ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܕܠܰܙܟܰܪܝܳܐ ܟܳܗܢܳܐ ܒܒܶܝܬ ܩܽܘܕܫܳܐ܆ ܒܝܰܕ ܓܰܒܪܺܐܶܝܠ ܣܰܒܰܪ ܥܰܠ ܒܰܛܢܶܗ܆ ܪܰܚܶܡ ܥܠܰܝܢ ܐܰܠܳܗܳܐ܀

ܫܡܰܥ ܗ̱ܘܳܐ ܙܟܰܪܝܳܐ ܠܡܶܠܬܶܗ ܕܡܰܠܰܐܟܳܐ܆ ܘܰܒܦܽܘܠܳܓܳܐ ܠܳܐ ܨܒܳܐ ܕܰܢܗܰܝܡܶܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܥܰܠ ܒܰܛܢܳܐ ܕܰܒܬܽܘܠܬܳܐ ܫܰܘܕܰܥ܆ ܒܝܰܕ ܣܽܘܒܳܪܳܗ̇ ܘܒܰܛܢܳܗ̇ ܕܰܥܩܰܪܬܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܳܡܰܪ ܥܺܝܪܳܐ ܕܝܽܘܚܰܢܳܢ ܢܶܬܩܪܶܐ܆ ܘܰܢܒܺܝܶܗ ܬܽܘܒ ܕܰܡܪܰܝܡܳܐ ܢܶܗܘܶܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܶܡܰܪ ܟܳܗܢܳܐ ܠܡܰܠܰܐܟܳܐ ܕܣܰܒܪܶܗ܆ ܕܰܐܝܟܰܢ ܐܰܫܰܪ ܗܳܕܶܐ ܕܳܐܡܰܪ ܐܰܢ̱ܬ܆ ܪܰܚܶܡ ܥܠܰܝܢ ܐܰܠܳܗܳܐ܀

ܒܪܺܝܟܽ ܗ̱ܘ ܕܫܰܕܰܪ ܥܺܝܪܳܐ ܨܶܝܕ ܟܳܗܢܳܐ܆ ܡܶܛܽܠ ܒܰܛܢܳܐ ܪܓܺܝܓܺܐ ܕܝܽܘܚܰܢܳܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܳܐܦ ܥܺܝܪܳܐ ܣܰܒܰܪ ܠܰܙܟܰܪܝܳܐ܆ ܡܶܛܽܠ ܒܰܛܢܳܐ ܪܓܺܝܓܺܐ ܕܝܽܘܚܰܢܳܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗ̱ܕܳܢܳܐ

ܗܰܘ ܕܠܰܙܟܰܪܝܳܐ܆ ܟܳܗܢܳܐ ܒܒܶܝܬ ܩܽܘܕܫܳܐ܆ ܫܰܕܰܪ ܥܺܝܪܳܐ ܕܰܢܣܰܒܪܶܗ: ܡܶܛܽܠ ܒܰܛܢܶܗ ܕܝܽܘܚܰܢܳܢ: ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܝܰܗ̱ܒ ܦܺܐܪܳܐ: ܦܰܐܝܳܐ ܘܫܰܦܺܝܪܳܐ: ܠܶܐܠܺܝܫܒܰܥ ܣܳܒܬܳܐ ܥܩܰܪܬܳܐ: ܕܢܶܗܘܶܐ ܟܳܪܽܘܙܳܐ ܕܚܰܝ̈ܶܐ: ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܥܰܠ ܕܠܳܐ ܗܰܝܡܶܢ܆ ܗ̱ܘܳܐ ܠܡܶܠܰܬ ܥܺܝܪܳܐ. ܙܟܰܪܝܳܐ ܟܳܗܢܳܐ ܒܒܶܝܬ ܩܽܘܕܫܳܐ: ܒܫܶܬܩܳܐ ܦܰܟܪܶܗ ܠܠܶܫܳܢܶܗ: ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܳܐ ܕܰܫܪܳܐ ܒܡܰܪܒܥܳܐ

ܗܰܘ ܕܠܰܙܟܰܪܝܳܐ ܒܒܶܝܬ ܩܽܘܕܫܳܐ܆ ܣܰܒܰܪ ܡܶܛܽܠ ܝܽܘܚܰܢܳܢ܆ ܕܡܶܢ ܐܶܠܺܝܫܒܰܥ ܡܶܬܺܝܠܶܕ܆ ܘܚܰܫܳܐ ܕܥܰܩܪܽܘܬܳܐ ܡܶܫܬܪܶܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܙܟܰܪܝܳܐ ܟܳܗܢܳܐ ܒܒܶܝܬ ܩܽܘܕܫܳܐ܆ ܡܛܳܝܗ̱ܝ ܦܶܣܳܐ ܕܰܢܣܺܝܡ ܒܶܣ̈ܡܶܐ܆ ܘܶܐܬܳܐ ܠܘܳܬܶܗ ܡܰܠܰܐܟܳܐ܆ ܕܰܢܣܰܒܪܶܗ ܬܶܗܪܳܐ ܪܰܒܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܟܳܗܢܳܐ ܬܗܰܪ ܗ̱ܘܳܐ ܘܶܐܬܕܰܡܰܪ܆ ܘܰܠܦܽܘܠܳܓܳܐ ܝܰܗ̱ܒ ܢܰܦܫܶܗ܆ ܘܥܺܝܪܳܐ ܒܫܶܬܩܳܐ ܦܽܘܡܶܗ ܦܟܰܪ܆ ܥܕܰܡܳܐ ܕܝܽܘܚܰܢܳܢ ܠܶܗ ܫܪܳܐ܆ ܡܒܰܪܰܟ ܐܰܢ̱ܬ ܡܳܪܝܳܐ ܐܰܠܳܗܳܐ܀

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ܆ ܡܳܪܶܐ ܟܽܠ ܥܰܠ ܥܽܘܕܪ̈ܳܢܰܝܟ܆ ܕܰܠܙܰܕܺܝ̈ܩܶܐ ܐܶܬܚܰܘܺܝܬ܆ ܒܟܽܠ ܡܢܰܘ̈ܳܢ ܘܰܒܟܽܠ ܕܶܡ̈ܘܳܢ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܫܡܰܝ̈ܳܢܶܐ ܫܽܘܒܚܳܐ ܙܳܡܪܺܝܢ

ܠܰܙܟܰܪܝܳܐ ܥܺܝܪܳܐ ܣܰܒܪܶܗ܆ ܕܰܥܩܰܪܬܳܐ ܒܝܰܠܕܶܗ ܬܰܦܨܚܺܝ݂ܘܗ̱ܝ܆ ܕܢܰܬܩܶܢ ܐܽܘܪܚܳܐ ܩܕܳܡ ܡܳܪܶܗ܆ ܗܰܘ ܕܶܐܬܳܐ ܕܢܶܦܪܽܘܩ ܥܳܠ̈ܡܶܐ܀

ܫܡܰܥ ܗ̱ܘܳܐ ܙܟܰܪܝܳܐ ܘܶܐܬܦܰܠܰܓ܆ ܘܠܶܫܳܢܶܗ ܒܫܶܬܩܳܐ ܐܶܬܦܟܰܪ܆ ܘܠܳܐ ܟܰܗܶܢ ܘܳܐܦܠܳܐ ܡܰܠܶܠ܆ ܥܕܰܡܳܐ ܕܝܽܘܚܰܢܳܢ ܐܶܬܚܙܺܝ܀

ܦܺܐܪܳܐ ܚܰܠܝܳܐ ܝܶܗܒܰܬ ܠܰܢ܆ ܥܩܰܪܬܳܐ ܕܝܶܠܕܰܬ ܝܽܘܚܰܢܳܢ܆ ܗܳܐ ܚܳܕܝܳܐ ܥܺܕܰܬ ܩܽܘܕܫܳܐ܆ ܘܙܳܡܪܳܐ ܫܽܘܒܚܳܐ ܒܣܽܘܒܳܪܶܗ܀

ܗܰܘ ܕܝܰܗ̱ܒ ܗ̱ܘܳܐ ܦܺܐܪܳܐ ܦܰܐܝܳܐ܆ ܠܶܐܠܺܝܫܒܰܥ ܣܳܒܬܳܐ ܥܩܰܪܬܳܐ܆ ܕܢܶܗܘܶܐ ܟܳܪܽܘܙܳܐ ܕܚܰܝ݂̈ܶܐ܆ ܘܢܰܦܢܶܐ ܠܥܰܡ̱̈ܡܶܐ ܡܶܢ ܛܽܘܥܝܰܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ

ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ: ܠܘܳܬ ܙܟܰܪܝܳܐ ܟܳܗܢܳܐ ܘܣܰܒܪܶܗ ܘܶܐܡܰܪ ܠܶܗ: ܬܺܐܠܰܕ ܐܰܢ̱ܬܬܳܟ ܝܰܠܽܘܕܳܐ: ܘܬܶܩܪܶܐ ܠܰܫܡܶܗ ܝܽܘܚܰܢܳܢ: ܘܢܶܗܘܶܐ ܡܰܟܪܶܙ ܩܕܳܡ ܡܳܪܶܗ: ܕܳܐܬܶܐ ܕܢܶܦܪܽܘܩ ܠܥܳܠܡܳܐ܀

ܡܶܢ ܬܶܗܪܳܐ ܕܡܰܠܶܠ ܥܺܝܪܳܐ܆ ܐܶܬܦܰܠܰܓ ܟܳܗܢܳܐ ܘܠܳܐ ܨܒܳܐ ܕܰܢܗܰܝܡܶܢ: ܦܰܢܺܝ ܦܶܬܓܳܡܳܐ ܘܶܐܡܰܪ. ܐܰܝܟܰܢܳܐ ܐܶܕܰܥ ܗܳܕܶܐ: ܕܗܳܐ ܐܶܢܳܐ ܐܺܝܬܰܝ ܣܳܒܳܐ: ܘܰܐܢ̱ܬܰܬܝ ܩܰܫܺܝܫܰܬ ܝܰܘ̈ܡܶܐ܀

ܐܶܣܰܪ ܥܺܝܪܳܐ ܠܠܶܫܳܢܶܗ܆ ܕܰܙܟܰܪܝܳܐ ܟܳܗܢܳܐ ܘܬܰܟܣܶܗ ܘܶܐܡ̣ܰܪ ܠܶܗ: ܬܶܗܘܶܐ ܫܰܬܺܝܩ ܘܠܳܐ ܬܡܰܠܶܠ: ܥܕܰܡܳܐ ܠܝܰܘܡܳܐ ܕܡܶܬܺܝܠܶܕ: ܗܰܘ ܕܡܰܟܪܶܙ ܚܰܝ̈ܶܐ ܚܰܕ̈ܬܶܐ܆ ܘܡܰܠܟܽܘܬܳܐ ܠܟܽܠܶܗ ܥܳܠܡܳܐ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܝܰܘܡܳܢܳܐ

ܓܰܒܪܺܐܶܝܠ܆ ܣܰܒܪܶܗ ܗ̱ܘܳܐ ܠܰܙܟܰܪܝܳܐ ܠܓܰܘ ܒܰܩܕܽܘܫ ܩܽܘ̈ܕܫܺܝܢ܆ ܕܢܶܗܘܶܐ ܠܳܟ ܒܪܳܐ ܒܚܰܪܰܬ ܝܰܘܡܰܝ̈ܟ ܫܡܶܗ ܝܽܘܚܰܢܳܢ܆ ܘܢܶܗܘܶܐ ܡܰܟܪܶܙ ܩܕܳܡ ܡܳܪܶܗ܆ ܐܽܘܪܚܳܐ ܠܬܰܝ̈ܳܒܶܐ܀

ܙܟܰܪܝܳܐ ܟܳܗܢܳܐ܆ ܐܶܫܬܪܺܝ ܐܶܣܳܪ ܠܶܫܳܢܶܗ ܒܝܰܠܕܶܗ ܕܝܽܘܚܰܢܳܢ܆ ܘܰܚܕܺܝ ܣܳܒܳܐ ܘܰܐܘܕܺܝ ܘܫܰܒܰܚ ܟܰܕ ܐܳܡܰܪ ܗ̱ܘܳܐ܆ ܕܗܳܢܳܐ ܛܰܠܝܳܐ ܐܺܝܙܓܰܕܳܐ܆ ܐܺܝܬܰܘܗ̱ܝ ܕܥܶܠܳܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܳܠܳܐ ܕܫܽܘܒܚܳܐ

ܢܚܶܬ ܓܰܒܪܺܐܶܝܠ: ܪܺܝܫ ܡܰܠܰܐܟ̈ܶܐ ܕܰܢܣܰܒܰܪ ܗ̱ܘܳܐ܆ ܠܰܙܟܰܪܝܳܐ ܥܰܠ ܝܽܘܚܰܢܳܢ. ܘܥܰܠ ܕܠܳܐ ܗܰܝܡܶܢ܆ ܘܶܐܬܦܰܠܰܓ ܗ̱ܘܳܐ ܥܰܠ ܢܽܘܪܳܢܳܐ: ܒܫܶܬܩܳܐ ܦܰܟ̰ܪܶܗ ܕܠܳܐ ܢܡܰܠܶܠ܀

ܙܟܰܪܝܳܐ ܟܳܗܢܳܐ: ܥܰܠ ܕܶܐܬܦܰܠܰܓ ܡܶܛܽܠ ܥܺܝܪܳܐ܆ ܘܠܳܐ ܐܰܫܪܶܗ ܗ̱ܘܳܐ ܠܡܰܠܰܐܟܳܐ: ܒܫܶܬܩܳܐ ܦܰܟ̰ܪܶܗ ܟܰܕ ܐܳܡܰܪ ܠܶܗ܆ ܕܬܶܗܘܶܐ ܫܰܬܺܝܩ: ܥܕܰܡܳܐ ܕܗܽܘ ܦܺܐܪܳܐ ܢܶܕܢܰܚ܀

ܠܗܳܝ ܣܰܝܒܽܘܬܳܐ: ܐܳܦ ܥܰܩܪܽܘܬܳܐ ܕܠܳܐ ܐܰܦܪܝܰܬ܆ ܢܽܘܓܪܳܐ ܪܰܒܳܐ ܕܰܫ̈ܢܰܝܳܐ. ܡܛܳܐ ܠܶܗ ܫܪܳܝܳܐ ܕܬܶܒܛܰܢ ܘܬܺܐܠܰܕ ܐܺܝܙܓܰܕ ܫܰܝܢܳܐ: ܘܩܳܠܳܐ ܕܰܩܕܳܡ ܦܳܪܽܘܩܳܐ܀

ܥܺܝܪܳܐ ܕܢܽܘܪܳܐ: ܠܟܳܗܢܳܐ ܙܟܰܪܝܳܐ ܒܰܩܕܽܘܫ ܩܽܘܕܫܺܝ̈ܢ܆ ܡܣܰܒܰܪ ܗ̱ܘܳܐ ܠܶܗ ܟܰܕ ܐܳܡܰܪ: ܙܟܰܪܝܳܐ ܨܠܽܘܬܳܟ܆ ܐܶܫܬܰܡܥܰܬ ܠܳܗ̇܆ ܩܕܳܡ ܐܰܠܳܗܳܐ: ܘܶܐܠܺܝܫܒܰܥ ܝܳܠܕܳܐ ܠܳܟ ܒܪܳܐ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܥܰܡ ܟܶܢ̈ܫܶܐ ܫܡܰܝܳܢ̈ܶܐ

ܢܚܶܬ ܥܺܝܪܳܐ ܡ̣ܶܢ ܪܰܘܡܳܐ ܘܰܐܝܬܺܝ ܣܒܰܪܬܳܐ ܠܰܙܟܰܪܝܳܐ ܟܳܗܢܳܐ: ܘܶܐܡܰܪ ܠܶܗ ܕܡܶܬܺܝܠܶܕ ܠܳܟ ܟܳܪܽܘܙܳܐ܆ ܡܶܢ ܥܽܘܒܳܐ ܥܰܩܪܳܐ ܕܶܐܠܺܝܫܒܰܥ: ܥܰܡ̱̈ܡܶܐ ܫܰܒܚܽܘܗܝ ܘܪܰܡܪܡܽܘܗܝ ܠܥܳܠܰܡ ܥܳܠܡܺܝܢ܀

ܥܶܠܰܬ ܐܳܦ ܐܶܫܬܰܡܥܰܬ ܨܠܽܘܬܳܟ ܙܟܰܪܝܳܐ ܩܕܳܡ ܡܳܪܝܳܐ ܡܳܪܳܟ: ܘܶܐܠܺܝܫܒܰܥ ܐܰܢ̱ܬܬܳܟ ܬܺܐܠܰܕ ܠܳܟ ܒܪܳܐ܆ ܘܬܶܩܪܶܐ ܠܰܫܡܶܗ ܝܽܘܚܰܢܳܢ: ܥܰܡ̱̈ܡܶܐ ܫܰܒܚܽܘܗܝ ܘܪܰܡܪܡܽܘܗܝ ܠܥܳܠܰܡ ܥܳܠܡܺܝܢ܀

ܐܶܫܰܥܝܳܐ ܩܥܳܐ ܘܒܰܕܶܩ ܥܰܠ ܟܳܪܽܘܙܳܐ ܒܪܽܘܚܳܐ ܩܰܕܺܝܫܳܐ: ܕܗܳܢ ܐܺܝܬܰܘܗ̱ܝ ܩܳܠܳܐ ܕܩܳܪܶܐ ܒܚܽܘܪܒܳܐ܆ ܛܰܝܶܒܘ ܐܽܘܪܚܳܐ ܠܡܳܪܝܳܐ ܕܳܐܬܶܐ: ܥܰܡ̱̈ܡܶܐ ܫܰܒܚܽܘܗܝ ܘܪܰܡܪܡܽܘܗܝ ܠܥܳܠܰܡ ܥܳܠܡܺܝܢ܀

ܫܽܘܒܚܳܐ ܠܺܐܝܬܝܳܐ ܓܢܺܝܙܳܐ ܕܰܫܒܺܝܚ ܘܰܟܣܶܐ܆ ܡܶܢ ܟܽܠ ܒܺܐܝܬܽܘܬܶܗ: ܘܡܶܬܬܰܘܕܶܐ ܒܰܐܒܳܐ ܘܰܒܪܳܐ ܘܪܽܘܚ ܩܽܘܕܫܳܐ: ܬܠܺܝܬܳܝܽܘܬܳܐ ܚܕܳܐ ܐܺܝܬܽܘܬܳܐ: ܥܰܡ̱̈ܡܶܐ ܫܰܒܚܽܘܗܝ ܘܪܰܡܪܡܽܘܗܝ ܠܥܳܠܰܡ ܥܳܠܡܺܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܢܰܝ̈ ܢܽܘܗܪܳܐ

ܙܟܰܪܝܳܐ ܟܳܗܢܳܐ܆ ܒܒܶܝܬ ܩܽܘܕܫܳܐ ܒܥܰܕܥܺܐܕܳܐ ܗܰܘ ܕܰܡ̈ܛܰܠܠܶܐ܆ ܡܛܳܝܗ̱ܝ ܦܶܣܳܐ ܕܰܢܣܺܝܡ܆ ܒܶܣ̈ܡܶܐ ܩܕܳܡ ܡܳܪܶܗ܀

ܐܶܡܰܪ ܥܺܝܪܳܐ܆ ܠܰܙܟܰܪܝܳܐ ܡܶܟܺܝܠ ܬܶܗܘܶܐ ܫܠܶܐ ܘܫܰܬܺܝܩ܆ ܥܰܕ ܢܶܬܺܝܠܶܕ܆ ܐܺܝܙܓܰܕܳܐ ܠܡܶܠܬܳܐ܀

ܠܗܰܝܟܰܠ ܩܽܘܕܫܳܐ܆ ܣܠܶܩ ܙܟܰܪܝܳܐ ܘܡܰܠܰܐܟܳܐ ܬܰܡܳܢ ܣܰܒܪܶܗ܆ ܡܶܛܽܠ ܒܰܛܢܳܗ̇܆ ܕܶܐܠܺܝܫܒܰܥ ܥܩܰܪܬܳܐ܀

ܐܶܫܬܠܰܚ ܪܺܝܫ܆ ܡܰܠܰܐܟ̈ܶܐ ܘܡܰܠܶܠ ܥܰܡܶܗ ܥܰܠ ܒܰܛܢܶܗ܆ ܕܟܳܪܽܘܙ ܩܽܘܫܬܳܐ܆ ܝܽܘܚܰܢܳܢ ܓܰܒܝܳܐ܀

ܡܫܺܝܚܳܐ ܕܰܫܪܳܐ܆ ܠܦܽܘܠܳܓܳܐ ܘܠܰܙܟܰܪܝܳܐ ܒܝܰܕ ܟܳܪܽܘܙܶܗ܆ ܫܪܺܝ ܡܶܢ ܥܺܕܬܳܟ܆ ܠܪ̈ܽܘܫܥܶܐ ܕܗܶܪ̈ܶܣܺܝܣ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܫܰܦܺܝܪ ܗ̱ܘܳܐ ܫܠܳܡܳܐ܆ ܕܝܰܗ̱ܒ ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܠܰܙܟܰܪܝܳܐ ܒܗܰܝܟܰܠ ܩܽܘܕܫܳܐ ܟܰܕ ܐܳܡܰܪ ܠܶܗ܆ ܕܡܶܬܺܝܠܶܕ ܠܳܟ܆ ܦܺܐܪܳܐ ܪܓܺܝܓܳܐ ܝܽܘܚܰܢܳܢ܀

ܡܳܐ ܦܰܐܝܳܐ ܗ̱ܘܳܬ ܫܳܥܬܳܐ܆ ܕܰܢܚܶܬ ܥܺܝܪܳܐ ܠܗܰܝܟܰܠ ܩܽܘܕܫܳܐ܆ ܘܣܰܒܪܶܗ ܠܰܙܟܰܪܝܳܐ ܟܳܗܢܳܐ ܥܰܠ ܝܽܘܚܰܢܳܢ܆ ܕܡܶܢܳܟ ܕܳܢܰܚ܆ ܟܳܪܽܘܙܳܐ ܩܕܳܡ ܒܰܪ ܡܰܠܟܳܐ܀

ܡܳܐ ܫܰܦܺܝܪ ܗ̱ܘܳܐ ܠܥܺܝܪܳܐ܆ ܕܰܡܣܰܒܰܪ ܠܶܗ ܠܟܳܗܢܳܐ ܙܟܰܪܝܳܐ܆ ܕܡܶܬܺܝܠܶܕ ܠܳܟ ܝܽܘܚܰܢܳܢ ܡܶܢ ܐܶܠܺܝܫܒܰܥ܆ ܕܢܶܗܘܶܐ ܡܰܟܪܶܙ܆ ܠܬܰܝ̈ܳܒܶܐ ܡܰܠܟܽܘܬ ܪܰܘܡܳܐ܀

ܫܡܰܥ ܗ̱ܘܳܐ ܙܟܰܪܝܳܐ ܠܥܺܝܪܳܐ܆ ܕܰܡܣܰܒܰܪ ܠܶܗ ܡܶܛܽܠ ܝܰܠܕܳܐ܆ ܘܶܐܬܦܰܠܰܓ ܗ̱ܘܳܐ ܪܶܥܝܳܢܶܗ ܘܠܳܐ ܐܰܫܪܶܗ ܗ̱ܘܳܐ܆ ܘܦܰܟܪܶܗ ܒܫܶܬܩܳܐ܆ ܥܕܰܡܳܐ ܕܩܳܠܳܐ ܐܶܬܺܝܠܶܕ܀

ܒܝܽܘܡ ܣܽܘܒܳܪܶܗ ܫܒܺܝ݂ܚܳܐ܆ ܘܰܪܓܺܝܓܳܐ ܕܟܳܪܽܘܙ ܩܽܘܫܬܳܐ܆ ܚܳܕܝܳܐ ܥܺܕܬܳܐ ܥܰܡ ܝܰܠ̈ܕܶܝܗ̇ ܘܙܳܡܪܺܝܢ ܫܽܘܒܚܳܐ܆ ܠܡܳܪܝܳܐ ܡܫܺܝܚܳܐ܆ ܕܡܰܟܪܳܗ̇ ܒܩܳܠܶܗ ܕܝܽܘܚܰܢܳܢ܀

ܫܽܘܒܚܳܐ

ܡܳܐ ܦܰܐܝܳܐ ܘܫܰܦܺܝܪܳܐ܆ ܗܳܝ ܒܰܪ̱ܬ ܩܳܠܳܐ ܕܪܺܝܫ ܡܰܠܰܐܟ̈ܶܐ܆ ܟܰܕ ܐܳܡܰܪ ܠܶܗ ܠܰܙܟܰܪܝܳܐ ܒܗܰܝܟܰܠ ܩܽܘܕܫܳܐ܆ ܕܬܺܐܠܰܕ ܐܰܢ̱ܬܬܳܟ܆ ܐܺܝܙܓܰܕܳܐ ܘܡܰܬܩܶܢ ܐܽܘܪܚܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܫܠܺܝ̈ܚܶܐ ܦܝܳܣܳܐ ܩܰܪܶܒܘ ܠܗܰܘ

ܢܚܶܬ ܥܺܝܪܳܐ ܠܒܶܝܬ ܩܽܘܕܫܳܐ ܘܣܰܒܪܶܗ ܠܟܳܗܢܳܐ܆ ܒܰܛܢܶܗ ܦܰܐܝܳܐ ܘܰܪܓܺܝܓܳܐ ܕܟܳܪܽܘܙܳܐ ܕܩܽܘܫܬܳܐ܆ ܘܰܕܠܳܐ ܗܰܝܡܶܢ ܗ̱ܘܳܐ ܟܳܗܢܳܐ ܕܣܳܒܬܳܐ ܬܺܐܠܰܕ܆ ܐܰܣܪܶܗ ܒܫܶܬܩܳܐ ܠܠܶܫܳܢܶܗ ܥܕܰܡܳܐ ܕܶܐܬܺܝܠܶܕ܆ ܫܽܘܒܚܳܐ ܠܶܗ ܠܚܰܬܢܳܐ ܫܡܰܝܳܢܳܐ܆ ܕܰܩܕܳܡܰܘܗ̱ܝ ܫܰܕܰܪ ܐܺܝܙܓܰܕܳܐ܆ ܘܰܡܟܰܪ ܠܶܗ ܥܺܕܰܬ ܩܽܘܕܫܳܐ ܘܗܳܐ ܙܳܡܪܳܐ ܫܽܘܒܚܳܐ܀

ܫܽܘܒܚܳܐ

ܚܰܕܽܘܬܳܐ ܗܘܳܬ ܝܰܘܡܳܢܳܐ ܠܒܰܪ̱ܬ ܠܶܘܳܝ̈ܶܐ܆ ܕܩܰܒܠܰܬ ܒܰܛܢܳܐ ܒܣܰܝܒܽܘܬܳܗ̇ ܒܦܽܘܩܕܳܢ ܒܳܪܽܘܝܳܐ܆ ܟܰܕ ܐܳܡܰܪ ܠܶܗ ܢܽܘܪܳܢܳܐ ܠܟܳܗܢܳܐ ܙܟܰܪܝܳܐ܆ ܕܡܶܬܺܝܠܶܕ ܠܳܟ ܟܳܪܽܘܙܳܐ ܕܡܰܟܪܶܙ ܩܕܳܡ ܡܳܪܶܗ܆ ܫܽܘܒܚܳܐ ܠܶܗ ܕܚܰܕܺܝ ܠܰܥܩܰܪܬܳܐ܆ ܫܽܘܒܚܳܐ ܠܶܗ ܕܣܰܒܪܶܗ ܠܰܙܟܰܪܝܳܐ܆ ܫܽܘܒܚܳܐ ܠܶܗ ܕܰܦܪܰܩ ܥܺܕܬܶܗ ܘܗܳܐ ܙܳܡܪܳܐ ܫܽܘܒܚܳܐ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ ܠܟܽܘܢ܆ ܕܗܳܐ ܡܰܛܺܝ ܠܶܗ ܢܽܘܚܳܡܳܐ ܘܝܰܘܡܶܗ ܕܦܽܘܪܥܳܢܳܐ. ܩܳܝܡܺܝܢ ܐܢܬܽܘܢ ܕܠܳܐ ܚܒܳܠܳܐ ܡ̣ܶܢ ܩܰܒܪ̈ܰܝܟܽܘܢ܆ ܘܢܳܦܩܺܝܢ ܐܢܬܽܘܢ ܒܰܪܗܺܝܒܽܘܬܳܐ ܠܽܐܘܪܥܶܗ ܕܒܰܪ ܡܰܠܟܳܐ. ܠܳܒܫܺܝܢ ܐܢܬܽܘܢ: ܐܶܣܛܰܠ ܬܶܫܒܽܘܚܬܳܐ. ܘܰܩܕܳܡܰܘܗ̱ܝ: ܫܽܘܒܚܳܐ ܙܳܡܪܺܝܢ ܐܢܬܽܘܢ. ܡܢܰܚܡܳܢܳܐ ܕܝܰܠܕ̈ܰܘܗ̱ܝ ܕܳܐܕܳܡ. ܚܽܘܣ ܘܶܐܬܪܰܚܰܡܥܠܰܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܆ ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܒܝܰܕ ܥܶܛܪܳܐ ܕܒܶܣ̈ܡܶܐ ܕܩܰܪܶܒ ܗ̱ܘܳܐ܆ ܙܟܰܪܝܳܐ ܟܳܗܢܳܐ ܒܒܶܝܬ ܩܽܘܕܫܳܐ܆ ܘܶܐܣܬܰܒܰܪ ܡܶܢ ܥܺܝܪܳܐ ܕܪܰܘܡܳܐ܆ ܥܰܠ ܝܰܠܕܶܗ ܕܦܺܐܪܳܐ ܪܓܺܝܓܳܐ܆ ܛܽܘܒܰܝܗܽܘܢ ܠܟܳܗ̈ܢܶܐ ܙܗܰܝ̈ܳܐ܆ ܕܰܚܠܳܦ ܕܣܰܒܪܶܗ ܠܰܙܟܰܪܝܳܐ܆ ܥܺܝܪܳܐ ܕܢܽܘܪܳܐ ܒܒܶܝܬ ܩܽܘܕܫܳܐ܆ ܡܳܪܳܐ ܕܥܺܝܪ̈ܶܐ ܒܺܐܝܕܰܝ̈ܗܽܘܢ܆ ܘܚܰܝ݂̈ܶܐ ܠܥܳܠܡܳܐ ܗܳܐ ܡܦܰܠܶܓ܀

ܫܽܘܒܚܳܐ

ܐܶܬܦܰܠܰܓ ܟܳܗܢܳܐ ܥܰܠ ܥܺܝܪܳܐ܆ ܒܝܰܕ ܣܒܰܪܬܳܐ ܕܰܐܝܬܺܝ ܗ̱ܘܳܐ ܠܶܗ܆ ܘܶܐܡܰܪ ܠܶܗ ܕܰܐܝܟܰܢܳܐ ܬܶܗܘܶܐ܆ ܗܳܕܶܐ ܕܶܐܡܰܪܬ ܢܽܘܪܳܢܳܐ܆ ܕܶܐܢܳܐ ܓܶܝܪ ܐܺܝܬܰܝ ܣܳܒܳܐ܆ ܘܰܐܢ̱ܬܰܬܝ ܣܰܓܺܝܰܐܬ ܝܰܘ̈ܡܶܝܗ̇܆ ܒܫܶܬܩܳܐ ܦܰܟܪܶܗ ܠܠܶܫܳܢܶܗ܆ ܘܶܐܡܰܪ ܠܶܗ ܬܶܗܘܶܐ ܫܰܬܺܝܩ܆ ܥܕܰܡܳܐ ܠܝܰܠܕܶܗ ܕܟܳܪܽܘܙܳܐ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܦܶܬܓܳܡܳܐ: ܗܳܝܕܶܝܢ ܡܡܰܠܶܠ ܒܚܶܙܘ̈ܳܢܶܐ ܥܰܡ ܙܰܕܺܝܩܰܘ̈ܗ̱ܝ: ܘܶܐܡܰܪ ܕܣܳܡܶܬ ܥ̱ܽܘܗܕܳܢܳܐ ܠܓܰܒܪܳܐ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ

ܨܠܽܘܬܳܟ ܥܰܡܰܢ ܟܳܗܢܳܐ ܙܟܰܪܝܳܐ ܨܠܽܘܬܳܟ ܥܰܡܰܢ܆

ܘܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܥܢܳܐ ܗ̱ܘܳܐ ܙܟܰܪܝܳܐ ܘܰܠܡܰܠܰܐܟܳܐ ܦܰܢܺܝ ܘܶܐܡܰܪ܆ ܕܰܐܢ̱ܬܰܬܝ ܥܩܰܪܬܳܐ ܗ̱ܝ ܘܰܕܚܺܝ݂ܠ ܫܰܪܒܳܟ ܐܳܘ ܢܽܘܪܳܢܳܐ܆ ܘܶܐܢܳܐ ܣܳܒܳܐ ܘܰܥܒܰܪ ܙܰܒܢܳܐ ܕܢܶܗܘܶܐ ܠܺܝ ܒܪܳܐ܆ ܘܥܰܛܠܳܐ ܗ̱ܝ ܗܳܕܶܐ ܕܰܐܫܰܪ ܫܰܪܒܳܟ ܐܰܝܟ ܕܳܐܡܰܪ ܐܰܢ̱ܬ܀

ܫܽܘܒܚܳܐ ܠܰܐܒܳܐ ܕܝܰܗ̱ܒ ܠܳܗ̇ ܦܺܐܪܳܐ ܠܣܳܒܬܳܐ ܥܩܰܪܬܳܐ܆ ܘܣܶܓܕܬܳܐ ܠܰܒܪܳܐ ܕܡܶܛܽܠܳܬܶܗ ܩܳܠܳܐ ܝܶܠܕܰܬ܆ ܬܰܘܕܺܝ ܠܪܽܘܚܳܐ ܕܕܰܟܝܶܗ ܘܩܰܕܫܶܗ ܒܟܰܪܣܳܐ ܕܶܐܡܶܗ܆ ܕܢܰܟܪܶܙ ܒܚܽܘܪܒܳܐ ܡܰܠܟܽܘܬ ܪܰܘܡܳܐ ܒܪܺܝܟܽ ܗ̱ܘ ܕܰܓܒܳܝܗ̱ܝ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀