܐ ܥܒܳܕܳܐ ܕܡܶܠܬܶܗ܀

ܛܽܘܪ̈ܶܐ ܘܟܽܠܗܶܝܢ ܪ̈ܳܡܳܬܳܐ ܐܺܝ̈ܠܳܢܶܐ ܕܦܺܐܪ̈ܶܐ ܘܟܽܠܗܽܘܢ ܐܰܪ̈ܙܶܐ ܚܰܝܽܘܬܳܐ ܘܟܽܠܳܗ̇ ܒܥܺܝܪܳܐ. ܪ̈ܰܚܫܳܐ ܘܛܰܝܪ̈ܳܐ ܘܦܳܪܰܚܬܳܐ܀

ܡܰܠ̈ܟܶܐ ܕܰܐܪܥܳܐ ܘܟܽܠܗܶܝܢ ܐܶܡ̈ܘܳܬܳܐ ܪܰܘܪ̈ܒܳܢܶܐ ܘܟܽܠܗܽܘܢ ܕܰܝܳܢ̈ܶܐ ܕܰܐܪܥܳܐ. ܓܰܕܽܘ̈ܕܶܐ ܘܰܒܬܽܘ̈ܠܳܬܳܐ ܣܳܒ̈ܶܐ ܘܰܥܠܰܝ̈ܡܶܐ ܢܫܰܒܚܽܘܢ ܠܰܫܡܶܗ ܕܡܳܪܝܳܐ܀

ܡܶܛܽܠ ܕܪܰܒ ܗ̱ܽܘ ܫܡܶܗ ܒܰܠܚܽܘ̈ܕܰܘܗܝ. ܘܫܽܘܒܚܶܗ ܒܰܐܪܥܳܐ ܘܒܰܫܡܰܝܳܐ. ܡܪܺܝܡ ܩܰܪܢܳܐ ܕܥܰܡܶܗ ܘܬܶܫܒܽܘܚܬܳܐ ܠܟܽܠܗܽܘܢ ܙܰܕܺܝ̈ܩܰܘܗܝ ܘܠܰܒ̈ܢܰܝ ܐܺܝܣܪܳܐܶܝܠ ܥܰܡܳܐ ܕܩܰܪܺܝܒ ܠܶܗ܀

ܫܰܒܰܚܘ̱ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ ܬܶܫܒܽܘܚܬܶܗ ܒܥܺܕܬܳܐ ܕܙܰܕܺܝ̈ܩܶܐ. ܢܶܚܕܶܐ ܐܺܝܣܪܳܐܶܝܠ ܒܥܳܒܽܘܕܶܗ ܘܰܒܢܰܝ̈ ܨܶܗܝܽܘܢ ܢܶܪܽܘܙܽܘܢ ܒܡܰܠܟܗܽܘܢ܀

ܘܰܢܫܰܒܚܽܘܢ ܠܰܫܡܶܗ ܒܰܦ̈ܠܰܓܶܐ ܘܒܰܪ̈ܒܺܝܥܶܐ ܘܰܒܟܶܢܳܪ̈ܶܐ ܢܙܰܡܪܽܘܢ ܠܶܗ. ܡܶܛܽܠ ܕܨܳܒܶܐ ܡܳܪܝܳܐ ܒܥܰܡܶܗ ܘܝܳܗܶܒ ܠܡܶܣ̈ܟܺܢܶܐ ܦܽܘܪܩܳܢܳܐ܀

ܢܶܬܥܰܫܢܽܘܢ ܙܰܕܺܝ̈ܩܶܐ ܒܺܐܝܩܳܪܳܐ ܘܰܢܫܰܒܚܽܘܢܳܝܗܝ ܥܰܠ ܥܰܪ̈ܣܳܬܗܽܘܢ. ܘܰܢܪܰܡܪܡܽܘܢ ܠܰܐܠܳܗܳܐ ܒܓܰܓܪ̈ܳܬܗܽܘܢ. ܣܰܝܦܳܐ ܕܰܬܪܶܝܢ ܦܽܘܡܰܘ̈ܗܝ ܒܺܐܝ̈ܕܰܝܗܽܘܢ܀

ܠܡܶܬܒܰܥ ܦܽܘܪܥܳܢܳܐ ܡܶܢ ܥܰܡ̱̈ܡܶܐ ܘܡܰܟܣܳܢܽܘܬܳܐ ܡܶܢ ܐܶܡ̈ܘܳܬܳܐ ܠܡܶܐܣܰܪ ܡܰܠܟܰܝ̈ܗܽܘܢ ܒܣܽܘ̈ܛܡܶܐ ܘܝܰܩܺܝܪ̈ܰܝܗܽܘܢ ܒܫܺܫ̈ܠܳܬܳܐ ܕܦܰܪܙܠܳܐ܀

ܠܡܶܥܒܰܕ ܠܗܽܘܢ ܕܺܝܢܳܐ ܕܰܟܬܺܝܒ. ܘܫܽܘܒܚܳܐ ܠܟܽܠܗܽܘܢ ܙܰܕܺܝ̈ܩܰܘܗܝ. ܫܰܒܰܚܘ̱ ܠܡܳܪܝܳܐ ܒܩܽܘܕܫܶܗ ܫܰܒܚܽܘܗܝ ܒܰܪܩܺܝܥܳܐ ܕܥܽܘܫܢܶܗ܀

ܫܰܒܚܽܘܗܝ ܒܚܰܝܠܬܳܢܽܘܬܶܗ. ܫܰܒܚܽܘܗܝ ܒܣܽܘܓܳܐܐ ܕܪܰܒܽܘܬܶܗ. ܫܰܒܚܽܘܗܝ ܒܩܳܠܳܐ ܕܩܰܪܢܳܐ. ܫܰܒܚܽܘܗܝ ܒܩܺܝܬܳܪ̈ܶܐ ܘܰܒܟܶܢܳܪ̈ܶܐ܀

ܫܰܒܚܽܘܗܝ ܒܰܦ̈ܠܰܓܶܐ ܘܒܰܪ̈ܒܺܝܥܶܐ. ܫܰܒܚܽܘܗܝ ܒܡܶܢ̈ܶܐ ܚܰܠ̈ܝܳܬܳܐ. ܫܰܒܚܽܘܗܝ ܒܨܶܨܠܰܝ̈ ܫܶܡܥܳܐ. ܫܰܒܚܽܘܗܝ ܒܩܳܠܳܐ ܘܒܰܩܥܳܬܳܐ. ܟܽܠ ܢܶܫܡܳܐ ܬܫܰܒܚܰ ܠܡܳܪܝܳܐ܀

ܫܰܒܰܚܘ̱ ܠܡܳܪܝܳܐ ܟܽܠܟܽܘܢ ܥܰܡ̱̈ܡܶܐ. ܫܰܒܚܳܝ̈ܗܝ ܟܽܠܗܶܝܢ ܐܶܡ̈ܘܳܬܳܐ. ܡܶܛܽܠ ܕܥܶܫܢܰܬ ܥܠܰܝܢ ܛܰܝܒܽܘܬܶܗ ܫܰܪܺܝܪܳܐܺܝܬ ܡܳܪܝܰܐ ܗ̱ܘ ܠܥܳܠܰܡ܀

ܡܫܰܡܫܳܢܳܐ: ܒܰܪܶܟܡܳܪܝ܀

ܟܳܗܢܳܐ: ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡܫܳܢܳܐ: ܥܰܡܳܐ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ. ܐܰܡܺܝܢ܀

ܟܳܗܢܳܐ: ܫܽܘܒܚܳܐ ܠܰܬܠܺܝܬܳܝܽܘܬܳܐ܆ ܫܽܘܒܚܳܐ ܠܰܬܠܺܝܬܳܝܽܘܬܳܐ܆ ܡܫܰܒܚܺܝܢܰܢ ܠܰܬܠܺܝܬܳܝܽܘܬܳܐ ܡܫܰܒܰܚܬܳܐ܆ ܐܺܝܬܝܳܝܬܳܐ ܘܰܡܬܽܘܡܳܝܬܳܐ. ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ ܒܟܽܠܥܶܕܳܢܺܝ̈ܢ܀

ܬܫܡܫܬܐ ܕܚܕ ܩܢܘܡܐ
ܩܽܘܩܰܠܝܽܘܢ H

ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܶܫܘܰܚ܀

ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀

ܢܰܦܪܥܽܘܢ ܬܽܘܒ ܘܢܶܬܪܰܒܽܘܢ ܒܣܰܝܒܽܘܬܳܐ ܗ̄ ܫܰܡܺܝ̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀

ܘܰܢܚܰܘܽܘܢ ܕܰܬܪܺܝܨ ܗ̱ܽܘ ܡܳܪܝܳܐ ܗ̄ ܥܰܫܺܝܢ ܗ̱ܽܘ ܘܠܰܝܬ ܒܶܗ ܥܰܘܠܳܐ܀

ܫܽܘܒܚܳܐ ܘܥܶܩܒܳܐ: H

ܕܽܘܟܪܳܢܳܟ ܐܳܘ ܡܳܪܝ ܝܰܥܩܽܘܒ ܗܳܪܟܳܐ ܘܰܠܥܶܠ ܒܰܫܡܰܝܳܐ ܘܰܐܝܠܶܝܢ ܕܝܰܩܰܪܘ ܕܽܘܟܪܳܢܳܟ ܢܶܬܥܰܕܪܽܘܢ ܒܰܨܠܰܘ̈ܳܬܳܟ܀

ܣܶܕܪܐ ܕܚܰܕ ܩܢܽܘܡܳܐ

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܕܰܐܘܪܶܒ ܕܽܘܟܪܳܢ ܓܰܒܝܳܐ ܡܳܪܝ (ܦܠܳܢ) ܒܰܫܡܰܝܳܐ ܘܒܰܐܪܥܳܐ. ܘܰܐܪܕܺܝ ܡܶܢ ܓܰܪ̈ܡܰܘܗ̱ܝ ܥܽܘܕܪ̈ܳܢܶܐ ܠܰܡ̈ܡܰܚܰܝܳܐ. ܕܠܶܗ ܠܗܰܘ ܕܰܓܒܳܝܗ̱ܝ ܢܰܘܕܶܐ ܘܢܶܤܓܽܘܕ ܘܰܢܫܰܒܰܚ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܕܽܘܟܪܳܢܶܗ ܕܡܳܪܝ (ܦܠܳܢ) ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܣܶܕܪܳܐ

ܟܰܕ ܒܩܽܘܠܳܤ̈ܶܐ ܘܚܽܘܓܳܝ̈ܶܐ ܘܰܙܡܺܝܪ̈ܳܬܳܐ ܕܪܽܘܚܳܐ ܩܰܕܺܝܫܳܐ ܠܳܟ ܢܰܨܺܝܚ ܫܽܘܦܪ̈ܶܐ ܦܠܳܢ ܡܢܰܨܪܺܝܢܰܢ ܘܰܒܚܰܕܘܬܳܐ ܐܳܡܪܺܝܢܰܢ: ܠܳܟ ܛܽܘܒܰܝܟ ܓܰܒܝܳܐ ܡܳܪܝ ܦܠܳܢ ܝܰܡܳܐ ܕܚܽܘܠܡܳܢܳܐ ܘܫܶܦܥܳܐ ܕܥܽܘܕܪ̈ܳܢܶܐ ܘܢܶܒܥܳܐ ܕܳܐܣ̈ܘܳܬܳܐ ܘܥܳܕܽܘܪܳܐ ܕܰܡܚܺܝܠܽܘܬܳܐ. ܠܳܟ ܛܽܘܒܰܝܟ ܓܰܒܝܳܐ ܡܳܪܝ ܦܠܳܢ ܕܡܶܢ ܟܰܪܤܳܐ ܐܶܬܓܒܺܝܬ ܐܰܝܟ ܐܶܪܰܡܝܳܐ ܘܰܫܡܽܘܐܝܶܠ. ܠܳܟ ܛܽܘܒܰܝܟ ܡܳܪܝ ܦܠܳܢ ܕܰܥܒܺܝܕ ܐܰܢ̱ܬ ܪܰܒ ܒܰܝܬܳܐ ܥܰܠ ܒܶܝܬܓܰܙܶܗ ܕܡܳܪܳܟ. ܘܗܳܫܳܐ ܒܰܨܠܰܘ̈ܳܬܳܟ ܩܺܐܪ̈ܤܶܐ ܢܶܬܒܰܛܠܽܘܢ܆ ܪ̈ܰܘܒܶܐ ܢܶܫܬܰܗܽܘܢ܆ ܫܓܽܘܫ̈ܝܶܐ ܢܶܬܠܚܽܘܢ܆ ܚܶܪ̈ܝܳܢܶܐ ܢܶܫܠܽܘܢ܆ ܫܰܒ̈ܛܶܐ ܕܪܽܘܓܙܳܐ ܢܶܥܒܪܽܘܢ܆ ܟܪ̈ܺܝܗܶܐ ܢܶܬܰܐܤܽܘܢ܆ ܡܚܺܝ̈ܠܶܐ ܢܶܬܚܰܝܠܽܘܢ܆ ܚܰܘ̈ܒܶܐ ܢܶܬܚܰܤܽܘܢ܆ ܚܛܳܗ̈ܶܐ ܢܶܫܬܰܒܩܽܘܢ. ܘܥܰܢܺܝ̈ܕܶܐ ܡܗܰܝܡ̈ܢܶܐ ܒܰܐܘ̈ܘܳܢܶܐ ܫܡܰܝܳܢ̈ܶܐ ܢܶܬܬܢܺܝܚܽܘܢ܆ ܘܰܚܢܰܢ ܘܗܶܢܽܘܢ ܢܰܤܶܩ ܫܽܘܒܚܳܐ ܠܰܡܚܰܝܠܳܢܳܟ ܘܰܡܢܰܨܚܳܢܳܟ܆ ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܠܐ ܒܩ̄ ܕܩܽܘܩܳܝܳܐ: H

ܠܰܚܠܽܘܠܶܗ ܕܡܳܪܝ ܓܰܒܪܺܐܝܠ ܩܪܳܢܝ ܐܰܠܳܗܳܐ. ܘܶܐܢ ܐܺܙܰܠ ܩܶܢܛܰܐ ܗ̱ܘ ܪܰܒܳܐ ܘܶܐܢ ܐܶܦܽܘܫ ܕܶܚܠܬܳܐ ܗ̱ܝ. ܘܶܐܢ ܐܳܙܶܠ ܐ̱ܢܳܐ ܚܰܘ̈ܒܰܝ ܥܳܗܶܕ ܐ̱ܢܳܐ. ܘܶܐܢ ܦܳܐܶܫ ܐ̱ܢܳܐ. ܗܘܺܝܬ ܠܺܝ ܢܽܘܟܪܳܝܳܐ. ܒܰܕܡܳܐ ܕܰܪܕܳܐ ܡܶܢ ܕܰܦܢܶܗ ܕܒܰܪ ܐܰܠܳܗܳܐ. ܢܶܬܚܰܤܽܘܢ ܚܰܘ̈ܒܰܝ ܘܶܐܩܥܶܐ ܠܳܟ ܫܽܘܒܚܳܐ ܡܳܪܝܳܐ ܗ̄ ܨܠܽܘܬܶܗ ܬܥܰܕܰܪܝ ܠܰܢ܀

ܢܰܨܺܝܚܳܐ ܡܳܪܝ ܒܰܪܨܰܘܡܳܐ ܠܰܚܠܽܘܠܶܗ ܙܰܡܢܰܢܝ. ܡܽܘܢ ܐܰܪܡܶܐ ܠܶܗ ܪܽܘܡܝܳܢܳܐ ܬܰܪܥܺܝܬܝ ܠܳܐ ܝܳܕܥܳܐ. ܟܳܗ̈ܢܶܐ ܢܰܪܡܽܘܢ ܨܠܽܘܬܳܐ ܘܒܳܥܽܘܬܳܐ. ܘܰܡܫܰܡ̈ܫܳܢܶܐ ܥܶܛܪܳܐ ܕܦܺܝܪ̈ܡܰܝܗܽܘܢ. ܥܰܬܺܝܪ̈ܶܐ ܡܪܰܚܡܳܢܽܘܬܳܐ ܘܡܶܤ̈ܟܺܢܶܐ ܦܝܳܤܳܐ. ܕܫܳܡܰܥ ܡܳܪܝܳܐ ܨܠܰܘ̈ܳܬܗܽܘܢ ܘܥܳܒܶܕ ܥܠܰܝܢ ܪ̈ܰܚܡܶܐ ܗ̄ ܨܠܽܘܬܶܗ ܬܥܰܕܰܪܝ ܠܰܢ܀

ܫܽܘܒܚܳܐ: ܠܳܟ ܝܳܗܒܳܐ ܥܺܕܬܳܐ ܛܽܘܒܳܐ ܐܳܘ ܡܳܪܝ ܫܶܡܥܽܘܢ. ܕܗܰܘ ܛܽܘܒܳܐ ܕܝܰܗܒ ܗ̱ܘܳܐ ܡܳܪܰܢ ܠܘܳܬܳܟ ܐܶܬܝܰܒܰܠ. ܛܽܘܒܰܝܟ ܕܰܤܢܰܝܬ ܠܥܳܠܡܳܐ ܥܳܒܽܘܪܳܐ. ܛܽܘܒܰܝܟ ܕܰܪܚܶܡܬ ܚܽܘܒܶܗ ܕܰܡܫܺܝܚܳܐ. ܛܽܘܒܰܝܟ ܡܳܐ ܕܫܳܡܥܰܬ ܩܳܠܶܗ ܕܡܳܪܳܟ ܕܳܐܡܰܪ ܠܳܟ. ܕܬܳܐ ܥܽܘܠ ܝܺܪܰܬ ܡܰܠܟܽܘܬܳܐ ܘܚܰܝ̈ܶܐ ܕܠܳܐ ܥܳܒܪܺܝܢ ܗ̄ ܨܠܽܘܬܳܟ ܬܥܰܕܰܪܝ ܠܰܢ܀

ܡܶܢ ܥܳܠܰܡ: ܡܶܢ ܒܶܤ̈ܡܶܐ ܘܡܶܢ ܗܶܪ̈ܽܘܡܶܐ ܓܒܰܝ̈ܳܐ ܕܰܐܪܥܳܐ. ܒܤܶܡ ܠܰܡܫܺܝܚܳܐ ܕܽܘܟܪܳܢܳܟ ܓܰܒܝܳܐ ܡܳܪܝ ܕܳܕܳܐ. ܕܰܛܥܺܝܢ ܦܰܓܪܳܟ ܝܽܘܩܪܳܐ ܕܕܽܘܒܳܪ̈ܰܝܟ. ܫܰܗܪܳܐ ܘܨܰܘܡܳܐ ܘܥܰܡ̈ܠܶܐ ܕܦܽܘܪܫܳܢܳܐ. ܡܰܠܰܐܟ̈ܶܐ ܢܳܦܩܺܝܢ ܠܽܐܘܪܥܳܟ ܘܰܡܩܰܒܠܺܝܢ ܠܳܟ. ܕܥܰܡܗܽܘܢ ܬܶܚܕܶܐ ܘܬܶܬܒܰܤܰܡ ܒܰܡܫܺܝܚܳܐ ܕܰܐܘܪܒܳܟ ܗ̄ ܨܠܽܘܬܳܟ ܬܥܰܕܰܪܝ ܠܰܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ H

ܩܳܪܶܝܢܰܢ ܠܳܟ ܡܳܪܝܳܐ ܡܳܪܰܢ ܬܳܐ ܠܥܽܘܕܪܳܢܰܢ: ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܡܳܪܝܳܐ ܡܳܪܰܢ ܡܳܪܳܐ ܕܥܺܝܪ̈ܶܐ ܘܰܕܡܰܠܰܐܟ̈ܶܐ. ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܒܦܶܠܓܶܗ ܕܠܺܠܝܳܐ ܐܶܬܬܥܺܝܪ ܕܰܘܺܝܕ ܠܰܡܫܰܒܳܚܽܘ: ܕܰܢܩܽܘܡ ܢܰܘܕܶܐ ܡܶܛܽܠ ܬܶܗܪ̈ܶܐ ܕܰܐܠܳܗܽܘܬܳܐ. ܐܳܦ ܐܰܢ̱ܬ ܗܳܫܳܐ ܒܦܶܠܓܶܗ ܕܠܺܠܝܳܐ ܩܽܘܡ ܦܳܪܽܘܫܳܐ: ܘܒܰܙܡܺܝܪ̈ܳܬܶܗ ܕܕܰܘܺܝܕ ܗܰܠܶܠ ܪܽܘܚܳܢܳܐܺܝܬ܀

ܐܰܝܢܳܐ ܕܡܶܬܬܥܺܝܪ ܠܰܡܫܰܒܳܚܽܘ ܒܠܰܝ̈ܠܰܘܳܬܳܐ: ܫܪܶܐ ܫܘܽܠܛܳܢܶܗ ܕܠܺܠܝܳܐ ܡܶܢܶܗ ܘܰܕܚܶܫܽܘܟܳܐ. ܡܰܢ ܕܰܡܫܰܒܰܚ ܠܰܐܠܳܗܽܘܬܳܐ ܒܠܰܝ̈ܠܰܘܳܬܳܐ: ܐܺܝܡܳܡܰܐ ܗ̱ܘ ܠܶܗ ܠܺܠܝܳܐ ܕܥܺܝܪ ܒܶܗ ܠܰܡܫܰܒܳܚܽܘ܀

ܒܳܟ ܡܳܪܝ ܐܶܢܗܰܪ ܕܺܐܝܡܳܡܳܐ ܐܰܢ̱ܬ ܠܰܕܪܳܚܶܡ ܠܳܟ: ܢܽܘܗܪܳܐ ܐܰܢ̱ܬ ܡܳܪܝ ܐܰܢܗܰܪ ܥܰܝ̈ܢܰܝ ܕܶܐܚܙܶܐ ܚܢܳܢܳܟ. ܐܽܘܪܚܶܗ ܕܥܳܠܡܳܐ ܤܪܺܝܓܳܐ ܘܡܰܠܝܳܐ ܟܽܠ ܬܽܘܩ̈ܠܳܬܳܐ: ܕܰܡܗܰܠܶܟ ܒܳܟ ܠܳܐ ܡܶܬܬܩܶܠ ܠܶܗ ܕܺܐܝܡܳܡܳܐ ܐܰܢ̱ܬ܀

ܢܫܰܒܚܽܘܢܳܟ ܡܳܪܝ ܥܺܝܪ̈ܰܝ ܪܰܘܡܳܐ ܕܠܳܐ ܡܬܽܘܡ ܕܳܡܟܺܝܢ: ܚܠܳܦ ܐܰܪ̈ܥܳܢܶܐ ܕܫܶܢܬܶܗ ܕܠܺܠܝܳܐ ܫܰܬܩܰܬ ܐܶܢܽܘܢ. ܢܫܰܒܚܳܟ ܝܰܡܳܐ ܢܫܰܒܚܳܟ ܝܰܒܫܳܐ ܢܫܰܒܚܳܟ ܐܳܐܰܪ: ܠܳܟ ܕܰܫܒܺܝܚ ܐܰܢ̱ܬ ܒܰܥܒܺܝ̈ܕܳܬܳܟ ܘܠܳܟ ܬܶܫܒܽܘܚܬܳܐ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨܠܰܘ̈ܳܬܳܐ܀

ܫܡܰܥ ܒܳܥܽܘܬܰܢ ܘܰܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܬܶܫܒܽܘܚܬܳܐ ܕܡܰܠܰܐܟ̈ܶܐ

ܟܳܗܢܳܐ: ܐܰܟܡܳܐ ܕܰܡܫܰܒܚܺܝܢ ܡܰܠܰܐܟ̈ܶܐ ܘܟܶܢ̈ܫܶܐ ܕܪ̈ܰܒܰܝ ܡܰܠܰܐܟ̈ܶܐ ܕܒܰܫܡܰܝܳܐ: ܘܰܚܢܰܢ ܡܚܺܝ̈ܠܶܐ ܘܚܰܛܳܝ̈ܶܐ܆ ܡܳܟ̈ܶܐ ܘܥܰܦܪ̈ܳܢܶܐ ܐܰܟܘܳܬܗܽܘܢ ܡܫܰܒܚܺܝܢܰܢ ܟܰܕ ܐܳܡܪܺܝܢܰܢ ܒܟܽܠܙܒܰܢ ܘܰܒܟܽܠܥܶܕܳܢ:

ܥܰܡܳܐ: ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ ܘܥܰܠ ܐܰܪܥܳܐ ܫܠܳܡܳܐ ܘܫܰܝܢܳܐ ܘܤܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ܀

ܡܫܰܒܚܺܝܢܰܢ ܠܳܟ܆ ܡܒܰܪܟܺܝܢܰܢ ܠܳܟ܆ ܤܳܓܕܺܝܢܰܢ ܠܳܟ܆ ܡܡܰܠܠܽܘܬ ܫܽܘܒܚܳܐ ܡܰܤܩܺܝܢܰܢ ܠܳܟ܀

ܡܰܘܕܶܝܢܰܢ ܠܳܟ܆ ܡܶܛܽܠ ܪܰܒܽܘܬܳܐ ܕܫܽܘܒܚܳܐ ܕܺܝܠܳܟ܆ ܡܳܪܝܳܐ ܥܳܒܽܘܕܳܐ܆ ܡܰܠܟܳܐ ܫܡܰܝܳܢܳܐ܆ ܐܰܠܳܗܳܐ ܐܰܒܳܐ ܐܰܚܺܝܕ ܟܽܠ܀

ܡܳܪܝܳܐ ܐܰܠܳܗܳܐ܆ ܒܪܳܐ ܝܺܚܺܝܕܳܝܳܐ܆ ܝܶܫܽܘܥ ܡܫܺܝܚܳܐ ܥܰܡ ܪܽܘܚܳܐ ܩܰܕܺܝܫܳܐ܀

ܡܳܪܝܳܐ ܐܰܠܳܗܳܐ܆ ܐܶܡܪܶܗ ܕܰܐܠܳܗܳܐ܆ ܒܪܳܐ ܘܡܶܠܬܶܗ ܕܰܐܒܳܐ܆ ܗܰܘ ܕܫܳܩܶܠ ܐܰܘܟܺܝܬ ܫܩܰܠ ܚܛܺܝܬܶܗ ܕܥܳܠܡܳܐ ܐܶܬܪܰܚܰܡܥܠܰܝܢ܀

ܗܰܘ ܕܫܳܩܶܠ ܐܰܘܟܺܝܬ ܫܩܰܠ ܚܛܺܝܬܶܗ ܕܥܳܠܡܳܐ ܨܠܺܝ ܠܰܢ ܐܶܕܢܳܟ ܘܩܰܒܶܠ ܒܳܥܽܘܬܰܢ܆ ܗܰܘ ܕܝܳܬܶܒ ܒܫܽܘܒܚܳܐ ܡܶܢ ܝܰܡܺܝܢܳܐ ܕܰܐܒܽܘܗ̱ܝ ܚܽܘܤ ܘܶܐܬܪܰܚܰܡܥܠܰܝܢ܀

ܡܶܛܽܠ ܕܰܐܢ̱ܬ ܗ̱ܽܘ ܠܚܽܘܕܰܝܟ܆ ܩܰܕܺܝܫܰܬ ܗ̱ܽܘ ܠܚܽܘܕܰܝܟ܆ ܡܳܪܝܳܐ ܝܶܫܽܘܥ ܡܫܺܝܚܳܐ ܘܥܰܡ ܪܽܘܚܳܟ ܩܰܕܺܝܫܳܐ܀

ܫܽܘܒܚܶܗ ܕܰܐܠܳܗܳܐ ܐܰܒܳܐ ܐܰܡܺܝܢ ܒܟܽܠܙܒܰܢ ܘܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܐܶܒܰܪܟܳܟ ܐܳܦ ܐܶܫܰܒܰܚ ܠܰܫܡܳܟ ܩܰܕܺܝܫܳܐ܆ ܡܒܰܪܟܳܐ ܠܥܳܠܰܡ ܗܰܘ ܕܺܐܝܬܰܘܗ̱ܝ ܡܩܰܘܶܐ ܠܥܳܠܰܡ ܥܳܠܡܺܝܢ܀

ܡܒܰܪܰܟ ܐܰܢ̱ܬ ܡܳܪܝܳܐ ܐܰܚܺܝܕ ܟܽܠ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ܆ ܘܰܡܫܰܒܰܚ ܫܡܳܟ ܘܰܡܗܰܕܰܪ ܒܬܶܫܒ̈ܚܳܬܳܟ ܠܥܳܠܰܡ ܥܳܠܡܺܝܢ܀

ܠܳܟ ܝܳܐܶܐ ܫܽܘܒܚܳܐ܆ ܠܳܟ ܦܰܐܝܳܐ ܬܶܫܒܽܘܚܬܳܐ܆ ܘܠܳܟ ܦܶܐܐ ܩܽܘܠܳܤܳܐ܆ ܐܰܠܳܗܳܐ ܕܟܽܠ ܐܰܒܳܐ ܕܰܫܪܳܪܳܐ ܥܰܡ ܒܪܳܐ ܝܺܚܺܝܕܳܝܳܐ ܐܳܦ ܠܪܽܘܚܳܐ ܚܰܝܳܐ ܩܰܕܺܝܫܳܐ܆ ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܡܳܪܰܢ ܝܶܫܽܘܥ ܡܫܺܝܚܳܐ

ܡܳܪܰܢ ܝܶܫܽܘܥ ܡܫܺܝܚܳܐ: ܬܰܪܥܳܐ ܕܪܰܚܡܰܝܟ ܠܳܐ ܬܶܐܚܽܘܕ ܒܰܐܦܰܝ̈ܢ ܡܳܪܝ܆ ܚܰܛܳܝ̈ܶܐ ܚܢܰܢ ܡܰܘܕܶܝܢܰܢ ܐܶܬܪܰܚܰܡܥܠܰܝܢ܀

ܚܽܘܒܳܟ ܐܰܚܬܳܟ ܡܶܢ ܐܰܬܪܳܟ ܨܶܐܕܰܝܢ ܡܳܪܝ܆ ܕܰܒܝܰܕ ܡܰܘܬܳܟ ܐܶܬܒܰܛܠܰܬ ܡܺܝܬܽܘܬܰܢ ܐܶܬܪܰܚܰܡܥܠܰܝܢ܀

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܶܠܬ̣ܳܢܳܐ. ܩܰܕܺܫܰܬ ܠܳܐ ܡܳܝܽܘܬ̣ܳܐ ܕܐܶܨܠܶܒܬ ܚܠܳܦܰܝܢ ܐܶܬ̣ܪܰܚܰܡܥܠܰܝܢ (ܓ ܙܰܒܢܺܝ̈ܢ)܀

ܡܳܪܰܢ ܐܶܬ̣ܪܰܚܰܡܥܠܰܝܢ. ܡܳܪܰܢ ܚܽܘܣ ܘܪܰܚܶܡܥܠܰܝܢ. ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬ̣ܰܢ ܘܐܶܬ̣ܪܰܚܰܡܥܠܰܝܢ܀

ܫܽܘܒܚܳܐ ܠܳܟ ܐܰܠܳܗܳܐ. ܫܽܘܒܚܳܐ ܠܳܟ ܒܳܪܽܘܝܳܐ. ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ ܒܰܪܶܟܡܳܪܝ̱܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܰܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܨܠܰܘ̈ܳܬܳܐ ܕܡܶܨܛܰܠܝܳܢ ܒܚܰܪܰܬ݀ ܟܽܠܗܶܝܢ ܨܠܰܘ̈ܳܬܳܐ ܪ̈ܽܘܫܡܳܝܳܬܳܐ

ܩܳܢܽܘܢܳܐ ܕܗܰܝܡܳܢܽܘܬܳܐ

ܟܳܗܢܳܐ: ܡܗܰܝܡܢܺܝܢܰܢ ܒܚܰܕ ܐܰܠܳܗܳܐ.

ܐܰܒܳܐ ܐܰܚܺܝܕ ܟܽܠ ܥܳܒܽܘܕܳܐ ܕܰܫܡܰܝܳܐ ܘܕܰܪܥܳܐ. ܘܰܕܟܽܠܗܶܝܢ ܐܰܝܠܶܝܢ ܕܡܶܬܚܰܙܝ̈ܳܢ ܘܰܕܠܳܐ ܡܶܬܚܰܙܝ̈ܳܢ. ܘܰܒܚܰܕ ܡܳܪܝܳܐ ܝܶܫܽܘܥ ܡܫܺܝܚܳܐ ܝܺܚܺܝܕܳܝܳܐ ܒܪܳܐ ܕܰܐܠܳܗܳܐ. ܗܰܘ ܕܡܶܢ ܐܰܒܳܐ ܐܶܬ̣ܝܺܠܶܕ ܩܕܳܡ ܟܽܠܗܽܘܢ ܥܳܠ̈ܡܶܐ ܢܽܘܗܪܳܐ ܕܡܶܢ ܢܽܘܗܪܳܐ. ܐܰܠܳܗܳܐ ܫܰܪܺܝܪܳܐ ܕܡܶܢ ܐܰܠܳܗܳܐ ܫܰܪܺܝܪܳܐ. ܝܺܠܺܝܕܳܐ ܘܠܳܐ ܥܒܺܝܕܳܐ. ܘܰܫܘܶܐ ܒܽܐܘܣܺܝܰܐ ܠܰܐܒܽܘܗ̱ܝ. ܕܒܺܐܝܕܶܗ ܗܘܳܐ ܟܽܠ. ܗܰܘ ܕܡܶܛܽܠܳܬ̣ܰܢ ܒܢܰܝ̈ܢܳܫܳܐ ܘܡܶܛܽܠ ܦܽܘܪܩܳܢܰܢ.

ܢܚܶܬ̣ ܡܶܢ ܫܡܰܝܳܐ ܘܶܐܬ̣ܓܰܫܰܡ ܡܶܢ ܪܽܘܚܳܐ ܩܰܕܺܝܫܳܐ ܘܡܶܢ ܡܰܪܝܰܡ ܒܬ̣ܽܘܠܬܳܐ ܝܳܠܕܰܬ̣ ܐܰܠܳܗܳܐ ܘܰܗܘܳܐ ܒܰܪܢܳܫܳܐ. ܘܶܐܨܛܠܶܒ ܚܠܳܦܰܝܢ ܒܝܰܘܡܰܝ̈ ܦܶܢܛܺܝܘܳܣ ܦܺܝܠܰܛܳܘܣ. ܚܰܫ ܘܡܺܝܬ̣ ܘܶܐܬ̣ܩܒܰܪ ܘܩܳܡ ܠܰܬܠܳܬ̣ܳܐ ܝܰܘܡܺܝ̈ܢ ܐܰܝܟ ܕܰܨܒܳܐ.

ܘܰܣܠܶܩ ܠܰܫܡܰܝܳܐ ܘܝܺܬ̣ܶܒ ܡܶܢ ܝܰܡܺܝܢܳܐ ܕܰܐܒܽܘܗ̱ܝ. ܘܬܽܘܒ ܐܳܬ̣ܶܐ ܒܫܽܘܒܚܳܐ ܪܰܒܳܐ ܠܰܡܕܳܢ ܠܚܰܝ̈ܶܐ ܘܰܠܡܺܝ̈ܬ̣ܶܐ. ܗܰܘ ܕܰܠܡܰܠܟܽܘܬ̣ܶܗ ܫܽܘܠܳܡܳܐ ܠܳܐ ܐܺܝܬ̣. ܘܰܒܚܰܕ ܪܽܘܚܳܐ ܩܰܕܺܝܫܳܐ ܕܺܐܝܬ̣ܰܘܗܝ̱ ܡܳܪܝܳܐ ܡܰܚܝܳܢܳܐ ܕܟܽܠ.

ܗܰܘ ܕܡܶܢ ܐܰܒܳܐ ܢܳܦܶܩ ܘܥܰܡ ܐܰܒܳܐ ܘܥܰܡ ܒܪܳܐ ܡܶܣܬܓ̣ܶܕ ܘܡܶܫܬܰܒܰܚ. ܗܰܘ ܕܡܰܠܶـܠ ܒܰܢܒܺܝ̈ܶܐ ܘܒܰܫܠܺܝ̈ܚܶܐ. ܘܒܰܚܕܳܐ ܥܺܕܬܳܐ ܩܰܕܺܝܫܬܳܐ ܩܰܬܽܘܠܺܝܩܺܝ ܘܰܫܠܺܝ̣ܚܳܝ̣ܬܳܐ. ܘܡܰܘܕܶܢܰܢ ܕܰܚܕܳܐ ܗܺܝ ܡܰܥܡܽܘܕܺܝܬ̣ܳܐ ܠܫܽܘܒܩܳܢܳܐ ܕܰܚܛܳܗ̈ܶܐ. ܘܰܡܣܰܟܶܝܢܰܢ ܠܰܩܝܳܡܬܳܐ ܕܡܺܝ̈ܬ̣ܶܐ ܘܰܠܚܰܝ̈ܶܐ ܚܰܕ̈ܬ̣ܶܐ ܕܰܒܥܳܠܡܳܐ ܕܰܥܬܺܝܕ. ܐܰܡܺܝܢ ܒܰܪܶܟ̣ܡܳܪܝ܀

ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ
ܩܘܩܠܝܘܢ

ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ̣ ܗ̄ܘܗ̄ ܘܡܰܠܟܬ̣ܳܐ ܡܶܢ ܝܰܡܺܝܢܳܟ܀

ܘܰܛܥܳܝ ܥܰܡܶܟ̣ܝ̱ ܘܒܶܝܬ̣ ܐܰܒܽܘܟܝ̱ ܗ̄ܘܗ̄ ܕܢܶܬܪܰܓ̣ܪܰܓ̣ ܡܰܠܟܳܐ ܠܫܽܘܦܪܶܟ̣ܝ̱܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܩܰܪܶܒܝ̱ ܒܳܥܽܘܬ̣ܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟ̣ܝ̱܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܽܘܟܪܳܢܳܗ̇ ܕܡܰܪܝܰܡ܇ ܢܶܗܘܶܐ ܠܒܽܘܪ̈ܟܳܬ̣ܰܢ܇ ܘܰܨܠܽܘܬ̣ܳܗ̇ ܬܶܗܘܶܐ܇ ܫܽܘܪܳܐ ܠܢܰܦ̈ܫܳܬ̣ܰܢ܀

ܫܽܘܒܚܳܐ: ܪܺܝܚܳܐ ܒܰܣܺܝܡܳܐ܇ ܗܳܐ ܦܳܐܰܚ ܒܳܐܐܰܪ܇ ܠܰܒܬ̣ܽܘܠܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܒܰܨܠܺܝܒܳܟ ܡܳܪܰܢ ܝܶܫܽܘܥ܇ ܘܒܰܨܠܽܘܬ̣ ܡܰܪܝܰܡ ܕܺܝܠܶܕܬܳܟ܇ ܐܰܥܒܰܪ ܐܳܦ ܒܰܛܶܠ ܡܶܢܰܢ܇ ܠܡܰܚܘ̈ܳܬ̣ܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ̱ ܒܪܰܬܝ̱ ܘܰܚܙܳܝ ܘܰܨܠܳܝ ܐܶܕܢܶܟܝ̱܀

ܡܶܛܽܠ ܕܗܽܘܝܽܘ ܡܳܪܶܟܝ̱ ܣܓܽܘܕܝ̱ ܠܶܗ ܗ̄ܘܗ̄ ܘܒܰܪܬ ܨܽܘܪ ܬܶܣܓܘܽܕܝ ܠܶܗ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ̱ ܠܺܝܚܺܝܕܶܟܝ̱ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܕܝܳܠܕܰܬ ܐܰܠܳܗܳܐ

ܗܰܘ ܪܺܝܫ ܡܰܠܰܐܟ̣̈ܶܐ܇ ܫܠܳܡܳܐ ܐܰܝܬܺܝ ܠܒܰܪ̱ܬ̣ ܕܰܘܺܝܕ܇ ܣܰܒܪܳܗ̇ ܘܶܐܡܰܪ ܠܳܗ̇܇ ܕܡܳܪܝ̱ ܥܰܡܶܟ̣ܝ̱ ܘܡܶܢܶܟ̣ܝ̱ ܕܳܢܰܚ܀

ܫܽܘܒܚܳܐ: ܐܶܠܦܳܐ ܗܘܳܬ̣ ܡܰܪܝܰܡ܇ ܛܶܥܢܰܬ̣ ܙܰܝܚܰܬ ܝܰܩܰܪܬܶܗ܇ ܠܗܰܘ ܩܽܘܒܰܪܢܺܝܛܺܝ܇ ܡܳܪܳܐ ܕܟܽܠܗܶܝܢ ܒܶܪ̈ܝܳܬ̣ܳܐ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܡܰܢܽܘ ܒܰܪ ܡܰܢܽܘ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܇ ܐܺܝܬܰܘܗ̱ܝ ܐܰܠܳܗܳܐ ܡܶܢ ܐܰܠܳܗܳܐ ܫܰܪܺܝܪܳܐ܇ ܠܥܶܠ ܐܰܠܳܗܳܐ ܠܬܰܚܬ ܒܰܪܢܳܫܳܐ܇ ܚܪܶܡ ܗ̱ܘ ܐܰܝܢܳܐ ܕܒܳܨܶܐ ܠܶܗ܀

ܬܶܫܡܶܫܬܳܐ ܕܩܰܕܺܝ̈ܫܶܐ
ܩܘܩܠܝܘܢ

ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ܘܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܰܫܘܰܚ܀

ܢܰܦܪܥܽܘܢ ܬܽܘܒ ܢܶܬ̣ܪܰܒܽܘܢ ܒܣܰܝܒܽܘܬ̣ܳܐ ܗ̄ܘܗ̄ ܫܰܡܺܝ̣̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܛܽܘܒܳܐ ܠܰܢܒܺܝ̈ܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀

ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ ܒܫܽܘܠܳܡܳܐ

ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀

ܘܰܢܚܰܘܽܘܢ ܕܰܬܪܺܝܨ ܗܘ ܡܳܪܝܳܐ ܗ̄ ܥܰܫܺܝܢ ܗܘ ܘܠܰܝܬ ܒܶܗ ܥܰܘܠܳܐ܀

ܒܰܪܶܟܡܳܪܝ:
ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ ܐܳܘ ܡܳܪܝ̱ ܦܠܢ܇ ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪ ܕܽܘܟ̣ܪܳܢܳܟ܇ ܢܶܬ̣ܥܰܕܪܽܘܢ ܒܰܨܠܰܘ̈ܳܬ̣ܳܟ܀

ܣܛܰܘܡܶܢܩܰܐܠܳܘܣ ܩܽܘܪܶܝܐܠܰܝܣܳܘܢ

ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀

ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠܟܺܐܢ̈ܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀

ܫܠܳܡ ܠܶܟܝ

ܫܠܳܡ ܠܶܟ̣ܝ ܒܬ̣ܽܘܠܬܳܐ ܡܰܪܝܰܡ ܡܰܠܝܰܬ̣ ܛܰܝܒܽܘܬ̣ܳܐ. ܡܳܪܰܢ ܥܰܡܶܟܝ. ܡܒܰܪܰܟ̣ܬܳܐ ܐܰܢ̱ܬܝ ܒܢܶܫ̈ܶܐ. ܘܰܡܒܰܪܰܟ ܗ̱ܽܘ ܦܺܐܪܳܐ ܕܰܒܟܰܪܣܶܟ̣ܝ̱. ܡܳܪܰܢ ܝܶܫܽܘܥ. ܐܳܘ ܩܰܕܺܝܫܬܳܐ ܡܰܪܝܰܡ ܝܳܠܕܰܬ̣ ܐܰܠܳܗܳܐ. ܨܰܠܳܝ ܚܠܳܦܰܝܢ ܚܰܛܳܝ̈ܶܐ. ܗܳܫܳܐ ܘܰܒܫܳܥܰܬ ܘܡܰܘܬܰܢ ܐܰܡܺܝܢ܀